« A pou to chanjé nèt, kontinyé chanjé mannyè to ka réfléchi »

1-2. Kisa nou divèt kontinyé fè apré nou batizé ?

KONMYEN fwa to ka nétwayé to kaz ? Lò to pran to kaz, pitèt to nétwayé tout koté byen pròp. Mé kisa ki té ké pasé si to pa té kontinyé nétwayé to kaz souvan ? Kou to savé, lapousyè ké malpròpté ka vini vit. Pou to kaz rété pròp, to divèt kontinyé nétwayé l’ souvan.

² Menm fason-an, a toulong pou nou korijé fason nou ka réfléchi, épi kontinyé travay pou nou divini roun pi bon moun. Anvan nou batizé, nou fè roun patché éfòr pou nou « lavé nou kò di tousa ki ka sali nou lachè ké nou lèspri » (2 Cor. 7:1). Mé aprézan, nou divèt swiv konsèy apot Pòl bay, nou divèt ‘kontinyé korijé mannyè nou gen labitid réfléchi-a’ (Éph. 4:23). Poukisa nou divèt kontinyé fè éfòr ? Paské « lapousyè » ouben « malpròpté » sa monn-an pouvé kouvri nou vitman. Pou sa pa rivé nou é pou nou toujou fè Jéova plézi, a souvan pou nou gadé kouman nou ka réfléchi, ki ka kalité moun nou sa é ki anvi nou gen annan nou tchò.

KONTINYÉ « CHANJÉ MANNYÈ TO KA RÉFLÉCHI »

3. Kisa nou divèt fè pou nou ‘kontinyé chanjé mannyè nou ka réfléchi’ ? (Romains 12:2).

³ Kisa nou divèt fè pou kontinyé chanjé mannyè nou ka réfléchi ? (li Romains 12:2). Mo grèk yé tradwi pou « kontinyé chanjé mannyè zòt ka réfléchi » pouvé lé di osi « rénové zòt lèspri ». Lò to ka rénové roun kaz ki pa bon, a pa déztrwa ti bagaj konsa to ka ranjé. Ranjé roun kaz ké dékoré roun kaz, a pa menm bagaj-a. Donk, pou nou « rénové » nou lèspri, a pa loutou di fè déztrwa bon bagaj kousidiré nou té ka « dékoré » nou lavi. Nou divèt wè ki kalité moun nou sa vréman, épi chanjé sa nou divèt chanjé annan nou lavi, pou i alé annan sans sa Jéova ka di ki bon é ki pa bon. É a pa roun kou konsa nou divèt fè sa, a tout tan pou nou fè l’.

4. Kisa nou divèt fè pou nou pa lésé monn-an détenn asou nou ?

⁴ Lò nou ké parfè, tousa nou ké fè, ké fè Jéova plézi. Mé anvan sa, nou divèt fè bokou éfòr pou nou fè li plézi. Annan Romains 12:2, Pòl ka mété dé lidé ansanm : kontinyé chanjé fason nou ka réfléchi é konprann a kisa ki volonté Bondjé. Donk, annou pa lésé sa monn-an détenn asou nou, épi nou pa ka fè anyen pou sa. Pasé nou fè sa, nou divèt gadé kisa ki ka gidé nou lò nou lé pran roun désizyon, ès a fason Bondjé ka réfléchi ouben fason monn-an ka réfléchi.

5. Pou nou savé si nou vréman ka wè ki jou Jéova-a pròch, ki késyon nou pouvé pozé nou kò ? (gadé zimaj-a).

⁵ Annou pran roun èkzanp. Jéova lé ki nou ‘toujou gardé so jou annan nou lèspri’ (2 Pierre 3:12). Alòr doumandé to kò : « Ès fason mo ka mennen mo lavi ka montré ki mo ka konprann ki sa monn-an ké fini titalò ? Ès désizyon mo ka pran annan zafè travay-a ké zafè fè gran lékòl ka montré ki pou mo, adoré Jéova, a sa ki pi enpòrtan annan mo lavi ? Ès mo sir ki Jéova ké toujou bay mo ké mo fanmi tousa nou bézwen pou viv, ouben ès mo toujou ka kasé mo tèt pou bagaj matéryèl ? » Sonjé kouman Jéova kontan lò i ka wè ki to ka rèspèkté so volonté annan to lavi (Mat. 6:25-27, 33 ; Phil. 4:12, 13).

6. Kisa nou divèt kontinyé fè ?

⁶ A souvan nou divèt byen gadé fason nou ka réfléchi épi apré chanjé sa nou divèt chanjé. Pòl bay Korentyen-yan sa konsèy-a : « A toulong pou zòt pran tan byen gadé si zòt annan lafwa ; vérifyé toulong ki kalité moun zòt sa » (2 Cor. 13:5). Pou nou rété « annan lafwa », a pa loutou di alé annan réinyon-yan ké préché tanzantan. Fason nou ka réfléchi, sa nou lé fè é sa ki ka pousé nou fè bagaj-ya enpòrtan osi. Donk, a pou nou li Paròl Bondjé-a pou nou kontinyé chanjé fason nou ka réfléchi — sa ké anprann nou réfléchi kou li menm ka réfléchi épi kontinyé fè tousa nou divèt fè pou fè li plézi (1 Cor. 2:14-16).

« ABIYÉ KÉ NOUVO PÈRSONALITÉ-A »

7. Dapré Éphésiens 4:31, 32, ki ròt bagaj nou divèt fè, é poukisa sa pouvé rèd ?

⁷ (Li Éphésiens 4:31, 32.) Anplis di chanjé fason nou ka réfléchi, nou divèt « abiyé ké nouvo pèrsonalité-a » (Éph. 4:24). Sa pa ka fèt konsa san nou pa fè pyès éfòr. Si nou gen tandans ka rayi moun, ka kòlè ouben ka vin anrajé, a pa lanmenm konsa nou ké chanjé. Afòrs sèrten défo kolé annan nou tchò dipi lontan, nou pa ka rivé jité yé konsa. Parèkzanp Labib-a ka di ki sèrten moun « toujou ka kòlè » épi « ka kòlè fasilman » (Prov. 29:22). Lò nou gen défo konsa ki rèd pou lésé, pitèt nou ké divèt kontinyé fè bokou éfòr menm apré nou batizé. A sa nou ka wè ké èkzanp nou ké wè aprézan.

8-9. Kouman èkzanp Stephen ka montré ki nou divèt fè roun patché éfòr pou nou fin ké vyé pèrsonalité-a ?

⁸ Roun frè yé ka aplé Stephen té gen problèm pou kontrolé so kò lò i té kòlè. Men sa i ka di : « Menm apré mo batizé, mo té divèt kontinyé travay asou mo pròp kò. Parèkzanp, roun jou mo té ka préché di kaz an kaz, mo kouri dèyè roun moun ki té fin vòlò mo radyo annan mo loto. Lò mo té près trapé li, i lésé radyo-a tonbé atè épi i chapé. Lò mo rakonté ròt-ya kouman mo té pran mo radyo, roun ansyen […] doumandé mo : “Stephen, kisa to té ké fè si to té trapé li ?” Sa késyon-an fè mo réfléchi é sa pousé mo kontinyé fè éfòr pou chaché lapèb. »

⁹ Kou èkzanp Stephen ka montré, roun défo pouvé viré rounsèl kou konsa alòr ki nou té krè ki nou té fin ké sa. Si sa ka rivé to, pa dékourajé é pa di annan to tchò ki to pa sa roun bon sèrvitèr Bondjé. Menm apot Pòl rékonnèt : « Lò mo lé fè sa ki jis, a sa ki mové i gen koté mo » (Rom. 7:21-23). Kou nou pyès pa parfè, nou tout gen pou briga ké défo ki ka viré konsa toulong, kousidiré a lapousyè ké malpròpté ki ka kontinyé kouvri nou kaz. Pou nou rété « pròp », nou divèt kontinyé fè roun patché éfòr. Kouman nou pouvé rivé fè sa ?

10. Kouman nou pouvé briga ké défo nou gen pou lésé ? (1 Jean 5:14, 15).

¹⁰ Priyè Jéova parapòrta défo to lé briga pou lésé toupannan to sir ki i ké kouté to é i ké idé to (li 1 Jean 5:14, 15). I pa ké fè roun mirak pou fè l’ pati, mé i ké bay to fòrs pou to pa moli (1 Pierre 5:10). Kanta to menm, fè bagaj ki ka alé annan sans to lapriyè pou to pa kontinyé swiv to vyé pèrsonalité. Parèkzanp, panga pou to pa gadé gadé fim, pou to pa gadé émisyon latélé, ouben ankò pou to pa li liv ouben istwè koté yé ka fè kousidiré défo to ka briga pou lésé, a roun bon bagaj. Épi pa mété to lèspri asou vyé anvi (Phil. 4:8 ; Col. 3:2).

11. Kouman to pouvé kontinyé abiyé ké nouvo pèrsonalité-a ?

¹¹ Menm si to jité vyé pèrsonalité-a, sa enpòrtan pou to travay asou nouvo pèrsonalité-a. Kouman to pouvé fè sa ? Lò to ka wè roun kalité Jéova gen, désidé fè kou li (Éph. 5:1, 2). Parèkzanp, lò to ka li roun istwè annan Labib-a ki ka montré mizérikòrd Jéova-a, doumandé to kò : « Ès mo ka pardonnen ròt-ya ? » Ouben lò to ka li vèrsé annan Labib-a ki ka montré kouman Jéova gen konpasyon pou sa-ya ki maléré, doumandé to kò : « Ès mo ka gadé pou mo frè ké sò-ya ki maléré, é ès mo ka montré yé ki mo kontan yé annan sa mo ka fè ? » Kontinyé chanjé fason to ka réfléchi toupannan to ka abiyé ké nouvo pèrsonalité-a, épi pran pasyans ké to kò.

12. Kouman Stephen vin wè ki Labib-a pouvé fè roun moun chanjé nèt ?

¹² Stephen, nou ja palé anvan, rivé abiyé ké nouvo pèrsonalité-a piti piti. Men sa i ka di : « Dipi mo batizé, annan plizyèr sitiasyon mo té gen pou kontrolé mo kò, pas mo té kòlè. Mé mo anprann rété lwen di sa-ya ki ka provoké mo, ouben kalmé bagaj-ya rounòt fason. Bokou moun, mo madanm osi, félisité mo paské mo byen réyaji annan sa sitiasyon-yan. Mo menm ki mo menm, mo rété èstébékwé ! Mé a pa mo ki fè sa, mo pito krè ki sa chanjman-yan ka montré kouman Labib-a pouvé fè roun moun chanjé nèt. »

KONTINYÉ BRIGA KÉ VYÉ ANVI TO GEN

13. Kisa ki ké idé nou kontinyé briga pou fè sa ki bon ? (Galates 5:16).

¹³ (Li Galates 5:16.) Jéova ka bay nou so lèspri sen san konté pou i idé nou, pou nou briga pou fè sa ki byen. Lò nou ka étidyé so Paròl, nou ka mété nou kò anba so lèspri. Nou ka rousouvwè osi lèspri sen lò nou ka alé annan nou réinyon-yan. Nou ka pasé moman ké nou frè ké sò, ki kou nou menm, ka fè tousa yé pouvé pou fè sa ki byen, é sa ka ankourajé nou (Héb. 10:24, 25 ; 13:7). É lò nou ka sipliyé Jéova pou i idé nou briga ké roun défo, i ka bay nou fòrs gras a so lèspri sen pou nou kontinyé briga. Étidyé Labib-a, alé annan réinyon-yan ké lapriyè pa ké fè nou vyé anvi pati, mé tousa ké idé nou pa moli. Kou Galates 5:16 ka di, sa-ya ki ka lésé lèspri-a gidé yé, « pa ké fè pyès bagaj lachè anvi fè ».

14. Poukisa sa enpòrtan pou nou kontinyé travay pou nou anvi fè sa ki bon ?

¹⁴ Lò nou ka koumansé fè bagaj ki ka idé nou gen roun bon lanmityé ké Jéova, sa enpòrtan pou nou kontinyé fè sa, é pou nou kontinyé travay pou nou anvi fè bon bagaj. Poukisa ? Paské nou gen roun lèlmi ki pa janmen ka dronmi. Sa lèlmi-a, a tandans nou gen ka fè sa ki mové. Menm apré nou batizé, nou pouvé anvi fè bagaj nou ka éséyé jité lwen di nou, kou zafè jwé pou soumaké, bwè pou sou ouben gadé pòrnografi (Éph. 5:3, 4). Roun jenn frè ka di : « Roun bagaj ki té pi rèd pou mo briga pou mo lésé, a té ki mo té kontan mouché kou mo menm. O koumansman, mo té krè ki sa té ké pasé, mé sa anvi-a la toujou. » Alòr kisa ki pouvé idé to si to ka briga ké vyé anvi ki rèd menm pou lésé ?

15. Poukisa sa ka ankourajé nou di savé ki i pa gen pyès vyé anvi nou ka briga pou nou lésé « ki ròt moun pa janmen viv » ? (gadé zimaj-a).

¹⁵ Si to ka briga ké roun vyé anvi ki rèd menm pou to lésé, a pou to sonjé ki a pa to rounso ki annan sa sitiasyon-an. Labib-a ka di : « I pa gen pyès tantasyon zòt sipòrté ki ròt moun pa janmen viv » (1 Cor. 10:13a). Rounòt tradiksyon ka bay sa vèrsé-a konsa : « Tout tantasyon zòt jwenn té nòrmal pou wonm ké fanm » (Parole de Vie). Sa paròl-ya, a té pou krétyen-yan ki té ka rété Korent, ki wonm ki fanm. Roun ran annan yé té fè adiltèr, i té gen mouché ki té ka kouché ké mouché, fanm ki té ka kouché ké fanm, é rounòt ran té ka bwè pou sou (1 Cor. 6:9-11). Ès to krè ki apré yé batizé yé pa janmen té gen pou briga ké vyé anvi ankò ? Sa pa posib. Yé tout té wen ké lèspri Bondjé, sa vré, mé yé pa té parfè. Donk, détan yé briga ké vyé anvi yé té gen. Sa divèt ankourajé nou. Poukisa ? Paské sa ka montré ki kèlkéswa vyé anvi to ka briga pou to lésé, roun moun ja rivé tchenbé douvan sa menm vyé anvi-a. Donk, to menm osi to pouvé rété ‘djòk annan lafwa, paské to savé ki fanmi frè ké sò toupatou asou tout latè-a ka pasé anba sa menm kalité soufrans-ya’ (1 Pierre 5:9).

16. Annan ki trap nou pa divèt tonbé, é poukisa ?

¹⁶ Détan roun ran moun ka pansé ki pyès moun pa pouvé konprann sa yé ka viv. Mé panga tonbé annan sa trap-a. Sa pouvé fè to krè ki to sitiasyon pa bon menm é ki to pa ké janmen rivé tchenbé douvan sa mové anvi-a. A pa sa Labib-a ka di. Nou ka li : « Bondjé fidèl ; i pa ké janmen pèrmèt ki zòt tanté pasé sa zòt pouvé sipòrté épi, lò tantasyon-an ké rivé, i ké préparé fason-an pou zòt soti anba l’, pou zòt pouvé andiré l’ » (1 Cor. 10:13b). Donk, menm lò roun vyé anvi fò menm, roun moun pouvé rété fidèl douvan Jéova. É gras a Jéova, sa posib pou roun moun pa tonbé.

17. Kisa nou pa pouvé fè, mé kouman nou divèt réyaji ?

¹⁷ Pa janmen bliyé sa : Kou to pa parfè, to pa pouvé anpéché vyé anvi rouvini. Mé lò sa ka rivé, to pouvé fè yé alé lwen, jité yé, kou Jozèf chapé san i pa menm réfléchi, lò madanm Pitifar vini òbò li (Gen. 39:12). To pa blijé moli douvan yé !

PA ARÉTÉ BRIGA

18-19. Ki késyon pouvé idé nou kontinyé chanjé fason nou ka réfléchi ?

¹⁸ Pou nou kontinyé chanjé mannyè nou ka réfléchi, nou divèt fè sa ki annan nou lèspri ké sa nou ka fè, alé annan menm sans ké volonté Jéova. É sa ka doumandé nou fè roun patché éfòr. Pou fè sa, a souvan pou to asiz réfléchi épi doumandé to kò : « Ès sa mo ka fè ka montré ki mo ka byen konprann ki mo ka viv annan dèrnyé jou-ya ? Ès mo ka divini roun pi bon moun, é ès mo pèrsonalité ka piti piti sanblé plis ké nouvo pèrsonalité-a ? Ès mo ka lésé lèspri Jéova-a gidé mo pou mo tchenbé douvan tout vyé anvi mo lachè anvi ? »

¹⁹ Lò to ka réfléchi asou sa to ka fè, sonjé progrè to fè. Pa di annan to tchò ki to divèt parfè. Si to ka wè ki to divèt fè éfòr annan roun koté, pa dékourajé. Swiv konsèy ki annan Philippiens 3:16 : « Kèlkéswa progrè nou ja fè, annou kontinyé maché drèt annan menm chimen-an. » Atò, to ké pouvé sir ki Jéova ké béni éfòr to ka fè pou to kontinyé chanjé fason to ka réfléchi.