ARTIK POU ÉTIDYÉ 6
Sa Labib-a ka di asou Sa-la ki fè l’
« Ékri tousa mo ka di to annan roun liv » (JÉR. 30:2).
KANTIK 96 Le Livre de Dieu : un trésor
KOUTWÉY ASOU SA NOU KÉ WÈa
1. Poukisa to byen kontan Jéova fè moun ékri Labib-a ?
A PA ti mèrsi nou ka di Jéova mèrsi paské i fè moun ékri Labib-a ! Annan sa liv-a ki gen bokou valò, nou ka jwenn roun patché konsèy plen ké sajès ki pouvé idé nou savé sa pou nou fè lò nou ka jwenn problèm. Anplis di sa, i ka pèrmèt nou gen roun bèl èspwar pou dimen. Mé pi enpòrtan-an, i ka di nou plizyèr bagaj asou Moun-an ki fè l’. Lò nou ka réfléchi asou bèl kalité Bondjé gen, sa ka touché nou tchò bokou. Sa ka pousé nou divini zanmi ké li é konsa nou ka vin pi pròch ké li (Ps. 25:14).
2. Kisa Jéova fè pou moun-yan konnèt li ?
2 Jéova lé moun-yan konnèt li. A pou sa, tan-lontan, i fè sèrten moun fè rèv, i bay yé vizyon, é i jis voyé zanj pou poté so mésaj bay yé (Nomb. 12:6 ; Actes 10:3, 4). Mé kouman nou té ké pouvé étidyé sa rèv-ya, sa vizyon-yan ouben sa mésaj-ya si pyès moun pa té marké yé ? A pou sa Jéova fè sa ki fo pou moun « ékri […] annan roun liv » sa i té lé nou konnèt (Jér. 30:2). Kou « fason vré Bondjé-a ka aji, parfè », nou pouvé sir ki fason i chwazi pou palé ké nou-a bon toubonnman épi i itil pou nou (Ps. 18:30).
3. Kisa Jéova fè pou nou gen Labib-a jòdla ? (Isaïe 40:8).
3 (Li Isaïe 40:8). Sa ka fè nanninannan Paròl Bondjé-a ka bay wonm-yan ké fanm-yan ki gen lafwa annan li roun patché bon konsèy. Kouman sa posib ? A roun bon késyon paské lò yé ékri Labib-a o koumansman, a té asou roun kalité papyé ki ka pouri. Donk jòdla, nou pa ka jwenn pyès annan sa prémyé dokiman-yan. Mé Jéova fè sa ki fo pou yé roukopyé sa tèks sakré-a. Menm si yé pa té parfè, sa-ya ki roukopyé sa tèks-a té ka vréman fè atansyon. Men sa roun èspésyalis Labib-a ka di asou Ékritir ébrayik-ya : « I pa gen pyès ròt liv yé ékri tan-lontan yé byen roukopyé konsab. » Donk, menm si i ja gen lontan yé ékri Labib-a asou bagaj ki ka pouri, é menm si sa-ya ki roukopyé Labib-a pa té parfè, nou pouvé sir ki sa nou ka li annan nou Labib jòdla, a lidé Sa-la ki fè l’, Jéova.
4. Kisa nou ké wè annan sa artik-a ?
4 A Jéova ki ka bay « tout bèl bagaj ké tout kado parfè » (Jacq. 1:17). É Labib-a ka fè parti di tout pi bèl kado Jéova bay nou. É roun kado ka anprann nou bokou bagaj asou moun-an ki ka bay nou l’. Parèkzanp, i ka pèrmèt nou wè si moun-an byen konnèt sa-la i ka bay kado-a, mé osi si i byen savé sa i bézwen. A menm bagaj-a pou Labib-a. Lò nou ka pran tan byen gadé sa kado-a, nou ka anprann roun patché bagaj asou Sa-la ki bay nou l’. Nou ka anprann kouman i konnèt nou byen é ki i byen savé sa nou bézwen. Annan sa artik-a, nou ké wè kisa Labib-a ka anprann nou asou trwa gran kalité Jéova gen : so sajès, so jistis ké so lanmou. Pou koumansé, annou palé di so sajès.
ANNAN LABIB-A NOU KA WÈ SAJÈS BONDJÉ
5. Bay roun fason Labib-a ka montré sajès Bondjé.
5 Jéova savé ki nou bézwen i bay nou konsèy plen ké sajès. É Labib-a, bèl kado i bay nou-a, plen ké so sajès. A pou sa, konsèy nou ka trapé annan l’ ka idé moun-yan. Labib-a ka chanjé lavi moun. Lò Moyiz ékri prémyé liv Labib-ya, i di Israyélit-ya : « A pa paròl ki pa gen valò. Yé ké fè zòt trapé lavi » (Deut. 32:47). Sa-ya ki té ka swiv sa Ékritir-ya té pouvé gen roun bèl lavi (Ps. 1:2, 3). Ké tan-an, Labib-a pa pédi so pouvwar, i pouvé chanjé lavi moun. Annan parti « La Bible transforme des vies » asou jw.org, i gen témwanyaj pasé 50 frè ké sò ki ka montré kouman, jis jòdla, Labib-a « ka fè so travay » asou moun-yan ki ka krè annan li (1 Thess. 2:13).
6. Poukisa nou pouvé di ki Labib-a lontan pi bon pasé nenpòrt ki ròt liv ?
6 I pa gen pyès ròt liv kou Paròl Bondjé-a. Poukisa ? Paské Moun-an ki fè sa liv-a, Jéova, tou-pwisan, i la pou tout-tan é i gen sajès pasé pyès moun. I gen patché ròt liv moun-yan ka kontinyé li menm apré moun-yan ki ékri sa liv-ya mouri. É souvan, konsèy ki annan sa liv-ya pa gen pyès valò ankò jòdla. Parkont, prensip-ya nou ka jwenn annan Labib-a, ki plen ké sajès, pa jen ka gaté. Yé ka kontinyé idé moun-yan annan nenpòrt ki lépòk ! Pi nou ka li sa liv sakré-a é nou ka réfléchi asou sa nou ka anprann, pi Sa-la ki fè sa liv-a ka sèrvi so lèspri sen ki pwisan pou idé nou konprann kouman nou pouvé apliké konsèy-ya ki annan l’ (Ps. 119:27 ; Mal. 3:16 ; Héb. 4:12). Wi, Moun-an ki fè Labib-a byen vivan, é i vréman lé gidé to ! Sa divèt bay nou anvi li Labib-a souvan !
Kouman Labib-a té ka idé sèrvitèr Jéova-ya tan-lontan rété ansanm ansanm é kouman i ka idé sèrvitèr Jéova-ya rété ansanm ansanm jòdla ? (gadé paragraf 7-8).
7. Kouman Labib-a té ka idé sèrvitèr Bondjé-ya tan-lontan rété ansanm ansanm ?
7 I gen rounòt bagaj ki ka montré ki nou ka trapé sajès Bondjé annan Labib-a : Labib-a ka idé pèp Bondjé-a rété ansanm ansanm. Lò Israyélit-ya rivé annan Péyi Bondjé té promèt-a, yé enstalé yé kò annan plizyèr koté. Roun ran divini péchèr, ròt koumansé lévé zannimo, épi ròt ankò koumansé fè bati. Problèm-an a té ki Israyélit-ya ki té ka rété roun koté té ka riské arété gadé pou ròt Israyélit-ya ki té ka rété ròt koté. Mé Jéova té prévwè plizyèr lévènman koté tout sa ki té ka adoré l’ té divèt vini pou yé kouté yé li ké èspliké so Paròl (Deut. 31:10-13 ; Néh. 8:2, 8, 18). Imajiné sa roun Israyélit ki té ka rivé Jérizalèm té divèt ka rousanti lò i té ka wè pitèt roun milyon ròt moun ki té ka adoré Bondjé ki té ka vini di tout koté annan péyi-a ! Gras a sa lévènman-yan, Jéova pèrmèt so pèp rété ansanm ansanm. Pita, yé fòrmé asanblé krétyen-an. Annan sa asanblé-a, i té gen wonm ké fanm ki té ka palé tout kalité lang. I té gen grotchap ké ti tchatcha. I té gen sa ki té rich épi ròt ki té maléré. Mé a yé lanmou pou Ékritir-ya ki té ka fè yé adoré vré Bondjé-a yé tout ansanm. É moun-yan ki té ka divini krétyen pa té pouvé rivé konprann Paròl Bondjé-a si ròt-ya ki té ka adoré Bondjé pa té ka idé yé, é si yé pa té ka rasanblé ansanm ké yé (Actes 2:42 ; 8:30, 31).
8. Kouman Labib-a ka idé sèrvitèr Bondjé-ya rété ansanm ansanm jòdla ?
8 Nou Bondjé ki gen sajès ka kontinyé ansényé so pèp é i ka kontinyé sèrvi Labib-a pou fè li rété ansanm ansanm. A annan so Paròl nou ka jwenn sa manjé èspirityèl-a ki ka fè nou santi nou kò tèlman byen. Souvan, pannan réinyon asanblé-a ké pannan gran asanblé sirkonskripsyon ké réjyonal, nou ka rasanblé ké nou konpanyen pou kouté yé li ké èspliké Ékritir-ya. Donk Labib-a, a roun zouti vréman enpòrtan Jéova ka sèrvi pou idé so sèrvitèr-ya « adoré l’ ansanm ansanm » (Soph. 3:9).
9. Ki kalité nou blijé gen pou nou konprann mésaj-a ki annan Labib-a ? (Luc 10:21).
9 Men rounòt bagaj ankò ki ka montré ki Bondjé gen sajès : a fason Jéova fè moun ékri roun patché bagaj annan Ékritir-ya pou sa-ya ki gen imilité rounso rivé konprann yé (li Luc 10:21). Roun patché moun ka li Labib-a. Roun èspésyalis Labib-a ka di ki, non sèlman a Labib-a moun-yan ka li pasé pyès ròt liv, mé anplis di sa, a sa liv-a osi yé ka pran tan byen li pasé pyès ròt livc. Mé a sèlman sa-ya ki gen imilité ki ka vréman konprann é ki ka vréman fè sa Labib-a ka di (2 Cor. 3:15, 16).
10. Ki ròt bagaj ka montré nou sajès Jéova-a annan Labib-a ?
10 Nou ka wè sajès Bondjé-a rounòt fason ankò annan Labib-a. Jéova ka itilizé so Paròl pou ansényé nou tout, mé osi pou ansényé ké konsolé nou chak. Lò nou ka li Labib-a, nou ka santi kouman Jéova kontan nou chak (Is. 30:21). Sa dèt rivé to chaché annan Ékritir-ya sa pou to té fè lò to té gen roun problèm. Konmyen fwa to li roun vèrsé épi to santi ki Bondjé té fè l’ èspésyalman pou to ? Pourtan, Labib-a ka touché tchò roun patché moun. Atò, kouman i pouvé rivé bay to konsèy ki ka byen alé ké sa to bézwen é ki toujou valab jòdla ? Ében paské a roun moun ki gen roun sajès pyès moun pa pouvé gen ki fè l’ (2 Tim. 3:16, 17).
ANNAN LABIB-A NOU KA WÈ JISTIS BONDJÉ
11. Lò i fè moun ékri Labib-a, kouman Bondjé montré ki i pa ka fè préférans ?
11 Annan pi gran kalité Jéova gen, i gen jistis-a (Deut. 32:4). Jistis-a ka alé ké zafè pa fè préférans. Donk sa lé di ki Jéova pa ka fè préférans (Actes 10:34, 35 ; Rom. 2:11). A sa nou ka wè lò nou ka gadé lang Jéova chwazi pou yé ékri Labib-a. Yé ékri 39 prémyé liv-ya an ébré. A té roun lang tout adoratèr Bondjé-ya annan sa lépòk-a té pouvé konprann fasilman. Mé o 1é syèk di nou lépòk, près tout moun té ka palé grèk. A pou sa i fè yé ékri 27 dèrnyé liv-ya an grèk. Mé Jéova pa té lé so Paròl disponib annan rounsèl lang. Jòdla, moun-yan ka palé roun patché lang. Alòr, kouman sa kantité moun-yan pouvé rivé anprann konnèt Jéova ?
12. Bay roun fason Daniel 12:4 ka fèt pannan sa dèrnyé jou-ya.
12 Jéova fè profèt Danyèl di ki pannan lépòk lafen-an « vré konésans-a » ki annan Labib-a té ké vin bokou. Anfèt, bokou moun té ké konprann li (li Daniel 12:4). Sa konésans-a divini bokou gras a tradiksyon-an épi paské yé fè é yé distribiyé Labib-a ké piblikasyon ki ka apiyé asou Labib-a. Jòdla, a Labib-a yé ka tradwi é yé ka distribiyé plis pasé pyès ròt liv annan monn-an. Mé détan, tradiksyon Labib-a yé ka vandé annan magazen-yan ka kouté chè. Kanta òrganizasyon Jéova-a, i ja tradwi tout Paròl Bondjé-a ouben plizyèr parti annan l’ annan pasé 240 lang, é tout moun pouvé gen roun Labib san yé pa péyé anyen. A konsa, moun tout nasyon ka asèpté « bon nouvèl di Rwayonm-an » anvan lafen-an rivé (Mat. 24:14). Nou Bondjé ki jis lé ki roun patché moun li so Paròl épi anprann konnèt li, paské i kontan nou chak bokou.
ANNAN LABIB-A NOU KA WÈ LANMOU BONDJÉ
13. Poukisa nou pouvé di ki nou ka wè lanmou Jéova annan Labib-a ? (Jean 21:25).
13 Labib-a ka idé nou konprann ki pi gran kalité Jéova gen, a lanmou (1 Jean 4:8). Sonjé sa Jéova fè moun ékri annan Labib-a, mé osi sa i pa fè yé marké. I gen tousa nou bézwen savé pou nou vin zanmi ké li, pou nou lavi bèl jòdla é pou nou pouvé gen lavi pou tout-tan. Mé pas i kontan nou, Jéova pa ka néyé nou anba enfòrmasyon ; i pa ka di nou plis ki sa nou pouvé tchenbé (li Jean 21:25).
14. Kouman nou ka wè lanmou Bondjé annan Labib-a ankò ?
14 Men rounòt bagaj annan Labib-a ki ka montré ki Jéova kontan nou : I ka palé pou nou roun fason ki ka montré ki nou gen valò pou li. I pa ka bay nou roun lis bagaj pou nou fè ouben pou nou pa fè ki pa ka fini. I pa ka di nou èkzaktéman sa nou divèt fè ké sa nou pa divèt fè annan tout ti bagaj annan nou lavi. Sa i lé pito, a ki nou réfléchi gras a istwè ki pasé tan-lontan, profési ké konsèy i ka bay nou. A konsa Paròl Bondjé-a ka pousé nou kontan ké obéyi Jéova ké tout nou tchò.
Poukisa nou divèt réfléchi asou fason Jéova té ka aji ké so sèrvitèr-ya tan-lontan ? (2 Rois 5:1-3 ; Gen. 39:1, 10-12 ; Luc 2:25-38). (gadé paragraf 15).
15. a) Kisa ki ka montré ki Jéova ka gadé pou sa-ya ki ka li so Paròl ? b) Asou zimaj-a, asou kimoun annan Labib-a tifi-a, jenn frè-a, ké sò-a ki ja gen so laj ka réfléchi ?
15 Labib-a ka montré ki Jéova ka gadé pou nou. Kouman ? Nou ka jwenn roun patché istwè annan Labib-a koté nou ka wè sa moun-yan rousanti. Kou yé « té gen menm santiman ki noupa », nou pouvé konprann fasilman sa yé rousanti (Jacq. 5:17). Pi enpòrtan-an, lò nou ka gadé kouman i té ka aji ké moun kou nou menm, nou ka konprann pi byen ki Jéova « gen bokou lanmou pou nou, é i plen ké mizérikòrd » (Jacq. 5:11).
16. Kisa istwè moun annan Labib-a ki fè péché ka anprann nou asou Jéova ? (Isaïe 55:7).
16 Labib-a ka montré lanmou Jéova rounòt fason ankò : i ka pèrmèt nou sir ki si nou ka fè roun péché, Jéova pa ké lagé nou. Israyélit-ya péché kont Jéova roun patché fwa. Pourtan, lò yé té ka répanti ké tout yé tchò, Bondjé té ka pardonnen yé (li Isaïe 55:7). Krétyen-yan annan 1é syèk-a té savé osi ki Bondjé té kontan yé bokou. Parèkzanp Bondjé fè apot Pòl palé di roun mouché ki té fè roun péché ki té grav, mé ki té répanti. É i ankourajé so frè ké sò-ya ‘pardonnen li ké tout yé tchò’ épi « konsolé l’ » (2 Cor. 2:6, 7 ; 1 Cor. 5:1-5). Ès a pa roun bèl bagaj ? Lò so sèrvitèr-ya té ka fè roun péché, Jéova pa té ka lagé yé. Pasé i fè sa, ké bokou lanmou, i té ka idé yé, i té ka korijé yé é i té ka rousouvwè yé ké so bra gran louvri. I ka promèt ki i ké fè menm bagaj-a jòdla ké sa-ya ki péché é ki ka répanti (Jacq. 4:8-10).
BAY SA « KADO PARFÈ » KI KA VINI DI BONDJÉ VALÒ
17. Poukisa Labib-a sa roun bèl kado konsa ?
17 Lò i bay nou Labib-a, Jéova fè nou roun kado ki bèl toubonnman. Poukisa so Paròl bèl konsa ? Paské kou nou wè l’, nou ka jwenn sajès, jistis ké lanmou Bondjé annan l’. Labib-a sa roun prèv ki Jéova lé ki nou anprann konnèt li é ki nou divini so zanmi.
18. Kouman nou pouvé di Jéova mèrsi pou sa « kado parfè », Labib-a ?
18 Nou pa lé bliyé ki Paròl Bondjé-a, a roun « kado parfè » (Jacq. 1:17). A pou sa, annou kontinyé di Jéova mèrsi pou sa kado-a ki sakré. Kouman nou pouvé fè sa ? A pou nou li l’ é a pou nou réfléchi asou l’. A pou nou byen sir ki Sa-la ki fè l’ ké béni nou pou sa. I ké pèrmèt nou « trouvé konésans Bondjé-a » (Prov. 2:5).
KANTIK 98 « Toute Écriture est inspirée de Dieu »
a Labib-a ka idé nou vin pi pròch ké Jéova. Kisa sa liv sakré-a ka anprann nou asou sajès, jistis ké lanmou Bondjé ? Sa nou ka anprann annan sa liv-a ka fè nou pi kontan Paròl Bondjé-a é sa ké idé nou wè l’ kou i sa vréman : roun kado ki gen bokou valò ki ka vini di nou Papa ki annan syèl-a.
b W. Green, General Introduction to the Old Testament: The Text, Charles Scribner’s Sons, 1899.
c M. Adler et C. Van Doren, How to Read a Book, Simon & Schuster, 1972.