« Jij tout latè-a » plen ké mizérikòrd. Fè l’ konfyans !

1. Kisa Jéova anprann Abraam é ki ka konsolé nou ?

ABRAAM pa janmen bliyé sa kozé-a ké so Papa ki annan syèl-a ! Jéova sèrvi roun zanj pou di li ki i té ké krazé vil Sodòm ké Gomòr nèt ! Sa té rèd pou Abraam konprann sa, menmsi so lafwa té fò. I doumandé so Bondjé : « Ès to ké vréman fè moun-an ki jis mouri ansanm ké moun-an ki méchan ? [...] Ès Jij tout latè-a pa ké fè sa ki jis ? » Jéova pran tan anprann so zanmi roun bagaj ki ka konsolé nou tout : i pa ké janmen détrwi moun ki jis (Gen. 18:23-33).

2. Poukisa nou pouvé sir ki lò Jéova ka jijé roun moun, i toujou ka fè sa ki jis é i toujou ka aji ké mizérikòrd ?

² Poukisa nou pouvé sir ki lò Jéova ka jijé roun moun, i toujou ka fè sa ki jis é i toujou ka aji ké mizérikòrd ? Paské nou savé ki i « ka wè sa i gen annan tchò » moun (1 Sam. 16:7). Pou byen di, i konnèt « tchò chak moun » (1 Rois 8:39 ; 1 Chron. 28:9). Ès a pa roun bèl bagaj ? Jéova gen lontan plis sajès pasé nou, donk a pa tout tan nou ka konprann sèrten désizyon i ka pran. A pou sa apot Pòl di : « So jijman rèd pou konprann ! » (Rom. 11:33).

3-4. a) Ki késyon nou pouvé pozé nou kò ? b) Kisa nou ké wè annan sa artik-a ? (Jean 5:28, 29).

³ Menmsi nou savé ki Jéova toujou ka fè sa ki jis, pitèt nou gen menm kalité késyon Abraam té gen. Nou pitèt menm ka doumandé nou kò : « Ès Jéova pa ké janmen résisité roun moun i détrwi, kou sa-ya ki té ka rété Sodòm ké Gomòr parèkzanp ? Ès i ké résisité roun ran annan yé lò “rézirèksyon […] moun ki pa jis” ké fèt ? » (Actes 24:15).

⁴ Annou rouwè sa nou ja savé asou rézirèksyon-an. I pa gen lontan, nou konprann pi byen a kisa ki « rézirèksyon pou lavi » ké « rézirèksyon jijman »-ana (li Jean 5:28, 29). Fason nou ka konprann sa rézirèksyon-yan aprézan fè nou konprann ròt bagaj pi byen osi. A sa nou ké wè annan sa artik-a ké ròt-a ki ka vin dèyè. Nou ké wè sa nou savé ké sa nou pa savé asou jijman Jéova-ya ki jis.

SA NOU PA SAVÉ

5. Kisa nou piblikasyon té ka di asou moun Sodòm ké Gomòr ?

⁵ Kisa ki ké rivé sa-ya Jéova ka di ki yé pa jis ? Anvan, nou piblikasyon té ka di ki Jéova pa té ké janmen résisité moun-yan i détrwi, kou sa-ya ki té ka rété Sodòm ké Gomòr parèkzanp. Mé nou fouyé annan Labib é nou priyè, é a konsa nou vin konprann ki nou pa té pouvé sir di sa. Poukisa ?

6. Kimoun ki pa té jis Jéova détrwi, é kisa nou pa savé ?

⁶ Annou wè déztrwa ròt èkzanp. Labib ka palé plizyèr fwa di moun Bondjé jijé é ki pa té jis. Parèkzanp, Jéova détrwi tout moun pannan Délij-a, sòf Noé ké so fanmi. I sèrvi osi Israyélit-ya pou détrwi sèt nasyon-yan ki té ka rété annan Péyi i té promèt bay yé-a. Épi i sèrvi roun zanj pou tchwé 185 000 sòlda asiryen pannan rounsèl lannwit (Gen. 7:23 ; Deut. 7:1-3 ; Is. 37:36, 37). Ès Labib ka di nou san katakata ki Jéova désidé ki tout sa moun-yan mouri pou tout-tan é ki i pa ké janmen résisité yé ? Non. Poukisa nou pouvé di sa ?

7. Kisa nou pa savé asou moun-yan ki mouri pannan Délij-a ouben lò Israyélit-ya pran péyi Kanaan-an ? (gadé zimaj-a).

⁷ Nou pa savé kouman Jéova jijé yé chak. Nou pa savé non plis si sa-ya ki mouri té gen tan anprann konnèt li épi répanti. Labib ka di ki, anvan Délij-a, Noé « préché lajistis » (2 Pierre 2:5). Mé i pa ka di ki toupannan i té ka fè sa bi papa arch-a, i éséyé jwenn chak moun asou latè-a pou di yé ki Délij-a té ké krazé tout bagaj. Menm fason-an, nou pa savé si tout sa ki té ka rété Kanaan té gen lokazyon anprann konnèt Jéova épi chanjé yé konpòrtman.

8. Kisa nou pa savé asou moun-yan ki té ka rété Sodòm ké Gomòr ?

⁸ É moun-yan ki té ka rété Sodòm ké Gomòr ? Lòt, roun moun ki té jis, té ka rété an mitan yé. Mé, ès nou savé si i préché pou yé chak ? Non. A vré, yé té mové, mé ès yé té ka konprann sa ? Labib ka di ki roun patché mouché, « timoun kou granmoun », éséyé vyolé mouché-ya ki té annan kaz Lòt. Roun ran annan yé té sa dé tibolonm. Donk, pitèt yé pa menm té ka wè ki sa yé té ka fè pa té bon menm (Gen. 19:4 ; 2 Pierre 2:7). Ès nou pouvé di ki Jéova, ki gen bokou mizérikòrd, désidé ki i pa ké janmen résisité yé ? Non. A vré, Jéova di Abraam ki i pa té menm gen dis moun ki té jis annan sa vil-a (Gen. 18:32). Donk, sa lé di ki sa moun-yan pa té jis, é Jéova té gen drwa tchwé yé akoz di sa yé té ka fè. Mé, ès nou pouvé sir ki yé pyès pa ké résisité lò « rézirèksyon […] moun ki pa jis » ké fèt ? Non, nou pa pouvé sir di sa !

9. Kisa nou pa savé asou Salomon ?

⁹ Parkont, Labib ka palé osi di moun ki té jis ki chanjé é ki divini moun ki pa jis. Annou pran èkzanp rwa Salomon. I té konnèt Jéova, i té savé kouman i té divèt adoré l’ é Jéova té béni l’ bokou. Pourtan, pita, i adoré fo bondjé. Jéova té faché akoz di sa, é tout nasyon Israyèl-a soufri pannan plizyèr syèk paské Salomon té péché. A vré, Labib ka di ki Salomon « mouri kou tout so gangan anvan li », é annan so gangan i té gen moun ki té fidèl kou rwa David (1 Rois 11:5-9, 43 ; 2 Rois 23:13). Mé, ès fason yé antéré l’ ka pèrmèt nou sir ki Jéova ké résisité l’ ? Labib pa ka di sa. Mé, roun ran pouvé pansé ki Salomon ké résisité paské Labib ka di ki « sa-la ki mouri péyé pou so péché » (Rom. 6:7). A vré, mé sa pa lé di ki tout sa ki mouri ké résisité kousidiré yé té ganyen drwa rouviv. Rézirèksyon-an, a roun kado ka vini di nou Bondjé ki kontan nou. I ka bay moun i lé sa kado-a pou yé pouvé adoré l’ pou tout-tan (Job 14:13, 14 ; Jean 6:44). Ès Salomon ké rousouvwè sa kado-a ? A Jéova rounso ki savé. Mé sa nou savé, a ki Jéova ké fè sa ki jis.

SA NOU SAVÉ

10. Kisa Jéova ka rousanti parapòrta zafè détrwi roun moun ? (Ézéchiel 33:11).

¹⁰ (Li Ézéchiel 33:11.) Jéova ka di nou sa i ka rousanti lò i ka jijé moun-yan. Apot Pyèr di menm bagaj ki profèt Ézékyèl. I di ki Jéova « pa lé rounsèl moun mouri » (2 Pierre 3:9). Sa paròl-ya ka rasiré nou. Nou savé ki Jéova pa ké détrwi roun moun pou tout-tan sòf si i gen roun bon rézon pou fè l’. I plen ké mizérikòrd, donk, i ka aji ké mizérikòrd chak fwa sa posib.

11. Kimoun Bondjé pa ké résisité, é kouman nou fè savé sa ?

¹¹ Ès nou savé si sèrten moun pa ké résisité ? Wi, mé Labib ka bay non déztrwa moun rounsob. Jézi di ki Jida Iskaryòt pa té ka mérité Bondjé résisité l’ (Marc 14:21 ; gadé osi Jean 17:12 ké nòt pou étidyé pou sa vèrsé-a). Jida viré do bay Jéova ké so Pitit, é i té byen savé sa i té ka fè (gadé Marc 3:29 ké nòt pou étidyé pou sa vèrsé-a). Anplis di sa, Jézi di ki roun ran chèf rélijyé ki té éséyé baré so chimen té ké mouri é yé pa té ké gen pyès èspwar rouviv (Mat. 23:33 ; gadé Jean 19:11 ké nòt pou étidyé « l’homme » pou sa vèrsé-a). É Pòl èspliké ki Bondjé pa ké résisité apòsta-ya ki pa ka répanti (Héb. 6:4-8 ; 10:29).

12. Kisa nou savé asou mizérikòrd Jéova-a ? Bay roun èkzanp.

¹² Mé kou nou ja di l’, Jéova plen ké mizérikòrd, é « i pa lé rounsèl moun mouri ». Kisa ka montré nou sa ? Annou wè kouman i aji ké mizérikòrd ké roun ran moun ki té fè péché ki té grav. Rwa David, parèkzanp, fè roun adiltèr é i tchwé roun moun. Mé kou i répanti, Jéova pardonnen l’ (2 Sam. 12:1-13). Kanta rwa Manasé li menm, i fè mové bagaj pannan près tout so lavi. Pourtan, menm annan sa sitiasyon-an ki té grav menm, Jéova aji ké mizérikòrd ké li é i pardonnen l’ paské i répanti (2 Chron. 33:9-16). Sa èkzanp-ya ka fè nou sonjé ki Jéova ka aji ké mizérikòrd chak fwa i gen roun bon rézon pou i fè l’. Donk, i ké résisité sa-ya ki ka konprann ki péché yé fè té grav é ki ka répanti, kou David ké Manasé.

13. a) Poukisa Jéova aji ké mizérikòrd ké Ninivit-ya ? b) Kisa Jézi di asou Ninivit-ya ?

¹³ Annou palé osi di kouman Jéova montré Ninivit-ya so mizérikòrd. I di Jonas : « Mo wè mové bagaj yé ka fè. » Mé lò yé répanti, Jéova pardonnen yé pas i gen bonté. I té gen lontan plis mizérikòrd ki Jonas ki lévé faché. I fè so profèt sonjé ki Ninivit-ya ‘pa menm té savé sa ki té bon ké sa ki té mové’ (Jon. 1:1, 2 ; 3:10 ; 4:9-11). Pita, Jézi pran èkzanp Ninivit-ya pou montré so disip ki Jéova jis é ki i plen ké mizérikòrd. I di ki Ninivit-ya ki té répanti té ké « résisité » pannan « jou jijman-an » (Mat. 12:41).

14. Kisa « rézirèksyon jijman »-an ké lé di pou Ninivit-ya ?

¹⁴ Pannan ki « jijman » Ninivit-ya ké résisité ? Jézi di ki roun « rézirèksyon jijman » té ké fèt pita (Jean 5:29). I té ka sonjé mil lannen-yan lò i té ké rwa. É pannan sa mil lannen-yan i té ké gen « roun rézirèksyon pou moun ki jis kou pou moun ki pa jis » (Actes 24:15). Pou moun ki pa jis, a ké roun rézirèksyon jijman. Jéova ké Jézi ké byen gadé yé konpòrtman é kouman yé ké réyaji parapòrta sa yé ké anprann. Si roun Ninivit ki résisité pa lé adoré Jéova, Jéova pa ké pèrmèt li rété vivan (Is. 65:20). Mé tout sa ki ké chwazi adoré Jéova é rété fidèl, yé ké gen posibilité viv pou tout-tan ! (Dan. 12:2).

15. a) Poukisa nou pa pouvé di ki pyès moun Sodòm ké Gomòr pa ké résisité ? b) Kouman nou divèt konprann sa ki marké annan Jude 7 ? (gadé karé-a « Kisa Jid té lé di ? »).

¹⁵ Aprézan, annou palé di moun Sodòm ké Gomòr. Jézi di ki sa té ké pi fasil pou yé pannan « jou jijman-an » ki pou sa-ya ki pa té lé kouté ni li ni so ansèyman (Mat. 10:14, 15 ; 11:23, 24 ; Luc 10:12). Ès Jézi té ka èkzajéré pou montré ki moun di so lépòk té pi mové pasé moun Sodòm ké Gomòr ? Non. Sonjé ki lò i di ki ‘jou jijman-an, moun Niniv té ké résisité’, i pa té ka èkzajéré, i té lé di ki yé té ké rouviv vré. Donk, lò i di ki Bondjé té ké jijé moun Sodòm ké Gomòr pannan « jou jijman-an », i té lé di ki roun ran té ké résisité. Ki pou Ninivit-ya, ki pou moun Sodòm ké Gomòr, a di menm « jou jijman-an » i té ka palé. Sonjé sa Jézi di asou « rézirèksyon jijman »-an. I di ki sa rézirèksyon-an té ké pou « sa ki fè mové bagaj » (Jean 5:29). Moun Sodòm ké Gomòr fè mové bagaj kou Ninivit-ya. Parkont, Bondjé bay Ninivit-ya lokazyon répanti. Donk nou pouvé pansé ki i gen roun èspwar pou moun Sodòm ké Gomòr. Roun ran annan yé ké pitèt résisité pannan « jou jijman-an », é yé ké pouvé répanti. Nou ké pitèt gen pou fè yé konnèt Jéova ké Jézi.

16. Kouman Jéova ka fè pou i désidé kimoun i ké résisité ? (Jérémie 17:10).

¹⁶ (Li Jérémie 17:10.) Sa vèrsé-a ka byen di sa nou savé : dipi tout-tan, Jéova sa sa-la ki ka « byen gadé ofon tchò moun, tousa yé ka séré ofon yé tchò ». Lò i ké désidé kimoun i ké résisité, i ké « bay chak moun sa i ka mérité soulon so konpòrtman ». Lò a ké pou bay roun jijman kondanasyon, i ké fè l’, mé i ké aji ké mizérikòrd chak kou sa ké posib. Donk, nou pa janmen divèt di ki roun moun pa ké résisité si nou pa sir di sa !

« JIJ TOUT LATÈ-A » KÉ FÈ SA KI JIS !

17. Ès i gen roun èspwar pou moun mouri-ya ?

¹⁷ Dipi Adan ké Èv arété obéyi Jéova épi yé désidé swiv Satan, milyar moun mouri. Nou « lèlmi », lanmò, ja ranmasé roun patché moun ! (1 Cor. 15:26). Ès i gen roun èspwar pou tout sa moun-yan ? Roun ti group disip Kris ki fidèl (144 000 moun) ké résisité annan syèl-a é yé pa ké janmen mouri (Rév. 14:1). Roun patché wonm ké fanm fidèl ki kontan Jéova ké résisité lò i ké gen « rézirèksyon [...] moun ki jis ». É si yé ka kontinyé sa dé moun ki jis pannan mil lannen-yan Kris ké rwa ké pannan dèrnyé éprèv-a, yé ké pouvé viv pou tout-tan asou latè-a (Dan. 12:13 ; Héb. 12:1). Pannan mil lannen-yan Jézi ké Rwa, « moun ki pa jis », sa lé di sa-ya ki pa adoré Jéova ké sa-ya ki « fè mové bagaj », ké pouvé chanjé konpòrtman épi divini dé sèrvitèr Bondjé ki fidèl (Luc 23:42, 43). Mé i gen roun ran moun ki té mové, é ki briga kont Jéova ké so projè tèlman ki i ké désidé pa fè yé rouviv menm (Luc 12:4, 5).

18-19. a) Poukisa nou pouvé sir ki Jéova ké jis lò i ké jijé moun mouri-ya ? (Isaïe 55:8, 9). b) Di kisa nou ké palé annan ròt artik-a ?

¹⁸ Ès nou pouvé sir ki chak kou Jéova ka jijé moun, i toujou ka pran roun désizyon ki jis ? Wi, a sa Abraam té byen konprann. Jéova sa roun jij ki parfè é ki plen ké sajès ké mizérikòrd. I sa « Jij tout latè-a » ! I fòrmé so Pitit é i mété l’ pou i jijé tout moun (Jean 5:22). Ni Papa-a ni Pitit-a pouvé li ofon tchò chak moun (Mat. 9:4). Donk, yé ké toujou fè « sa ki jis » !

¹⁹ Annou byen désidé fè Jéova konfyans. I savé sa i divèt fè pi byen pasé nou menm. Donk, a pou nou rékonnèt ki a pa nou pou jijé moun. A li ki pouvé fè l’ ! (li Isaïe 55:8, 9). É lò a pou jijé, annou toujou lésé sa annan lanmen Jéova ké Jézi, Rwa-a ki ka byen imité jistis ké mizérikòrd so Papa (Is. 11:3, 4). É pou lò yé ké jijé moun-yan pannan gran tribilasyon-an ? Kisa nou pa savé é kisa nou savé asou sa ? Ròt artik-a ké réponn sa késyon-an.