ARTIK POU ÉTIDYÉ 18
KANTIK 65 Kontinyé vansé !
Jenn frè-ya, imité Mark ké Timoté
« Pran Mark ké to, paské i ké byen idé mo annan ministèr-a » (2 TIM. 4:11).
SA NOU KÉ ANPRANN
Nou ké wè kouman èkzanp Mark ké Timoté pouvé ankourajé jenn frè-ya gen bèl kalité yé bézwen pou sèrvi ròt-ya ankò plis.
1-2. Kisa ki té pouvé anpéché Mark ké Timoté sèrvi ròt-ya ankò plis ?
JENN frè-ya, ès zòt lé fè plis bagaj pou Jéova é ès zòt lé idé frè ké sò-ya annan zòt asanblé ankò plis ? Asiré pa pitèt. Sa ka fè nou plézi lò nou ka wè ki roun patché jennjan lé sèrvi ròt-ya ! (Ps. 110:3). Mé pitèt sa rèd pou zòt. Pitèt zòt ka ézité paské zòt pa savé kisa ki pouvé rivé zòt ouben ki koté Jéova lé zòt alé. Ouben ès sa ja rivé zòt pa asèpté fè roun bagaj pas zòt té pè pa rivé fè sa yé té ka doumandé zòt fè ? Si a sa, pa gadé, sa ja rivé roun patché moun.
2 Mark ké Timoté jwenn menm kalité problèm. Mé menmsi yé pa té savé kouman yé lavi té ké chanjé ouben menmsi yé té ka pansé ki yé pa té gen èspéryans, yé chwazi fè plis bagaj pou Jéova kanmenm. Lò yé envité Mark alé ké apot Pòl ké Barnabé annan yé prémyé vwayaj misyonèr, i dèt té ka rété annan kaz so manman koté yé té alèz (Actes 12:12, 13, 25). Mé i lésé sa koté i té byen konnèt-a pou fè plis pou Jéova. Pou koumansé, i vwayajé jik Antyòch é apré sa, i alé ankò pi lwen ké Pòl ké Barnabé (Actes 13:1-5). Timoté li menm osi dèt té ka rété koté so papa ké so manman lò Pòl envité l’ vin préché ké li. Kou i té sa roun jennjan, i pitèt té ka pansé ki i pa té gen asé èspéryans pou alé ké Pòl (gadé 1 Corinthiens 16:10, 11 ké 1 Timothée 4:12). Mé i asèpté alé ké l’ é i jwenn bokou bénédiksyon (Actes 16:3-5).
3. a) Poukisa nou pouvé di ki Pòl té kontan Mark ké Timoté bokou ? (2 Timothée 4:6, 9, 11 ; gadé zimaj-ya osi). b) Ki késyon nou ké réponn annan sa artik-a ?
3 Lò yé té jenn, Mark ké Timoté anprann byen fè patché bagaj yé té bay yé fè annan asanblé-a. Pòl té tèlman kontan sa jennjan-yan ki i té lé yé la ké li lò i konprann ki i té ké mouri titalò (li 2 Timothée 4:6, 9, 11). Poukisa Pòl té kontan Mark ké Timoté bokou konsa ? Kouman jenn frè-ya pouvé imité yé ? É kouman konsèy Pòl bay Timoté pouvé idé jennjan-yan ?
Pòl té kontan Mark ké Timoté bokou paské lò yé té jenn, yé asèpté bagaj yé té bay yé fè annan asanblé-ac (gadé paragraf 3).
IMITÉ MARK : TRAVAY RÈD POU FÈ PLIS POU JÉOVA KÉ POU TO FRÈ KÉ SÒ
4-5. Kouman Mark montré ki i té paré pou idé so frè ké sò ?
4 Roun liva ka di ki sèrvi ròt-ya lé di fè tousa nou pouvé pou idé yé épi kontinyé idé yé menmsi sa rèd. Mark bay nou roun bon èkzanp annan sa zafè-a. Lò Pòl réfizé i vin ké li annan so dézyèm vwayaj misyonèr, i dèt té yèg é sa dèt fè l’ lapenn (Actes 15:37, 38). Mé i kontinyé sèrvi so frè ké sò-ya kanmenm.
5 Mark asèpté alé préché rounòt koté ké so kouzen Barnabé. É apéprè 11 lannen pita, i té annan sa-ya ki ankourajé Pòl prémyé fwa i té lajòl Ròm (Philém. 23, 24). Tèlman apot-a té kontan Mark idé l’, i di ki i té sa « roun sours ki ka bay gran konsolasyon » (Col. 4:10, 11).
6. Ki bénédiksyon Mark jwenn pas i travay ansanm ké plizyèr frè ki té fidèl ? (gadé nòt-a).
6 Mark anprann bokou bagaj pas i pasé tan ké plizyèr frè ki té fidèl. I rété roun ti moman Ròm ké Pòl épi apré sa i alé jwenn apot Pyèr Babilòn. Yé lanmityé té tèlman fò ki Pyèr aplé l’ « Mark, mo pitit » (1 Pierre. 5:13). Toupannan yé té ka travay ansanm, Pyèr dèt rakonté so jenn zanmi roun patché bèl bagaj asou lavi ké ministèr Jézi. Pita, Mark ékri tousa annan so Lévanjilb.
7. Kouman Seung-Woo imité Mark ? (gadé zimaj-a osi.)
7 Mark toujou kontinyé gen bokou bagaj pou fè pou Jéova é i rété pròch di frè ki té fidèl. Kouman to pouvé imité l’ ? Pitèt to lé fè plis bagaj pou Jéova, parèkzanp divini asistan ouben ansyen. Mé to pòkò gen kalité yé ka doumandé roun asistan ouben roun ansyen gen. Si a sa, pa dékourajé. Pasé sa, kontinyé chaché wè sa to pouvé fè pou Jéova ké asanblé-a. Annou wè èkzanp Seung-Woo, ki ansyen jòdla. Lò i té pi jenn, i té ka konparé so kò ké ròt jenn frè. Yé té bay sèrten annan yé rèsponsabilité, mé li menm pa té bay li anyen pou fè. Kou i té ka pansé ki yé té bliyé l’, i palé di sa ké sèrten frè ki té gen èspéryans. Roun ansyen di l’ fè sa i té pouvé pou sèrvi ròt-ya menmsi moun pa té savé sa i té ka fè. Atò Seung-Woo koumansé idé frè ké sò-ya ki té ja granmoun é sa-ya ki té bézwen roun moun mennen yé lasal. Men sa i ka di lò i ka sonjé sa lépòk-a : « Sa idé mo konprann kisa sèrvi ròt-ya lé di vréman. É mo pran plézi idé yé. »
Ki bénédiksyon jenn frè-ya ké jwenn si yé ka frékanté frè ki fidèl ? (gadé paragraf 7).
IMITÉ TIMOTÉ : GADÉ POU RÒT-YA
8. Poukisa Pòl chwazi Timoté pou vwayajé ké li ? (Philippiens 2:19-22).
8 Lò Pòl té ka routounen annan vil-ya koté yé té pèrsékité l’, i té bézwen frè ki té gen kouraj pou alé ké l’. Pou koumansé, i chwazi Silas, roun frè ki té gen èspéryans (Actes 15:22, 40). Pita, i chwazi Timoté osi. Poukisa i chwazi l’ ? Pas i té gen roun bon répitasyon é i té ka gadé pou ròt-ya (Actes 16:1, 2 ; li Philippiens 2:19-22).
9. Kouman nou savé ki Timoté té ka gadé pou so frè ké sò ?
9 Lò i koumansé travay ké Pòl, Timoté montré ki i té ka gadé pou ròt-ya pasé i gadé pou so pròp kò. Atò, lò Pòl lésé l’ Béré, i té savé ki i té ké byen pran swen di frè ké sò-ya ki té fin batizé (Actes 17:13, 14). A sa moman-an, i dèt anprann bokou bagaj ké Silas ki té rété Béré li menm osi. Mé pita, Pòl voyé Timoté tousèl Tésalonik pou i ankourajé frè ké sò-ya ki té ka rété annan sa vil-a (1 Thess. 3:2). Pannan 15 lannen, Timoté anprann ‘pléré ké sa-ya ki té ka pléré’ sa lé di rousanti sa ròt-ya té ka rousanti lò yé té ka soufri (Rom. 12:15 ; 2 Tim. 1:4). Kouman jenn frè-ya pouvé imité Timoté ?
10. Kouman Woo Jae anprann gadé pou ròt-ya ?
10 Roun frè yé ka aplé Woo Jae anprann gadé pou ròt-ya ankò plis. Lò i té pi jenn, sa té rèd pou i kozé ké gangan-yan annan so asanblé. Lò i té lasal, i té ka di yé bonjou vitman épi i té ka pati. Alòr, roun ansyen di l’ ki i té pouvé di yé sa i té kontan koté yé pou koumansé kozé ké yé. I di l’ osi doumandé so kò kisa yé té kontan. Woo Jae fè sa ansyen-an té di l’ fè. Jòdla i ansyen, i ka di : « Aprézan sa pi fasil pou mo kozé ké moun ki gen tout kalité laj. Mo kontan pas mo ka pi byen konprann problèm mo frè ké so-ya gen osi. Sa ka pèrmèt mo idé yé. »
11. Kouman jenn frè-ya pouvé anprann gadé pou frè ké sò-ya annan yé asanblé ? (gadé zimaj-a osi).
11 Si to sa roun jenn frè, to menm osi to pouvé anprann gadé pou ròt-ya. Lò to lasal, gadé pou tout to frè ké sò kèlkéswa yé laj ouben koté yé soti. Doumandé yé kouman yé k’alé épi kouté yé. Sa ké pèrmèt to savé kouman to pouvé idé yé. Pitèt roun frè ké so madanm ki granmoun ké di to ki yé bézwen roun moun idé yé sèrvi aplikasyon JW Library® ouben ki yé té ké kontan roun moun mennen yé préché. Ès to pouvé idé yé sèrvi yé pòrtab ouben yé tablèt ouben ès to pouvé òrganizé to kò pou préché ké yé ? Si to ka pran douvan pou idé ròt-ya, to ké bay tout moun roun bèl èkzanp.
Jenn frè-ya pouvé idé asanblé-a di plizyèr fason (gadé paragraf 11).
PROFITÉ DI KONSÈY PÒL BAY
12. Kouman jenn frè-ya pouvé profité di konsèy Pòl bay Timoté ?
12 Pòl bay Timoté konsèy pou i rivé annan so lavi é pou i sèrvi Jéova ankò plis (1 Tim. 1:18 ; 2 Tim. 4:5). Si to sa roun jenn frè, to pouvé profité di sa konsèy-ya. Kouman ? Li dé lèt Pòl ékri pou Timoté kousidiré a té pou to i té ékri yé épi doumandé to kò ki konsèy pouvé idé to èspésyalman. Annou wè déztrwa konsèy Pòl bay.
13. Kisa ki ké idé to adoré Bondjé ké fidélité ?
13 « Travay rèd pou to kontinyé adoré Bondjé ké fidélité » (1 Tim. 4:7b). Pòl di Timoté ki a té pou i té fidèl ké Jéova épi fè sa ki té ka fè l’ plézi. Nou divèt fè éfòr pou nou kontan Bondjé é pou nou adoré l’ ké fidélité pas nou pa ka fèt ké sa kalité-a. Yé té ka sèrvi mo grèk-a ki lé di « travay rèd » pou palé di roun moun ki té divèt antréné so kò pou préparé so kò pou roun konpétisyon. Sa moun-an té divèt fòrsé so kò pou antréné so kò. Nou menm osi, nou divèt fòrsé nou kò pou nou gen bon labitid ki ké idé nou fè nou lanmityé ké Jéova vin pi fò.
14. Poukisa nou ka li Labib ? Bay roun èkzanp.
14 Sa enpòrtan di gen labitid li Labib touléjou é sa enpòrtan osi di sonjé ki to ka li Labib pou fè to lanmityé ké Jéova vin pi fò. Parèkzanp, kisa kozé Jézi pran ké roun jennjan ki té rich ka anprann to ? (Marc 10:17-22). Sa jennjan-an té sir ki Jézi té sa Mési-a, mé i pa té divini so disip pas so lafwa pa té asé fò. Mé Jézi « koumansé kontan l’ ». Ès sa pa ka touché to lò to ka wè kouman Jézi palé bay li ? I té lé jennjan-an pran roun bon désizyon. Sa Jézi té ka rousanti pou jennjan-an, a sa Jéova té ka rousanti pou li osi (Jean 14:9). Réfléchi asou sa istwè-a é asou to sitiasyon é apré sa, doumandé to kò : « Kisa mo divèt fè pou mo fè mo lanmityé ké Jéova vin pi fò é pou mo sèrvi ròt-ya ankò plis ? »
15. Poukisa roun jenn frè divèt sa roun bon èkzanp pou ròt-ya ? (1 Timothée 4:12, 13).
15 « A pou to sa roun èkzanp pou tout sa ki fidèl » (li 1 Timothée 4:12, 13). Pòl ankourajé Timoté anprann konnèt fè bagaj kou byen li épi byen ansényé. Mé i di l’ osi travay pou gen bèl kalité kou lanmou ké lafwa épi pou i pa fè pyès bagaj malpròp. Poukisa ? Pas sa roun moun ka fè pi enpòrtan pasé sa i ka di. Imajiné yé ka doumandé to fè roun diskour asou balan nou divèt gen lò nou ka préché. To ké pi alèz pou fè sa diskour-a si to menm to ka fè tousa to pouvé pou préché ké balan. Sa to ka fè ké bay sa to ka di plis valò (1 Tim. 3:13).
16. a) Bay senk fason roun frè pouvé sa roun bon èkzanp. b) Kouman roun jenn frè pouvé sa roun èkzanp ‘annan fason i ka palé’ ?
16 Annan 1 Timothée 4:12, Pòl ka bay senk fason roun frè pouvé sa roun bon èkzanp. Si to sa roun jenn frè, pran tan étidyé sa senk bagaj-ya. Parèkzanp, imajiné to lé sa roun bon èkzanp « annan fason to ka palé ». Réfléchi asou sa to pouvé di pou bay ròt-ya fòrs. Si to ka rété koté to papa ké to manman toujou, ès to pouvé montré yé to rékonésans pou sa yé ka fè pou to pi souvan ? Apré réinyon-yan, ès to pouvé di roun moun ki fè roun sijè sa to té kontan annan so sijè ? Ès to pouvé fè éfòr pou to bay roun répons di topa fason ? Si to ka fè éfòr annan fason to ka palé, ròt-ya ké wè ki to ka divini roun pi bon sèrvitèr Jéova (1 Tim. 4:15).
17. Kisa ki ké idé roun jenn frè rivé fè sa i prévwè fè pou Jéova ? (2 Timothée 2:22).
17 « Pran kouri pou tout anvi jennjan-yan gen, mé kontinyé chaché fè sa ki jis » (li 2 Timothée 2:22). Pòl ankourajé Timoté rété lwen di tousa ki té ké pouvé anpéché l’ fè sa i té prévwè fè pou Jéova épi di tousa ki té ké pouvé gaté so lanmityé ké li. Pitèt to ké randé to kò kont ki to ka pasé tròp tan ka anmizé é ki akoz di sa to pa gen bokou tan pou fè plis pou Jéova. Parèkzanp, doumandé to kò konmyen tan to ka pasé ka fè èspòr, ka alé asou Entèrnèt ouben ka jwé jévidéyo. Ès to pouvé sèrvi roun moso annan sa tan-an pou fè plis pou Jéova é pou ròt-ya ? Pitèt to pouvé bay roun lanmen pou to okipé di sal di Rwayonm-an ouben préché ké roun prézantwar ké to asanblé. Si to ka fè sa, to ké divini zanmi moun ki ké ankourajé to fè plis pou Jéova épi rivé fè sa to prévwè.
TO KA JWENN BÉNÉDIKSYON LÒ TO KA SÈRVI RÒT-YA
18. Poukisa nou pouvé di ki tchò Mark ké Timoté té kontan é ki yé fè roun patché bèl bagaj annan yé lavi ?
18 Mark ké Timoté fè sakrifis pou sèrvi ròt-ya ankò plis é grasa sa, yé tchò té kontan é yé fè roun patché bèl bagaj (Actes 20:35). Pou sèrvi so frè ké sò, Mark vwayajé annan plizyèr koté asou latè-a. I ékri asou lavi ké ministèr Jézi osi. Kanta Timoté, i idé Pòl fè plizyèr asanblé é fè lafwa so frè ké sò vin pi fò. Asiré, Jéova wè tout sakrifis Mark ké Timoté fè pou fè plis pou li é sa fè l’ plézi toubonnman.
19. Poukisa jenn frè-ya divèt kouté konsèy Pòl bay Timoté, é ki bénédiksyon yé ké jwenn grasa sa ?
19 Lò nou ka wè lèt Pòl ékri pou Timoté, nou pouvé di ki i té kontan l’ bokou. Mé a Jéova ki sèrvi Pòl pou ékri sa lèt-ya. Donk, sa i ékri annan sa lèt-ya ka montré ki Jéova kontan zòt bokou, jenn frè-ya. I lé zòt pran plézi adoré l’. Donk, fè tousa zòt pouvé pou swiv konsèy Pòl bay Timoté épi sèrvi ròt-ya ankò plis. Si a sa zòt ka fè, zòt ké gen roun bèl lavi jòdla épi zòt ké ‘tchenbé vré lavi-a [ki ka vini titalò] ké tout zòt fòrs’ (1 Tim. 6:18, 19).
KANTIK 80 « Goûtez et voyez que Jéhovah est bon »
a D. Hiebert, Biblioteca Sacra, avril-jwen 1983
b Kou Pyèr té sa roun moun ki té sansib, sa té fasil pou li èspliké Mark sa Jézi fè é sa i rousanti osi. Pitèt a pou sa, annan so Lévanjil, Mark ka palé souvan di sa Jézi fè ké rousanti (Marc 3:5 ; 7:34 ; 8:12).
c MEN SA NOU KA WÈ ASOU ZIMAJ-YA : Mark ka idé Pòl ké Barnabé pannan yé vwayaj misyonèr. Timoté kontan paské i ka vizité roun asanblé pou ankourajé frè ké sò-ya é pou bay yé fòrs.