Nou frè-ya, ès zòt ka fè tousa zòt pouvé pou zòt divini asistan ?

1. Kouman apot Pòl té ka wè asistan-yan ?

ASISTAN-yan ka fè bagaj ki enpòrtan annan asanblé-ya. Apot Pòl té kontan sa mouché-ya ki té fidèl, i té kontan yé bokou. Parèkzanp, annan lèt i ékri pou frè-ya ki té ka rété Filip, Pòl ka voyé bonjou pou ansyen-yan, mé pou asistan-yan osi (Phil. 1:1).

2. Kisa Luis ka rousanti pas i asistan ?

² Ki yé jenn, ki yé ja gen yé ti laj, roun patché frè ki asistan kontan pas yé pouvé idé asanblé-a. Parèkzanp, Devan divini asistan lò i té gen 18 an. Luis, li menm, divini asistan lò i té gen pasé 50 lannen. Men sa i ka di pou palé di sa roun patché asistan ka rousanti : « Mo asistan, é pou mo, a roun bèl lònò, èspésyalman lò mo ka réfléchi asou tousa frè ké sò-ya annan asanblé-a ka fè pou montré mo ki yé kontan mo ! »

3. Ki késyon nou ké réponn ?

³ Si to batizé mé to pòkò asistan, ès to pouvé éséyé divini asistan ? Kisa ki ké bay to anvi fè sa ? É ki kalité èspirityèl Labib ka doumandé to gen pou to divini asistan ? A sa késyon-yan sa artik-a ké réponn. Mé pou koumansé, annou wè sa roun asistan ka fè.

KISA ROUN ASISTAN KA FÈ ?

4. Kisa roun asistan ka fè ? (gadé zimaj-a osi).

⁴ Roun asistan, a roun frè ki batizé é a lèspri sen ki ka chwazi l’ pou i idé ansyen-yan fè roun patché bagaj enpòrtan annan asanblé-a. Roun ran asistan ka gadé pou tout moun annan asanblé-a gen roun téritwar ké piblikasyon pou préché. Rounòt ran ka idé pou okipé di sal di Rwayonm-an. Ròt ankò la pou rousouvwè frè ké sò-ya pou réinyon-yan ouben ka okipé di mikro-ya é ka mété lanmizik ké vidéyo-ya pannan réinyon-yan. Mé sa ki pi enpòrtan, a ki asistan-yan kontan Jéova é yé ka obéyi so prensip. Anplis di sa, a pa ti kontan yé kontan yé frè ké sò-ya (Mat. 22:37-39). Atò, kouman roun frè ki batizé pouvé divini asistan ?

5. Kisa roun frè pouvé fè pou i divini asistan ?

⁵ Labib ka di ki kalité èspirityèl roun frè divèt gen pou i divini asistan (1 Tim. 3:8-10, 12, 13). Donk, si to lé divini asistan pran tan byen étidyé sa kalité èspirityèl-ya é fè tousa to pouvé pou to gen sa kalité-ya. Mé anvan sa, a pou to byen réfléchi asou sa ki ka bay to anvi divini asistan.

POUKISA TO ANVI DIVINI ASISTAN ?

6. Kisa ki divèt bay to anvi fè tout kalité bagaj pou to frè ké sò-ya ? (Matthieu 20:28 ; gadé zimaj-a anlè prémyé paj-a).

⁶ Pi bon modèl nou gen-an, a Jézi Kris é a lanmou ki té dèyè tousa i té ka fè : lanmou pou so Papa ké lanmou pou moun-yan. A sa lanmou-a ki té ka fè l’ travay rèd épi fè ti bagaj pyès moun pa té lé fè (li Matthieu 20:28 ; Jean 13:5, 14, 15). Si kou Jézi, a lanmou ki dèyè tousa to ka fè, Jéova ké béni to, é i ké idé to gen kalité èspirityèl-ya to divèt gen pou to divini asistan (1 Cor. 16:14 ; 1 Pierre 5:5).

7. Poukisa roun frè pa divèt anvi divini asistan pou ròt-ya poté li anlè ?

⁷ Souvan, annan sa monn-an, moun ka admiré sa-ya ki ka bay yé kò grad. A pa konsa annan òrganizasyon Jéova-a. Roun frè ki ka imité Jézi é ki kontan ròt-ya pa ka chaché koumandé yé é i pa lé yé wè l’ kou roun moun ki enpòrtan. Si yé té ka bay roun moun ki ka krè so kò rèsponsabilité annan asanblé-a, i pa té ké lé fè pyès ti travay Jéova lé i fè pou i pran swen di so brébi ki gen valò. I té ké di ki a pa li ki pou fè sa ti bagaj-ya (Jean 10:12). Jéova pa ké janmen béni éfòr roun frè ka fè pas i lé ròt-ya poté li anlè (1 Cor. 10:24, 33 ; 13:4, 5).

8. Ki konsèy Jézi bay so apot ?

⁸ Détan, menm sa-ya ki té bon zanmi Jézi té lé gen rèsponsabilité, mé a pa té pou bon rézon-yan. Sonjé sa Jak ké Jan, dé apot Jézi, fè roun jou. Yé doumandé li bay yé roun bon plas annan so Rwayonm. Jézi pa félisité yé pou sa. Pasé i fè sa, men sa i èspliké 12 apot-ya : « Sa-la ki lé divini gran divèt sa zòt sèrvitèr, é sa-la ki lé prémyé plas-a divèt èsklav tout moun » (Marc 10:35-37, 43, 44). Si roun frè lé gen rèsponsabilité paské i lé sèrvi so frè ké sò-ya, i ké pouvé idé asanblé-a bokou (1 Thess. 2:8).

KISA TO POUVÉ FÈ POU TO ANVI DIVINI ASISTAN ?

9. Kisa to pouvé fè pou to anvi divini asistan ?

⁹ To kontan Jéova é to lé sèrvi to frè ké sò-ya, asiré pa pitèt. Mé pitèt to pa anvi fè sa roun asistan ka fè. Si a sa, kisa to pouvé fè pou to anvi fè l’ ? Sonjé kouman to tchò ké kontan si to ka fè bagaj pou to frè ké sò-ya. Jézi di : « Nou tchò pi kontan lò nou ka bay ki lò nou ka rousouvwè » (Actes 20:35). É a sa li menm fè osi. Lò i té ka sèrvi ròt-ya, so tchò té kontan toubonnman. To pouvé gen sa men lajwa-a to menm osi.

10. Kouman Jézi montré ki i té kontan sèrvi ròt-ya ? (Marc 6:31-34).

¹⁰ Annou pran roun èkzanp ki ka montré ki Jézi té kontan sèrvi ròt-ya (li Marc 6:31-34). Kou li ké so apot té las, yé té k’alé roun koté yé té ké yé rounso pou yé pozé. Mé roun patché moun rivé anvan yé pas yé té lé Jézi ansényé yé. Jézi té pouvé di yé non paské li ké so apot « pa menm té gen tan pou manjé ». I té pouvé anprann sa moun-yan déztrwa bagaj rounso épi di yé routounen annan yé kaz osi. Mé, kou a lanmou ki té dèyè tousa i té ka fè, i koumansé « anprann yé roun patché bagaj ». É i té « ja ta » lò i fin ansényé yé (Marc 6:35). I pa fè l’ pas i té blijé fè l’, i fè l’ paské i té « gen pityé pou yé ». Kou i té kontan moun, i té anvi ansényé yé. Lò i té ka fè tousa i té pouvé pou idé ròt-ya, so tchò té kontan toubonnman.

11. Kisa Jézi fè pou idé moun-yan ? (gadé zimaj-a osi).

¹¹ Pou idé sa moun-yan, Jézi ansényé yé, mé a pa sa rounso i fè. I bay yé sa yé té bézwen osi. I fè roun mirak pou bay yé manjé é i fè so disip distribiyé sa manjé-a bay yé (Marc 6:41). A konsa i montré so disip kouman yé té pouvé sèrvi ròt-ya. I montré yé osi ki sa kalité travay-a, kou sa asistan-yan ka fè, enpòrtan. Imajiné kouman apot-ya té kontan lò yé idé Jézi distribiyé sa manjé-a jiktan « tout moun manjé plen yé vant » ! (Marc 6:42). A pa sa jou-a rounso Jézi gadé pou ròt-ya anvan i gadé pou so pròp kò. I fè sa pannan tout so lavi asou latè-a (Mat. 4:23 ; 8:16). Jézi té vréman kontan lò i té ka ansényé ròt-ya é lò i té ka pran swen di yé. Atò, to pouvé sir ki, si a ké sa menm mantalité-a to ka fè sa ki fo pou to divini asistan, to menm osi to tchò ké kontan.

12. Poukisa nou pyès pa divèt krè ki nou pa pouvé fè anyen pou asanblé-a ?

¹² Si to ka pansé ki to pa konnèt fè gran bagaj, pa dékourajé. Asiré, to gen sèrten kalité to pouvé sèrvi pou idé annan asanblé-a. Priyè Jéova é li sa Pòl ka di annan 1 Corinthiens 12:12-30. Sa Pòl ka di ka byen montré ki asanblé-a bézwen to é ki to gen valò pou li kou tout ròt sèrvitèr Jéova-ya. Si to pòkò gen tout kalité èspirityèl-ya to divèt gen pou to divini asistan, pa lésé tonbé. Pasé sa, fè tousa to pouvé pou to sèrvi Jéova é pou to idé to frè ké sò-ya. Anplis di sa, to pouvé sir ki ansyen-yan ké bay to bagaj pou fè parapòrta sa to pouvé fè (Rom. 12:4-8).

13. Kisa nou pouvé di asou kalité yé ka doumandé roun asistan gen ?

¹³ Réfléchi asou sa osi : lò to ka gadé, près tout kalité èspirityèl Labib ka di roun asistan divèt gen, a kalité èspirityèl tout krétyen-yan divèt gen ! Pas tout krétyen-yan divèt pròch ké Jéova, divèt kontan bay ròt-ya é divèt viv roun fason ki ka fè Bondjé plézi. Donk, to dèt ja gen près tout kalité yé ka doumandé roun asistan gen. Mé annou wè sa roun frè pouvé fè èspésyalman pou i divini asistan.

SA TO DIVÈT FÈ POU TO DIVINI ASISTAN

14. Kisa sa lé di sa roun moun ki « séryé » ? (1 Timothée 3:8-10, 12).

¹⁴ Annou wè déztrwa kalité èspirityèl yé ka palé annan 1 Timothée 3:8-10, 12 (li). Roun asistan divèt « séryé ». An grèk, lò yé ka di « séryé », sa pouvé lé di osi « ki mérité yé rèspèkté l’ ». Sa pa lé di ki to pa janmen divèt ari ni voyé blag (Eccl. 3:1, 4). Sa lé di ki to divèt travay rèd pou to fè tousa yé ka doumandé to fè. Si tout moun savé ki to sa roun moun yé pouvé fè konfyans, tout asanblé-a ké rèspèkté to.

15. Kisa sa lé di pa ‘bloublou moun ké nou kozé’ ké pa « chaché fè bénéfis roun fason ki malonnèt » ?

¹⁵ Roun asistan pa divèt ‘bloublou moun ké so kozé’. Sa lé di ki i divèt onèt, é i divèt sa roun moun yé pouvé fè konfyans. Lò i ka di roun bagaj, a pou i fè l’ é i pa divèt manti (Prov. 3:32). I pa divèt « chaché fè bénéfis roun fason ki malonnèt ». Sa lé di ki to divèt onèt lò to ka vandé ké achté ouben lò yé ka doumandé to okipé di soumaké frè ké sò-ya ka bay. Sa lé di osi ki roun asistan pa ké profité asou so frè ké sò-ya pou i fè soumaké.

16. a) Kisa roun moun ki ‘rézonab lò i ka bwè diven’ ka fè ? b) Kisa sa lé di gen roun « konsyans ki pròp » ?

¹⁶ Roun asistan divèt ‘rézonab lò i ka bwè diven’. Sa lé di ki i pa divèt bwè tròp é moun pa divèt di ki i sa roun tafyatò. I divèt gen roun « konsyans ki pròp ». Sa lé di ki i divèt obéyi sa Jéova ka di asou sa ki bon ké sa ki mové. Kou so konsyans pròp, menmsi i pa parfè, i pouvé gen roun bon lanmityé ké Jéova é sa ka pèrmèt li gen lapè annan so tchò.

17. Kisa sa lé di « montré sa yé konnèt fè » ? (1 Timothée 3:10 ; gadé zimaj-a osi).

¹⁷ Roun asistan divèt ‘montré sa i konnèt fè’. Sa lé di ki i ja ka montré ki yé pouvé bay li rèsponsabilité. A pou sa, lò ansyen-yan ka bay to roun bagaj pou fè, a pou to byen swiv sa yé ka di to fè ké sa òrganizasyon-an ka di to fè. A pou to sir ki to byen konprann sa to divèt fè épi konmyen tan to gen pou fè l’. Asanblé-a ké wè ki lò yé ka bay to roun bagaj pou fè, to sa roun moun ki séryé é yé ké wè ki to ka fè progrè. Zòt ki ansyen, pran tan fòrmé frè-ya (li 1 Timothée 3:10). Ès i gen timoun ki gen ant 10 ké 14 lannen ouben mwens é ki batizé annan zòt asanblé ? Ès yé gen labitid étidyé yé rounso é ès yé ka byen préparé yé réinyon ? Ès yé ka partisipé pannan réinyon-yan é ès yé ka préché chak simenn ? Si a sa, bay yé bagaj pou fè soulon yé laj ké sa yé pouvé fè. Si zòt ka fè sa, zòt ké pouvé wè « sa yé konnèt fè ». Konsa, lò yé ké gen ant 17 ké 19 lannen, yé ké pitèt pouvé divini asistan.

18. Lò yé ka di ki « pyès moun pa ka akizé yé di pyès bagaj », kisa sa lé di ?

¹⁸ ‘Pyès moun pa divèt akizé l’ di pyès bagaj.’ Sa lé di ki to pa ka fè pyès mové bagaj pou pyès moun pa akizé to. Détan, moun pouvé manti asou roun krétyen. A sa ki rivé Jézi é i di ki a sa yé té ké fè ké so disip (Jean 15:20). Mé si, kou Jézi, to toujou ka fè sa ki drèt, to ké gen roun bon répitasyon annan asanblé-a (Mat. 11:19).

19. Kisa « maryé ké rounsèl madanm » lé di ?

¹⁹ « Maryé ké rounsèl madanm. » Si to maryé, to divèt rèspèkté sa Jéova di o koumansman. I di ki a sèlman roun mouché ké roun madanm ki pouvé maryé (Mat. 19:3-9). Roun krétyen pa divèt fè pyès bagaj sèksyèl ki pa pròp (Héb. 13:4). Mé, « maryé ké rounsèl madanm », a plis ki sa. Sa lé di pa tronpé so madanm, donk, pa gadé ròt madanm ké anvi non plis (Job 31:1).

20. Kisa ka montré ki roun mouché ka « byen dirijé » so fanmi ?

²⁰ « Byen dirijé yé timoun ké yé pròp fanmi. » Si to gen roun fanmi, a roun rèsponsabilité to gen é a roun bagaj ki divèt enpòrtan pou to. Fè tousa to pouvé pou to étidyé ké to fanmi chak simenn. Préché ké yé souvan. Idé to timoun divini zanmi ké Jéova (Éph. 6:4). Lò roun mouché ka pran byen swen di so fanmi, i ka montré ki i ké pouvé pran swen di asanblé-a (gadé 1 Timothée 3:5).

21. Si to pòkò asistan, kisa to pouvé fè ?

²¹ Nou frè-ya, zòt ki pòkò asistan, pran tan byen réfléchi asou tout konsèy yé ka bay zòt annan sa artik-a épi priyè pou sa. Étidyé kalité èspirityèl-ya asistan-yan divèt gen épi fè tousa zòt pouvé pou zòt gen sa kalité-ya. Pa bliyé kouman zòt kontan Jéova ké zòt frè ké sò-ya. É lésé sa lanmou-a bay zòt anvi sèrvi zòt frè ké sò-ya ! (1 Pierre 4:8, 10). Travay rèd pou zòt divini asistan, konsa zòt tchò ké kontan paské zòt ké sèrvi zòt frè ké sò-ya. A pou Jéova vidé roun lapli bénédiksyon asou zòt pou tout éfòr zòt ka fè pou divini asistan ! (Phil. 2:13).