A pou to gen rékonésans pou wonm-yan Jéova ké Jézi ka sèrvi annan asanblé-a

1. Ki kado Jézi fè nou ?

I PA gen pyès moun ki fè bagaj kou Jézi pou idé ròt-ya. Lò i té asou latè-a, i fè patché mirak pou idé ròt-ya (Luc 9:12-17). Épi pi bèl kado i fè nou-a, a lò i bay so lavi pou nou (Jean 15:13). É dipi i résisité, i ka kontinyé idé nou. Kou i promèt fè l’, i ka doumandé Jéova bay nou so lèspri sen pou i ansényé nou ké konsolé nou (Jean 14:16, 17, nòt ; 16:13). Anplis di sa, i ka sèrvi nou réinyon-yan pou bay nou sa nou bézwen pou fè disip asou tout latè-a (Mat. 28:18-20).

2. Lò Éphésiens 4:7, 8 ka di ki Jézi « fè nou kado plizyèr wonm », di kimoun yé ka palé ?

² Annou palé di rounòt kado Jézi ka fè nou. Apot Pòl di ki lò Jézi monté laro syèl-a, « i fè nou kado plizyèr wonm » (li Éphésiens 4:7, 8). Pòl di ki Jézi bay sa « kado »-ya pou yé fè plizyèr bagaj pou asanblé-a vin pi fò (Éph. 1:22, 23 ; 4:11-13). Jòdla, annan sa kado-ya, i gen asistan-yan, ansyen-yan ké rèsponsab sirkonskripsyon-yana. Sa wonm-yan pa parfè é détan, yé ka tronpé yé kò (Jacq. 3:2). Mé nou Sényèr Jézi Kris ka itilizé yé pou idé nou. Yé sa dé kado Jézi ka bay nou.

3. Bay roun èkzanp pou èspliké kouman nou pouvé idé frè-ya Jéova ké Jézi ka sèrvi annan asanblé-a.

³ Jézi bay sa wonm-yan rèsponsabilité fè asanblé-a vin pi fò (Éph. 4:12). Mé nou tout nou pouvé idé yé pou yé rivé fè sa travay enpòrtan-an. A kou lò nou ka konstrwi roun lasal di Rwayonm. Roun ran ka travay asou chantyé-a é rounòt ran ka idé sa-ya ka travay. Yé ka mennen manjé, matéryèl ouben yé ka idé yé fè ròt bagaj. Menm fason-an, nou tout nou pouvé di ouben fè bagaj pou nou idé asistan-yan, ansyen-yan ké rèsponsab sirkonskripsyon-yan. Annou wè kouman nou pouvé profité di tousa yé ka fè é montré yé ké Jézi, ki bay nou sa « kado »-ya, ki nou kontan yé.

ASISTAN-YAN KA IDÉ RÒT-YA

4. Annan 1^é syèk-a, ki kalité bagaj asistan-yan té ka fè pou idé asanblé-a ?

⁴ Annan 1^é syèk-a, roun ran frè té ka divini asistan (1 Tim. 3:8). Nou pouvé pansé ki a di yé Pòl té ka palé lò i di ki roun ran té ka « idé ròt-ya », sa lé di ki yé té ka fè bagaj asanblé-a té bézwen (1 Cor. 12:28). Asistan-yan té ka okipé di bagaj enpòrtan annan asanblé-a pou ansyen-yan té pouvé mété yé lidé asou ansèyman-an épi okipé di brébi-ya. Parèkzanp, pitèt yé té ka idé sa-ya ki té ka kopyé Ékritir-ya ouben yé té ka achté matéryèl yé té bézwen.

5. Kisa asistan-yan ka fè pou idé asanblé-a jòdla ?

⁵ Annou wè sèrten bagaj asistan-yan ka fè pou idé asanblé-a jòdla (1 Pierre 4:10). Souvan, yé ka okipé di kont asanblé-a ké di téritwar-ya é yé ka koumandé piblikasyon-yan pou asanblé-a. Pannan réinyon-yan, yé ka okipé di zafè odyo ké vidéyo-a, yé annan sèrvis akèy-a, é yé ka bay roun lanmen pou okipé di lasal di Rwayonm-an. Tousa enpòrtan pou tout bagaj byen pasé annan asanblé-a (1 Cor. 14:40). Roun ran annan yé ka fè diskour pannan réinyon Vie et ministère-a, yé ka fè diskour piblik é yé ka travay ansanm ké rèsponsab group prédikasyon-yan. É détan, asistan ki gen èspéryans ka alé ké ansyen-yan lò yé k’alé wè frè ké sò pou ankourajé yé.

6. Poukisa nou gen rékonésans pou nou asistan-yan ?

⁶ Kisa sèrten frè ké sò di asou bèl bagaj asistan-yan ka fè annan asanblé-a ? Men sa Beberlyb, roun sò ki ka rété Bolivi ka di : « Grasa nou asistan-yan mo ka byen profité di réinyon-yan, mo pouvé chanté, réponn pannan réinyon-yan, kouté frè-ya ka fè diskour é mo ka anprann bokou bagaj ké vidéyo-ya ké zimaj-ya. Yé ka fè sa ki fo pou anyen pa rivé nou é grasa yé, roun ran pouvé kontinyé swiv yé réinyon dipi yé kaz. Apré réinyon-yan, yé ka pran douvan pou nétwayé lasal-a, yé ka okipé di kont asanblé-a é yé ka fè sa ki fo pou nou gen piblikasyon nou bézwen. Mo ka di yé mèrsi bokou pou tousa yé ka fè ! » Men sa Leslie, roun sò so mari ansyen é ki ka rété Kolonbi, ka di : « Mo mari bézwen asistan-yan idé li pou i fè tousa i gen pou fè annan asanblé-a. Si yé pa té la, i té ké gen plis bagaj pou fè ankò. Yé gen balan é yé toujou paré pou idé. Sa ka fè mo plézi di wè sa. » Nou tout nou gen rékonésans pou tousa nou asistan-yan ka fè (1 Tim. 3:13).

7. Kouman nou pouvé montré ki nou gen rékonésans pou nou asistan-yan ? (gadé zimaj-a osi).

⁷ Sa byen di gen rékonésans pou sa asistan-yan ka fè. Mé men konsèy Labib ka bay nou : « A pou zòt montré zòt gen rékonésans » (Col. 3:15). Krzysztof, roun ansyen ki ka rété Fenlann, ka èspliké kouman i ka di yé mèrsi : « Mo ka voyé yé roun kart ouben roun mésaj koté mo ka mété roun vèrsé é mo ka byen èspliké yé kouman yé ankourajé mo ouben poukisa mo kontan sa yé ka fè. » Pascal ké Jael, ki ka rété an Nouvèl Kalédoni, ka priyè èspésyalman pou asistan-yan. Pascal ka di : « Dipi roun ti moman, nou ka priyè Jéova bokou pou nou asistan-yan, nou ka di l’ mèrsi pou yé é nou ka doumandé l’ idé yé. » Jéova ka kouté sa kalité lapriyè-ya é a tout asanblé-a ki ka profité di sa (2 Cor. 1:11).

ANSYEN-YAN « KA TRAVAY RÈD ANMITAN NOU »

8. Poukisa Pòl té pouvé di ki ansyen-yan annan 1^é syèk-a té ka « travay rèd » ? (1 Thessaloniciens 5:12, 13).

⁸ Annan 1^é syèk-a, ansyen-yan té « ka travay rèd » pou asanblé-a (li 1 Thessaloniciens 5:12, 13 ; 1 Tim. 5:17). Yé té ka « gidé » li : a yé ki té ka dirijé réinyon-yan é yé té ka pran désizyon pou asanblé-a. É yé té ka « avèrti » yé frè ké sò : ké tout yé lanmou, yé té ka bay yé konsèy pou protéjé asanblé-a (1 Thess. 2:11, 12 ; 2 Tim. 4:2). Yé té ka travay rèd osi pou bay yé fanmi sa yé té bézwen pou viv, é yé té ka fè sa ki fo pou yé pròp lafwa ké yé lanmityé ké Jéova rété fò (1 Tim. 3:2, 4 ; Tite 1:6-9).

9. Ki rèsponsabilité ansyen-yan gen jòdla ?

⁹ Ansyen-yan gen bokou bagaj pou fè. Yé sa dé évanjélizatèr (2 Tim. 4:5). Yé ka òrganizé bagaj-ya pou asanblé-a préché annan so téritwar, yé ka bay nou roun bon èkzanp, yé ka préché ké balan é yé ka idé nou pou nou vin vayan annan zafè préché ké ansényé. Yé sa dé jij osi é lò yé ka jijé yé ka fè l’ ké mizérikòrd é yé pa ka fè pyès préférans. Lò roun krétyen ka fè roun péché ki grav, yé ka idé l’ pou i rouvin byen ké Jéova toupannan yé ka fè sa ki fo pou asanblé-a rété pròp (1 Cor. 5:12, 13 ; Gal. 6:1). Mé pi enpòrtan-an, yé sa dé bèrjé (1 Pierre 5:1-3). Yé ka byen préparé yé kò anvan yé fè diskour, yé ka fè tousa yé pouvé pou yé anprann konnèt chak moun annan asanblé-a é yé k’alé wè frè ké sò-ya pou ankourajé yé. Anplis di tousa ké ròt bagaj yé ka fè ankò, roun ran annan yé ka bay roun lanmen pou konstrwi épi okipé di lasal di Rwayonm-yan, yé ka idé pou òrganizé asanblé réjyonal-ya é yé annan comité de liaison hospitalier ouben annan group ki ka vizité moun malad. Ansyen-yan ka vréman travay rèd pou nou !

10. Poukisa nou pouvé gen rékonésans pou nou ansyen-yan ?

¹⁰ Jéova di ki plizyèr bèrjé té ké pran swen di nou é ki nou ‘pa té ké tranblé ankò afòrs nou pè’ (Jér. 23:4). A sa Johanna, roun sò ki ka rété Fenlann, wè lò so manman tonbé malad. I ka di : « Sa rèd pou mo di ròt-ya sa mo ka rousanti, mé roun ansyen mo pa té djè konnèt pran pasyans ké mo, i priyè ké mo é i fè mo konprann ki Jéova kontan mo. Mo ka bliyé sa i di mo, mé mo pa ké jen bliyé ki apré sa mo pa té pè ankò. Mo sir ki Jéova fè l’ vin wè mo jiskont lò mo té bézwen. » Kouman ansyen-yan annan to asanblé ja idé to ?

11. Kouman nou pouvé montré nou ansyen-yan ki nou gen rékonésans pou sa yé ka fè ? (gadé zimaj-a osi).

¹¹ Jéova lé nou montré ansyen-yan ki nou gen bokou rékonésans pou « travay yé ka fè »-a (1 Thess. 5:12, 13). Henrietta, ki ka rété an Fenlann li menm osi, ka di : « Ansyen-yan ka pran plézi idé nou, mé sa pa lé di ki yé gen plis tan ké plis fòrs ki ròt frè ké sò-ya ouben ki yé pa gen problèm. Détan, mo ka di yé : “To sa roun bon ansyen, to savé sa ?” » Kanta Sera, roun sò ki ka rété Tirki, men sa i ka di : « Ansyen-yan bézwen ankourajman pou yé pouvé kontinyé fè yé travay. Donk, nou pouvé ékri roun ti kart pou yé, envité yé manjé ouben préché ké yé. » Ès to kontan èspésyalman sa roun ansyen annan to asanblé ka fè ? Atò, doumandé to kò kouman to pouvé montré li ki to kontan sa i ka fè (1 Cor. 16:18).

RÈSPONSAB SIRKONSKRIPSYON-YAN KA FÈ ASANBLÉ-YA VIN PI FÒ

12. Kisa Jézi fè pou fè asanblé-ya annan 1^é syèk-a vin pi fò ? (1 Thessaloniciens 2:7, 8).

¹² Jézi fè asanblé-a « kado plizyèr wonm » pou idé l’ rounòt fason ankò. I sèrvi ansyen-yan ki té Jérizalèm pou voyé Pòl, Barnabé ké ròt frè vizité chak asanblé (Actes 11:22). Pou fè kisa ? I té lé ki yé fè asanblé-ya vin pi fò, menm fason asistan-yan ké ansyen-yan ka fè l’ (Actes 15:40, 41). Sa wonm-yan fè bokou sakrifis pou yé té pouvé fè sa travay-ya, é détan, yé manké mouri pou ansényé ké ankourajé ròt-ya (li 1 Thessaloniciens 2:7, 8).

13. Ki rèsponsabilité rèsponsab sirkonskripsyon-yan gen ?

¹³ Rèsponsab sirkonskripsyon-yan ka vwayajé bokou. Sèrten annan yé ka fè pasé san kilomèt lò yé ka lésé roun asanblé pou alé annan rounòt. Chak simenn, roun rèsponsab sirkonskripsyon ka fè plizyèr diskour, i k’alé ankourajé frè ké sò-ya é i ka dirijé roun réinyon ké pyonyé-ya, roun réinyon ké ansyen-yan ké plizyèr réinyon pou prédikasyon-yan. I ka préparé diskour osi é i ka òrganizé asanblé sirkonskripsyon-yan ké asanblé réjyonal-ya. I ka fòrmé pyonyé-ya annan lékòl pou sèrvis pyonyé-a é i ka òrganizé roun réinyon èspésyal ké pyonyé-ya annan sirkonskripsyon-an. Anplis di tousa, Bétèl-a ka doumandé l’ fè ròt bagaj enpòrtan osi é détan, i divèt fè l’ vit.

14. Poukisa nou pouvé gen rékonésans pou nou rèsponsab sirkonskripsyon-yan ?

¹⁴ Ki bénédiksyon bèl travay rèsponsab sirkonskripsyon-yan ka fè ka mennen pou asanblé-a ? Men sa roun frè ki ka rété Tirki ka di asou plizyèr rèsponsab sirkonskripsyon : « Chak fwa yé ka vini, sa ka ankourajé mo pran plis tan pou idé mo frè ké sò. Mo kontré ké roun patché rèsponsab sirkonskripsyon, mé yé pyès pa janmen fè mo santi ki yé té tro okipé ouben ki yé pa té lé palé ké mo. » Roun jou, Johanna, nou ja palé anvan, té ka préché ké roun rèsponsab sirkonskripsyon é yé pa wè pyès moun. Magré sa, i ka di : « Mo pa ké janmen bliyé sa lajournen-an. Mo dé sò té fin déménajé, é mo tchò té gro. Mé, rèsponsab sirkonskripsyon-an ankourajé mo bokou. I idé mo konprann ki lò to ka sèrvi Jéova, a pa tout-tan to pouvé rété òbò to fanmi ouben to zanmi. Parkont, annan monn nouvo-a nou ké gen plis tan, nou ké pouvé wè yé pi souvan. » Roun patché frè ké sò vin kontan yé rèsponsab sirkonskripsyon-an pas i idé yé (Actes 20:37 – 21:1).

15. a) Dapré 3 Jean 5-8, kouman nou pouvé montré ki nou gen rékonésans pou travay rèsponsab sirkonskripsyon-yan ka fè ? (gadé zimaj-a osi). b) Poukisa nou divèt montré nou rékonésans pou madanm frè-ya ki ka travay rèd annan asanblé-ya, é kouman nou pouvé fè l’ ? (gadé karé-a « Annou pa bliyé yé madanm »).

¹⁵ Apot Jan ankourajé Gayis byen rousouvwè frè-ya ki té ka pasé épi ‘lò yé té ké pati, idé yé gen sa yé té ké bézwen é fè l’ roun fason ki ka fè Bondjé plézi’ (li 3 Jean 5-8). Nou menm osi, nou pouvé swiv so konsèy lò nou ka envité rèsponsab sirkonskripsyon-an manjé ouben lò nou ka soutni tousa i ka òrganizé pou asanblé-a préché. Leslie, nou ja palé anvan, ka montré so rékonésans rounòt fason. Men sa i ka di : « Mo ka doumandé Jéova ba yé tousa yé bézwen. Mo ké mo mari, nou ka ékri lèt pou yé, pou fè yé savé ki nou kontan lò yé la. » Pa bliyé ki rèsponsab sirkonskripsyon-yan sa dé moun kou tout moun. Détan, yé ka tonbé malad, yé pouvé enkyèt bokou ouben menm dékourajé. Pitèt sa to ké di pou ankourajé l’ ouben ti kado to ké bay li ké sa répons i té ka antann lò i priyè ? (Prov. 12:25).

NOU BÉZWEN FRÈ POU TRAVAY ANNAN ASANBLÉ-A

16. Ki késyon frè-ya pouvé pozé yé kò ? (Proverbes 3:27).

¹⁶ Toupatou asou latè-a, nou bézwen plis frè pou travay annan asanblé-ya. Atò, si to sa roun frè, doumandé to kò : « Ès mo pouvé idé sa-ya ki bézwen yé idé yé ? » (li Proverbes 3:27). Ès to lé fè tousa to pouvé pou to divini asistan ? Si to ja asistan, ès to paré fè tousa to pouvé pou to divini roun ansyen épi idé to frè ké sò-yac ? Ès to pouvé chanjé déztrwa bagaj annan to lavi pou to pouvé fè Lékòl pou évanjélizatèr Rwayonm-an ? Sa fòrmasyon to ké ganyen ké pèrmèt Jézi itilizé to ankò pi byen. Si to ka santi ki to pa ké rivé fè tout sa bagaj-ya, priyè Jéova. Doumandé l’ bay to so lèspri sen pou to rivé fè tousa yé ka bay to fè (Luc 11:13 ; Actes 20:28).

17. Kisa frè-ya Jézi Kris, nou Rwa, chwazi pou travay annan asanblé-ya ka montré nou asou li ?

¹⁷ Frè-ya Jézi ka chwazi pou travay annan asanblé-ya ka montré ki a li ki ka dirijé nou pannan sa dèrnyé jou-ya (Mat. 28:20). Nou gen bokou rékonésans pou nou Rwa Jézi ki kontan nou é ki kontan bay. I savé sa nou bézwen é i ka bay nou frè pou idé nou. Donk, gadé sa to pouvé fè pou montré sa wonm-yan ki ka travay rèd ki to gen rékonésans pou sa yé ka fè. É pa janmen bliyé di Jéova mèrsi, pas « tout bèl bagaj ké tout kado ki parfè » ka vini di li (Jacq. 1:17).