« Aplé ansyen-yan »

1. Kouman Jéova montré ki so brébi-ya gen bokou valò pou li ?

BRÉBI Jéova-ya gen bokou valò pou li. I achté yé ké disan Jézi é i bay ansyen-yan rèsponsabilité okipé di yé (Actes 20:28). Bondjé mété Jézi chèf asanblé-a. Yé toulédé lé ansyen-yan janti ké brébi-ya. Ansyen-yan ka swiv sa Jézi ka di é yé ka idé brébi-ya kontinyé gen roun lanmityé ki fò ké Jéova (Is. 32:1, 2).

2. Di kimoun Jéova ka okipé èspésyalman ? (Ézéchiel 34:15, 16).

² Jéova ka gadé pou tout so brébi-ya, mé i ka okipé èspésyalman di sa-ya ki ka soufri. Roun ran ka soufri pitèt paské yé fè roun péché é Jéova ka sèrvi ansyen-yan pou idé yé (li Ézéchiel 34:15, 16). Mé i lé ki nou osi nou alé wè ansyen-yan lò nou bézwen. I lé nou priyè l’ ké tout nou tchò pou doumandé l’ idé nou. Mé anplis di sa, i lé nou alé wè ansyen-yan pou yé idé nou (Éph. 4:11, 12).

3. Kisa nou ké wè annan sa artik-a, é kouman sa ké idé nou ?

³ Annan sa artik-a, nou ké wè plis bagaj asou fason Jéova ka sèrvi ansyen-yan pou idé sa-ya yé lanmityé ké Jéova fébli. Nou ké réponn sa késyon-yan : Kitan nou divèt doumandé ansyen-yan idé nou ? Poukisa nou divèt fè sa ? É kouman ansyen-yan ka idé nou ? Menmsi jòdla nou pa gen gro éprèv, répons sa késyon-yan ké fè nou gen plis rékonésans pou ansyen-yan. Anplis di sa, sa répons-ya ké pitèt sové nou roun jou.

KITAN NOU DIVÈT « APLÉ ANSYEN-YAN » ?

4. Kouman nou savé ki Jacques 5:14-16, 19, 20 ka palé di roun moun ki bézwen viré byen ké Jéova ? (gadé zimaj-ya osi).

⁴ Disip Jak èspliké kouman Jéova ka sèrvi ansyen-yan pou idé nou. Men sa i ékri : « Ès i gen roun moun ki malad ? A pou i aplé ansyen-yan ki annan asanblé-a pou yé vini wè l’ » (li Jacques 5:14-16, 19, 20). Annan sa vèrsé-ya, Jak ka palé di roun moun ki bézwen viré byen ké Jéova. Nou ka konprann sa pas i pa ka di moun-an alé wè roun dòktèr, i ka di l’ alé wè ansyen-yan. Anplis di sa, Jak ka èspliké ki moun-an ki malad ka géri lò Bondjé ka pardonnen so péché. Pou roun moun ki malad viré byen, i divèt alé wè roun dòktèr, di li sa ki pa k’alé épi fè sa dòktèr-a di li fè. Menm fason-an, si nou bézwen viré byen ké Jéova, nou divèt palé ké ansyen-yan, èspliké yé nou sitiasyon épi swiv konsèy yé ka bay nou annan Labib.

5. Kouman nou pouvé savé si nou lanmityé ké Jéova vin fèb ?

⁵ Annan Jacques chapit 5, Jak ka ankourajé nou alé wè ansyen-yan lò nou ka santi ki nou lanmityé ké Jéova ka fébli. Mé sa enpòrtan di doumandé yé idé nou anvan nou fè roun bagaj Jéova pa kontan. Labib ka avèrti nou : si nou pa ka panga, nou pouvé pansé ki nou ka fè Jéova plézi alòr ki a pa sa (Jacq. 1:22). A sa krétyen-yan ki té annan asanblé Sard té ka pansé osi. Mé Jézi di yé ki yé pa té ka fè Jéova plézi ankò (Rév. 3:1, 2). Pou nou savé si nou lanmityé ké Jéova fò, nou pouvé konparé sa nou té ka rousanti pou Jéova lò nou fin batizé ké sa nou ka rousanti pou li jòdla (Rév. 2:4, 5). Annou doumandé nou kò : « Ès mo ka pran plézi li Labib ké réfléchi asou l’ kou anvan ? Ès mo k’alé annan tout réinyon-yan ? Ès mo ka préparé tout mo réinyon ? Ès mo gen balan pou préché kou anvan ? Ès mo ka lésé anmizman ké soumaké a yé plas ? » Si nou ka di non pou roun annan sa késyon-yan, sa pouvé lé di ki nou lanmityé ké Jéova vin fèb. É si nou pa ka fè anyen pou sa, bagaj-ya pouvé vin pi mové ankò. Mé si nou pa ka rivé fè nou lanmityé ké Jéova vin pi fò nou rounso ouben si nou ja fè roun bagaj nou savé Jéova pa kontan, nou divèt alé wè ansyen-yan.

6. Kisa roun moun ki fè roun péché ki grav divèt fè ?

⁶ I gen péché ki tèlman grav ki ansyen-yan pouvé tiré moun-an ki fè sa péché-a annan asanblé-a si i pa ka répanti. Si nou fè roun péché konsa, nou divèt alé wè roun ansyen (1 Cor. 5:11-13). Roun moun ki fè roun péché ki grav pa pouvé viré byen ké Jéova tousèl. I bézwen yé idé l’. Pou Jéova pardonnen l’ grasa ranson-an, i divèt ‘fè bagaj ki ka montré ki i ka répanti’ (Actes 26:20). Parèkzanp, i divèt alé wè ansyen-yan.

7. Ès a sa-ya ki fè roun péché rounso ki bézwen ansyen-yan idé yé ?

⁷ A pa sa-ya ki fè roun péché ki grav rounso ansyen-yan ka idé. Yé ka idé sa-ya osi ki ka briga ké vyé anvi yé gen é ki ka santi ki yé pa pouvé tchenbé ankò (Actes 20:35). Pitèt sa pi rèd pou to briga ké vyé anvi to gen si anvan to divini krétyen to té ka pran ladròg, to té ka gadé pòrnografi ouben to té ka fè vyé bagaj sèksyèl. Mé to pa blijé briga to rounso. To pouvé désidé palé ké roun ansyen. I ké pran tan kouté to. I ké bay to bon konsèy é i ké fè to sonjé ki si to pa ka fè vyé bagaj to anvi fè-a, to ké fè Jéova plézi (Eccl. 4:12). Pitèt to dékourajé pas to gen vyé anvi toujou. Atò, ansyen-an ké fè to sonjé ki Jéova kontan pas to doumandé yé idé to. Sa ka montré ki to pa ka konté asou to pròp fòrs é ki to lé fè Jéova plézi (1 Cor. 10:12).

8. Pou ki kalité péché nou pa bézwen alé wè ansyen-yan ?

⁸ Nou pa bézwen alé wè ansyen-yan chak fwa nou fè roun bagaj ki pa bon. Parèkzanp, si to ka di roun frè ouben roun sò roun bagaj ki ka fè l’ lapenn ouben to ka faché ké li, pasé to alé wè roun ansyen, to pouvé swiv sa Jézi di épi alé fè lapè ké to frè ouben to sò (Mat. 5:23, 24). To pouvé fè réchèrch osi pou to anprann kouman to pouvé gen plis dousèr, pasyans épi kontrolé to kò pi byen. Si to pa ka rivé ranjé to problèm, to pouvé doumandé ansyen-yan idé to. Annan lèt Pòl ékri pou frè-ya ki té Filip, i doumandé roun frè idé Évodi ké Sentich tonbé dakò. Roun ansyen annan to asanblé pouvé fè menm bagaj-a pou to (Phil. 4:2, 3).

POUKISA NOU DIVÈT « APLÉ ANSYEN-YAN » ?

9. Poukisa nou divèt alé wè ansyen-yan menmsi nou ronté ? (Proverbes 28:13).

⁹ Lò nou fè roun péché ki grav ouben nou ka santi ki nou pa ké rivé tchenbé ankò, nou divèt gen lafwa ké kouraj pou nou doumandé ansyen-yan idé nou. Mé menmsi nou ronté, sa pa divèt anpéché nou alé wè ansyen-yan. Poukisa ? Paské Jéova mété ansyen-yan pou yé idé nou kontinyé gen roun lanmityé ki fò ké li. Donk, lò nou ka palé pou ansyen-yan, nou ka montré ki nou ka fè l’ konfyans é ki nou ka obéyi l’. Nou ka rékonnèt ki nou bézwen yé idé nou pou nou kontinyé fè sa ki bon (Ps. 94:18). É si nou fè roun péché ki grav, mé nou di sa nou fè épi nou arété fè sa péché-a, Jéova ké pardonnen nou (li Proverbes 28:13).

10. Kisa ki pouvé rivé si nou ka éséyé séré nou péché ?

¹⁰ Donk, lò nou ka doumandé ansyen-yan idé nou lò nou bézwen, nou ka jwenn roun patché bénédiksyon. Parkont, si nou ka éséyé séré nou péché, nou sitiasyon ké vin pi mové. Pannan roun tan, rwa David pa di pyès moun sa i té fè. A pou sa i té tris pou mouri é i té malad pas i té savé ki i té gaté so lanmityé ké Jéova (Ps. 32:3-5). Lò nou gen roun maladi ouben roun bobo, pi nou ké antann pou okipé di sa, pi nou ké soufri. Menm fason-an, si nou fè roun péché ki grav é nou pa ka doumandé ansyen-yan idé nou, nou ka riské pédi nou lanmityé ké Jéova. A pou sa i ka di nou : « Annou ranjé tout bagaj ansanm » (Is. 1:5, 6, 18). Nou ké roudivini zanmi Jéova si nou ka palé ké ansyen-yan pas a yé i ka sèrvi pou idé nou.

11. Si nou ka séré roun péché ki grav, kisa sa pouvé fè ròt-ya ?

¹¹ Si nou fè roun péché ki grav é nou ka séré sa nou fè-a, sa pouvé fè ròt-ya soufri. Nou pouvé anpéché lèspri sen Bondjé fè so travay annan asanblé-a épi bay nou frè ké sò-ya problèm (Éph. 4:30). Si nou ka vin savé ki roun frè ouben roun sò fè roun péché ki grav, nou divèt ankourajé l’ alé wè ansyen-yana. Si nou ka séré so péché, nou ka péché kont Jéova nou menm osi (Lév. 5:1). Si i pa ka alé di ansyen-yan lavérité, kou nou kontan Jéova, nou ké fè l’ nou menm. Lò nou ka fè sa, nou ka protéjé nou frè ké nou sò annan asanblé-a, é nou ka idé sa-la ki fè roun péché viré byen ké Jéova.

KOUMAN ANSYEN-YAN KA IDÉ NOU ?

12. Kouman ansyen-yan ka idé sa-ya ki bézwen viré byen ké Bondjé ?

¹² Labib ka di ki ansyen-yan divèt idé sa-ya ki bézwen viré byen ké Jéova (1 Thess. 5:14). Si to fè roun péché, ansyen-yan ké pozé to déztrwa késyon pou konprann sa to ka rousanti ké sa to ka pansé (Prov. 20:5). Sa pouvé rèd pou to di palé ké yé. Pitèt to timid ouben to ronté é to pa ka rivé di sa ki pasé. Mé to pouvé idé yé si to pa ka séré anyen pou yé. Pa pè « palé san réfléchi » (Job 6:3). Ansyen-yan pa ké kouri jijé to pou sa to di. Yé ké pran tan kouté to é yé ké chaché konnèt tousa yé bézwen konnèt anvan yé bay to roun konsèy (Prov. 18:13). Yé savé ki pran swen di troupo Bondjé-a ka pran tan. Donk yé savé ki détan, to ké bézwen palé ké yé plizyèr fwa anvan yé rivé idé to.

13. Ki bénédiksyon nou ké jwenn lò ansyen-yan ké priyè pou nou é lò yé ké bay nou konsèy ? (gadé zimaj-ya osi).

¹³ Anplis di sa, ansyen-yan pa ké fè pyès bagaj pou to santi to kò ankò pi mal akoz di sa to fè. Yé ké pito priyè pou to é pitèt to ké rété èstébékwé lò to ké wè ki yé lapriyè « pwisan ». Yé ké fè rounòt bagaj pou to osi. Yé ké « mété dilwil asou [to] annan non Jéova » (Jacq. 5:14-16). Sa « dilwil »-a, a lavérité ki annan Paròl Bondjé-a. Ansyen-yan ké sèrvi plizyèr vèrsé ki ké konsolé to é ki ké idé to viré byen ké Jéova (Is. 57:18). Konsèy yé ké bay to ké idé to pou to ankò pi désidé fè sa ki byen. Grasa yé, to ké tandé Jéova di to : « Men chimen-an. Swiv li » (Is. 30:21).

14. Dapré Galates 6:1, kouman ansyen-yan ka idé krétyen-yan ki « fè roun bagaj [yé] pa té divèt fè » ? (gadé zimaj-ya osi).

¹⁴ (Li Galates 6:1.) Roun krétyen ki ka « fè roun bagaj i pa [...] divèt fè », a roun krétyen ki pa ka swiv sa Jéova ka di asou sa ki bon ké sa ki pa bon. Lò yé ka di ki i fè « roun bagaj i pa té divèt fè », sa lé di ki i pitèt pran roun mové désizyon ouben i fè roun péché ki grav. Kou ansyen-yan kontan l’, yé ké éséyé « ralé sa moun-an mété l’ asou bon chimen-an [...] ké dousèr ». Annan lang ébré-a, lò yé té ka di « ralé sa moun-an mété l’ asou bon chimen-an », yé té ka palé di fason roun dòktèr té ka roumété zo roun moun byen drèt pas i té kasé, pou zo-a byen géri. Lò roun bon dòktèr ka éséyé fè sa, i ka fè sa ki fo pou moun-an pa soufri tròp. Menm fason-an, lò ansyen-yan ka idé roun moun ki fè roun bagaj ki pa bon, kou yé savé ki moun-an ja ka soufri, yé ka éséyé pa fè l’ soufri ankò plis. Yé pa ka bliyé nonplis ki Labib ka di yé « véyé [yé] kò ». Lò yé ka idé roun frè ouben roun sò viré byen ké Jéova, yé ka sonjé ki yé menm osi yé pa parfè, ki yé menm osi yé pouvé fè roun bagaj ki pa bon. Donk, yé pa ka fè kousidiré yé pi fò pasé li ouben yé pi jis pasé li é yé pa rèd ké li. Yé pito ka fè tousa yé pouvé pou yé konprann sa i ka rousanti (1 Pierre 3:8).

15. Kisa nou pouvé fè si nou gen roun problèm ?

¹⁵ Nou pouvé fè nou ansyen-yan konfyans. Jéova anprann yé ki yé pa divèt répété sa moun ka di yé. I anprann yé sèrvi Labib pou bay moun konsèy pasé yé di sa yé menm ka pansé é i anprann yé ki yé divèt kontinyé idé nou tchenbé magré tout problèm nou ka jwenn (Prov. 11:13 ; Gal. 6:2). Yé tout diféran. Yé chak gen yépa kalité é roun ran gen plis èspéryans. Mé nou pouvé alé palé ké yé tout. Nou pa ké alé wè roun ansyen dèyè ròt jiktan nou trapé roun ki ké di nou sa nou anvi tandé. Si nou té ka fè sa, nou té ké kou sa-ya ki pi kontan moun « karésé yé zorè » pasé yé kouté « bon ansèyman-an » ki ka vini di Paròl Bondjé-a (2 Tim. 4:3). Ansyen nou ké palé pou li-a ké pitèt doumandé nou si nou ja alé wè ròt ansyen épi ki konsèy yé bay nou. É kou i konnèt so limit, pitèt li menm osi ké alé wè rounòt ansyen pou i bay li roun konsèy (Prov. 13:10).

SA NOU TOUT DIVÈT FÈ

16. Kisa nou tout divèt fè ?

¹⁶ A toulong ansyen-yan ka gadé pou nou pas nou sa brébi Bondjé-ya, mé yé pa ka di nou sa nou divèt fè. Nou tout divèt montré Jéova annan sa nou ka di ké sa nou ka fè touléjou ki nou kontan l’ é ki nou lé fè l’ plézi (Rom. 14:12). É grasa li, nou pouvé rété fidèl ké li menmsi sa rèd. Donk, pasé ansyen-yan di nou sa nou divèt fè, yé ka sèrvi Paròl Jéova-a pou montré nou sa i ka pansé. Si nou ka kouté konsèy yé ka bay nou ki ka vini di Labib, nou ké anprann « byen réfléchi » é nou ké pran bon désizyon (Héb. 5:14).

17. Kisa nou divèt byen désidé fè ?

¹⁷ Nou ka di Jéova mèrsi paské i ka pran swen di nou ! Menm fason roun bèrjé ka pran swen di so brébi, Jéova voyé Jézi, « bon bèrjé-a », asou latè-a pou i péyé ranson-an pou nou pouvé gen lavi pou tout-tan (Jean 10:11). É grasa ansyen-yan ki annan asanblé-ya, Jéova fè sa promès-a fèt : « Mo ké bay zòt bèrjé ki ka fè mo volonté é yé ké bay zòt konésans, é yé ké idé zòt byen konprann tout bagaj » (Jér. 3:15). Lò nou ka santi ki nou lafwa ka vin fèb ouben ki nou bézwen ranjé nou lanmityé ké Jéova, annou pa ézité alé wè sa bèrjé-ya. Annou byen désidé profité di sa bèl dispozisyon Jéova mété pou nou-a : ansyen-yan.