ARTIK POU ÉTIDYÉ 34
KANTIK 107 Annou imité lanmou Bondjé
Kouman ansyen-yan ka montré ki yé kontan é ki yé ka pran pityé pou sa-ya ki péché
« Kou Bondjé bon, i lé idé to répanti » (ROM. 2:4).
SA NOU KÉ ANPRANN
Nou ké wè sa ansyen-yan ka fè pou idé roun moun annan asanblé-a ki fè roun péché ki grav.
1. Kisa ki pouvé idé roun moun ki fè roun péché ki grav répanti ?
ANNAN artik nou fin wè-a, nou wè sa Pòl di asanblé Korent fè lò roun moun annan asanblé-a fè roun péché ki té grav. Kou sa moun-an pa té lé répanti, yé tiré l’ annan asanblé-a. Mé kou vèrsé sa artik-a ka apiyé asou-a ka montré l’, Bondjé pouvé idé roun moun répanti (Rom. 2:4). Kouman ansyen-yan pouvé idé roun moun répanti ?
2-3. Kisa pou nou fè si nou savé ki roun frè ouben roun sò fè roun péché ki grav, é poukisa ?
2 Si ansyen-yan pa savé ki roun moun annan asanblé-a fè roun péché ki grav, yé pa pouvé idé l’. Donk, si nou savé ki roun frè ouben roun sò fè roun péché ki grav, sa lé di roun péché ki pouvé fè ki yé ké tiré l’ annan asanblé-a, a pou nou di l’ alé wè ansyen-yan pou yé idé l’ (Is. 1:18 ; Actes 20:28 ; 1 Pierre 5:2).
3 Mé kisa pou nou fè si moun-an ki péché pa lé alé wè ansyen-yan ? Si a sa, nou ké alé wè ansyen-yan nou menm pou yé idé l’. Lò nou ka fè sa, nou ka montré ki nou kontan l’. Nou pa lé pédi nou frè ouben nou sò. Si i ka kontinyé fè sa i ka fè ki pa bon, i ka riské pédi so lanmityé ké Jéova. I ka riské sali répitasyon asanblé-a osi. Donk, kou nou kontan Jéova é kou nou kontan nou frè ouben nou sò, nou ka pran nou kouraj, nou ka fè roun bagaj (Ps. 27:14).
SA ANSYEN-YAN KA FÈ POU IDÉ SA-YA KI FÈ ROUN PÉCHÉ KI GRAV
4. Kisa ansyen-yan lé lò yé k’alé wè roun moun ki fè roun péché ki grav ?
4 Lò roun moun annan asanblé-a ka fè roun péché ki grav, ansyen-yan ka chwazi trwa ansyen pou yé fè sa yé ka aplé roun komitéa. Sa trwa frè-ya divèt rékonnèt yé limit.Yé ké fè tousa yé pouvé pou idé moun-an ki péché répanti, mé yé divèt konprann ki yé pa pouvé fòrsé pyès moun chanjé (Deut. 30:19). Yé divèt asèpté ki a pa tout moun ki péché ki ké réyaji kou rwa David : tout moun pa ké asèpté yé idé yé (2 Sam. 12:13). Roun ran ké pitèt désidé pa kouté Jéova (Gen. 4:6-8). Mé sa ansyen-yan lé, a idé moun-an répanti. Kisa ansyen-yan divèt sonjé lò yé ka kontré ké roun moun ki péché ?
5. Kisa ansyen-yan divèt sonjé lò yé ka alé wè roun moun ki péché ? (2 Timothée 2:24-26 ; gadé zimaj-a osi).
5 Ansyen-yan ka wè moun-an ki péché kou roun brébi ki pédi ki gen bokou valò pou Jéova (Luc 15:4, 6). A pou sa, lò yé ka fè yé réinyon ké li, yé pa rèd ni annan fason yé ka palé ni annan fason yé ka aji ké l’. Yé pa ka di yé kò ki a késyon rounso yé divèt pozé pou savé sa ki pasé. Pasé yé fè sa, yé ka montré yé gen kalité ki marké annan 2 Timothée 2:24-26 (li). Yé ka fè sa ki fo pou yé toujou dous ké janti toupannan yé ka éséyé touché tchò moun-an ki péché.
Kou bèrjé tan-lontan, ansyen-yan ka fè tousa yé pouvé pou trouvé brébi-ya ki pédi (gadé paragraf 5).
6. Kouman ansyen-yan pouvé préparé yé tchò anvan yé fè yé réinyon ké roun moun ki péché ? (Romains 2:4).
6 Ansyen-yan ka préparé yé tchò. Yé toujou ka sonjé sa Pòl di : « Kou Bondjé bon, i lé idé to répanti. » Donk, yé ka éséyé imité fason Jéova ka aji ké sa-ya ki péché (li Romains 2:4). Yé pa janmen ka bliyé ki yé sa dé bèrjé Kris ka dirijé (Is. 11:3, 4 ; Mat. 18:18-20). Anvan yé fè yé réinyon ké moun-an, yé ka priyè é yé ka sonjé sa yé lé pou li : idé l’ répanti. Yé ka fè réchèrch annan Labib ké annan piblikasyon-yan é yé ka doumandé Jéova idé yé byen konprann sitiasyon-an. Épi yé ka désidé sa yé bézwen savé asou moun-an pou yé pi byen konprann sa ki rivé l’ annan so lavi ki fè l’ réfléchi ké aji konsa jòdla (Prov. 20:5).
7-8. Lò ansyen-yan ka palé ké roun moun ki fè roun péché ki grav, kouman yé pouvé imité pasyans Jéova-a ?
7 Ansyen-yan ka imité pasyans Jéova-a. Yé pa ka bliyé fason Jéova aji ké moun-yan ki péché tan-lontan. Annou wè plizyèr èkzanp. Jéova pran so tan pou fè Kayen réfléchi. I di li sa ki té ké rivé l’ si i té ka péché é i èspliké l’ ki i té pouvé viré byen ké li (Gen. 4:6, 7). I fè profèt Natan korijé David é Natan pran roun èkzanp pou touché so tchò (2 Sam. 12:1-7). É i « pa arété », i « pa té ka las » voyé so profèt pou so nasyon ki pa té lé kouté l’ (Jér. 7:24, 25). I pa antann so pèp répanti pou idé l’. Pasé i fè sa, a li ki pran douvan pou ankourajé l’ répanti.
8 Lò ansyen-yan ka idé roun moun ki fè roun péché ki grav, yé ka imité Jéova. Lò yé ka fè sa moun-an réfléchi, kou 2 Timothée 4:2 ka di, yé gen « bokou pasyans ». Men sa roun nòt pou étidyé asou sa vèrsé-a ka di asou sa : « Roun ansyen toujou divèt kontrolé so kò épi pran so tan pou bay moun-an anvi fè sa ki byen. Si ansyen-an ka faché ouben ka fè kousidiré moun-an ki péché ka fatigé l’, pitèt moun-an pa ké anvi palé ouben pa ké anvi répanti menm. »
9-10. Kouman ansyen-yan pouvé idé roun moun ki péché réfléchi asou sa ki fè l’ péché ?
9 Ansyen-yan ka éséyé konprann poukisa moun-an péché. Ès i vin plizanpli fèb paské i arété étidyé li rounso ouben i arété préché ? Ès i pa té ka priyè bokou ouben ès i té ka priyè jis pou priyè ? Ès i arété briga ké mové anvi i té gen ? Ès i chwazi zanmi ouben anmizman ki pa té bon pou li ? Kouman sa désizyon-yan aji asou so tchò ? Ès i ka konprann ki sa i fè, fè so Papa Jéova lapenn ?
10 Ansyen-yan pouvé pozé moun-an késyon pou fè l’ réfléchi asou sa ki gaté so lanmityé ké Jéova é ki fè l’ péché. Lò yé ka fè sa, a pou yé janti é a pa pou yé doumandé bagaj yé pa bézwen savé (Prov. 20:5). Anplis di sa, kou Natan fè ké David, yé pouvé pran èkzanp pou fè li réfléchi é fè l’ konprann ki sa i fè-a pa té bon menm. Pitèt prémyé kou-a yé ké palé ké li, i ké vréman tris akoz di sa i fè. I ké pitèt menm répanti.
11. Kouman Jézi té ka aji ké moun ki té ka péché ?
11 Ansyen-yan ka fè tousa yé pouvé pou yé imité Jézi. Men késyon Jézi pozé Sol di Tars pou fè li réfléchi asou so konpòrtman : « Sol, Sol, poukisa to ka pèrsékité mo ? » A konsa i idé l’ réfléchi asou sa i té ka fè (Actes 9:3-6). É asou « sa fanm-an, sa Jézabèl-a », men sa i di : « Mo bay li tan pou i répanti » (Rév. 2:20, 21).
12-13. Kouman ansyen-yan pouvé bay roun moun ki péché tan pou i répanti ? (gadé zimaj-a osi).
12 Ansyen-yan ka swiv èkzanp Jézi. Yé pa ka yenki désidé ki moun-an ki péché pa ké répanti. Roun ran ké répanti prémyé kou ansyen-yan ké palé ké yé é rounòt ran ké bézwen plis tan. A pou sa ansyen-yan ké pitèt divèt wè moun-an ki péché plizyèr fwa. Pitèt apré prémyé réinyon-an ké ansyen-yan, i ké koumansé byen réfléchi asou sa yé di li. É pitèt sa ké bay li anvi fè so kò toupiti épi doumandé Jéova pardon ké tout so tchò (Ps. 32:5 ; 38:18). É prochen kou ansyen-yan ké wè l’, i ké gen rounòt mantalité.
13 Pou idé roun moun ki péché répanti, ansyen-yan ka éséyé konprann li é yé janti ké li. Yé ka èspéré ki Jéova ké béni éfòr yé ka fè é ki yé frè ouben yé sò ké roukoumansé wè bagaj-ya kou Jéova ka wè yé épi ké répanti. Yé ka priyè pou sa (2 Tim. 2:25, 26).
Annan sèrten sitiasyon, ansyen-yan ké fè plizyèr réinyon ké moun-an ki péché pou bay li tan répanti (gadé paragraf 12).
14. Lò roun moun ka répanti, a grasa kimoun, é poukisa ?
14 Lò roun moun ki péché ka répanti, a pa ti kontan nou kontan ! (Luc 15:7, 10). A grasa kimoun ? Ansyen-yan ? Sonjé sa Pòl ékri asou sa-ya ki péché : « Bondjé ké pitèt pèrmèt yé répanti » (2 Tim. 2:25). Roun nòt pou étidyé asou sa vèrsé-a ka di : « Lò roun moun ka chanjé fason i ka pansé ké aji, a Jéova ki mérité lònò, a pa pyès ròt moun, pas a li ki ka idé krétyen-an ki pédi so chimen fè sa chanjman enpòrtan-an. Pòl ka palé osi di bèl bénédiksyon moun-an ka jwenn lò i ka répanti : i ka konprann lavérité-a pi byen, i ka viré gen bon sans é i pouvé soti anba trap Djab-a (2 Tim. 2:26). »
15. Kouman ansyen-yan pouvé kontinyé idé roun moun ki répanti ?
15 Lò roun moun ki péché ka répanti, komité ansyen-an ka fè sa ki fo pou yé ouben ròt ansyen annan asanblé-a alé wè frè-a ouben sò-a pou ankourajé l’. Konsa, yé pouvé idé l’ pou i pa tonbé annan trap Satan-an é pou i fè sa ki byen (Héb. 12:12, 13). Ansyen-yan pa ké di pyès moun pyès bagaj asou péché-a frè-a ouben sò-a fè. Mé, kisa asanblé-a bézwen savé ?
« A POU TO KORIJÉ YÉ DOUVAN TOUT MOUN »
16. Kisa Pòl té lé di lò i di « douvan tout moun » ? (1 Timothée 5:20).
16 (Li 1 Timothée 5:20.) Annan sa vèrsé-a, Pòl té ka di Timoté, ki té ansyen, sa i té divèt fè ké ‘moun ki té ka kontinyé péché’. Kisa i té lé di lò i di Timoté korijé yé « douvan tout moun » ? Ès sa té lé di « douvan tout asanblé-a » ? Non. Lò Pòl di « tout moun », i té ka palé di tout sa ki té konnèt sitiasyon-an. A té pitèt frè ké sò-ya ki té wè moun-an fè roun péché ouben sa-ya moun-an té alé wè pou di sa i té fè. A sa moun-yan rounso ansyen-yan té divèt alé wè pou di yé ki yé té korijé moun-an.
17. Si roun moun ka fè roun péché ki grav é roun patché moun savé sa ouben ké vin savé sa, kisa ansyen-yan ké di douvan tout asanblé-a, é poukisa ?
17 Annan sèrten sitiasyon, roun patché moun ja savé ki moun-an péché ouben yé ké vin savé ki i péché. Annan sa kalité sitiasyon-yan, « douvan tout moun » lé di « douvan tout asanblé-a ». Donk, roun ansyen ké di tout asanblé-a ki yé rouprann frè-a ouben sò-a. Poukisa i ké fè sa ? Pòl ka di : « Pou ròt-ya panga. » Sa lé di pou moun-yan annan asanblé-a konprann ki sa moun-an fè pa té bon é pou yé pa alé fè roun péché ki grav yé menm osi.
18. Lò roun jennjan ki batizé é ki pòkò gen 18 lannen ka fè roun péché ki grav, kouman ansyen-yan divèt réglé problèm-an ? (gadé zimaj-a osi).
18 Lò roun jennjan ki batizé é ki pòkò gen 18 lannen ka fè roun péché ki grav, kouman ansyen-yan divèt réglé sa problèm-an ? Ansyen-yan ké doumandé dé ansyen annan asanblé-a alé wè jennjan-an ké so paranb si yé Témwen Jéova. Yé ké doumandé paran-yan kisa yé prévwè fè pou idé yé timoun répanti. Si jennjan-an ka montré ki i lé chanjé é si paran-yan ka rivé touché so tchò, ansyen-yan ké pitèt désidé ki yé pa bézwen alé pi lwen. A paran-yan Bondjé doumandé korijé yé timoun ké lanmou (Deut. 6:6, 7 ; Prov. 6:20 ; 22:6 ; Éph. 6:2-4). Apré sa, tanzantan, ansyen-yan ké palé ké paran-yan pou savé si yé ka byen idé yé timoun. É si roun jennjan ki batizé é ki pòkò gen 18 lannen ka kontinyé péché é pa lé répanti ? Enben, roun komité ansyen ké alé wè l’ ké so paran si yé Témwen Jéova.
Si roun jennjan ki batizé é ki pòkò gen 18 lannen ka fè roun péché ki grav, dé ansyen ké palé ké li ké so paran si yé Témwen Jéova (gadé paragraf 18)
« JÉOVA GEN BOKOU LANMOU POU NOU, I PLEN KÉ PITYÉ É I LÉ PARDONNEN NOU »
19. Lò ansyen-yan ka fè yé réinyon ké roun moun ki péché, kouman yé ka éséyé imité Jéova ?
19 Frè-ya ki annan roun komité ansyen savé ki Jéova bay yé rèsponsabilité fè asanblé-a rété pròp (1 Cor. 5:7). Mé si sa posib, yé lé idé moun-an ki péché répanti osi. Donk yé ka kontinyé èspéré ki i ké chanjé. Lò yé ka fè sa, yé ka imité Jéova ki « gen bokou lanmou pou nou, [ki] plen ké pityé é [ki] lé pardonnen nou » (Jacq. 5:11). A sa bèl kalité-ya apot Jan té gen. Gadé sa i marké : « Mo pitit-ya, mo ka ékri zòt sa bagaj-ya pou zòt pa fè pyès péché. É pourtan, si roun moun ka fè roun péché, nou gen roun asistan òbò Papa-a, Jézi Kris, roun moun ki jis » (1 Jean 2:1).
20. Ki késyon nou ké réponn annan dèrnyé artik-a ?
20 Détan, malérèzman, sa pouvé rivé ki roun krétyen ki fè roun péché ki grav pa ka répanti. Donk, ansyen-yan divèt tiré l’ annan asanblé-a. Kisa ansyen-yan divèt fè annan sa sitiasyon-an ? Nou ké réponn sa késyon-an annan dèrnyé artik-a.
KANTIK 103 Bèrjé-ya, roun kado di Bondjé
a Anvan, nou té ka aplé sa group frè-ya « comités de discipline religieuse ». Mé kou a pa jijé rounso yé ka jijé, nou pa ké aplé sa group-ya konsa ankò. Aprézan, nou ké di « komité ansyen ».
b Sa ki marké pou paran-yan valab osi pou moun ki rèsponsab timoun-an.