Kouman ansyen-yan ka idé sa-ya yé tiré annan asanblé-a

1-2. a) Kouman Jéova ka wè roun moun ki fè roun préché ki grav é ki pa ka répanti ? b) Lò roun moun ka fè roun péché ki grav, kisa Jéova lé i fè ?

JÉOVA pa ka asèpté nenpòrt ki kalité konpòrtman. I rayi péché-a (Ps. 5:4-6). I lé nou rèspèkté sa i ka di annan so Paròl asou sa ki bon ké sa ki pa bon. Mé i savé ki nou pa parfè é ki nou pa pouvé obéyi l’ parfètman (Ps. 130:3, 4). Parkont, i pa ka asèpté moun « ki pa ka rèspèkté [l’] » é ki ka ‘pran so favèr nou pa mérité-a sèrvi èskiz pou gen vyé kondwit san ronté’ (Jude 4). A pou sa, Labib ka di ki Bondjé « ké détrwi sa-ya ki pa ka rèspèkté l’ » pannan lagèr Armagédon (2 Pierre 3:7 ; Rév. 16:16).

² Mé, Jéova pa lé rounsèl moun mouri. Kou nou wè l’ annan sa Tourdégard-a é kou Labib ka byen montré l’, Jéova « lé tout moun répanti » (2 Pierre 3:9). Ansyen-yan ka imité Jéova lò yé ka pran pasyans pou idé sa-ya ki péché chanjé épi rouvin òbò Jéova. Mé, i gen sa ki pa ka répanti (Is. 6:9). Menmsi ansyen-yan ka éséyé idé yé plizyèr fwa, roun ran ka kontinyé fè sa ki pa bon. Lò a konsa, kisa ansyen-yan divèt fè ?

« TIRÉ MÉCHAN-AN ANMITAN ZÒT »

3. a) Dapré Labib, kisa ansyen-yan divèt fè lò roun moun ka péché é pa ka répanti ? b) Poukisa nou pouvé di ki lò yé ka tiré roun moun annan asanblé-a, a moun-an ki désidé sa ?

³ Lò roun moun ka péché é pa ka répanti, ansyen-yan blijé fè sa 1 Corinthiens 5:13 ka di : « Tiré méchan-an anmitan zòt. » Moun-an ki péché savé ki, si i pa ka répanti, yé ké tiré l’ annan asanblé-a. Donk, nou pouvé di ki a rékòlté i ka rékòlté sa i sonmen (Gal. 6:7). Poukisa nou pouvé di sa ? Paské magré tousa ansyen-yan éséyé fè pou idé l’ répanti, moun-an pa lé chanjé (2 Rois 17:12-15). Annan sa i ka fè, i ka montré ki i pa lé obéyi koumannman Jéova-ya (Deut. 30:19, 20).

4. Lò yé ka tiré roun moun annan asanblé-a, poukisa ansyen-yan ka fè tout asanblé-a savé sa ?

⁴ Lò yé ka tiré roun moun annan asanblé-a, ansyen-yan ka di tout asanblé-a ki moun-an pa Témwen Jéova ankòa. Yé pa ka di sa pou fè moun-an ki péché ronté. Yé ka di sa pou pèrmèt asanblé-a obéyi koumannman-an ki annan Labib é ki ka di « arété frékanté » moun-an ki ka péché é ki pa ka répanti, épi « pa menm manjé ké [li] » (1 Cor. 5:9-11). Jéova pa bay sa koumannman-an pou bon tchò. Apot Pòl ékri : « Roun tibi lèlven ka fè tout lapat-a gonflé » (1 Cor. 5:6). Si roun moun ki péché é ki pa répanti ka kontinyé fè parti di asanblé-a, ròt-ya ké pitèt pansé ki yé pa bézwen obéyi koumannman Jéova-ya (Prov. 13:20 ; 1 Cor. 15:33).

5. Kouman nou divèt wè roun moun yé tiré annan asanblé-a, é poukisa ?

⁵ Donk, kouman nou divèt wè roun frè ouben roun sò yé tiré annan asanblé-a ? Menmsi nou pa ka frékanté l’ ankò, a pou nou sonjé ki i kou roun brébi ki pédi, mé sa pa lé di ki i pa ké janmen rouvin ankò. Roun brébi ki lésé troupo-a, pouvé éséyé rouvini roun jou. Pa bliyé ki i bay Jéova so lavi. Malérèzman, fason i ka viv jòdla pa ka fè Jéova plézi, é i ka riské pédi posibilité viv pou tout-tan (Ézéch. 18:31). Mé, dipi i ka rété tan toujou, é dipi Jéova paré pou gen pityé pou li é pou pardonnen l’, nou ka èspéré ki i ké chanjé. Kouman ansyen-yan pouvé montré ki yé ka èspéré ki moun-an yé tiré annan asanblé-a ké rouvini ?

SA ANSYEN-YAN KA FÈ POU SA-YA YÉ TIRÉ ANNAN ASANBLÉ-A

6. Kisa ansyen-yan ka fè pou idé roun moun yé tiré annan asanblé-a ?

⁶ Ès ansyen-yan ka arété éséyé idé roun moun yé tiré annan asanblé-a pou i rouvini òbò Jéova ? Pyès toubonnman ! Lò roun komité ansyen ka di roun moun ki pa lé répanti ki i ké tiré l’ annan asanblé-a, i ka di l’ osi sa i bézwen fè pou i rouvini annan asanblé-a. Mé a pa sa rounso i ka fè. Byen souvan, ansyen-yan ké di moun-an ki péché ki yé lé rouwè l’ déztrwa mwa pita pou wè si i chanjé. Si déztrwa mwa apré, moun-an ka asèpté kontré ké ansyen-yan ankò, ké bokou lanmou, yé ké ankourajé l’ répanti épi rouvin òbò Jéova. Menmsi i pa chanjé lidé, ansyen-yan ké kontinyé éséyé rouwè l’ tanzantan.

7. Lò yé ka palé ké roun moun yé tiré annan asanblé-a, kouman ansyen-yan ka imité Jéova ki ka pran lapenn moun ? (Jérémie 3:12).

⁷ Lò ansyen-yan ka palé ké sa-ya yé tiré annan asanblé-a, yé ka imité Jéova ki toujou ka pran lapenn moun. Parèkzanp, lò nasyon Israyèl-a té ka péché, Jéova pa té ka antann i répanti pou éséyé idé l’. I té ka pran douvan pou idé l’, anvan menm i montré ki i té lé répanti. É kou nou wè l’ annan dézyèm artik sa Tourdégard-a, lò i doumandé profèt Ozé pardonnen so madanm é viré byen ké li menmsi i té ka péché toujou, i montré ki i sa roun Bondjé ki ka pran lapenn moun (Osée 3:1 ; Mal. 3:7). Kou Jéova, ansyen-yan lé moun-an ki péché rouvin annan asanblé-a, yé pa ka randé bagaj-a rèd pou li (li Jérémie 3:12).

8. Kouman èkzanp Jézi pran, èkzanp pitit-a ki té pédi, ka idé nou konprann sa Jéova ka rousanti pou sa-ya yé tiré annan asanblé-a ? (Luc 15:7).

⁸ Sonjé èkzanp Jézi té bay, èkzanp pitit-a ki té pédi nou palé annan dézyèm artik sa Tourdégard-a. Lò papa-a wè ki so pitit té ka rouvin, « i kouri jwenn li, i pran li annan so bra épi i bo l’ ké tandrès » (Luc 15:20). Papa-a pa antann so pitit doumandé l’ pardon. I pran douvan, kou nenpòrt ki papa ki kontan so pitit té ké fè l’. A sa ansyen-yan ka éséyé fè ké sa-ya ki pédi yé chimen. Yé lé sa brébi-ya ki pédi, rouvin lakaz (Luc 15:22-24, 32). Lò roun moun ki péché ka répanti, tout moun kontan annan syèl-a. Mé i gen moun ki kontan asou latè-a osi ! (li Luc 15:7).

9. Kisa Jéova ka ankourajé sa-ya ki péché fè ?

⁹ Kisa sa nou wè jik aprézan ka anprann nou ? Nou anprann ki Jéova pa ka pèrmèt sa-ya ki péché é ki pa lé répanti kontinyé fè parti di asanblé-a. Mé nou anprann osi, ki i pa ka tounen so do bay moun ki péché. I lé yé rouvin òbò l’. Annan Osée 14:4, Jéova ka di sa i ka rousanti pou sa-ya ki ka péché é ki ka répanti : « Mo ké géri yé é yé ké roudivini dé moun ki fidèl. Mo ké kontan yé pas a sa mo lé, paské mo pa faché ké yé ankò. » Kou ansyen-yan savé sa Jéova ka rousanti, yé ka gadé pou tout ti chanjman ki ka montré ki roun moun ka répanti. É grasa sa paròl-ya, sa-ya ki lésé Jéova pouvé sir ki i kontan yé é ki i lé yé rouvin òbò l’.

10-11. Kouman ansyen-yan ka éséyé idé sa-ya yé tiré annan asanblé-a dipi lontan ?

¹⁰ É pou sa-ya yé tiré annan asanblé-a dipi lontan ? Pitèt yé arété fè sa ki fè ki yé tiré yé annan asanblé-a. É détan, yé pa menm ka sonjé poukisa yé tiré yé annan asanblé-a. Kèlkéswa yé sitiasyon, ansyen-yan ké éséyé routrouvé sa moun-yan épi yé ké alé wè yé. Lò yé ké fè yé réinyon ké yé, yé ké propozé yé priyè ké yé é yé ké ankourajé yé rouvin òbò Jéova. Roun moun ki arété frékanté asanblé-a dipi lontan, ké bézwen viré anprann konnèt Jéova ké vérité-ya ki annan Labib. A pou sa, si i ka di ansyen-yan ki i lé rouvini, yé ké fè sa ki fo pou roun moun étidyé Labib ké li, menmsi yé pòkò roumété l’ annan asanblé-a. A ansyen-yan ki ké òrganizé sa.

¹¹ Pou imité fason Jéova ka pran lapenn moun, ansyen-yan ka fè tousa yé pouvé pou trouvé tout sa yé tiré annan asanblé-a pou fè yé savé ki lapòt-a louvri toujou. Lò roun moun ki péché ka répanti ké tout so tchò é ka arété fè sa ki pa bon, yé pouvé roumété l’ annan asanblé-a vitman (2 Cor. 2:6-8).

12. a) Annan ki sitiasyon èspésyalman ansyen-yan divèt panga ? b) Poukisa nou pa divèt pansé ki Jéova pa ké janmen pouvé pardonnen sèrten moun ki péché ? (gadé nòt-a osi).

¹² Annan sèrten sitiasyon, ansyen-yan ké divèt byen panga anvan yé désidé roumété roun moun annan asanblé-a. Parèkzanp, si roun moun maltrété roun timoun, té divini apòsta ouben si i kalkilé pou divòrsé épi maryé ké rounòt moun, ansyen-yan ké divèt byen gadé pou wè si i répanti ké tout so tchò (Mal. 2:14 ; 2 Tim. 3:6). A pou yé protéjé troupo-a. Mé, a pa pou yé bliyé ki, dipi roun moun ka répanti ké tout so tchò é ka arété fè sa ki mové, Jéova ké asèpté i rouvini annan asanblé-a. Donk, menmsi yé divèt byen panga ké moun ki chaché bloublou ròt-ya, yé pa divèt pansé ki Jéova pa ké janmen pouvé pardonnen sa kalité moun-yanb (1 Pierre 2:10).

SA ASANBLÉ-A POUVÉ FÈ

13. Ès fason nou ka aji ké roun frè ouben roun sò ansyen-yan rouprann, a konsa nou ké fè ké roun moun yé tiré annan asanblé-a ? Èspliké.

¹³ Kou nou wè l’ annan ròt artik-a, sa pouvé rivé ki ansyen-yan divèt di tout asanblé-a ki yé korijé roun frè ouben roun sò. Ès nou pouvé kontinyé frékanté roun sò ouben roun frè yé rouprann ? Wi, pas i répanti é i arété fè sa ki mové (1 Tim. 5:20). I ka fè parti di asanblé-a toujou, é pou rousouvwè ankourajman, i bézwen pasé tan ké so frè ké sò (Héb. 10:24, 25). Parkont, a pa menm bagaj-a ké roun moun yé tiré annan asanblé-a. Nou ka « arété frékanté » sa moun-an é nou ‘pa menm ka manjé’ ké li (1 Cor. 5:11).

14. Kouman roun frè ouben roun sò pouvé sèrvi so konsyans ki fòrmé grasa Labib pou savé kouman i ké aji ké roun moun yé tiré annan asanblé-a ? (gadé zimaj-a osi).

¹⁴ Ès sa lé di ki nou pa menm ké gadé asou koté roun moun yé tiré annan asanblé-a ? Non. Nou pa ké frékanté l’ : nou pa ké ni pasé tan ké li ni anmizé ké li. Parkont, ès nou pouvé envité l’ vini annan réinyon-yan, èspésyalman si a té roun zanmi ouben si a roun moun di nou fanmi ? Chak krétyen ké divèt sèrvi so konsyans ki fòrmé grasa Labib pou désidé sa i ké fè. É si sa moun-an ka vini lasal ? Anvan, nou pa té ké di l’ bonjou. Mé la osi, chak krétyen ké divèt sèrvi so konsyans ki fòrmé grasa Labib pou désidé sa i ké fè. Roun ran ké alèz pou di moun-an bonjou é ki yé byen kontan i vini. Mé nou pa ké pran roun kozé ké li é nou pa ké frékanté l’.

15. Di ki kalité moun 2 Jean 9-11 ka palé ? (gadé karé-a « Ès Jan ké Pòl té ka palé di menm kalité péché-a ? »).

¹⁵ Roun ran pouvé doumandé yé kò : « Ès Labib pa ka di ki si roun krétyen ka di roun moun yé tiré annan asanblé-a bonjou, i ka partisipé annan vyé bagaj i ka fè ? » (li 2 Jean 9-11). Vèrsé-ya ki anvan 2 Jean 9-11 ka montré ki yé ka palé di apòsta-ya ké di moun ki ka ankourajé ròt-ya fè mové bagaj (Rév. 2:20). Donk, si roun moun ka di toupatou sa apòsta-ya ka ansényé ouben si i ka ankourajé ròt-ya fè mové bagaj, ansyen-yan pa ké alé wè l’. Sa pa lé di ki sa moun-an pa ké janmen chanjé. Mé tout tan moun-an pòkò chanjé, nou pa ké, ni di l’ bonjou, ni envité l’ vini annan nou réinyon.

ANNOU IMITÉ JÉOVA KI KA PRAN LAPENN MOUN, KI GEN PITYÉ POU YÉ É KI LÉ PARDONNEN YÉ

16-17. a) Kisa Jéova ka doumandé moun ki péché fè ? (Ézéchiel 18:32). b) Kouman ansyen-yan pouvé travay ansanm ansanm ké Jéova ?

¹⁶ Kisa nou anprann annan sa senk artik-ya ? Jéova pa lé pyès moun mouri ! (li Ézéchiel 18:32). I lé moun ki péché viré byen ké li (2 Cor. 5:20). A pou sa, i pa janmen arété doumandé so sèrvitèr-ya ki pa té ka obéyi, répanti épi rouvin òbò li. É lò ansyen-yan ka fè tousa yé pouvé, pou idé roun moun répanti, yé ka travay ansanm ansanm ké Jéova, é a roun lònò pou yé (Rom. 2:4 ; 1 Cor. 3:9).

¹⁷ Imajiné kouman tout moun kontan laro syèl-a, lò roun moun ki péché ka répanti ! Chak fwa roun brébi ki té pédi ka rouvin òbò l’, a pa ti kontan nou Papa ki annan syèl-a kontan. Lò nou ka réfléchi asou fason Jéova ka pran nou lapenn, asou fason i gen pityé pou nou é lé pardonnen nou ké asou so favèr nou pa mérité-a, nou lanmou pou li ka vin pi fò (Luc 1:78).