Kouman Jéova ka idé nou tchenbé

1. Poukisa nou bézwen fòrs pou tchenbé rèd, é kimoun ki pouvé idé nou ? (1 Pierre 5:10).

KOU dèrnyé jou-ya rèd pou sipòrté, sa-ya ki ka adoré Jéova bézwen fòrs pou tchenbé rèd. I gen sa ki gen roun maladi ki ka fè yé soufri touléjou. Ròt ka pléré pas roun moun yé kontan mouri. Épi i gen ròt ankò ka soufri pas moun yé fanmi ouben moun annan gouvèrnman yé péyi ka baré yé chimen (Mat. 10:18, 36, 37). Kèlkéswa problèm to ka jwenn, to pouvé sir ki Jéova pouvé idé to tchenbé (li 1 Pierre 5:10).

2. Poukisa nou ka rivé tchenbé ?

² Roun moun ki ka tchenbé rèd ka rété fidèl ké Jéova é ka adoré l’ ké lajwa menm lò i gen problèm, lò yé ka pèrsékité l’ ouben lò i anvi fè roun mové bagaj. A Jéova ka idé nou tchenbé, a pa ké nou pròp fòrs nou ka rivé fè l’. I ka bay nou « pwisans-a ki ka dépasé pwisans ki nòrmal-a » (2 Cor. 4:7). Annan sa artik-a, nou ké wè kat bagaj i bay nou pou idé nou tchenbé. Nou ké wè osi sa nou divèt fè pou sa bagaj-ya idé nou tchenbé.

LAPRIYÈ

3. Poukisa nou pouvé di ki lapriyè, a roun mirak ?

³ Jéova fè roun bagaj ki pouvé idé nou tchenbé : i fè sa ki fo pou nou pouvé palé ké li menmsi nou pa parfè (Héb. 4:16). A roun mirak i fè la ! Réfléchi asou sa : Nou pouvé palé ké li nenpòrt kitan épi di tout kalité bagaj. I ka konprann tout lang é i ka kouté nou kèlkéswa koté nou fika — menmsi nou annan roun koté ki lwen di tout bagaj ouben nou lajòl (Jon. 2:1, 2 ; Actes 16:25, 26). É si afòrs nou enkyèt nou pa ka rivé di sa nou lé di, Jéova ka konprann sa nou lé di li (Rom. 8:26, 27). Wi, lapriyè, a roun mirak vré !

4. Poukisa nou pouvé di ki Jéova lé nou doumandé li fòrs nou bézwen pou tchenbé ?

⁴ Annan so Paròl, Jéova ka di nou ki nou pouvé sir ki « kèlkéswa sa nou ka doumandé soulon so volonté, i ka tandé nou » (1 Jean 5:14). Atò, ès nou pouvé doumandé l’ fòrs nou bézwen pou tchenbé ? Wi ! Jéova lé nou kontinyé tchenbé. Poukisa nou pouvé di sa ? Pas lò nou ka tchenbé, nou ka idé Jéova réponn sa-la ki ka provoké l’, Satan Djab-a (Prov. 27:11). Anplis di sa, Labib ka di ki Jéova lé « montré so fòrs pou tout sa ki ka adoré li ké tout yé tchò » (2 Chron. 16:9). Donk, nou pouvé sir ki Jéova pouvé idé nou tchenbé é ki a sa i lé fè (Is. 30:18 ; 41:10 ; Luc 11:13).

5. Kouman lapriyè pouvé idé nou gen lapè annan nou tchò ? (Isaïe 26:3).

⁵ Labib ka di ki si nou ka di tousa nou gen asou nou tchò lò nou ka priyè, ‘lapè Bondjé, ki ka dépasé tousa nou pouvé konprann, ké protéjé nou tchò ké nou lèspri’ (Phil. 4:7). Lò yé ka jwenn problèm, roun patché moun ki pa ka adoré Jéova ka éséyé diféran bagaj pou santi yé kò byen ouben pou yé bliyé yé problèm. Mé lò nou ka priyè Jéova, i ka bay nou roun lapè ki lontan pi bon pasé pyès ròt kalité bagaj. Lò nou ka priyè l’, nou ka montré l’ ki a asou li rounso nou ka konté, é a sa moman-an i ka bay nou « roun lapè ki pa ka fini » (li Isaïe 26:3). Parèkzanp, i ka idé nou sonjé vèrsé annan so Paròl ki ka konsolé nou. Sa vèrsé-ya ka kalmé nou tchò pas yé ka fè nou sonjé ki Jéova kontan nou é ki i lé idé nou (Ps. 62:1, 2).

6. Kisa to pouvé di annan to lapriyè ? (gadé zimaj-a osi).

⁶ Sa to pouvé fè : Lò to gen problèm, « jité tout to traka asou Jéova » é doumandé l’ bay to so lapè (Ps. 55:22). Doumandé l’ bay to sajès to bézwen osi pou to byen jéré problèm to gen (Prov. 2:10, 11). Sipliyé l’, doumandé l’ bay to fòrs pou tchenbé, mé pa bliyé di l’ mèrsi pou tousa i ka fè pou to (Phil. 4:6). Réfléchi asou fason i ka idé to tchenbé touléjou, é di l’ mèrsi pou sa i ka fè pou idé to é pou bèl bagaj i ka bay to. Pa lésé to problèm anpéché to wè tousa i ka fè pou to (Ps. 16:5, 6).

PARÒL BONDJÉ-A

7. Poukisa lò nou ka étidyé Labib sa pouvé idé nou tchenbé ?

⁷ Jéova bay nou so Paròl pou idé nou tchenbé. I gen bokou vèrsé ki ka pèrmèt nou sir ki Jéova ka idé nou. Annou pran roun èkzanp. Matthieu 6:8 ka di : « Zòt Papa savé sa zòt bézwen anvan menm zòt doumandé l’. » A Jézi ki di sa, é pyès moun pa konnèt Jéova pi byen pasé li. Donk, nou pa bézwen pè, nou pouvé sir ki Jéova ka wè sa nou bézwen lò nou gen problèm é i ké idé nou. I gen roun patché ròt vèrsé konsa ki pouvé bay nou fòrs nou bézwen pou tchenbé (Ps. 94:19).

8. a) Bay roun prensip annan Labib ki pouvé idé nou tchenbé. b) Jou-a nou ké jwenn roun problèm, kisa ki ké idé nou sonjé prensip-ya ki ké pouvé idé nou ?

⁸ Annan Labib, i gen plizyèr prensip ki pouvé idé nou tchenbé. Sa prensip-ya pouvé bay nou sajès nou bézwen pou pran bon désizyon (Prov. 2:6, 7). Parèkzanp, Labib ka di nou pa enkyété tròp pou sa ki pouvé rivé dimen (Mat. 6:34). Pasé nou fè sa, i ka di nou konté asou Jéova touléjou. Si nou ka li Labib touléjou é nou ka réfléchi asou sa nou ka li, jou-a nou ké jwenn roun problèm, sa ké pi fasil pou nou sonjé ki prensip ké pouvé idé nou.

9. Kouman istwè-ya ki annan Labib ka idé nou ankò pi sir ki Jéova ké toujou la pou nou ?

⁹ Anplis di sa, annan Labib, i gen istwè moun kou nou menm Jéova idé pas yé té ka fè l’ konfyans (Héb. 11:32-34 ; Jacq. 5:17). Lò nou ka réfléchi asou sa istwè-ya, nou ka vin pi sir ki Jéova sa « koté nou pouvé alé séré é i sa nou fòrs, i toujou paré pou idé nou lò nou gen problèm » (Ps. 46:1). Lò nou ka réfléchi asou istwè sa wonm-yan ké sa fanm-yan ki té gen lafwa, sa ka bay nou anvi imité yé fidélité épi tchenbé rèd kou yé fè l’ (Jacq. 5:10, 11).

10. Kisa to pouvé fè pou Paròl Bondjé-a idé to tchenbé ?

¹⁰ Sa to pouvé fè : Li Labib touléjou épi fè roun lis vèrsé ki ké idé to. Bokou moun ka li tèks pou koumansé lajournen-an chak jou bonmanten. Sa ka pèrmèt yé réfléchi asou bagaj ki ké ankourajé yé pannan tout lajournen-an. Roun sò yé k’aplé Mariea di ki a sa ki idé l’ lò yé di li ki so papa ké so manman té gen roun kansèr. Kouman tèks pou koumansé lajournen-an idé l’ tchenbé toupannan i té ka pran swen di yé jiktan yé mouri ? I ka di : « Chak bonmanten mo té gen labitid li tèks pou koumansé lajournen-an annan ti liv Annou byen gadé Ékritir-ya chak jou é mo té ka réfléchi asou l’. Sa té ka idé mo mété mo lidé asou Jéova ké bèl bagaj i ka anprann nou annan so Paròl, pasé mo mété mo lidé asou problèm mo té gen » (Ps. 61:2).

NOU FRÈ KÉ SÒ

11. Poukisa, lò nou savé ki frè ké sò-ya ka jwenn menm problèm ké nou, sa ka rasiré nou ?

¹¹ Pou idé nou tchenbé, Jéova bay nou roun fanmi frè ké sò. Lò nou savé ki ‘fanmi frè ké sò toupatou asou tout latè-a ka pasé anba menm kalité soufrans’ ké nou, sa ka rasiré nou (1 Pierre 5:9). Poukisa nou ka di sa ? I gen frè ké sò ka jwenn menm kalité problèm ké nou é ki rivé rété fidèl ké Jéova. Donk, kèlkéswa problèm nou ka jwenn, nou pouvé tchenbé ! (Actes 14:22).

12. Kouman nou frè ké sò ka idé nou, é kisa nou pouvé fè pou yé ? (2 Corinthiens 1:3, 4).

¹² Nou frè ké sò pouvé ankourajé nou. A sa ki rivé apot Pòl. Annan lèt i ékri, i bay non sa-ya ki idé l’ lò i pa té pouvé soti di so kaz é i di yé mèrsi. Sa frè ké sò-ya di bagaj pou ankourajé Pòl é yé bay li sa i té bézwen osi (Phil. 2:25, 29, 30 ; Col. 4:10, 11). A sa ka fèt jòdla osi. Lò nou bézwen nou frè ké sò idé nou tchenbé, yé la pou nou. É lò a yé ki bézwen, nou la pou yé (li 2 Corinthiens 1:3, 4).

13. Kisa ki idé Maïa tchenbé ?

¹³ An 2020, an Risi, lapolis antré annan kaz roun sò yé ka aplé Maïa, é yé fouyé so kaz. Apré sa, yé mennen l’ douvan lalwa pas i té palé pou ròt moun di sa i ka krè. Maïa ka di : « Mo té las, mo té enkyèt é mo té tris. Mé a sa moman-an, frè ké sò-ya aplé mo, é i gen sa ki voyé mo mésaj é ki ékri lèt pou mo. Yé di mo ki yé té kontan mo bokou. Mo té ja savé ki frè ké sò-ya té kontan mo é ki yé té sa mo fanmi. Mé ké tousa yé fè pou mo, mo ankò pi sir di sa. »

14. Kisa nou pouvé fè pou frè ké sò-ya idé nou tchenbé rèd ? (gadé zimaj-a osi).

¹⁴ Sa to pouvé fè : Rété pròch di to frè ké sò. Pa pè doumandé ansyen-yan idé to. Yé pouvé sa « roun koté pou séré lò i gen van, roun koté pou séré lò i gen gro lapli » (Is. 32:2). É anmenmtan, sonjé ki to frè ké sò ka jwenn problèm yé menm osi. Si to ka idé roun moun ki bézwen yé idé l’ alòr ki to menm to gen problèm, to tchò ké kontan, to ké wè ki a pa to rounso ki gen problèm é sa ké idé to tchenbé rèd (Actes 20:35).

NOU ÈSPWAR

15. Kouman èspwar Jézi té gen idé l’, é kouman èspwar nou gen ka idé nou ? (Hébreux 12:2).

¹⁵ Jéova bay nou roun èspwar. Sa nou ka èspéré ké fèt, asiré pa pitèt. É sa ka idé nou tchenbé (Rom. 15:13). Jézi rivé tchenbé jou-a ki té pi rèd annan so lavi asou latè-a pas i té ka sonjé bèl promès so Papa té fè li-ya (li Hébreux 12:2). I té savé ki si i té ka rété fidèl, i té ké montré ki Satan manti asou Jéova é ki Jéova mérité nou bay li lònò. Épi i té présé rouwè so Papa é divini Rwa ké so frè-ya. Nou menm osi, kou nou gen èspwar viv pou tout-tan annan monn nouvo Bondjé promèt nou-a, sa ka idé nou tchenbé anba tout kalité problèm nou ka jwenn annan monn Satan-an.

16. Kouman èspwar nou gen idé Alla tchenbé, é kisa sa ka anprann to ?

¹⁶ Annou wè kouman èspwar Jéova bay nou di viv annan monn nouvo-a idé Alla, roun sò ki ka rété Larisi. Yé arété so mari é yé mété l’ lajòl pou i antann so prosè. Lò sa rivé yé, Alla di : « Mo wè ki lò mo ka palé ké Jéova di èspwar i bay mo-a é mo ka réfléchi asou l’, sa ka idé mo pa dékourajé tròp. Mo savé ki tout sa bagaj-ya ké fini titalò. Jéova ké ganyen, é nou menm osi. »

17. Kouman nou pouvé montré nou rékonésans pou èspwar Jéova bay nou-a ? (gadé zimaj-a osi).

¹⁷ Sa to pouvé fè : Pran tan réfléchi asou bèl promès Jéova fè to pou dimen. Imajiné to kò ka profité di bénédiksyon nou ké jwenn annan monn nouvo-a. Sa ké idé to wè ki tout problèm to ka jwenn jòdla « la pou roun ti moman é yé pa lou » (2 Cor. 4:17). Anplis di sa, fè tousa to pouvé pou palé ké ròt-ya di promès Bondjé ka fè to pou dimen. Sonjé kouman lavi sa-ya ki pa ka adoré Jéova fika : yé gen roun patché problèm é sa dèt pi rèd pou yé pas yé pa konnèt sa Bondjé ka promèt nou pou dimen ! Menmsi a déztrwa bagaj rounso to ka di, to pouvé bay yé anvi anprann plis bagaj asou Rwayonm-an ké bèl bagaj nou ka antann pou dimen.

18. Poukisa nou pouvé sir ki Jéova ké fè sa i promèt fè ?

¹⁸ Jòb, roun mouché ki té fidèl, tchenbé lò i jwenn roun patché éprèv. I di Jéova : « Aprézan, mo savé to pouvé fè tout bagaj é i pa gen anyen ki pouvé anpéché to fè sa to lé fè » (Job 42:2). Jòb anprann ki anyen pa pouvé anpéché Jéova fè sa i promèt fè. Lò nou ka sonjé sa, sa ka bay nou fòrs pou tchenbé nou menm osi. Annou pran roun èkzanp : roun moun ki malad dékourajé pas i alé wè roun patché dòktèr, mé yé pyès pa rivé géri l’. Mé roun jou, roun bon dòktèr ki gen bokou èspéryans ka di l’ sa i gen é ka èspliké l’ kouman i ké géri l’. Menmsi moun-an savé ki a pa lanmenm i ké géri, so tchò soulajé. Kou i savé i ké géri, sa pi fasil pou i tchenbé. Nou menm osi, kou nou sir ki sa Jéova promèt asou paradi-a ké fèt, nou pouvé tchenbé.

19. Kisa nou bézwen pou nou tchenbé ?

¹⁹ Kou nou wè l’, Jéova bay nou lapriyè, so Paròl, nou frè ké sò ké roun èspwar pou idé nou tchenbé. Si nou ka fè tousa nou pouvé pou nou sèrvi sa bagaj-ya i ka bay nou, i ké soutni nou jiktan monn Satan-an ké soufrans-ya disparèt (Phil. 4:13).