To pouvé sir ki Jéova pardonnen to

1-2. Kisa sa-ya ki ka répanti pouvé rousanti ? (gadé zimaj-a osi).

RWA David fè bagaj ki pa té bon é so konsyans bat li (Ps. 40:12 ; 51:3 ké paròl ki marké anvan koumansman psaume-an). Mé i répanti ké tout so tchò é Jéova pardonnen l’ (2 Sam. 12:13). É lò i konprann ki Jéova té pardonnen l’, so tchò té kontan (Ps. 32:1).

² Nou menm osi, nou tchò pouvé kontan lò nou ka konprann ki Jéova pardonnen nou péché. Sa ka konsolé nou lò nou savé ki menmsi nou fè péché ki grav, Jéova lé pardonnen nou é ki i ké fè l’ si nou ka répanti ké tout nou tchò, si nou ka priyè l’ pou doumandé pardon, si nou k’alé wè ansyen-yan épi si nou ka fè tousa nou pouvé pou nou pa roukoumansé ! (Prov. 28:13 ; Actes 26:20 ; 1 Jean 1:9). Épi lò nou savé ki, lò i ka pardonnen nou, pou li, a kousidiré nou pa té janmen péché, sa ka rasiré nou ! (Ézéch. 33:16).

3-4. Kisa Jennifer té ka rousanti menm apré so batenm, é kisa nou ké wè annan sa artik-a ?

³ Mé i gen sa ki pa ka rivé krè ki Jéova pardonnen yé. A sa ki rivé Jennifer ki lévé annan lavérité. Lò i té jenn, i koumansé fè mové bagaj dèyè do so papa ké so manman. Plizyèr lannen apré sa, i rouvin òbò Jéova, i chanjé sa i té gen pou chanjé é i batizé. I ka di : « Anvan, mo té ka mennen roun vyé lavi, épi mo té ka bwè pou sou, mo té toujou ka kòlè é pou mo sa ki té pi enpòrtan, a té fè soumaké. Mo té savé ki Labib ka di ki grasa sakrifis Jézi, Jéova pouvé pardonnen nou. Mé menmsi mo té répanti é mo té doumandé Jéova pardonnen mo, ofon mo tchò mo pa té ka rivé krè ki i té fè l’. »

⁴ Détan, ès to menm osi to pa ka rivé krè ki Jéova pardonnen to ? Si a sa, sonjé ki nou Bondjé lé pardonnen nou. David té sir ki Jéova té pardonnen l’ é Jéova lé nou tchò kontan kou tchò David té kontan pas i té pardonnen l’. Annan sa artik-a, nou ké wè poukisa nou divèt sir ki Jéova pardonnen nou é nou ké wè sa ki pouvé idé nou sir di sa.

POUKISA A POU TO SIR KI JÉOVA PARDONNEN TO

5. Kisa Satan lé fè nou krè ? Bay roun èkzanp.

⁵ Lò nou sir ki Jéova pardonnen nou, nou pa ka tonbé annan trap Satan. Pa bliyé ki Satan ka fè tousa i pouvé pou fè nou arété adoré Jéova. Pou i rivé fè sa, pitèt i ka éséyé fè nou krè ki Jéova pa ké janmen pardonnen nou. Sonjé sa ki rivé krétyen-an yé té tiré annan asanblé Korent-a pas i té ka fè bagaj sèksyèl malpròp (1 Cor. 5:1, 5, 13). I té répanti, mé Satan té lé ki frè ké sò-ya annan asanblé-a désidé pa pardonnen l’. Pou li, yé té divèt rèd ké li épi pa lésé l’ rouvini annan asanblé-a. É i té lé sa krétyen-an krè ki Bondjé pa té ké jen pardonnen l’ pou i « néyé anba gro chagren », konsa i té ké arété adoré Jéova. Satan pa chanjé, i ka fè menm bagaj-a jòdla. Mé « nou byen savé sa i lé fè » (2 Cor. 2:5-11).

6. Kisa ki ké fè nou konsyans arété bat nou ?

⁶ Lò nou sir ki Jéova pardonnen nou, nou konsyans pa ka bat nou ankò. Lò nou ka péché, nou konsyans ka bat nou é sa nòrmal (Ps. 51:17). A roun bon bagaj. Nou konsyans pouvé fè nou chanjé sa nou gen pou chanjé (2 Cor. 7:10, 11). Mé, si magré nou répanti, nou konsyans ka kontinyé bat nou, nou ka riské lésé Jéova. Si nou sir ki Jéova pardonnen nou, nou konsyans pa ké bat nou ankò. Konsa, nou ké adoré Jéova kou i lé nou adoré l’, sa lé di ké lajwa é ké roun bon konsyans (Col. 1:10, 11 ; 2 Tim. 1:3). Mé, kisa nou pouvé fè pou nou sir ki Jéova pardonnen nou ?

KISA TO POUVÉ FÈ POU TO SIR KI JÉOVA PARDONNEN TO ?

7-8. Kisa Jéova di Moyiz asou li, é di kisa sa ka pèrmèt nou sir ? (Exode 34:6, 7).

⁷ Réfléchi asou sa Jéova ka di asou li menm. Parèkzanp, gadé sa i di Moyiz asou Montangn Sinayi-aa (li Exode 34:6, 7). I té pouvé palé di plizyèr kalité i gen, mé i chwazi di Moyiz ki i té sa roun « Bondjé ki plen ké pityé ké tandrès ». Donk, si roun moun ki kontan Jéova é ki péché ka répanti ké tout so tchò, ès Jéova pa ké pardonnen sa moun-an ? Si i pa té ka fè l’, i té ké sa roun Bondjé ki pa gen pityé é ki mové. Mé a pa konsa Jéova fika.

⁸ Nou pouvé sir ki Jéova pa ké janmen di roun bagaj asou li ki pa vré pas i toujou ka di lavérité (Ps. 31:5). Donk, nou pouvé krè sa i ka di. Si to konsyans ka kontinyé bat to, doumandé to kò : « Ès mo sir ki Jéova, a roun Bondjé ki kontan pardonnen é ki ka pran pityé pou moun-yan ? É ès mo sir ki i ké pardonnen tout sa ki ka répanti ? Donk, ès mo pa divèt sir ki i pardonnen mo, mo menm osi ? »

9. Kisa Psaume 32:5 ka anprann nou asou fason Jéova ka pardonnen nou ?

⁹ Réfléchi asou sa Jéova ka anprann nou annan Labib asou fason i ka pardonnen nou. Parèkzanp, David ékri : « To pardonnen mo fot, tout mo péché » (li Psaume 32:5). Mo ébré yé sèrvi pou di « pardonnen » pouvé lé di osi « lévé roun bagaj », « tiré roun bagaj » ouben « mennen roun bagaj alé ». Lò Jéova pardonnen David, a té kousidiré i té pran tout so péché é i té mennen yé alé lwen. A sa ki fè si David té soulajé, pas a té kousidiré yé té tiré roun charj ki té lou asou so do (Ps. 32:2-4). Nou pouvé gen sa lajwa-a nou menm osi. Si nou répanti, nou pa bézwen poté nou péché asou nou do ankò pas Jéova pran yé é i mennen yé alé lwen.

10-11. Lò yé ka di ki Jéova « paré pou pardonnen », kisa sa ka anprann nou asou li ? (Psaume 86:5).

¹⁰ (Li Psaume 86:5.) Annan sa psaume-an, David ka di ki Jéova « paré pou pardonnen ». Sa lé di ki Jéova pa ka kouri faché lò nou ka péché. I toujou lé pardonnen sa-ya ki ka répanti. A konsa i fika. Poukisa i konsa ? Men sa vèrsé-a ka di : « To plen ké lanmou fidèl pou tout sa ki ka aplé to. » Annan ròt artik-a, nou anprann ki Jéova promèt montré so lanmou fidèl pou sa-ya ki kontan l’, é i di ki i pa ké janmen anbandonnen yé. Sa lanmou-a ka bay li anvi « pardonnen » tout sa ki ka répanti (Is. 55:7, nòt). Si to pa ka rivé krè ki Jéova pardonnen to, doumandé to kò : « Ès mo sir ki Jéova sa roun moun ka pardonnen pas a konsa i fika é ki i paré pou pardonnen tout sa ki ka répanti é ki ka ‘aplé l’’ pou doumandé l’ pardon ? Donk, ès mo pa divèt sir ki i pardonnen mo, mo menm osi, lò mo ‘aplé l’’ pou doumandé l’ pardon ? »

¹¹ Labib ka di ki Jéova ka konprann ki nou pa parfè (Ps. 139:1, 2). Rounòt psaume David ékri ka byen montré nou sa. Annou wè kouman sa psaume-an pouvé konsolé nou é idé nou ankò pi sir ki Jéova pardonnen nou.

PA BLIYÉ SA JÉOVA KA SONJÉ

12-13. Dapré Psaume 103:14, kisa Jéova ka sonjé, é kisa i ka fè parapòrta sa ?

¹² (Li Psaume 103:14.) Annan sa vèrsé-a, David ka di ki Jéova ka « sonjé nou sa lapousyè ». Sa ka montré poukisa Jéova paré pou pardonnen so sèrvitèr ki ka répanti : i savé ki nou pa parfè. Pou nou byen konprann sa, annou pran tan réfléchi asou sa David di.

¹³ Annan sa menm vèrsé-a, David ka di osi ki Jéova « byen savé ké kisa nou fèt ». Kou Jéova fè Adan « ké lapousyè latè-a », i byen savé ki menm roun moun ki parfè gen limit ; parèkzanp, i bézwen manjé, dronmi ké rèspiré (Gen. 2:7). Mé lò yé ka di ki « nou sa lapousyè », sa lé di osi ki nou pa parfè pas Adan ké Èv péché é ki nou gen pou briga pou nou pa fè mové bagaj. Jéova byen savé sa. Lò David di ki Jéova ka « sonjé nou sa lapousyè », i té lé di osi ki, kou Jéova savé ki nou pa parfè, i toujou ka fè roun bagaj pou nou pas i ka pran nou lapenn. A kousidiré David té di : Jéova savé ki détan nou ka fè bétiz, mé lò nou ka répanti ké tout nou tchò, i ka pran nou lapenn é i ka pardonnen nou (Ps. 78:38, 39).

14. a) Ki ròt bagaj David di asou fason Jéova ka pardonnen nou ? (Psaume 103:12). b) Kisa fason Jéova pardonnen David ka anprann nou ? (gadé karé-a : « Jéova ka pardonnen é i ka bliyé »).

¹⁴ Ki ròt bagaj Psaume 103 ka anprann nou asou fason Jéova ka pardonnen nou ? Annan Psaume 103:12, David ka di ki lò Jéova ka pardonnen nou, « i ka mété nou péché lwen di nou », « menm fason koté solèy-a ka lévé lwen di koté i ka kouché-a » (li). Koté solèy-a ka lévé lwen di koté i ka kouché-a ; sa dé koté-ya pa ké jen kontré. Kisa sa ka anprann nou asou fason Jéova ka pardonnen nou ? Roun livb ka di ki Jéova ka mennen nou péché alé tèlman lwen ki i pa gen anyen pou fè l’ sonjé nou péché ankò. Détan, roun lòdò pouvé fè to sonjé roun bagaj. Mé, lò Jéova ka pardonnen nou, a kousidiré i pa té rété pyès lòdò ki té ké pouvé fè l’ sonjé nou péché épi pini nou pou sa péché-a (Ézéch. 18:21, 22 ; Actes 3:19).

15. Si nou konsyans ka kontinyé bat nou akoz di sa nou fè anvan, kisa nou pouvé fè ?

¹⁵ Kouman sa David di annan Psaume 103 pouvé idé nou krè ki Jéova pardonnen nou ? Si nou konsyans ka kontinyé bat nou akoz di sa nou fè anvan, annou doumandé nou kò : « Ès mo ka bliyé sa Jéova ka sonjé ? Ès mo ka bliyé ki i savé ki mo pa parfè é ki i pardonnen mo pas mo répanti ? Parkont, ès mo ka sonjé sa i désidé bliyé ? Ès mo ka sonjé péché i désidé pardonnen, roun péché i pa ké jen sèrvi pou pini mo ankò ? » Jéova pa ka sonjé péché nou fè anvan. Nou pa divèt fè l’ nonplis (Ps. 130:3). Si nou sir ki Jéova pardonnen nou, nou konsyans pa ké bat nou ankò é nou ké kontinyé adoré l’ ké tchò kontan.

16. Bay roun èkzanp ki ka montré ki a pa roun bon bagaj lò nou konsyans ka kontinyé bat nou akoz di sa nou fè anvan (gadé zimaj-a osi).

¹⁶ Annou pran roun èkzanp. Lò nou konsyans ka kontinyé bat nou akoz di sa nou fè anvan, a kousidiré nou ka éséyé roulé roun loto toupannan nou ka gadé annan rétrovizèr-a toulong. A roun bon bagaj lò nou ka gadé annan rétrovizèr-a tanzantan ; sa ka pèrmèt nou wè si i gen roun danjé dèyè nou. Mé, pou nou pa fè roun aksidan, a pou nou gadé douvan. Menm fason-an, détan, a roun bon bagaj lò nou ka réfléchi asou mové bagaj nou fè anvan, sa pouvé idé nou pa roukoumansé. Mé si nou pa ka arété sonjé fot nou fè anvan, nou ké néyé anba chagren afòrs nou konsyans ka bat nou, é pitèt sa ké anpéché nou fè tousa nou pouvé pou nou adoré Jéova. Annou pito mété nou lidé asou sa nou pouvé fè pou adoré Jéova, épi asou bèl promès i fè nou pou dimen, koté « nou pa ké sonjé » mové bagaj-ya (Is. 65:17 ; Prov. 4:25).

FÈ TOUSA TO POUVÉ POU TO RIVÉ KRÈ KI JÉOVA KONTAN TO É KI I PARDONNEN TO

17. Poukisa a pou nou toujou fè tousa nou pouvé pou nou rivé krè ki Jéova kontan nou é ki i pardonnen nou ?

¹⁷ A pou nou toujou fè tousa nou pouvé pou nou rivé krè ki Jéova kontan nou é ki i pardonnen nou (1 Jean 3:19, nòt). Poukisa ? Pas Satan li menm, i pa ka las chaché fè nou krè ki nou pa mérité Jéova kontan nou ouben ki i pa ké janmen pardonnen nou. Sa i lé, a fè nou arété adoré Jéova. É pi sa ké alé, pi i ké travay ankò pi rèd pou i rivé fè sa pas i savé ki i pa gen bokou tan ankò (Rév. 12:12). Annou pa janmen lésé l’ ganyen !

18. Kisa to pouvé fè pou to rivé krè ki Jéova kontan to é ki i pardonnen to ?

¹⁸ Pou to ankò pi sir ki Jéova kontan to, fè sa ròt artik-a té ka di nou fè. Pou to rivé krè ki Jéova pardonnen to, réfléchi asou sa i di asou li menm. Réfléchi asou sa Labib ka di asou fason i ka pardonnen nou. Pa bliyé ki i savé ki to pa parfè é ki i ké pardonnen to. É pa bliyé ki lò i ka pardonnen i pa ka sonjé to péché ankò. Atò, kou David ki té sir ki Jéova té pardonnen l’, to ké pouvé di : « Mèrsi, Jéova, pas “to pardonnen mo fot, tout mo péché” ! » (Ps. 32:5).