LÉSON 58
Kontinyé rété fidèl douvan Jéova
Vré krétyen-yan byen désidé pa lésé anyen ni pésonn vini krazé yé lanmityé ké Jéova. Asiré pa pitèt, a sa ou ka rousanti. Ou fidélité gen bokou valò pou Jéova (li 1 Chroniques 28:9). Annan ki sitiasyon sa pouvé rèd pou ou rété fidèl douvan Jéova ? É kisa ki pouvé idé ou ?
1. Kouman ròt-ya pouvé éséyé fè nou anbandonnen Jéova ?
I gen moun ki ké éséyé fè nou arété sèrvi Jéova. Mé kimoun ki ké éséyé fè roun bagaj konsa ? I gen moun ki arété sèrvi Jéova é aprézan yé ka manti asou so òrganizasyon paské yé lé krazé nou lafwa. Yé ka aplé yé apòsta. Anplis di sa, i gen chèf rélijyé ki ka sonmen manti asou nou pou fè sa-ya ki pa ka fè atansyon arété sèrvi Jéova. Sa danjéré pou nou lò nou ka pédi tan palé ké sa-ya ki kont nou, lò nou ka li yé liv, ouben li yé blòg, lò nou k’alé asou yé sit Entèrnèt, ouben lò nou ka gadé yé vidéyo. Jézi palé di sa-ya ki ka éséyé krazé nou fidélité douvan Jéova, i di asou yé : « Lésé yé. Yé lé montré moun chimen-an, mé yé pa menm ka wè. É si roun moun ki pa ka wè ka gidé rounòt moun ki pa ka wè, yé toulédé ké tonbé annan roun trou » (Matthieu 15:14).
2. Kouman désizyon nou ka pran annan nou lavi ka montré ki nou fidèl douvan Jéova ?
Nou lanmou pou Jéova ké pousé nou pa mélé nou kò ké fo rélijyon-yan menm menm menm. Sa lé di nou pa divèt fè parti di pyès òrganizasyon ki mélé ké fo rélijyon-yan, épi nou pa divèt ni travay pou yé, ni fè pyès aktivité ké yé. Jéova ka avèrti nou : «Soti annan [Gran Babilòn-an], mo pèp» (Révélation 18:2, 4).
ANNOU FOUYÉ ANNAN LABIB-A
Annou wè sa ou pouvé fè pou pa lésé pyès moun krazé ou fidélité pou Jéova. Annou wè osi kouman ou pouvé montré ou fidélité lò ou ka ‘soti annan Gran Babilòn-an’.
3. Panga fo ansényan-yan
Kisa nou divèt fè si nou ka tandé vyé bagaj asou òrganizasyon Jéova-a ? Li Proverbes 14:15, épi kozé asou sa késyon-an :
Poukisa nou divèt fè atansyon pa krè tousa nou ka tandé ?
Li 2 Jean 9-11, épi kozé asou sa késyon-yan :
Kouman nou divèt aji ké apòsta-ya ?
Menm si nou pa ka kozé dirèktéman ké apòsta-ya, kouman nou pouvé wè ké tandé yé ansèyman ?
Dapré ou, kisa Jéova té ké rousanti si ou té ka kouté vyé paròl yé ka di asou li ouben asou so òrganizasyon ?
4. Rété fidèl douvan Jéova menm si roun frè ka fè roun péché
Si nou savé ki roun moun annan asanblé-a fè roun péché grav, kisa nou divèt fè ? Gadé ki lalwa Jéova té bay Israyèl tan-lontan. Li Lévitique 5:1.
Kou vèrsé-a ka di, si nou savé ki roun moun fè roun péché grav, nou divèt di ansyen-yan sa i fè. Mé anvan nou fè sa, nou lanmou ké pousé nou ankourajé sa moun-an alé wè ansyen-yan pou di yé sa i fè. Mé si i pa k’alé palé ké yé, nou ké fidèl douvan Jéova é nou ké di ansyen-yan sa nou savé. Kouman lò nou ka fè sa, sa ka montré ki nou gen lanmou fidèl...
pou nou Bondjé Jéova ?
pou moun-an ki fè péché-a ?
pou ròt moun-yan annan asanblé-a ?
Si roun frè fè roun mové bagaj, idé’l !
5. Rété lwen di Gran Babilòn-an
Li Luc 4:8 ké Révélation 18:4, 5, épi kozé asou sa késyon-yan :
Ès mo non toujou marké asou roun lis di roun fo rélijyon ?
Ès mo ka fè parti di roun òrganizasyon ki mélé ké rounòt rélijyon ?
Ès mo travay ka soutni fo rélijyon-yan ?
Ès i gen ròt bagaj annan mo lavi ki ka montré ki mo pòkò vréman soti di fo rélijyon-yan ?
Si pou roun di sa késyon-yan mo réponn wi, ki chanjman mo divèt fè annan mo lavi ?
Annan tout sa sitiasyon-yan, pran roun désizyon ki ké montré ki ou fidèl douvan Jéova é ki ké pèrmèt ou gen roun konsyans ki pròp.
Kisa ou té ké fè si roun òrganizasyon ki mélé ké fo rélijyon-yan, ka doumandé ou fè roun don pou idé moun ?
I GEN MOUN KA DI : « Mo bézwen savé sa apòsta-ya ka di asou Témwen Jéova-ya, pou mo rivé défann lavérité-a. »
Ès a roun bon lidé ? Poukisa ?
SA NOU WÈ
Nou anvi rété fidèl douvan Jéova, a pou sa nou pa divèt pran men ké
sa-ya ki ka éséyé fè nou pran roun mové chimen.
Kisa ou anprann
Poukisa nou pa divèt kouté sa apòsta-ya ka ansényé ?
Si nou ka anprann ki roun frè ouben roun sò fè roun péché ki grav, kisa nou divèt fè ?
Kouman nou pouvé obéyi sa avèrtisman-an ki ka di nou soti ké ti kouri di fo rélijyon-yan ?
SA OU POUVÉ TRAPÉ OSI
Gadé sa ou divèt fè lò ròt moun ka sonmen manti asou Témwen Jéova-ya.
« As-tu vraiment tous les faits ? » (La Tour de Garde, out 2018)
Kouman ou pouvé savé si roun bagaj moun-yan ka fè ouben si roun òrganizasyon ka soutni Gran Babilòn-an ?
Kisa sa-ya ki kont nou ka fè pou krazé nou lafwa ?
Li istwè roun monpè shintoïste ki tiré so dé pyé di fo rélijyon-yan (istwè mo lavi : « Je recherchais Dieu depuis mon enfance »).
« La Bible transforme des vies » (La Tour de Garde, 1é jwiyé 2011)