Kisa ki ké rivé sé rélijyon-yan ?

1. Ès tout sé rélijyon-yan bon ?

I gen moun sensèr annan tout sé rélijyon-yan. Bon nouvèl-a a ki Bondjé ka wè yé é i ka gadé pou yé. Malérèzman, sèrten moun ka sèrvi larélijyon pou fè mové bagaj (2 Corinthiens 4:3, 4 ; 11:13-15). Tout kalité journal ka montré ki sèrten rélijyon menm annan zafè tchwé patché moun, lagèr ké téroriz. I gen chef rélijyé ki ka fè sé timoun-yan méchansté é i gen sa ki pédofil. Sa-ya ki ka krè annan Bondjé byen tris di wè sa sitiasyon-an ! — Li Matthieu 24:3-5, 11, 12.

Vré rélijyon-an ka glorifyé Bondjé, mé sé fo rélijyon-yan, ka fè bagaj ki pa ka fè li plézi. Yé ka ansényé lidé ki pa annan Labib-a. Annan sa i gen manti asou Bondjé é asou sé moun mouri-ya. Mé Jéova lé ki sé moun-yan konnèt lavérité asou li. — Li Ézéchiel 18:4 ; 1 Timothée 2:3-5.

2. Kisa ki ké rivé sé rélijyon-yan ?

Érèzman, Bondjé pa ka lésé so kò bloublou douvan sé rélijyon-yan ki ka di yé kontan li, mé ki pi kontan monn Satan-an (Jacques 4:4). Annan Labib-a, yé ka aplé tout sé fo rélijyon-yan « Gran Babilòn-an ». Poukisa ? Paské fo rélijyon-an vini èkzisté apré délij-a annan roun vil yé ka aplé Babilòn. Titalò, Bondjé ké détrwi roun sèl kou sé rélijyon-yan ki ka manti pou sé moun-yan é ki ka fè yé soufri. — Li Révélation 17:1, 2, 5, 16, 17 ; 18:8.

Jéova pa ka bliyé moun sensèr ki toupatou annan sé fo rélijyon-yan ki asou tout latè-a. I ka anprann yé lavérité, é a konsa i ka rasanblé yé annan vré rélijyon-an. — Li Michée 4:2, 5.

3. Kisa sé moun sensèr-ya divèt fè ?

Jéova ka gadé pou moun ki kontan sa ki vré ké sa ki byen. I ka di yé soti annan sé fo rélijyon-yan san pédi tan. Roun moun ki kontan Bondjé paré pou fè chanjman pou fè li plézi. — Li Révélation 18:4.

Apré lanmò Jézi, sé moun sensèr-ya asèpté ké tchò kontan bon nouvèl-ya ki sé apot-ya té ka préché. Gras a Jéova, yé anprann viv rounòt fason. Konsa yé té pi éré, yé lavi té gen roun sans, é yé té gen roun èspwar. Yé sa dé èkzanp pou nou : lò yé tandé sa bon nouvèl-ya, yé bay Jéova prémyé plas annan yé lavi. — Li 1 Thessaloniciens 1:8, 9 ; 2:13.

Jéova ka asèpté annan so fanmi adoratèr-ya sa-ya ki ka soti di sé fo rélijyon-yan. Si ou ka asèpté so bèl envitasyon, ou ké divini so zanmi, ou ké annan roun fanmi plen ké lanmou é ou ké trapé lavi pou tout-tan. — Li Marc 10:29, 30 ; 2 Corinthiens 6:17, 18.

4. Kouman Bondjé ké randé tout sé moun-yan éré ?

Titalò Bondjé ké fè disparèt tout sé fo rélijyon-yan. A roun bon nouvèl ! Tout moun ké soulajé di tout soufrans. Sé fo rélijyon-yan pa ké janmen mété divizyon ni tronpé pyès moun ankò. Ki annan syèl-a ki asou latè-a tout moun ké adoré sèl vré Bondjé-a ansanm. — Li Révélation 18:20, 21 ; 21:3, 4.