2 Rongorongo

33 Bon 12 ana ririki Manate+ ngke e riki bwa te uea, ao e tautaeka i Ierutarem i nanon 55 te ririki.+

2 E karaoa ae buakaka i matan Iehova, ni kakairi n aia mwakuri aika riribaaki natannaomata ake e kakioianako Iehova mai mwaia tibun Iteraera.+ 3 E a manga katei taabo aika rietata ake e kabwakai tamana are Etekia,+ e katei aia baonikarea taiani Baara, ao e karaoi kaai aika tabu,* ao e bobaraaki nakoni bwaini karawa ni kabane ao e toro irouia.+ 4 E katei naba taiani baonikarea n ana auti Iehova,+ are e taetae ni kangai Iehova ibukina: “E na mena arau i Ierutarem n aki toki.”+ 5 Ao e katei baonikarea ibukini bwaini karawa ni kabane ni katawanang ake uoua ake n ana auti Iehova.+ 6 Ao e kabuekiia natina mwaane n te ai*+ n ana Mwarua Natin Innom,+ bon te tia tabunea,+ te tia kaiwa, te tia kakaraoi, ao e kateirakeia taan rorokoia taimonio ma taani kaiwani kanoan taai aika a na roko.+ E karaoa ae buakaka n te aro ae rangi ni korakora i matan Iehova, ni kaunna iai.

7 E karina te bouannanti ae kaaraki are e karaoia, i nanon ana auti te Atua ae koaua,+ are e kangai ibukina te Atua nakon Tawita ao nakon natina are Toromon: “N na kaaki arau n aki toki n te auti aei ao i Ierutarem, are I rineia mai buakon aia baronga nako tibun Iteraera.+ 8 Ao N na aki manga kanakoi waeia tibun Iteraera man te aba are I angania aia bakatibu, ma tii ngkana a kakairi raoi ni bwaai ni kabane ake I tua nakoia, are te Tua ae tabwanin, kaetieti, ao mooti ake e anganaki te aba rinanoni Mote.” 9 Ma e teimatoa Manate ni katiotionakoia kaain Iuta ao kaain Ierutarem, n arona ni kairiia bwa a na karaoa ae buakaka riki nakoia natannaomata ake e kamaunaia Iehova mai mwaia tibun Iteraera.+

10 E teimatoa Iehova n taetae nakoni Manate ma ana aomata, ma a aki muti.+ 11 Ao Iehova e a kairiia mataniwi n ana taanga ni buaka uean Aturia n ekiianako naakai, ao a taua Manate n taiani matau* ao a kabaea ni bwaai ni kabaewae aika uaai aika taiani buraati, ao a kairia nako Baburon. 12 Ao e bubutiia Iehova ae Atuana i buakon rawawatana bwa e na akoia* ao e teimatoa ni kananorinanoa n te aro ae korakora i matan te Atua ae Atuaia ana bakatibu. 13 E teimatoa n tataro Nakoina, ao E rotaki n ana onnon teuaei ma n ongo ana bubutii ni kan akoaki, ao E kaokia nako Ierutarem nakon nakoana n uea.+ Ao e a ataia Manate ae Iehova bon te Atua ae koaua.+

14 Imwin aei ao e katea teuaei oon tinanikun Ana Kaawa Tawita+ i maeaoni Kion+ n te mwarua. E rangi n rietata te oo aei. E kateia ao e rokoroko naba n te Mataroa n Ika.+ E reitianako ni katobibia te oo mai ikanne n otabwaninia te kaawa ao e roko i Oobera.+ Irarikina, e mwiokoiia mataniwi n te taanga ni buaka ni kaawan Iuta ni kabane aika nonoaki. 15 E kanakoi ngkanne atua aika ianena ma bouannanti man ana auti Iehova,+ ao baonikarea ni kabane ake e katei ni maungan ana auti Iehova+ ao i Ierutarem, ao e tua karenakoaia i tinanikun te kaawa. 16 E onobwaia naba teuaei ana baonikarea Iehova+ ao e anga taiani karea n raoi+ ao karea ni katituaraoi+ i aona, ao e tuangia kaain Iuta bwa a na toro iroun Iehova ae Atuan Iteraera. 17 Ma a bon teimatoa naba aomata n angakarea n taabo aika rietata, e ngae ngke bon tii nakon Iehova ae Atuaia.

18 Ni kaineti ngkanne ma nikiran rongorongoni Manate, ana tataro nakon Atuana ma aia taeka taan nori miitara ake a taetae nakoina n aran Iehova ae Atuan Iteraera, a boni koreaki mwia n rongorongoia uean Iteraera. 19 Ana tataro naba+ ma arona n anganaki ana bubutii, ana bure ni kabane ma ana aki kakaonimaki,+ taabo ake e katei iai taabo aika rietata, ao kaai aika tabu*+ ake e katei ma bouannanti aika kaaraki imwain are e kananorinanoa, a boni koreaki taekaia i buakon aia taeka taan nori miitara. 20 Ao e a wene ni motirawa Manate i rarikia ana bakatibu, ao a kaiia n ana auti, ao e a riki natina are Amon bwa te uea n onea mwina.+

21 Bon 22 ana ririki Amon+ ngke e riki bwa te uea, ao e tautaeka i Ierutarem i nanon uoua te ririki.+ 22 Ao e teimatoa ni karaoa ae buakaka i matan Iehova, n aron are e karaoia tamana are Manate,+ ao e angakarea Amon nakoia bouannanti aika kaaraki ni kabane ake e karaoi tamana are Manate,+ ao e teimatoa n toro irouia. 23 Ma e aki kananorinanoa i matan Iehova+ n aron tamana are Manate ae kananorinanoa.+ Ma n oneani mwin anne, e a kakorakoraa riki ana bure teuae Amon. 24 N tokina ao a a bairea te karitei ana toro n ekianako+ ao a kamatea i nanon ana auti. 25 Ma a bane ni kamateaki taani bairea te karitei nakon te Uea are Amon+ irouia kaain te aba, ao a kaueaa natina are Iotia+ n onea mwina.