Taani Motikitaeka

8 A taku ngkanne mwaane aika tibun Eberaim nakoina: “Tera ae ko karaoia nakoira? E aera ngkai ko aki weteira ngke ko nako ni buakania tibuni Mirian?”+ Ao a kauntaeka n te aro ae korakora ma ngaia.+ 2 Ma e taku nakoia: “Tera ae I karaoia ni kabotauaki ma ngkami? Tiaki a raoiroi riki nikirani kureebe ake a rikoi tibun Eberaim+ imwin taiakia, nakon uaa ake a taiaki ake a ikotii tibun Abietera?+ 3 E anga te Atua aia toka tibuni Mirian ake Ooreba ma Teebi+ nako nanoni baimi, ao tera ae I a tia ni karaoia ni kabotauaki ma ngkami?” Ao ngke e taekina aei* ao a a rau nanoia.

4 Ao e a roko Kiteon n te Ioretan ao e a rinanona nakon iterana are te iterana. E a kua ngaia ma raona mwaane ake 300, ma a teimatoa naba ni kaeiia aiaia. 5 Mangaia are e taku nakoia rorobuakan Tukota: “Taiaoka ma angania aomata aika ririmwiai aikai taiani kariki bwa a a kua, ao I tabe ni kaeiia Teba ma Taremunna ake aia uea tibuni Mirian.” 6 Ma a taku tokan Tukota: “Ko a tia n tauia Teba ma Taremunna, ngkai ti a riai n angan am taanga ni buaka te kariki?” 7 Ao e taku Kiteon: “Ibukin anne, ngkana e anga Teba ma Taremunna nako nanoni baiu Iehova, ao N na oreingkami n aroka aika kateketeke ao kaai aika kateketeke man te rereua.”+ 8 Ao e nako mai ikekei nako Benuera ao e a manga bubutii naba te baere e bubutii mai mwaina, ma a kaeka nakoina rorobuakani Benuera n aron naba aia kaeka rorobuakan Tukota. 9 Mangaia are e taku naba nakoia rorobuakani Benuera: “Ngkana I oki ma te raoi ao N na kabwakaa te taua aei.”+

10 A a mena ngkai i Kareko Teba ma Taremunna ma aia taanga ni buaka, aika tao 15,000 mwaane. Naakai ni kabane bon nikiraia kaain aia taanga ni buaka kaaini Mainiku,+ bwa a a tia ni bwaka mwaane aika 120,000 ake a uakabaang. 11 E waakinako Kiteon ni waerake ni kawaia naake a mamaeka n taian umwanrianna ake i mainikun Noba ao Iokebea,+ ao e nako ni buakana aia kaembwa aiaia, ake a aki tauraoi kaaina. 12 Ngke a birinako Teba ma Taremunna, ao e kakioia ao e tauia aia uea tibuni Mirian aika uoman aikai, aika Teba ma Taremunna, n te aro are a a takaka kaain te kaembwa aei ni kabane.

13 Ao e oki Kiteon are natin Ioaati man te buaka n te kawai n ararakea Eereti. 14 I aoni kawaina ao e taua te rorobuaka n ataei temanna mai Tukota ao e titirakinna. Mangaia are e a korei araia tokan Tukota ma unimwaanena, te rorobuaka n ataei aei, ao bon 77 mwaane. 15 Ao e kawariia rorobuakan Tukota ao e taku: “Ao aikai Teba ma Taremunna are kam kakanikoai ngkoa irouia ni kangai, ‘Ko a tia n tauia Teba ma Taremunna ngkai ti a riai n angania am rorobuaka aika kua te kariki?’”+ 16 Ao e anaiia unimwaanen te kaawa ao e kataereia n aroka aika kateketeke ma kaai aika kateketeke, bwa e katuuaaeia iai rorobuakan Tukota.+ 17 Ao e kabwakaa te taua are i Benuera+ ao e kamateia mwaanen te kaawa.

18 Ao e titirakinia Teba ma Taremunna ni kangai: “Aekakira mwaane ake kam kamateia i Tabora?” Ao a taku: “Kaanga aekakim, kaanga taraaia natiia ueea ngaiia n tatabemania nako.” 19 Mangaia are e taku: “Bon tariu nakanne, bwa natin tinau. Ngkai bon iai Iehova, ao ngke arona bwa kam kamaiuia, ao N na bon aki kamateingkami.” 20 E taku ngkanne nakon Ietere are ana karimoa: “Teirake ao kamateia naakai.” Ma e aki buuta ana kabaang te teinimwaane aei bwa e maaku, bwa e bon tuai n ikawai te teinimwaane aei. 21 Mangaia are a taku Teba ma Taremunna: “Bon teirake ngkoe ao tiringira, bwa e ataaki te mwaane mani korakorana.”* Mangaia are e teirake Kiteon ao e kamateia Teba ma Taremunna,+ ao e anai bwaai ni katamaroa aika ai aron tein namwakaina ake a mena i aon roroaia aia kamero.

22 Imwina riki ao a taku mwaane aika tibun Iteraera nakoni Kiteon: “Ko na tautaeka i aora, ngkoe ma natim ao tibum naba, bwa ko a tia ni kamaiuira mai nanoni baia tibuni Mirian.”+ 23 Ma e taku Kiteon nakoia: “N na aki tautaeka i aomi, ao e na aki naba tautaeka natiu i aomi. Bon Iehova ae e na tautaeka i aomi.”+ 24 Ao e reitia ni kangai Kiteon: “Kariaia bwa N na bubutii te bwai teuana mairoumi: ae kam na bane n anganai kaka teuana mwamwan te bwairi man ami bwai ni kuri ngkami n tatabemaningkami nako.” (Bwa iai irouia te koraki ake a konaaki mwamwan te bwairi aika koora ibukina bwa bon tibun Itimaera ngaiia.)+ 25 A kaeka ni kangai: “Ti na bon anga baikanne.” Mangaia are a taakina te kamwarai teuana ao a bane ngaiia n tatabemania nako n tewenakoi kaka teuana mwamwan te bwairi nako aona man aia bwai ni kuri. 26 Ao tinebun mwamwan te bwairi ake koora ake e bubutii teuaei, bon 1,700 te tiekera* ni koora, i rarikini bwaai ni katamaroa aika ai aron tein namwakaina, taabia, kunnikai aika karaoaki man te karai ae beboo ae buraen te tiibu aika bwabwainaki irouia aia uea tibuni Mirian, ao mwaen roroaia kamero.+

27 Ao e karaoia Kiteon bwa te ebota+ ao e kaotiotia n ana kaawa ae Obera,+ ao a a bane tibun Iteraera ni kamwaraeia n taromauria* te baei ikekei,+ ao e a riki bwa te bwai ni kamwane nakoni Kiteon ao nakoia kaaini batana.+

28 Mangaia are a a taenikai tibuni Mirian+ i mataia tibun Iteraera, ao a aikoa manga kakaewenako nakoia,* ao e a motirawa* te aba arei i nanon 40 te ririki n ana bong Kiteon.+

29 Mangaia are e a okira mwengana Ierubaara+ are natin Ioaati ao e tiku iai.

30 Ao a bungiaki natini Kiteon aika 70,* bwa a bati buuna. 31 Ao e bungia naba natin teuaei buuna ni kewe* are i Tekem, ao teuaei e aranna bwa Abimereka.+ 32 Ao e a mate Kiteon are natin Ioaati imwini maiuna ae abwabwaki, ao e kaiiaki n ruanimaten Ioaati are tamana i Obera are aia tabo tibun Abietera.+

33 Ao ngke e mate naba ngkekei Kiteon, ao a a manga kamwaraeia naba n taromaurii* taiani Baara tibun Iteraera,+ ao a rinea Baaraberita bwa atuaia.+ 34 Ao tibun Iteraera a aki uringa Iehova ae Atuaia,+ are e a tia ni kamaiuia mai nanoni baia aiaia ni kabane ake i rarikia,+ 35 ao a aki naba kaota te tangira ae koaua* nakoia kaaini batan Ierubaara ae taekani Kiteon, bwa booni mwini baike e karaoi ni kabane aika raraoi ibukia tibun Iteraera.+