TE OTINAKO

1 Ngke e mwananga nako Aikubita Iakoba, are Iteraera, ao a iria naba natina mwaane ma aia utu. Aikai araia natin Iakoba:+ 2 Reuben, Timeon, Rewi, Iuta,+ 3 Itakara, Teburun, Beniamin, 4 Tan, Nabetari, Kata, ao Atera.+ 5 Ao botaia naake a* riki mairoun Iakoba* bon 70 te aomata,* ma e a kamani mena Ioteba i Aikubita.+ 6 N tokina ao e a mate Ioteba,+ ao tarina naba ni kabane ma te roro arei ni kabane. 7 Ao a a bati aia kariki tibun Iteraera,* ao a a rangi ni bati ao n ririkirake ni mwaiti ma n rangi ni korakora, mangaia are e a on te aba irouia.+

8 Imwina riki ao e a teirake te uea temanna ae boou i Aikubita ae e aki kinaa Ioteba. 9 Mangaia are e taku nakoia ana aomata: “Noria! A a rangi ni bati ma ni korakora riki nakoira tibun Iteraera.+ 10 Ti na karaoa te bwai teuana nakoia bwa a kaawa n ririkirake mwaitiia ao ngkana e boo te buaka ao a na raonia taani kairiribai nakoira ma ni buakanira, ao a na kitana te aba aei.”

11 Mangaia are a mwiokoiia mataniwi i aoia aika a tautoronia* bwa a na karawawataia n aia mwakuri aika rawawata,+ ao a katei kaawa ni kaikobwai aika Bitom ma Raamteti ibukini Barao.+ 12 Ma ngke a kabatiaa karawawataaia ao e a rikirake riki mwaitiia ma ni buta te aba irouia, mangaia are a a taonaki n te maaku ae korakora I-Aikubita irouia tibun Iteraera.+ 13 Ao I-Aikubita a tautoronia tibun Iteraera ni karawawataia.+ 14 A karawawatai maiuia ni mwakuri aika matoatoa ni karaoan te timanti man te bokaboka ao ni karaoani buriki,* ao n aeka ni mwakuri riki n te tawaana aika karawawata. Eng, a kammwakuriia ni karawawataia ni mwakuri nako aika karawawata.+

15 Imwina riki ao e taetae uean Aikubita nakoia taani kabung aika taian Ebera, ae araia Nei Tibera ao Nei Bua, 16 ao e tuangia ni kangai: “Ngkana kam kabungia aine aika taian Ebera+ ao kam na taraia bwa tera natiia, ngkana te mwaane ao kam na tiringnga ma ngkana te aine ao e na maiu.” 17 Ma a maaka te Atua ae koaua taani kabung aikai ao a aki karaoa are e tuangia uean Aikubita, ma a kamaiuia naati mwaane.+ 18 Imwina riki ao e weteiia taani kabung aikai uean Aikubita ao e taku nakoia: “E aera ngkai kam kamaiuia naati mwaane?” 19 A taku taani kabung aikai nakoni Barao: “A kaokoro aine aika taian Ebera ma aine aika I-Aikubita, bwa a rangi ni marurung ao a a kamani bung imwain rokon te tia kabung irouia.”

20 Mangaia are e karaoa ae raoiroi te Atua nakoia taani kabung aikai, ao a a ririkirake mwaitiia aomata ma n rangi ni korakora. 21 Ao kioina ngke a maaka te Atua ae koaua taani kabung aikai, e a karekei aia utu te Atua imwina riki. 22 N tokina ao e a tua ae kangai Barao nakoia ana aomata ni kabane: “Kam na tewenakoia natiia taian Ebera aika mwaane ni kabane aika tibwa bungiaki, nako nanon te Karaanga ae te Naire, ma kam na kamaiuia naati aine ni kabane.”+

2 N te tai anne iai te mwaane temanna ae kaain te baronga ae Rewi ae mare ma natin* Rewi.+ 2 Ao e a bikoukou te aine arei ao e bungia te nati te mwaane. Ngke e noria bwa e kakateke taraana ao e a karabaa i nanon tenua namwakaina.+ 3 Ngke e a aikoa kona ni karabaa,+ ao e a anaa te bwaene* ae karaoaki man te aroka ae riiriki n te ran,* ao e kabiria n te korotaa ao e nnea te teei i nanona, ao e kaaki i buakoni maunei ake n te Karaanga ae te Naire. 4 Ma e tei mwaanen+ te teei ni kararoaa bwa e na nora te bwai ae e na riki nakoina.

5 Ngke e ruo natini Barao te aine bwa e na tebotebo n te Naire, ao a ririaki taani kawakinna aika aine i rarikin te Naire. Ao e nora te bwaene neiei ribuakoni maunei. Ao e a kanakoa naba ngkekei ana toro te aine bwa e na anaia.+ 6 Ngke e kaukia ao e nora te teei ae te mwaane ae tang. Ao e nanoangaia ma e taku: “Aio temanna mai buakoia natiia taian Ebera.” 7 E taku ngkanne mwaanen te teei nakon natini Barao te aine: “I kona n nako ni wetea te aine temanna mai buakoia taian Ebera bwa e na kammammaa te teei anne?” 8 E taku natini Barao te aine nakoina: “Naako!” E aki tabwara te teinnaine arei ma e a nako naba ni wetea tinan te teei.+ 9 E taku ngkanne natini Barao te aine nakon neiei: “Anaa te teei aei ao kammammaa, ao N na kabooko.” Mangaia are e anaa te teei te aine arei ao e kammammaa. 10 Ngke e a ikawai te teei arei ao e a kairia neiei nakon natini Barao te aine, ao e a riki bwa natina.+ E aranna bwa Mote* ao e taku: “Ibukina bwa I anaia man te ran.”+

11 Ao ni boong akekei ngke e a ikawai Mote,* ao e a nako ni kawariia tarina bwa e na nori aia mwakuri ake a karawawataaki iai,+ ao e nora te I-Aikubita ae orea temanna mai buakoia tarina aika taian Ebera. 12 Mangaia are e taratara nako ao akea ae e noria, ao e kamatea te I-Aikubita ao e taunna ni karabaa n te tano.+

13 Ma e a manga nako naba n te bong are imwina ao a boo n un mwaane aika uoman aika taian Ebera. Mangaia are e taku nakon teuare bure: “E aera ngkai ko a orea tarim?”+ 14 Ao e kaeka teuarei ni kangai: “Antai ae mwiokoiko bwa te natinuea te mwaane ao te tia moti i aora? Ko iangoia naba bwa ko na tiringai n aron are ko tiringa te I-Aikubita arei?”+ E a maaku Mote ao e taku i nanona: “E bon ataaki te baerei!”

15 Ao e ongo taekan te baei Barao, ao e kataia n tiringa Mote, ma e birinako Mote mairouni Barao ao e nako ni maeka n te aba ae Mirian.+ Imwin rokona ikekei ao e a tekateka i rarikin te mwanibwa teuana. 16 Ao iai natin ibongani Mirian+ aika itiman aine, ao a roko n itiran ao a kanoai nnen nimaia maan bwa a na kamooa ana nanai tamaia. 17 Ma a roko taani kawakintiibu n aron ae a taneiai iai ao a kakioianako. Mangaia are e teirake Mote ao e buokiia* aine akekei ao e kamooa aia nanai. 18 Ngke a a roko ni mwengaia iroun Reuera*+ are tamaia ao e taku: “E aera ngkai kam a rangi ni waekoa n oki n te bong aei?” 19 A kaeka ni kangai: “E katokai kaira te I-Aikubita+ temanna mairouia taani kawakintiibu, ao e itiran naba ibukira ao e kamooa te nanai.” 20 E taku nakoia natina aine: “Ao e nga teuanne? E aera ngkai kam a kitanna? Weteia bwa e aonga n amwarake ma ngaira.” 21 Imwin anne ao e a kukurei Mote ni maeka iroun te mwaane arei, ao e anga Tibora+ are natina te aine nakoni Mote bwa e na mare ma ngaia. 22 Imwina riki ao e a bungia te nati te mwaane neiei ao e aranna Mote bwa Keritiom,*+ bwa e taku: “Bon te aomata ngai ae I maeka n iruwa n te aba ae ianena.”+

23 Imwin te tai ae maan* ao e a mate uean Aikubita,+ ma a teimatoa tibun Iteraera ni ngirangira ibukin tautoronakia. Mangaia are a tang n rawawata ibukin tautoronakia, ao e teimatoa ni waerake nakon te Atua ae koaua tangia ni kani buokaki.+ 24 Ao e ongo ngirangiraia te Atua,+ ao e uringa ana berita ma Aberaam, Itaaka, ao Iakoba.+ 25 Mangaia are e noriia tibun Iteraera te Atua ao e atai rawawataia.

3 E a riki Mote bwa te tia kawakina ana nanai Ietero*+ are ibongani Mirian, are tamani buuna. Ngke e kaira te nanai nako maeaon te rereua, ao akea bwa e a roko i Oreba n ana maunga te Atua ae koaua.+ 2 E kaoti ngkanne ana anera Iehova nakoina n uran te ai i buakon te aroka.+ Ngke e tabe n tarataraia ao e noria bwa e urarake te aroka ma e aki bue. 3 Mangaia are e taku Mote: “N na nako n taraa raoi te bwai ae kamimi aei, n noria bwa e aera ngkai e aki bue te aroka aei.” 4 Ngke e noria Iehova bwa e nako n taraia, ao e a weteia naba te Atua mai buakon te aroka arei ao e taku: “Mote! Mote!” ao e kaeka ni kangai: “Aio ngai.” 5 E taku ngkanne: “Tai kaaniko riki. Buutii am kau mai waem ibukina bwa e tabu te tabo ane ko tei iai.”

6 E reitia ni kangai: “Ngai Atuan tamam, Atuan Aberaam,+ Atuan Itaaka,+ ao Atuan Iakoba.”+ Ao e karabaa matana Mote bwa e maaku n taraa te Atua ae koaua. 7 E reitia ni kangai Iehova: “I bon nora rawawataia au aomata ake i Aikubita, ao I ongo tangia ibukia te koraki ake a tautoronia ni kammwakuriia, I atai raoi marakia ake a taonaki iai.+ 8 N na ruo bwa N nang kamaiuia mai nanoni baia I-Aikubita+ ma ni kairiia ni kaotinakoia man te aba anne nakon te aba ae raoiroi ae mwawaawa, ae te aba ae raanga iai rannimamman te man ma aia karewe manibeeru,*+ nakon aia aono tibuni Kanaan, tibun Eta, taian Amoraite, taiani Beritaite, taian Iwaite, ao I-Iebuti.+ 9 Ao noria! E roko tangia tibun Iteraera irou, ao I nori naba rawawataia ae korakora ake a karawawataaki iai irouia I-Aikubita.+ 10 Nakomai ngkai bwa N na kanakoko nakoni Barao ao ko na kaotinakoia au aomata aika tibun Iteraera mai Aikubita.”+

11 Ma e taku Mote nakon te Atua ae koaua: “Kaanga antai ngai ngkai I riai n nakoni Barao ao ni kairiia tibun Iteraera ni kaotinakoia mai Aikubita?” 12 E kaeka ni kangai: “N na boni memena iroum,+ ao aei te kanikina ibukim bwa boni ngai ae I kanakoko: Ngkana ko a tia ni kairiia aomata akanne ni kaotinakoia mai Aikubita, ao kam na toro* iroun te Atua ae koaua i aon te maunga aei.”+

13 Ma e taku Mote nakon te Atua ae koaua: “Ngkana tao I nakoia tibun Iteraera ao I kangai nakoia, ‘E kanakomaiai nakoimi Atuaia ami bakatibu,’ ao a kangai nakoiu, ‘Antai arana?’+ ao tera ae N na taekinna nakoia?” 14 Mangaia are e taku te Atua nakoni Mote: “N na Riki bwa te Bwai ae I Rineia* bwa N na Riki Iai.”*+ Ao e reitia ni kangai: “Aio te bae ko na taekinna nakoia tibun Iteraera, ‘E kanakomaiai nakoimi teuare arana N na Riki Bwa te Bwai ae I Tangiria.’”+ 15 E a manga taku riki ngkanne te Atua nakoni Mote:

“Aio te bae ko na taekinna nakoia tibun Iteraera, ‘E kanakomaiai nakoimi Iehova ae Atuaia ami bakatibu, ae Atuan Aberaam,+ Atuan Itaaka,+ ao Atuan Iakoba.’+ Bon arau aei n aki toki+ ao aei te aro ae N na ururingaki iai man te roro teuana nakon te roro teuana. 16 Naako ngkai ao botiia aia unimwaane tibun Iteraera ao kangai nakoia, ‘E kaoti nakoiu Iehova ae Atuaia ami bakatibu, ae Atuan Aberaam, Itaaka, ao Iakoba, ao e kangai: “I bon atai aromi+ ma te bwai ae karaoaki nakoimi i Aikubita. 17 Mangaia ae I kangai, N na kairingkami nako man te karawawataaki+ i aani baia I-Aikubita nako abaia tibuni Kanaan, tibun Eta, taian Amoraite,+ taiani Beritaite, taian Iwaite, ao I-Iebuti,+ nakon te aba ae raanga iai rannimamman te man ma aia karewe manibeeru.”’+

18 “A na bon ongo ni bwanaam,+ ao ko na nako ni kawara uean Aikubita ngkoe ma aia unimwaane tibun Iteraera ao kam na kangai nakoina, ‘E a tia n taetae ma ngaira Iehova ae Atuaia taian Ebera.+ Mangaia ae ti butiiko bwa ti na mwananga i nanon tenibong nakon te rereua, bwa ti aonga n angakarea nakon Iehova ae Atuara.’+ 19 Ma I ataia raoi ngai bwa e na aki kariaia uean Aikubita bwa kam na nako, ma tii ngkana e kairoroaki n te bai ae korakora.+ 20 Mangaia ae N na arora baiu ao N na orea Aikubita n au mwakuri ni kabane aika rangi ni kamimi aika N na karaoi i aona, ao imwin anne e na kanakoingkami.+ 21 Ao N na karekea akoaia au aomata irouia I-Aikubita ao ngkana kam nako, ao e na iai uotami mairouia.+ 22 A na bubutii aine n tatabemania nako nakoia kaain rarikia, ao nakon te aine ae maeka n aia auti, bwaai aika karaoaki man te tirewa ao man te koora, ao kunnikai naba, ao kam na karin i aoia natimi mwaane ma natimi aine, ao kam na kuribwaiia I-Aikubita.”+

4 Ma e kaeka Mote ni kangai: “Ma tao ane a na bon aki kakoauaai ao a na aki ongo ni bwanaau,+ bwa ane a na kangai, ‘E bon aki kaoti Iehova nakoim.’” 2 E taku ngkanne Iehova nakoina: “Tera ane i baim?” ao e kaeka ni kangai: “Te oko.” 3 E taku: “Karenakoa i aontano.” Mangaia are e karenakoa i aontano, ao e a riki bwa te naeta,+ ao e a birinako mai iai Mote. 4 E a taku ngkai Iehova nakoni Mote: “Arora baim ao taua mai bukina.” Mangaia are e arora baina ao e taua, ao e a manga riki bwa te oko i baina. 5 E taku ngkanne te Atua: “Karaoa aei bwa a aonga ni kakoauaa ae e boni kaoti nakoim+ Iehova ae Atuaia aia bakatibu, ae Atuan Aberaam, Atuan Itaaka, ao Atuan Iakoba.”+

6 E a manga taku riki Iehova nakoina: “Karina baim taiaoka i nanon am kunnikai.” Mangaia are e karina baina i nanon ana kunnikai. Ngke e kaotinakoa, ao akea bwa e a rebera baina ao e a mainaina n ai aron te tino!+ 7 Ao e taku: “Kaoka baim nako nanon am kunnikai.” Mangaia are e kaoka baina nako nanon ana kunnikai. Ngke e kaotinakoa baina man ana kunnikai, ao e a manga okira arona are mai mwaina! 8 E taku: “Ngkana a aki kakoauako ke a aki mutiakina te moani kanikina, a na boni mutiakina ngkanne te kanikina are imwina.+ 9 Ma ngkana a bon aki naba kakoauai kanikina aika uoua aikai ao a rawa n ongo ni bwanaam, ao ko na anaa ranin te Karaanga ae te Naire ao kabwaroa i aon te aba ae mwau, ao e na riki te ran are ko anaia man te Naire bwa te raraa i aon te aba ae mwau.”+

10 E taku ngkanne Mote nakon Iehova: “Taiaoka Iehova bwa I aki wikateke, bon arou mangkoa bwa I wiremwe n taetae ao I aki rabakau naba ngkai ko a taetae nakon am toro, bwa I babanga te taetaenikawai.”*+ 11 E taku Iehova nakoina: “Antai ae karaoa win te aomata ke antai ae karaoiia* aomata bwa a na baennewe, a na bonotaninga, a na noraaba, ke a na mataki? Tiaki boni ngai ae Iehova? 12 Mangaia ae ko na nako ao N na memena iroum ngkana ko taetae,* ao N na reireiniko te bwai ae ko riai n taekinna.”+ 13 Ma e taku: “Taiaoka Iehova, I a butiiko ma kanakoa temanna ane ko kani kanakoa.” 14 Ao e urarake unin Iehova irouni Mote ao e taku: “Tera aron tarim are Aaron+ are tibun Rewi? I ataia bwa e boni wikateke, ao i aoni kawaina ngkai n nakomai ni kawariko. E na kimwareirei nanona ngkana e noriko.+ 15 Mangaia ae ko riai n taetae nakoina ao ko na tuangnga au taeka,+ ao N na memena iroum ngkana ko taetae+ ao N na memena naba irouna, ao N na reireiningkami baika kam na karaoi. 16 E na taetae ibukim nakoia aomata, ao e na riki bwa am tia taetae, ao ngkoe ko na tuangnga te bwai ae e taekinna te Atua.+ 17 Ao ko na taua te oko aei i baim ao karaoi kanikina iai.”+

18 Mangaia are e nako Mote n okira Ietero are tamani buuna+ ao e taku nakoina: “Taiaoka bwa I a kan nako n okiriia tariu ake i Aikubita bwa N na noriia bwa tao a maiu ke a aki.” E taku Ietero nakoni Mote: “Naako ma te rau.” 19 Imwin anne ao e taku Iehova nakoni Mote i Mirian: “Naako okira Aikubita, bwa a a bane ni mate mwaane ake a ukoukora tiringam.”+

20 E kaira ngkanne buuna Mote ao natina mwaane ao e katokaia i aon te taongki, ao e a moana okina nakon te aba ae Aikubita. Irarikin anne, e taua i baina Mote ana oko te Atua ae koaua. 21 E taku ngkanne Iehova nakoni Mote: “Ngkana ko okira Aikubita, taraia bwa ko na karaoi i matani Barao kakai ni kabane ake I kakorakorako bwa ko na karaoi.+ Ma N na kariaia bwa e na kamatoaa nanona,+ ao e na aki kanakoia au aomata.+ 22 Ko riai ni kangai nakoni Barao, ‘E kangai ana taeka Iehova: “Bon natiu te mwaane Iteraera, ae au karimoa.+ 23 I kangai nakoim: Kanakoa natiu bwa e aonga n toro irou. Ma ngkana ko rawa ni kanakoa, ao N na tiringa natim te mwaane ae am karimoa.”’”+

24 Ao e kaitiboo Iehova* ma teuaei i nanon te kawai i rarikin te tabo ni motirawa,+ ao e ukoukora te anga ae e na tiringa iai teuaei.+ 25 N tokina, e a anaa te atibu ae kakang Tibora+ ao e a korotobibia natina ao e karea waen teuarei ni kunin* natina ao e taku: “Ibukina bwa bon te tia mare te mwaane ngkoe ibukiu rinanon te raraa aei.” 26 Mangaia are E a kaaki teuaei. E taku neiei n te tai anne, “bon te tia mare te mwaane ngkoe ibukiu rinanon te raraa aei,” ibukin te korotobibi.

27 E taku ngkanne Iehova nakon Aaron: “Naako kawara Mote n te rereua.”+ Mangaia are e nako ni kawaria n ana maunga te Atua ae koaua+ ao e kamauria n te kaboria.* 28 Ao Mote e tuanga Aaron ana taeka Iehova ni kabane are e kanakoa iai,+ ma kanikina ni kabane ake E tua nakoina bwa e na karaoi.+ 29 Imwin anne ao a nako Mote ma Aaron n ikotiia aia unimwaane tibun Iteraera ni kabane.+ 30 E tuangia Aaron taeka ni kabane ake e taekin Iehova nakoni Mote, ao e karaoi kanikina Mote+ i mataia aomata. 31 Ibukin anne ao a a kakoauaa Mote aomata.+ Ngke a ongo tibun Iteraera ae e mutiakinia Iehova+ ma n nori karawawataaia,+ ao a a katorobubua ni bobaraaki i aontano.

5 Imwin anne ao a rin Mote ma Aaron ao a taku nakoni Barao: “E kangai ana taeka Iehova ae Atuan Iteraera, ‘Kanakoia au aomata bwa a aonga ni bukamarua te toa nakoiu n te rereua.’” 2 Ma e taku Barao: “Antai Iehova+ ae I riai n ongo ni bwanaana bwa N na kanakoia tibun Iteraera?+ I bon aki kinaa naba teutana Iehova, ao riki, N na bon aki kanakoia tibun Iteraera.”+ 3 Ma a taku: “E a tia n taetae ma ngaira Atuaia taian Ebera. Ti butiiko bwa ti kani mwananga i nanon tenibong nakon te rereua ao n angakarea nakon Iehova ae Atuara,+ bwa e kaawa n oreira n te aoraki ke n te kabaang.” 4 E kaekaia ni kangai uean Aikubita: “Mote ma Aaron, e aera ngkai kam a kairiianako aomata man aia mwakuri? Naako okiri ami mwakuri!”*+ 5 Ao e reitia ni kangai Barao: “Nori mwaitiia aomata aika n te aba aei, ao ko kani kamotirawaia man aia mwakuri.”

6 N te bong naba anne, ao e tua ni kangai Barao nakoia naake a kammwakuriia aomata ao naake a mwiokoaki mai buakoia tibun Iteraera bwa mataniwi i aoia: 7 “Kam na aki manga angania aomata aikai uteute aika mwau bwa a na karaoi buriki*+ iai. Ke a bon nako n rikorikoi uteute aika mwau i bon ibukia. 8 Ma kam na kairoroiia bwa a na karaoi mwaitini buriki ake a boni kakaraoi mai mwaina. Kam na aki kauarerekei mwaitiia, bwa a bon aoaoriia.* Anne bukina ae a tang iai ni kangai, ‘Ti kan nako, ti kan angakarea nakon Atuara!’ 9 Kairoroiia bwa a na mwakuri korakora riki ao katabetabeia, bwa a aonga n aki mutiakini keewe.”

10 Mangaia are a nako naake a kammwakuriia aomata+ ao naake a mwiokoaki mai buakoia tibun Iteraera, ao a taku nakoia aomata akekei: “Aei te bwai ae e taekinna Barao, ‘N na aki manga anganingkami uteute aika mwau. 11 Naako ao karekei uteute aika mwau ibukimi n taabo ake kam kona ni karekei iai, ma e na aki kauarerekeaki naba teutana ami mwakuri.’” 12 Ao a a uamae aomata akekei ni kabutaa te aba ae Aikubita bwa a na botii kain te uita ibukini karaoan uteute aika mwau. 13 Ao a teimatoa naake a kammwakuriia aomata akekei ni kaumakiia ni kangai: “Kam riai ni katiai ami mwakuri ni katoabong, n aromi ngkoa ngke kam anganganaki uteute aika mwau.” 14 A batiboaki naba naake a mwiokoaki mai buakoia tibun Iteraera ake a mwiokoaki irouia ana tia kammwakuri Barao.+ A titirakinia ni kangai: “E aera ngkai kam aki kakoroi mwaitini buriki ake kam taneiai ni kakaraoi? E riki aei ngkoananoa ao n te bong aei.”

15 Mangaia are a rinnako naake a mwiokoaki mai buakoia tibun Iteraera ao a tangitang nakoni Barao ni kangai: “E aera ngkai ko karaoa te aro aei nakoia am toro? 16 A aki anganaki am toro uteute aika mwau, ma a boni kangai naba nakoira, ‘Karaoi buriki!’ ao ti a batiboaki iai, ma bon aia bure am aomata.” 17 Ma e taku: “Kam aoaoringkami,*+ kam aoaoringkami!* Anne bukina ae kam kangai iai, ‘Ti kan nako, ti kan angakarea nakon Iehova.’+ 18 Mangaia ae naako okiri ami mwakuri! Kam na aki anganaki uteute aika mwau, ma kam riai ni kakoroi mwaitin ami buriki.”

19 A a noria ngkanne naake a mwiokoaki mai buakoia tibun Iteraera bwa e a korakora aia kangaanga ibukin te tua are kangai: “Kam aki riai ni kakerikaaka naba teutana mwaitin ami buriki ibukin tebongina.” 20 Imwin anne ao a boo ma Mote ao Aaron ake a tei ikekei bwa a na kawariia ngke a otinako mairouni Barao. 21 A aki tabwara ma a a taku naba nakoia: “Ke e taraingkami Iehova ma ni motiki taekami, kioina ngkai kam karika ribaakira* irouni Barao ma ana toro, ao kam kaaki te kabaang i nanoni baia bwa a na tiringira.”+ 22 E taku ngkanne Mote nakon Iehova: “E aera Iehova ngkai ko karawawataia aomata aikai? E aera ngke ko boni kanakoai? 23 Man te tai are I rin iai i matani Barao bwa N na taetae n aram,+ ao e a kakaraoa naba ae buakaka nakoia aomata aikai,+ ao ko bon tuai mani kamaiuia am aomata.”+

6 Mangaia are e taku Iehova nakoni Mote: “Ko nang nora ngkai te bae N na karaoia nakoni Barao,+ bwa N na kairoroa ni mwaakau bwa e na kanakoia au aomata ao N na kairoroa naba ni mwaakau bwa e na kakioianako mai abana.”+

2 E taku ngkanne te Atua nakoni Mote: “Bon Iehova ngai. 3 Ao I kaokaoti ngkoa nakon Aberaam, Itaaka, ao Iakoba bwa te Atua ae Moan te Mwaaka,+ ma I aki kaotai raoi nakoia+ n arau ae Iehova.+ 4 I kamatoaa naba au berita ma ngaiia bwa N na angania te aba ae Kanaan, ae te aba are a maeka ngkoa iai bwa ianena.+ 5 Ao I bon ongo ngirangiraia tibun Iteraera ake a tautoronaki irouia I-Aikubita, ao I uringa au berita.+

6 “Mangaia ae ko na kangai nakoia tibun Iteraera, ‘Bon Iehova ngai, ao N na kairingkami ni kaotinakoingkami mani karawawataami irouia I-Aikubita ao ni kamaiuingkami mai aan tautoronakimi irouia,+ ao N na kaokingkami ni baiu ae aroraki* ao n taiani motikitaeka aika korakora.+ 7 Ao N na anaingkami bwa au aomata, ao N na riki bwa Atuami+ ao kam na bon ataia bwa bon Iehova ngai ae Atuami, ae I kairingkami ni kaotinakoingkami mai aan taiani karawawata i Aikubita. 8 Ao N na kairingkami nakon te aba are I a tia ni berita iai n te taetae n tuea* bwa N na angan Aberaam, Itaaka, ao Iakoba, ao N na anganingkami bwa abami.+ Bon Iehova ngai.’”+

9 Imwina riki ao e kaota te rongorongo aei Mote nakoia tibun Iteraera, ma a aki kan ongo irouni Mote ibukini bwaran nanoia ao ibukin tautoronakia ae korakora.+

10 E taetae ngkanne Iehova nakoni Mote ni kangai: 11 “Rinnako ao tuanga Barao are uean Aikubita bwa e riai ni kanakoia tibun Iteraera mai abana.” 12 Ma e kaeka Mote ni kangai nakon Iehova: “Noria, a aki ongo irou tibun Iteraera,+ ao e nang kangaa riki n ongo irou Barao, ngkai e kangaanga irou te taetaenikawai?”*+ 13 Ma Iehova e a manga tuangia riki Mote ma Aaron baike a na tua nakoia tibun Iteraera ao nakoni Barao are uean Aikubita, bwa a aonga ni kaotinakoaki tibun Iteraera man te aba ae Aikubita.

14 Aikai mataniwia utu: Natin Reuben mwaane, are ana karimoa Iteraera,+ bon Anoka, Baru, Etiron, ao Karemi.+ Akanne ana utu Reuben.

15 Natin Timeon mwaane bon Iemuera, Iamin, Oata, Iakin, Toara, ao Tiaura are natina ma te aine ae tibuni Kanaan.+ Akanne ana utu Timeon.

16 Aikai araia natin Rewi mwaane:+ Kerition, Koata, ao Merari.+ A riki aia utu mairouia naakai. Abwakini maiun Rewi bon 137 te ririki.

17 Natini Kerition mwaane aika karinanaki ni kaineti ma aia utu, bon Ribeni ao Timei.+

18 Natini Koata mwaane bon Amram, Itia, Eberon, ao Utiera.+ Abwakini maiuni Koata bon 133 te ririki.

19 Natini Merari mwaane boni Maari ao Muti.

Akanne aia utu tibun Rewi ni kaineti ma aia utu ake a riki mairouia.+

20 Ao Amram e anaa Iokobeta are mwaanen tamana bwa buuna.+ E bungia neiei natin teuaei aika Aaron ma Mote.+ Abwakini maiun Amram bon 137 te ririki.

21 Natin Itia mwaane boni Kora,+ Nebeki, ao Tikeri.

22 Natin Utiera mwaane boni Mitiaera, Eretaban,+ ao Titeri.

23 Ao Aaron e anaa Nei Eriteba bwa buuna are natin Aminataba, ao mwaanen Nation.+ E bungia neiei natin teuaei aika Nataba, Abiu, Ereata, ao Itama.+

24 Natini Kora mwaane bon Atira, Erekana, ao Abiataba.+ Akanne bon utu ake a riki mairouni Kora.+

25 E anaa temanna natini Butiera te aine Ereata+ are natin Aaron bwa buuna. E bungia neiei natin teuaei ae Bineati.+

Aikai boni mataniwia utu ake a riki mairouia tibun Rewi.+

26 Anne rikia Aaron ma Mote ake e kangai nakoia Iehova: “Kairiia tibun Iteraera ni kaotinakoia man te aba ae Aikubita te korakina ma te korakina.”*+ 27 Bon nakanne ake a taetae nakoni Barao are uean Aikubita bwa a na kaotinakoia tibun Iteraera mai Aikubita. Bon Aaron ma Mote naakai.+

28 N te bong are e taetae iai Iehova ma Mote n te aba ae Aikubita, 29 ao Iehova e tuanga Mote ni kangai: “Bon Iehova ngai. Taekini bwaai ni kabane aika I taekin nakoim nakoni Barao are uean Aikubita.” 30 E taku ngkanne Mote i matan Iehova: “Noria! E kangaanga irou te taetaenikawai,* ao e nang kangaa n ongo irou Barao?”+

7 E taku ngkanne Iehova nakoni Mote: “Noria, I karaoiko bwa kaanga te Atua* nakoni Barao, ao e na riki Aaron are oin tarim bwa am burabeti.+ 2 Ko na manga taekini bwaai ni kabane ake N na tua nakoim, ao e na taetae Aaron are tarim nakoni Barao ao e na kanakoia tibun Iteraera mai abana. 3 Ao ngai N na kariaia bwa e na kamatoaa nanona Barao,+ ao N na kabatiai au kanikina ma au kakai n te aba ae Aikubita.+ 4 Ma e na aki ongo iroumi Barao, ao N na kaaki baiu i aon Aikubita ao N na kaotinakoia au aomata aika mwaitikurikuri,* ae au aomata aika tibun Iteraera, man te aba ae Aikubita n taiani motikitaeka aika korakora.+ 5 Ao a na bon ataia I-Aikubita bwa bon Iehova ngai+ ngkana I arora baiu ni kaitaraa Aikubita ma ni kaotinakoia tibun Iteraera mai buakoia.” 6 A karaoi Mote ma Aaron baike e tua Iehova nakoia. A boni karaoi n aron tuangaia. 7 Ana ririki Mote 80 ao ana ririki Aaron 83 ngke a taetae nakoni Barao.+

8 E a taku ngkai Iehova nakoni Mote ma Aaron: 9 “Ngkana e kangai nakoimi Barao, ‘Karaoa te kakai,’ ao ko na tuanga Aaron ni kangai, ‘Anaa okom ao karenakoa i matani Barao.’ E na riki bwa te naeta ae bubura.”+ 10 Mangaia are a rinnako Mote ma Aaron nakoni Barao ao a karaoa raoi are e tua Iehova. E karenakoa okona Aaron i matani Barao ma ana toro, ao e a riki bwa te naeta ae bubura. 11 Ma e weteiia ana aomata aika wanawana ma taan tabunea Barao. Ao ibongan Aikubita ake a tatabunea+ a karaoa naba aekakin anne n aia tabunea.*+ 12 A karenakoi okoia n tatabemania nako, ao a riki naba bwa naeta aika bubura, ma e kabwauti okoia okon Aaron. 13 Ma e boni kamatoaa naba nanona Barao+ ao e aki ongo irouia, n aron are e taekinna Iehova.

14 E taku ngkanne Iehova nakoni Mote: “E matoatoa nanoni Barao.+ E rawa ni kanakoia aomata akanne. 15 Naako nakoni Barao n te moaningabong ao karaoa aei: Ngkana e roko Barao n te Karaanga ae te Naire ao ko na kawaria ao teei i rarikin te karaanga, ao ko na uota i baim okom are e bitaki ngkoa nakon te naeta.+ 16 Ao ko riai ni kangai nakoina, ‘E kanakomaiai nakoim Iehova ae Atuaia taian Ebera+ ao e kangai: “Kanakoia au aomata bwa a na toro irou n te rereua,” ma ko tuai man ongo ni karokoa ngkai. 17 E kangai ana taeka Iehova: “Kam na ataia n aei bwa bon Iehova ngai.+ N nang orea ngkai ranin te Karaanga ae te Naire n te oko ae i baiu, ao e na bitaki nakon te raraa. 18 Ao a na mate iika ake n te Naire, ao e na mwaung te Naire, ao a na aki kona ni moi I-Aikubita n ranin te Naire.”’”

19 E taku ngkanne Iehova nakoni Mote: “Kangai nakon Aaron, ‘Anaa okom ao arora baim nako aon ranin Aikubita,+ nako aoni karaangana, nako aoni kawain ranna,*+ ao nako aon neina ma mwaruana nako ake a kawakinaki iai raan, bwa a aonga n riki bwa te raraa.’ Ao a na bon riki bwa te raraa raan ni kabane n te aba ae Aikubita ma raan naba ake ni nneia aika kaai ao aika atibu.” 20 Ao Mote ma Aaron a karaoa naba ngkekei are e tua Iehova. E tabekaarake te oko Aaron ao e orea ranin te Karaanga ae te Naire i matani Barao ma ana toro, ao e a riki bwa te raraa ranin te karaanga ni kabutaa.+ 21 Ao a a mate iika ake n te karaanga,+ ao e a mwaung te karaanga, ao a aikoa kona ni moi I-Aikubita man te Naire,+ ao e a riki bwa te raraa ranin te aba ae Aikubita ni kabutaa.

22 Ma ibongan Aikubita ake a tatabunea a karaoa naba aekakin anne n rabakauia n tabunea,+ mangaia are e teimatoa ni matoatoa nanoni Barao ao e aki ongo irouia, n aron are e taekinna Iehova.+ 23 E a oki ngkanne Barao nakon ana auti, ao e aki naba mutiakina te baei i nanona. 24 Mangaia are a bane I-Aikubita ni keniken i rarikin te Naire ni kabutaa ibukin nimaia te ran, bwa a aikoa kona ni moi n ranin te Naire. 25 Ao e a koro itibong imwin orean te Naire iroun Iehova.

8 E taku ngkanne Iehova nakoni Mote: “Rinnako nakoni Barao ao kangai nakoina, ‘E kangai ana taeka Iehova: “Kanakoia au aomata bwa a aonga n toro irou.+ 2 Ngkana ko teimatoa n rawa ni kanakoia, ao N na karekea kain am aono ni kabutaa n taiani biraoki.+ 3 Ao a na mwaitikurikuri biraoki n te Karaanga ae te Naire, ao a na aerake ma n rin i nanon am auti, i nanon am ruu ni matu, i aon am kainiwene, i nanon aia auti am toro ao i aoia am aomata, i nanon am ai n umum, ao i nanon am bwai* ni kaboo burawa.+ 4 A na aerake biraoki nako aom, nako aoia am aomata, ao nako aoia am toro ni kabane.”’”

5 Imwina riki ao e taku Iehova nakoni Mote: “Ko na kangai nakon Aaron, ‘Arora baim ma okom nako aon taiani karaanga, ao kawain nako ranin te Naire, ao neei, ao kaerakeia biraoki nako aon te aba ae Aikubita.’” 6 Mangaia are e arora baina Aaron nako aon ranin Aikubita, ao a aerake biraoki ao a kabutaa te aba ae Aikubita. 7 Ma ibongan Aikubita ake a tatabunea a karaoa naba aekakin anne n rabakauia n tabunea, ao a kaerakeia naba biraoki nako aon te aba ae Aikubita.+ 8 Ao Barao e wetea Mote ma Aaron ao e taku: “Butiia Iehova bwa e na kanakoia biraoki mairou ao mairouia au aomata,+ bwa I a kani kanakoia ami aomata bwa a aonga n angakarea nakon Iehova.” 9 E taku ngkanne Mote nakoni Barao: “I a katikua nakoim bwa ko na baireia bwa n ningai ae N na bubutii iai ibukim ao ibukia am toro ao am aomata bwa a na kanakoaki biraoki mairoum ao man am auti nako. Ma a na tiku tii ake n te Karaanga ae te Naire.” 10 Ao e kaeka ni kangai: “Ningabong.” Mangaia are e taku: “E na karaoaki ane ko taekinna, bwa ko aonga n ataia bwa bon akea riki temanna ae ai aron Iehova ae Atuara.+ 11 A na nako biraoki mairoum ao man am auti nako ao mairouia am toro ao am aomata. A na tiku tii ake n te Naire.”+

12 Mangaia are a otinako Mote ma Aaron mairouni Barao ao Mote e butiia Iehova ibukini biraoki ake E karokoi i aoni Barao.+ 13 Ao e karaoa Iehova are e butiia iai Mote, ao a a mate biraoki n auti nako ma katawanang ao tawaana nako. 14 A kauaataoi rake ni karokoa ae e a rangi ni bati te bwariko, ao e a mwaung aon te aba. 15 Ngke e noria Barao bwa e a nakoraoi te kangaanga, ao e kamatoaa nanona+ ao e rawa n ongo irouia n aron are e taekinna Iehova.

16 E a taku ngkai Iehova nakoni Mote: “Ko na kangai nakon Aaron, ‘Arora okom ao orea bubun aontano ao e na riki bwa taiani maninnara* n te aba ae Aikubita ni kabutaa.’” 17 Ao a karaoa aei. E arora baina Aaron ma okona ao e orea bubun aontano, ao a a mena maninnara i aoia aomata ao maan. E bane bubun aontano n riki bwa taiani maninnara n te aba ae Aikubita ni kabutaa.+ 18 A kataia ni karaoa aekakin anne ibonga ake a tatabunea n rabakauia n tabunea ni karokoi maninnara,+ ma a aikoa kona. Ao a a mena maninnara i aoia aomata ao maan. 19 Mangaia are a taku ibonga ake a tatabunea nakoni Barao: “Boni mwaakan* te Atua+ ae karaoaki iai aei!” Ma e teimatoa ni matoatoa nanoni Barao, ao e aki ongo irouia n aron are e taekinna Iehova.

20 E taku ngkanne Iehova nakoni Mote: “Kautimwaakako n te moaningabong ao teei i matani Barao. Ngkana e roko n te karaanga Barao ao ko riai ni kangai nakoina, ‘E kangai ana taeka Iehova: “Kanakoia au aomata bwa a na toro irou. 21 Ma ngkana ko aki kanakoia au aomata ao N na karokoia naango* i aom ao i aoia am toro ao am aomata, ao nako nanon am auti nako, ao a na onrake autin Aikubita n naango, ao a na kabutaa naba aontano are a maeka iai I-Aikubita. 22 N te bong anne ao N na boni kaokoroa te aba ae Koten are a maeka iai au aomata. A na akea naango iai,+ ao ko na ataia n aei bwa I mena n te aba aei ngai ae Iehova.+ 23 Ao N na karekea te kaokoroaki i marenaia au aomata ma am aomata. E na riki te kanikina aei ningabong.”’”

24 Ao e karaoa anne Iehova, ao a a roko naango aika mwaitikurikuri n ana auti Barao ao n aia auti ana toro ao n te aba ae Aikubita ni kabutaa.+ E a uruaki te aba bwa mwia naango aikai.+ 25 N tokina ao Barao e a wetea Mote ma Aaron ao e taku: “Naako angakarea nakon Atuami n te aba aei.” 26 Ma e taku Mote: “E aki riai karaoan anne ibukina bwa te bwai are ti na kareanna nakon Iehova ae Atuara bon te bwai ae riribaaki irouia I-Aikubita.+ Ngkana tao ti a kareana i mataia I-Aikubita te bae riribaaki irouia, tiaki a na boni karebanaira n atibu? 27 Ti na mwananga i nanon tenibong nakon te rereua, ao ti na angakarea ikekei nakon Iehova ae Atuara n aron are e taekinna nakoira.”+

28 E taku ngkanne Barao: “N na kanakoingkami bwa kam na angakarea nakon Iehova ae Atuami n te rereua. Ma kam na aki nakon te tabo ae rangi n raroa. Bubutii ibukiu nakon Atuami.”+ 29 E taku ngkanne Mote: “N nangi nako ngkai mairoum, ao N na bubutii nakon Iehova, ao a na nako ningabong naango mairouni Barao ma ana toro ao ana aomata. Ma ke e tai manga mwamwanaira* Barao n arona n rawa ni kanakoia ara aomata bwa a na angakarea nakon Iehova.”+ 30 Ao e otinako Mote mairouni Barao ao e a bubutiia Iehova.+ 31 Mangaia are e karaoa Iehova are e taekinna Mote, ao a a nako naango mairouni Barao ma ana toro ao ana aomata. Akea naba temanna ae tiku. 32 Ma e a manga kamatoaa naba nanona Barao ao e aki kanakoia aomata akekei.

9 Mangaia are e taku Iehova nakoni Mote: “Rinnako nakoni Barao ao ko na kangai nakoina, ‘E kangai ana taeka Iehova ae Atuaia taian Ebera: “Kanakoia au aomata bwa a aonga n toro irou.+ 2 Ma ngkana ko rawa ni kanakoia ao ko teimatoa n tauia, 3 ao noria! e na roko bain Iehova+ i aoia am man aika n te tawaana. E na roko te aoraki ae rangi ni kamamate i aoia aoti ma taongki, kamero, kaao, ao tiibu.+ 4 Ao Iehova e na boni kaokoroa aia man tibun Iteraera ma aia man I-Aikubita, ao akea aia man temanna tibun Iteraera ae e na mate.”’”+ 5 Irarikin anne, e bairea te tai Iehova ao e kangai: “E na karaoa aei Iehova i aon te aba ningabong.”

6 Ao e karaoa aei Iehova ni bon te bong are imwina, ao a a bane ni mate aia man I-Aikubita,+ ma bon akea naba temanna ae mate mai buakon aia man tibun Iteraera. 7 Ngke e titiraki Barao ao noria! akea naba temanna ae mate mai buakon aia man tibun Iteraera. Ma e boni matoatoa naba nanoni Barao, ao e aki kanakoia aomata akekei.+

8 E taku ngkanne Iehova nakoni Mote ma Aaron: “Kam na kaoni baimi ni kauaai n te mannang are man te nne ni kanaiai, ao e na karerake Mote i matani Barao. 9 Ao e na riki bwa bubun te tano i aon te aba ae Aikubita ni kabutaa, ao a na riki bwa kaboa aika rangi ni kakaiaki i aoia aomata ma maan n te aba ae Aikubita ni kabutaa.”

10 Mangaia are a abuta te mannang man te nne ni kanaiai ao a tei i matani Barao, ao e karerake te mannang Mote ao a a riki bwa kaboa aika rangi ni kakaiaki i aoia aomata ma maan. 11 Ao ibongan Aikubita ake a tatabunea a aikoa kona n tei i matani Mote ibukini kaboa, bwa a riki i aoia ibongan Aikubita ake a tatabunea ao i aoia I-Aikubita ni kabane.+ 12 Ma e kariaia Iehova bwa e na kamatoaa nanona Barao, ao e aki kan ongo irouia, n aron are e taekinna Iehova nakoni Mote.+

13 E taku ngkanne Iehova nakoni Mote: “Kautimwaakako n te moaningabong ao teei i matani Barao ao kangai nakoina, ‘Aio te bwai ae e taekinna Iehova ae Atuaia taian Ebera: “Kanakoia au aomata bwa a aonga n toro irou. 14 Bwa ngkana ko aki, ao N na karokoi rekenikai ni kabane iroum ao irouia am toro ma am aomata, bwa ko aonga n ataia ae bon akea riki temanna ae ai arou n te aonnaba ni kabutaa.+ 15 Bwa I kona ngkai n arora baiu n oreiko ma am aomata n te aoraki ae kamamate, ao ko na maunanako mai aon te aba. 16 Ma aio bukina ae I kariaia iai bwa ko na teimatoa ni maiu: bwa I aonga ni kaota mwaakau nakoim ao bwa e na tataekinaki arau i aonnaba ni bane.+ 17 Ko teimatoa naba ni kainikatonga nakoia au aomata n aki kanakoia? 18 Ningabong n taina naba aei ao N na kabwakaa te karau ae te aiti ae rangi ni korakora, ae tuai man riiriki i Aikubita mangkoa ni karokoa ngkai. 19 Ngaia are kanakotaeka nakoia am toro bwa a na karinia am nanai ni man ni kabane ma am man ni kabane ake n te tawaana. A na boni mate aomata nako ma maan ake a mena n te tawaana ake a aki karinaki n te auti, ngkana a bwakaraki n te karau ae te aiti.”’”

20 A waekoa ana toro Barao ake a maaka ana taeka Iehova, ni karinia aia toro ma aia man n taian auti, 21 ma e katikuia ana toro ma ana man n te tawaana te aomata ae aki kaaki i nanona ana taeka Iehova.

22 E a taku ngkai Iehova nakoni Mote: “Arora baim nako karawa, bwa e aonga ni bwaka te karau ae te aiti i aon te aba ae Aikubita ni kabutaa,+ i aoia aomata ma maan ao aroka ni kabane ake n te tawaana n te aba ae Aikubita.”+ 23 Mangaia are e arora okona Mote nako karawa, ao e karokoa te baa ma te karau ae te aiti Iehova ao e bwakara aon te aba te ai,* ao e teimatoa Iehova ni kabwakaa te karau ae te aiti i aon te aba ae Aikubita. 24 E bwaka te karau ae te aiti, ma te ai ae itirua ribuakon te karau ae te aiti. E bon rangi ni korakora n te aro ae tuai man riiriki mangkoa n te aba ae Aikubita.+ 25 E orei bwaai ni kabane ake n te tawaana n te aba ae Aikubita ni kabutaa te karau ae te aiti, n ikotaki ma aomata ao maan, ao e orei aroka ni kabane, ao e urui kainnamwarake ni kabane ake n te tawaana.+ 26 Ma tii te aba ae Koten ae aki bwaka iai te karau ae te aiti, are a mena iai tibun Iteraera.+

27 Mangaia are e kanaanako Barao bwa a na weteaki Mote ma Aaron ao e taku nakoia: “I boni bure n te tai aei. E bon eti Iehova ao boni ngai ma au aomata aika ti kairua. 28 Bubutiia Iehova bwa e aonga n toki te baa ma te karau ae te aiti. Ao N na kukurei ni kanakoingkami ao kam na aki manga tiku riki.” 29 Mangaia are e taku Mote nakoina: “N te tai are I otinako iai man te kaawa ao N na arori baiu i matan Iehova. E na toki te baa ma te karau ae te aiti, bwa ko aonga n ataia ae bon ana bwai Iehova te aonnaba.+ 30 Ma ni kaineti ma ngkoe ao am toro, I ataia bwa kam na bon aki naba maaka Iehova ae te Atua n te tai anne.”

31 Ao a kamateaki aroka aika buraekiti* ma baare, ibukina bwa e a tai te baare ao a nang tauraoi nakon te taiaki, ao a nang raure ueen taiani buraekiti. 32 Ma a aki kamateaki aroka aika uita* ibukina bwa a na tai rimwi riki. 33 E a nako ngkai Mote mairouni Barao nako tinanikun te kaawa ao e arora baina i matan Iehova, ao e a toki naba te baa ma te karau ae te aiti, ao e a aikoa bwaka te karau.+ 34 Ngke e noria Barao bwa e a toki te karau ma te karau ae te aiti ao te baa, ao e a manga bure naba n arona ni kamatoaa nanona,+ ngaia ma ana toro. 35 Ao e teimatoa ni matoatoa nanoni Barao ao e aki kanakoia tibun Iteraera, n aron are e taekinna Iehova rinanoni Mote.+

10 E taku ngkanne Iehova nakoni Mote: “Rinnako nakoni Barao bwa I a tia ni kariaia bwa a na kamatoai nanoia Barao ma ana toro,+ bwa I aonga ni kaotii au kanikina aikai i matana,+ 2 ao ko aonga n tataekina katuuaaean Aikubita irou ao au kanikina ake I karaoi i buakoia, nakoia natim ma tibum+ ao kam na bon ataia bwa bon Iehova ngai.”

3 Mangaia are a rin Mote ma Aaron nakoni Barao ao a taku nakoina: “E kangai ana taeka Iehova ae Atuaia taian Ebera, ‘Ko na maanra riki n rawa n aantaeka nakoiu?+ Kanakoia au aomata bwa a aonga n toro irou. 4 Bwa ngkana ko teimatoa n rawa ni kanakoia au aomata, ao noria, N nang karokoia rokati i abam ningabong. 5 Ao a na rabuna aon te aba ao e na aki kona n noraki aontano. A na kang nikirani baike a tiku ibukimi imwin te karau ae te aiti, ao a na kang arokami ni kabane ake a rikirake n te tawaana.+ 6 A na kaoni am auti ma aia auti am toro ni kabane ma autin Aikubita ni kabane, n te aro ae a tuai man nonoria tamami ma tibumi nako, man te tai are a moani mena iai n te aba aei ni karokoa te bong aei.’”+ Ao e rairaki ao e otinako mairouni Barao.

7 Ao a taku ana toro Barao nakoina: “E na maanra riki te aomata aei n riki bwa kaanga te tia karika te kangaanga nakoira?* Kanakoia aomata aikai bwa a aonga n toro iroun Iehova ae Atuaia. Ko tuai n ataia ae e a uruaki Aikubita?” 8 Mangaia are a a kairaki Mote ma Aaron ni kaokaki nakoni Barao, ao e taku nakoia: “Naako tooro iroun Iehova ae Atuami. Ma antai iai aika a na nako?” 9 E taku ngkanne Mote: “Ti na nako ma ara ataei, ara kara, natira mwaane, natira aine, ara tiibu, ao ara kao,+ ibukina bwa ti na karaoa te toa nakon Iehova.”+ 10 E taku nakoia: “Ti a mataku, ke e mena Iehova iroumi ngkana I kanakoingkami ma ami koraki n ataei!+ E teretere bwa kam kani karaoa te bwai ae buakaka. 11 Mangaia ae N na aki kariaia bwa kam na bane n nako. N na tii kariaia ami mwaane bwa a na nako n toro iroun Iehova, bwa bon anne ae kam bubutii iai.” Ao a kakioakinako mai matani Barao.

12 E a taku ngkai Iehova nakoni Mote: “Arora baim nako aon te aba ae Aikubita ibukia rokati, bwa a aonga n roko i aon te aba ae Aikubita ao ni kang aroka ni kabane ake n te aba, ake bwaai ni kabane ake a tiku imwin te karau ae te aiti.” 13 E aki tabwara Mote ma e a arora naba okona nako aon te aba ae Aikubita, ao e kawaia te angimainiku Iehova bwa e na kare nakon te aba n te ngaina anne ao n te tairiki anne. Ngke e a ingabong ao e a uotiia rokati te angimainiku. 14 Ao a a roko rokati i aon te aba ae Aikubita ni kabutaa ao n tiku i aon aonon Aikubita ni kabutaa.+ E rangi ni karawawataa te aba.+ A tuai mani kaoti rokati aika rangi ni mwaiti n aron aei mai mwaina, ao a na aki manga kaoti aika rangi ni mwaiti rimwi. 15 A rabuna aon te aba ni kabutaa ao e a roo te aba irouia. A kang aroka ni kabane ake n te aba ao uaan nako kaai ake a tiku imwin te karau ae te aiti. Akea te baanikai teuana ae kiriin ae tiku ke mwakoron te uteute teuana i aon te aba ae Aikubita ni kabutaa.

16 Mangaia are e waekoa Barao ni wetea Mote ma Aaron ao e taku: “I bure nakon Iehova ae Atuami ao nakoimi. 17 Taiaoka kabwaraa au bure n te tai aei, ao kam na butiia Iehova ae Atuami bwa e na kanakoa te rekenikai ae kamamate aei mairou.” 18 Mangaia are e* a nako mairouni Barao ao e a bubutiia Iehova.+ 19 E a bita ngkanne te ang Iehova nakon te angimaeao ae rangi ni korakora, ao e a uotiia nako rokati nakon Taari ae Uraura. Akea te rokati temanna ae tiku n aonon Aikubita ni kabutaa. 20 Ma e kariaia Iehova bwa e na kamatoaa nanona Barao,+ ao e aki kanakoia tibun Iteraera.

21 E taku ngkanne Iehova nakoni Mote: “Arora baim nako karawa bwa e aonga n rotongitong aon te aba ae Aikubita ni kabutaa, ae te rotongitong ae rangi ni korakora.” 22 E aki tabwara Mote ma e a arora naba baina nako karawa, ao e a rotongitong aon te aba ae Aikubita ni kabutaa i nanon tenibong.+ 23 A aikoa kona n noriia i bon irouia, ao akea i buakoia ae e teirake man ana tabo i nanon tenibong, ma e oota aia tabo ni maeka tibun Iteraera ni kabane.+ 24 Ao Barao e wetea Mote ao e taku: “Naako ao tooro iroun Iehova.+ A na tii tiku ami tiibu ma ami kao. A na iriingkami naba ami koraki n ataei.” 25 Ma e taku Mote: “Boni ngkoe ae ko na katauraoi ara* karea ao karea ni kabuekaki, ao ti na kareani baikai nakon Iehova ae Atuara.+ 26 A na irira naba ara man. Akea te man temanna ae kariaiakaki bwa e na tiku, ibukina bwa ti na kabonganai tabeman mai buakoia ibukin taromaurian Iehova ae Atuara, ao ti aki ataia ni karokoa rokora ikekei bwa tera ae ti na kareanna n ara taromauri nakon Iehova.” 27 Mangaia are e kariaia Iehova bwa e na kamatoaa nanona Barao, ao e aki kariaia kanakoaia.+ 28 E taku Barao nakoina: “Naako mai matau! Tarataraiko bwa ko na aki manga kataia ni kaoti i matau, bwa n te bong are ko kaoti iai i matau ao ko na mate.” 29 E kaeka ni kangai Mote: “N na aki manga kataia ni kaoti i matam n aron ane ko taekinna.”

11 E taku ngkanne Iehova nakoni Mote: “Ai tii teuana riki te rekenikai ae N nang karokoa i aoni Barao ma Aikubita. Imwin anne ao e na kanakoingkami mai ikai.+ Ngkana e a kanakoingkami, ao e na boni kakionakoingkami mai ikai.+ 2 Tuangia aomata bwa a riai ni bane mwaane ma aine ni bubutiia kaain rarikia bwaai aika karaoaki man te tirewa ao man te koora.”+ 3 Ao Iehova e angania tibun Iteraera te akoaki irouia I-Aikubita. Irarikin anne, e a rangi ni karineaki Mote n te aba ae Aikubita, i buakoia ana toro Barao, ao i buakoia I-Aikubita.

4 E taku ngkanne Mote: “E kangai ana taeka Iehova, ‘Ngkana e nang nukanibong ao N na nako buakoia I-Aikubita,+ 5 ao a na bane ni mate karimoa n te aba ae Aikubita,+ mairoun ana karimoa Barao ae tekateka i aon ana kaintokanuea ni karokoa ana karimoa te toro te aine ae kamantinti n te atibu ni kamantinti, ao aia karimoa nako maan.+ 6 E na korakora te tang n te aba ae Aikubita ni kabutaa, ae tuai man riiriki mai mwaina, ao e na aki naba riki rimwi.+ 7 Ma e na aki naba kaukau* te kamea nakoia tibun Iteraera, ke mwaane ke maan ake iai, bwa kam aonga n ataia ae e kona Iehova ni kaokoroia I-Aikubita ma tibun Iteraera.’+ 8 Ao a na boni bane am toro n ruo nakoiu ma ni bobaraaki nakoiu ao ni kangai, ‘Ko na nako ma aomata ni kabane ake a kakairi iroum.’+ Ao imwin anne N na otinako.” Ao e otinako mairouni Barao ma te un ae korakora.

9 E taku ngkanne Iehova nakoni Mote: “E na aki ongo iroumi Barao+ bwa a aonga ni kabatiaaki au kakai n te aba ae Aikubita.”+ 10 A karaoi kakai aikai ni kabane Mote ma Aaron i matani Barao,+ ma e kariaia Iehova bwa e na kamatoaa nanona Barao, mangaia are e aki kanakoia tibun Iteraera mai abana.+

12 E a taku ngkai Iehova nakoni Mote ma Aaron n te aba ae Aikubita: 2 “E na riki te namwakaina aei iroumi bwa te moan namwakaina n te ririki.+ 3 Taetae nakoia te botaki n aomata aika tibun Iteraera ni kangai: ‘N tebwina iai bongin te namwakaina aei, a riai n anaa te tiibu aomata n tatabemania nako+ ibukin aia utu, temanna te tiibu ibukia kaain te utu teuana. 4 Ma ngkana e rangi n uarereke mwaitiia kaain te utu ao a aki kona ni kana te tiibu ni kabanea, a na ibuobuoka ngkanne temanna te tiibu ma kaain rarikia ni kaineti ma mwaitiia kaaina. Ngkana e warekaki te mwaiti, ao bairea mwaitin ae e na kanna temanna ma temanna man te tiibu. 5 E riai ni marurung raoi am tiibu+ mwaane ae teuana ana ririki. Ko kona n rinea te tiibu mwaane ae ataei ke te kooti mwaane ae ataei. 6 Ko na kakawakinna ni karokoa 14 iai bongin te namwakaina aei,+ ao e riai te botaki n aomata aika tibun Iteraera n tiringnga n te airoo.*+ 7 A riai n anaa teutana te raraa ao a na kabira aoni bouan te mataroa akana uaai ao etani mataroan auti ake a kana iai te tiibu.+

8 “‘A na kana irikona n te tairiki anne.+ A riai n umunna i aon te ai ao a na kanna ma bwerena aika aki karikaki+ ao baanikai aika kiriin aika mao.+ 9 Kam na tai kana ae oraora ke ae kaburoaki n te ran, ma umunna i aon te ai ma matanriana ma waena* ao kanoan nanona.* 10 Ko na tai kawakina nikirana ni karokoa ae ingabong, ma kam riai ni kabueka nikirana ae tiku ni karokoa ae ingabong, n te ai.+ 11 Ao aio aromi ae kam riai ni kanna iai, a na bae nukami,* a na nim ami kau i waemi ao okomi i baimi, ao kam riai ni kawikoaingkami ni kanna. Bon te Toa ae te Riao nakon Iehova. 12 Bwa N na rinanon te aba ae Aikubita n te tairiki aei ao N na oreiia naati aika karimoa ni kabane n te aba ae Aikubita, mairouia aomata ni karokoa maan,+ ao N na motiki taekaia atuan Aikubita ni kabane.+ Bon Iehova ngai. 13 E na riki te raraa bwa ami kanikina i aon auti ake kam mena iai, ao N na nora te raraa ao N na riaoingkami, ao e na aki roko te rekenikai i aomi ni kamaunaingkami ngkana I orea te aba ae Aikubita.+

14 “‘E na riki te bong aei bwa te kanuringa ibukimi, ao kam na bukamaruia bwa te toa nakon Iehova n ami roro nako. Kam riai ni bukamaruia bwa bon te tua ae teimatoa. 15 Kam na kang bwerena aika aki karikaki i nanon itibong.+ Eng, n te moani bong kam na kanakoa te burawa ae karikaki* man ami auti, ibukina bwa ane e kana te bwai ae karikaki man te moani bong ni karokoa te kaitiua ni bong, e na boni kamateaki te aomata* anne mai buakoia tibun Iteraera. 16 Kam na karaoa te bwabwaro ae tabu n te moani bong ao te bwabwaro ae tabu naba n te kaitiua ni bong. Akea te mwakuri ae e na karaoaki ni boong akanne.+ Ma kam kariaiakaki ni katauraoa tii te amwarake ae a na kanna aomata* nako.

17 “‘Kam na kawakina te Toa ae te Bwerena ae Aki Karikaki,+ bwa n te bong naba anne ao N na kairiia ami koraki aika mwaitikurikuri* ni kaotinakoia man te aba ae Aikubita. Ao kam na kawakina te bong aei n ami roro nako bwa te tua ae teimatoa. 18 Kam na kang bwerena aika aki karikaki n te moan namwakaina n tairikin te bong ae 14 iai bongin te namwakaina, ni karokoa tairikin te bong ae 21 iai bongin te namwakaina.+ 19 I nanon itibong ao e na aki noraki n ami auti te burawa ae karikaki,* bwa ngkana iai ae e kana te bwai ae karikaki, ao e na boni kamateaki te aomata* anne mai buakon te botaki n aomata aika tibun Iteraera,+ n aki ongeia bwa te aomata ae maeka n iruwa ke tibun Iteraera ae bungiaki i buakomi.+ 20 Kam na aki kana te bwai ae karikaki. Kam na kang bwerena aika aki karikaki ni mwengami nako.’”

21 E waekoa ni weteiia aia unimwaane tibun Iteraera ni kabane Mote+ ao e taku nakoia: “Naako rineiia maan aika ataei* ibukia ami utu n tatabeua nako, ao kamatea te karea ibukin te Toa ae te Riao. 22 Kam na kateboa ngkanne te bwabwati n utoba* n te raraa are n te beetin ao kabira etan te mataroa ao bouana akana uaai n te raraa, ao akea iroumi ae e riai n otinako man ana auti ni karokoa ae ingabong. 23 Ao ngkana e a rinanon te aba Iehova ni karekei kaia I-Aikubita ao ngkana e nora te raraa i etan ami mataroa ao i aoni bouana akana uaai, ao e na bon riaon ami mataroa Iehova ao e na aki kariaia te rekenikai ae te mate* bwa e na rin n ami auti nako.+

24 “Kam na kawakina te baei bwa te tua ae teimatoa ibukim ao ibukia natim.+ 25 Ao ngkana kam roko n te aba ae e na anganingkami Iehova n aron are e taekinna, ao kam na kakaraoa te aro n taromauri aei.+ 26 Ao ngkana a titirakiningkami natimi ni kangai, ‘Tera nanon te waaki n taromauri aei iroumi?’+ 27 ao kam riai ni kangai, ‘Bon te angakarea ibukin te Toa ae te Riao nakon Iehova are e riaon aia auti tibun Iteraera i Aikubita, ngke e karekei kaia I-Aikubita ma e kamaiuia kaaini batara.’”

Ao a a katorobubua ni bobaraaki i aontano aomata. 28 Mangaia are a nako tibun Iteraera ao a karaoa are e tua Iehova nakoni Mote ma Aaron.+ A boni karaoi n aron tuangaia.

29 Ngke e a nukanibong ao e a kamateia karimoa ni kabane Iehova n te aba ae Aikubita,+ mairoun ana karimoa Barao are tekateka i aon ana kaintokanuea, ni karokoa ana karimoa te taenikai are n te karabuuti,* ao aia karimoa nako maan.+ 30 E teirake Barao n te nukanibong anne, ngaia ma ana toro ni kabane ao I-Aikubita ni kabane, ao e a korakora te tang irouia I-Aikubita ibukina bwa akea te auti teuana ae e aki mate iai temanna.+ 31 E aki tabwara ma e a wetea naba Mote ma Aaron+ n te nukanibong anne ao e taku: “Teirake ao naako mai buakoia au aomata, ngkami ao tibun Iteraera, ao naako tooro iroun Iehova n aron are kam taekinna.+ 32 Kairiianako naba ami nanai ni man n aron are kam taekinna ao naako.+ Ma kam na kakabwaiaai naba.”

33 Ao a a kaumakiia aomata akekei I-Aikubita bwa a na waekoa ni kitana+ te aba, bwa a kangai, “ibukina bwa ti na boni bane ni mate.”+ 34 Ngaia are a uouotii aomata aia bua ni burawa ake a aki karikaki ma aia bwai* ni kaboo burawa ake a kabaeaki ma aia kunnikai, i aon angaia. 35 A karaoa are e tuangia Mote tibun Iteraera, ao a bubutiia I-Aikubita bwaai aika karaoaki man te tirewa ao man te koora, ao kunnikai naba.+ 36 Ao Iehova e karekei akoaia ana aomata irouia I-Aikubita, mangaia are a anganaki baike a bubutii, ao a kuribwaiia I-Aikubita.+

37 A a kitana ngkanne Rameteti tibun Iteraera+ nako Tukota,+ ao mwaitiia mwaane ake a nakonako tao 600,000, n aki warekaki aia ataei.+ 38 Ao a airi naba ma ngaiia aomata aika kakaokoro* nako+ n ikotaki ma nanai ni man aika rangi ni bati aika nanai n tiibu, kooti, ao kaao. 39 A a umuni bua ni burawa ake a uotii mai Aikubita ni karaoi iai bwerena aika mronron aika aki karikaki. E aki karikaki ibukina bwa a a rina naba ni kakioakinako mai Aikubita ao a tuai ni karaoi aia tianaki.+

40 Maania ni maeka tibun Iteraera ake a mena i Aikubita+ bon 430 te ririki.+ 41 N tokin ririki ake 430, ao a a otinako n te bong naba anne ana aomata ni kabane Iehova aika mwaitikurikuri* man te aba ae Aikubita. 42 Bon te tairiki ae a na bukamarua iai kaotinakoaia mai Aikubita iroun Iehova. E na kakauringaki te tairiki aei irouia tibun Iteraera ni kabane n aia roro nako nakon Iehova.+

43 E taku ngkanne Iehova nakoni Mote ma Aaron, “Aio tuan te Toa ae te Riao: Akea te ianena ae e na kana manin te toa ae te riao.+ 44 Ma ngkana iai te aomata ae iai ana toro te mwaane ae kabooaki n te mwane, ao ko na korotobibia,+ ao e a tibwa kona ngkanne ni kanna. 45 E na aki kanna te ianena ae maeka i buakomi ao te tia mwakuri ae kabooaki ana mwakuri. 46 E riai ni kanaki n teuana te auti. Ko na tai uota irikona nako tinanikun te auti, ao kam na tai otea riina teaina.+ 47 A na bukamaruia te botaki n aomata aika tibun Iteraera. 48 Ngkana iai te ianena ae maeka i rarikim ae e kani bukamarua te Toa ae te Riao nakon Iehova, a riai ni korotobibiaki mwaane ni kabane ake ni batana. Imwina ngkanne e a kona ni bukamaruia ao e na riki bwa ai aron tibun Iteraera ae bungiaki i buakomi. Ma e na aki kanna te aomata ae aki korotobibiaki.+ 49 Tii te arona te tua nakon tibun Iteraera ae bungiaki i buakomi ao nakon te ianena ae maeka i buakomi.”+

50 Mangaia are a karaoa are e tua Iehova nakoni Mote ma Aaron, tibun Iteraera ni kabane. A boni karaoi n aron tuangaia. 51 N te bong naba anne, e a kairiia tibun Iteraera Iehova ni kaotinakoia man te aba ae Aikubita n ikotaki naba ma aia koraki aika mwaitikurikuri.*

13 E reitia ni kangai Iehova nakoni Mote: 2 “Katabuia* naati aika karimoa* aika mwaane nakoiu mai buakoia tibun Iteraera. Bon au bwai te karimoa ae te mwaane ae bungiaki irouia aomata ma maan.”+

3 E taku ngkanne Mote nakoia aomata: “Ururinga te bong aei ae kam otinako iai mai Aikubita,+ man te auti n toronaki, ibukina bwa e kairingkami Iehova ni kaotinakoingkami mai ikai n te bai ae korakora.+ Mangaia ae e na aki kanaki te bae karikaki. 4 Kam a otinako n te bong aei n te namwakaina ae Abibi.*+ 5 Ngkana e a kairiko Iehova nako abaia tibuni Kanaan, tibun Eta, taian Amoraite, taian Iwaite, ao I-Iebuti,+ are e taetae n tuea iai nakoia am bakatibu bwa e na anganiko,+ ae te aba ae raanga iai rannimamman te man ma aia karewe manibeeru,*+ ko riai ngkanne ni kakaraoa te aro n taromauri aei n te namwakaina aei. 6 Itibong am bong ni kang bwerena aika aki karikaki,+ ao e na karaoaki te toa nakon Iehova n te kaitiua ni bong. 7 A na kanaki bwerena aika aki karikaki i nanon itibong,+ ao akea te bae karikaki ae e na noraki iroum,+ ao akea te burawa ae karikaki* ae e na noraki iroum ni kabutaa am aono.* 8 Ao ko riai n tuanga natim te mwaane n te bong anne ni kangai, ‘I karaoa aei ibukin te baere e karaoia Iehova ibukiu ngke e kaotinakoai mai Aikubita.’+ 9 Ao e na riki te baei bwa kaanga te kanikina i aoni baim ao kaanga te kauring i aon ramwam,*+ bwa e aonga ni mena ana tua Iehova i wim, bwa e kairiko Iehova ni kaotinakoko mai Aikubita n te bai ae korakora. 10 Ko na kawakina te tua aei n taina ae baireaki ni katoa ririki.+

11 “Ngkana e kairiko Iehova nako abaia tibuni Kanaan, n aron are e taetae n tuea iai nakoim ao nakoia am bakatibu+ bwa e na anganiko, 12 ao ko na katabuia karimoa nako* aika mwaane nakon Iehova, n ikotaki naba ma aia karimoa nako am man akana iroum. Bon ana bwai Iehova mwaane aika karimoa.+ 13 Ko na manga kabooi aia karimoa nako am taongki n te tiibu, ao ngkana ko aki manga kabooi, ko riai ngkanne n tiringia n otei roroaia. Ao ko na manga kabooia naati nako aika karimoa aika mwaane.+

14 “Ngkana e titirakiniko natim te mwaane rimwi riki ni kangai, ‘Tera ae nanonaki n te baei?’ ko riai ngkanne ni kangai nakoina, ‘E kairira ni kaotinakoira Iehova mai Aikubita n te bai ae korakora, man te auti n toronaki.+ 15 Ngke e bon imanono naba Barao n rawa ni kanakoira,+ ao e a kamateia karimoa ni kabane Iehova n te aba ae Aikubita, ae aia karimoa aomata ao aia karimoa maan.+ Anne bukina ae I karean iai nakon Iehova mwaane aika aia karimoa nako maan,* ao I a manga kabooia aia karimoa natiu mwaane.’ 16 E na riki bwa te kanikina i aoni baim ao te kanikina ae kabaeaki i aon ramwam,*+ bwa e kairira ni kaotinakoira Iehova mai Aikubita n te bai ae korakora.”

17 Ngke e kanakoia tibun Iteraera Barao, ao e aki kairiia te Atua ni kawain abaia I-Biritia e ngae ngke e kaan, bwa e kangai te Atua: “Tao a na manga bitii aia iango aomata aikai ngkana a kaaitara ma te buaka, ao a na okira Aikubita.” 18 Mangaia are e kairiia aomata te Atua bwa a na toua te kawai ae abwabwaki n te rereua i rarikin Taari ae Uraura.+ Ma a otinako tibun Iteraera mai Aikubita n te aro ae baireaki raoi n aroia taani buaka. 19 E uotii naba Mote riin Ioteba, ibukina bwa e kairoroiia natin Iteraera Ioteba bwa a na taetae n tuea, ngke e kangai: “E na boni buokingkami te Atua, ao kam riai n uotiinako riiu mai ikai.”+ 20 A kitana Tukota ao a a katei aia umwanrianna i Etam i aon tian te rereua.

21 E ririmoaia Iehova n te ngaina rinanon te boua ae te nang ni kaiririia ni kawaia,+ ao rinanon te boua ae te ai n te bong ni kaotaia, bwa a aonga ni kona ni mwananga n te ngaina ao n te bong.+ 22 E aki kona n nako te boua ae te nang mai mwaia aomata n te ngaina, ao e aki kona naba n nako te boua ae te ai n te bong.+

14 E a taku ngkai Iehova nakoni Mote: 2 “Tuangia tibun Iteraera bwa a na oki rikaaki ma ni katei aia umwanrianna i moani Biairota i marenani Miketora ma taari, ni kaitaraa Baaratebon.+ Kam na katei ami umwanrianna i rarikin taari ni kaitaraa Baaratebon. 3 E na kangai ngkanne Barao ibukia tibun Iteraera, ‘A aiwaa n aki ataa kawaia n te aba. A a mwanetaua i nanon te rereua.’ 4 N na kariaia bwa e na kamatoaa nanona Barao+ ao e na kaeiia, ao N na karekea neboakiu ni konaakia Barao ma ana taanga ni buaka ni kabane,+ ao a na bon ataia I-Aikubita bwa bon Iehova ngai.”+ Mangaia are a karaoa anne tibun Iteraera.

5 Imwina riki ao e a kaongoaki uean Aikubita ae a a birinako aomata akekei. E a bitaki naba ngkekei nanoni Barao ma ana toro ibukia aomata akekei,+ ao a taku: “E aera ngkai ti karaoa aei ma ni kainaomataia tibun Iteraera man toronakia iroura?” 6 Mangaia are e katauraoi ana kaa ni buaka ao e kairiia ana tia buaka.+ 7 E anai 600 kaa ni buaka aika rineaki ao kaa ni buaka ni kabane mai Aikubita, ao taani buaka aika toka i aoia ni kabane. 8 Mangaia are e kariaia Iehova bwa e na kamatoaa nanona Barao are uean Aikubita, ao e kaeiia tibun Iteraera teuaei ngke a otinako tibun Iteraera ma te tokanikai.*+ 9 A kaeiia naakai I-Aikubita,+ ao a bane ana kaa ni buaka Barao ao ana tautia ake a toka i aoia aoti ao ana taanga ni buaka, n ooiia naakai ngke a kaembwa i rarikin taari, n uakaan ma Biairota ni kaitaraa Baaratebon.

10 Ngke e a uakaan Barao ao a a euti mataia tibun Iteraera ao a noriia I-Aikubita bwa a kaeiia. A a rangi ni maaku tibun Iteraera ao a a tang nakon Iehova.+ 11 A taku nakoni Mote: “Akea nneni kaweneaia maate i Aikubita ngkai ko kairira n nakomai bwa ti na mate n te rereua?+ Tera ae ko karaoia nakoira ngkai ko kairira ni kaotinakoira mai Aikubita? 12 Tiaki ti boni kangai nakoim i Aikubita, ‘Katikuira bwa ti aonga n toro irouia I-Aikubita’? Bwa e raoiroi riki iroura ae ti na toro irouia I-Aikubita nakon ae ti na mate n te rereua.”+ 13 E taku ngkanne Mote nakoia aomata: “Tai maaku.+ Teei n nene ao nora ana kakamaiu Iehova ae e nang karaoia ibukimi n te bong aei.+ Bwa I-Aikubita aika kam noriia n te bong aei kam na aki manga noriia, kam na bon aki manga noriia n aki toki.+ 14 E na boni buaka Iehova ibukimi+ ao kam na teimatoa ni kainabwabu.”

15 E a taku ngkai Iehova nakoni Mote: “E aera ngkai ko teimatoa n tang nakoiu? Tuangia tibun Iteraera bwa a riai n reita mwanangaia. 16 Ma ko na tabeka ngkoe okom ao arora baim nako aon taari ao bwenauaia, bwa a aonga n nakonako tibun Iteraera rinukan taari i aon te tano ae mwau. 17 Ma N na kariaia ngai bwa a na kamatoatoai nanoia I-Aikubita bwa a aonga n rimwia, ao N na karekea neboakiu ni konaakia Barao ma ana taanga ni buaka ni kabane, ana kaa ni buaka, ao ana tautia aika toka i aoia aoti.+ 18 Ao a na bon ataia I-Aikubita bwa bon Iehova ngai ngkana I karekea neboakiu ni konaakini Barao ma ana kaa ni buaka, ao ana tautia aika toka i aoia aoti.”+

19 E a kitania ngkanne tibun Iteraera ana anera te Atua ae koaua are e ririmoaia,+ ao e nako akuia, ao e mwaing te boua are te nang are i moaia nako buuki ao e tei i akuia.+ 20 Mangaia are e a mena i marenaia I-Aikubita ma tibun Iteraera.+ E karooa te itera are teuana te nang, ma e kaotaota n te bong n te itera are teuana.+ Mangaia are a aikoa kona ake te korakina ni kaania ake te korakina ni kangainaa.

21 Ao e arora baina Mote nako aon taari,+ ao e a kaoka ranin taari Iehova n te angimainiku ae korakora ni kangainaa, ao e a onika kabin taari nakon te tano ae mwau,+ ao e a bwenaua te ran.+ 22 Mangaia are a a mwananga tibun Iteraera n rinukan taari i aon te tano ae mwau,+ ao e a riki te ran bwa te oo i angaataia ao i angamaingia.+ 23 A kaeiia naakai I-Aikubita, ao a bane ana aoti Barao ma ana kaa ni buaka ao ana tautia aika toka i aoia aoti, n rimwia nako taari.+ 24 N te tai n tei n tantani n te ingabong* e a taraiia I-Aikubita Iehova mai nanon te boua ae te ai ma te nang,+ ao e a karokoa irouia te maaku. 25 E teimatoa ni koutii wiran aia kaa ni buaka n te aro are e a kangaanga aroni kabutakia irouia, ao a taku I-Aikubita: “Ti na birinako mairouia tibun Iteraera bwa e a buaka Iehova ibukia ni kaaitaraia I-Aikubita.”+

26 Ao e taku Iehova nakoni Mote: “Arora baim nako aon taari bwa e aonga n oki te ran nako aoia I-Aikubita ma aia kaa ni buaka ao aia tautia aika toka i aoia aoti.” 27 E arora naba baina ngkekei Mote nako aon taari ao ngke e nang ingabong ao e a okira arona taari. Ngke a a birinako I-Aikubita mai iai ao e a kamraraia I-Aikubita Iehova i taari.+ 28 E rabuni kaa ni buaka te ran are oki ao tautia aika toka i aoia aoti, ao kaain ana taanga ni buaka Barao ni kabane, ake a ruo nako taari n rimwia.+ Bon akea naba temanna mai buakoia ae kariaiakaki bwa e na maiu.+

29 Ma a nakonako tibun Iteraera i aon te tano ae mwau n rinukani kabin taari+ ao e riki te ran bwa te oo i angaataia ao i angamaingia.+ 30 Mangaia are n te bong anne ao e kamaiuia tibun Iteraera Iehova mairouia I-Aikubita,+ ao tibun Iteraera a noriia I-Aikubita ni mate i aon te bike. 31 A nora naba te mwaaka* ae korakora tibun Iteraera are e kabongana Iehova ni kaaitaraia iai I-Aikubita, ao a a maaka Iehova ao a a onimakina Iehova ma Mote are ana toro.+

15 N te tai anne ao a anenea te anene aei nakon Iehova Mote ma tibun Iteraera ni kangai:+

“N na anene nakon Iehova bwa e rangi ni karietataaki.+

E tewenakoia aoti ma taan toka i aoia i taari.+

 2 Boni korakorau ao mwaakau Iah,* kioina ngkai e riki bwa te tia kamaiuai.+

Bon Atuau aei ao N na karaoiroia,+ bon Atuan tamau+ ao N na karietataa.+

 3 Bon te tia buaka ae korakora Iehova.+ Bon Iehova arana.+

 4 E tewenakoi ana kaa ni buaka ma ana taanga ni buaka Barao i taari.+

Ao a iinako ana tia buaka aika rangi ni mwaatai n Taari ae Uraura.+

 5 A rabunaki n naao, ao a iinako i nano kaanga te atibu.+

 9 E taku te tia kairiribai, ‘N na kaeiia! N na ooiia!

N na tibwaa konau ni buaka ni karokoa ae I* rauaki!

N na buuta au kabaang! N na kataenikaiia ni baiu!’+

 11 Antai ae ai arom Iehova i buakoia atua?+

Antai ae ai arom, ae ko kaotiko bwa te Atua ngkoe ae rianako tabum?+

Bon Teuare riai ni karineaki n taian anene n nebonebo ao Teuare karaoi baika kamimi.+

 12 Ko arora baim ae ataim, ao e a kabwautiia naba aontano.+

A na bwara nanoia kaaini Kanaan ni kabane.+

 16 A na bwakaraki n te maaku ma te raraoma.+

Ibukini korakorani baim, a aki kona ni kakammwakuri kaanga te atibu.

 18 E na tautaeka Iehova bwa te uea n aki totoki.+

20 E anaa ngkanne te tamboriin* Miriam are te burabeti n aine are mwaanen Aaron, ao a rimwina aine ni kabane ni katangi tamboriin ao ni mwaie. 21 E anene Miriam ni kaekaia mwaane ni kangai:

“Anene nakon Iehova bwa e rangi ni karietataaki.+

E tewenakoia aoti i taari ma taan toka i aoia.”+

22 Imwina riki ao e kairiianako tibun Iteraera Mote man Taari ae Uraura, ao a a nakon rereuan Tiura ao ni mwananga i nanon tenibong i nanon te rereua, ma e aki reke irouia te ran. 23 A roko i Mara*+ ma a aki kona n nima ranin Mara bwa e mao. Anne bukina ae e aranna iai bwa Mara. 24 Mangaia are a a ngurengure aomata nakoni Mote+ ao a kangai: “Tera ae ti nang nimma?” 25 E tang teuaei nakon Iehova,+ ao e kairia Iehova nakon te aroka ae uarereke. Ngke e kabwakaa te aroka arei Mote nako nanon te ran ao e a riki ni mam te ran iai.

Ao E katea ikekei te moti ao te tua ibukia ao E kataiia naba ikekei.+ 26 E taku: “Ngkana ko ongo raoi ni bwanaan Iehova ae Atuam ao ngkana ko karaoa ae eti i matana ao ngkana ko mutiakin ana kaetieti ma ni kawakin ana moti ni kabane,+ N na bon aki karokoa i aom teuana mai buakon aoraki ake I karokoi i aoia I-Aikubita,+ bwa I kamaiuko ngai ae Iehova.”+

27 Imwin anne ao a a roko i Erim, ike a mena iai koburake n ran aika 12 ao aroka aika baam aika 70. Mangaia are a a nako ni kaembwa ikekei i rarikin te ran.

16 Imwini kitanan Erim iroun te botaki n aomata aika tibun Iteraera, ao a a roko n rereuan Tin+ are i marenan Erim ma Tinai, n 15 iai bongin te kauoua n namwakaina, imwini kitanan te aba are Aikubita irouia.

2 Ao a a ngurengure te botaki n aomata aika tibun Iteraera ibukini Mote ma Aaron n te rereua.+ 3 A teimatoa ni kangai tibun Iteraera nakoia: “E raoiroi riki ngke ti mate ni bain Iehova n te aba ae Aikubita ike ti kaakang irikomaiu iai,+ ngke ti kang amwarake ni karokoa rauakira. Kam kairira ngkai nakon te rereua aei bwa e na mate te botaki n aomata aei n te rongo.”+

4 E taku ngkanne Iehova nakoni Mote: “Noria, I a kabwakaa te amwarake ibukimi mai karawa+ n ai aron te karau, ao e na otinako temanna ma temanna n rikoa tibwangana ibukin te bong teuana ma teuana,+ bwa I aonga ni kataiia n noria bwa a na ongeaba n au tua ke a na aki.+ 5 Ma n te kaonoua ni bong+ ngkana a katauraoi ake a rikoi, e riai n uoua te tai mwaitin are a rikorikoia ibukin tebongina ni boong ake tabeua.”+

6 Mangaia are a taku Mote ma Aaron nakoia tibun Iteraera ni kabane: “Kam na ataia raoi n tairiki bwa bon Iehova are kairingkami ni kaotinakoingkami man te aba are Aikubita.+ 7 Kam na nora mimitongin Iehova n te moaningabong, bwa e a tia n ongo Iehova ngurenguremi ibukina. Kaanga antai ngaira ngkai kam na ngurengure ibukira?” 8 E reitia ni kangai Mote: “Ngkana e anganingkami Iehova te irikomaiu bwa kanami n te tairiki ao amwarake riki tabeua n te moaningabong bwa kam na rauaki iai, kam na noria iai bwa e bon ongo ngurenguremi Iehova are kam ngurengure iai ibukina. Bwa kaanga antai ngaira? Kam aki ngurengure ibukira ma bon ibukin Iehova.”+

9 E taku ngkanne Mote nakon Aaron: “Kangai nakon te botaki n aomata aika tibun Iteraera, ‘Keerake nako matan Iehova bwa e ongo ngurenguremi.’”+ 10 Ngke e taetae naba ngkekei Aaron nakon te botaki n aomata aika tibun Iteraera, ao a rairaki ni kaitaraa te rereua, ao akea bwa e a kaoti mimitongin Iehova n te nang.+

11 E reitia ni kangai Iehova nakoni Mote: 12 “I ongo ngurengureia tibun Iteraera.+ Tuangia ni kangai, ‘Kam na kang irikomaiu n te airoo,* ao kam na rauaki n te amwarake n te moaningabong,+ ao kam na bon ataia bwa bon Iehova ngai ae Atuami.’”+

13 Mangaia are a a roko kuere* n te tairiki anne ao n rabuna te kaembwa,+ ao n te moaningabong e a rabuna aontano te aoi ni kabutaa te kaembwa. 14 Ngke e a buanerake te aoi, ao a a mena i aontano n te rereua+ baika mmani n aron te tino. 15 Ngke a noria tibun Iteraera ao a taku i marenaia: “Tera te baei?” bwa a aki ataia bwa tera. E taku Mote nakoia: “Bon te amwarake ae e anganingkami Iehova bwa kanami.+ 16 E tua ae kangai Iehova: ‘E riai temanna ma temanna n rikoa te mwaiti ae e kona ni kanna. Kam na bairea mwaitina ae teuana te omera*+ ibukin temanna ma temanna ni kaineti ma mwaitiia ami aomata* ake a mena n ami umwanrianna.’” 17 A karaoa anne tibun Iteraera, ao a a rikoia, tabeman a rikoa ae bati ao tabeman a rikoa teutana. 18 Ngkana a baireia n te omera ao bon akea nikiran ana bwai te aomata ae rikoa ae bati, ao e tau raoi mwaitin ana bwai te aomata ae rikoa teutana.+ A rikoa ae a kona ni kanna n tatabemania nako.

19 E taku ngkanne Mote nakoia: “Akea temanna ae e na katuka teutana mai iai ni karokoa ae ingabong.”+ 20 Ma a aki ongo irouni Mote. Ngke a katuka teutana mai iai ni karokoa ae ingabong mwaane tabeman, ao a a riki iino iai ao ni mwaung, ao e a un Mote irouia. 21 A ririkoia n te ingabong teuana ma teuana, ni kaineti ma ae a kona ni kanna n tatabemania nako. Ngkana e a kabuebue taai ao e a ran naba.

22 N te kaonoua ni bong a rikoa te amwarake ni kauouaa mwaitina,+ uoua te bwai ni baire ae te omera ibukin temanna te aomata. Mangaia are a bane mataniwi n te botaki n aomata n roko irouni Mote ao a kaongoa taekan aei. 23 Ibukin aei ao e taku nakoia: “Bon anne ae e taekinna Iehova. Ningabong bon te bong ni motirawa* ae te bongi n taabati ae tabu nakon Iehova.+ Umuna ane kam riai n umunna ao kaburoa ane kam riai ni kaburoa,+ ao kawakina nikirana ni karokoa ae ingabong.” 24 Mangaia are a kawakinna ni karokoa ae ingabong n aron are e tua Mote, ao e aki mwaung ke n ino. 25 E taku ngkanne Mote: “Kanna n te bong aei ibukina bwa bon te bongi n taabati nakon Iehova te bong aei. Kam na aki kunea i aontano n te bong aei. 26 Onobong ae kam na rikoia iai, ma e na akea n te kaitiua ni bong ae te bongi n Taabati.”+ 27 Ma a nako aomata tabeman bwa a na rikoia n te kaitiua ni bong, ma e aki reke irouia.

28 Mangaia are e taku Iehova nakoni Mote: “Maanra ngkami n rawa ni kawakin au kaetieti ma au tua?+ 29 Kam na ataia bwa e anganingkami te bongi n Taabati Iehova.+ Anne bukina ae e anganingkami n te kaonoua ni bong te amwarake ibukin uabong. A riai aomata nako n tiku n oin aia tabo, e na akea ae e na kitana ana tabo n te kaitiua ni bong.” 30 Mangaia are a kawakina te bongi n Taabati* aomata n te kaitiua ni bong.+

31 A arana te amwarake arei tibun Iteraera bwa “te manna.”* E mainaina n aroni koraan te korianta,* ao kanakina ai aroni kanakin te bwerena ae mmani ma aia karewe manibeeru.*+ 32 E taku ngkanne Mote: “E kangai te bae e tua Iehova, ‘E na kawakinaki i nanon ami roro nako teuana te bwai ni baire ae on ae te omera,+ bwa a aonga n nora te amwarake ae I anganingkami bwa kam na kanna n te rereua ngke I kairingkami ni kaotinakoingkami man te aba are Aikubita.’” 33 Mangaia are e taku Mote nakon Aaron: “Anaa te kaatibu ao nnea iai te manna ae teuana te omera mwaitina, ao karinna i matan Iehova bwa te bwai ae e na kawakinaki i nanon ami roro nako.”+ 34 E karinna Aaron i matan te bwaoki* ae okoro+ bwa e aonga ni kawakinaki, n aron are e tua Iehova nakoni Mote. 35 A kakana te manna tibun Iteraera i nanon 40 te ririki+ ni karokoa ae a roko n te aba ae kaainaki.+ A kakana te manna ni karokoa ae a roko n tian te aba ae Kanaan.+ 36 Te omera bon teuana katebwinani mwakoron te bwai ni baire ae te eba.*

17 A kitana rereuan Tin te botaki n aomata aika tibun Iteraera+ ni mwananga nakon te tabo teuana ma teuana, ni kaineti ma are e tua Iehova.+ N tokina ao a a kaembwa i Rebirim.+ Ma akea iai te ran ibukin nimaia aomata.

2 Mangaia are a a kauntaeka aomata ma Mote+ ao a taku: “Anganira te ran bwa ti na moi.” Ma e taku Mote nakoia: “E aera ngkai kam a kauntaeka ma ngai? E aera ngkai kam teimatoa ni kataa Iehova?”+ 3 Ma a a rangi ni bwatakataka aomata ikekei, ao a teimatoa naba ni ngurengure nakoni Mote+ ni kangai: “E aera ngke ko kairira ni kaotinakoira mai Aikubita, ko na kamateira n te taka ma natira ao ara man?” 4 N tokina ao e a tang Mote nakon Iehova ni kangai: “Tera ae I riai ni karaoia nakoia aomata aikai? Ai tii teutana riki ao a nang karebanaai n atibu!”

5 E taku ngkanne Iehova nakoni Mote: “Ko na rimoaia aomata ao kairiia tabeman mai buakoia aia unimwaane tibun Iteraera, ao anaa okom are ko orea iai te Karaanga ae te Naire.+ Taua i baim ao riannanako. 6 Noria! N na tei imwaim ikekei i aon te bwaa are i Oreba. Ko na orea te bwaa, ao e na tiinako mai iai te ran, ao a na moi iai aomata.”+ E karaoa anne Mote i mataia aia unimwaane tibun Iteraera. 7 Mangaia are e arana te tabo arei bwa Mata*+ ao Meriba,*+ ibukini kakauntaekaia tibun Iteraera ao ibukin ae a kataa Iehova,+ ngke a kangai: “E mena i buakora Iehova ke e aki?”

8 A a roko ngkanne tibun Amareka+ bwa a na buakania tibun Iteraera i Rebirim.+ 9 Ao e taku Mote nakon Iotua:+ “Rineiia mwaane mai buakora ao naako buakania tibun Amareka. Ningabong ao N na tei i aon taubukin te maunga ae uarereke, ma ana oko te Atua ae koaua i baiu.” 10 Ao Iotua e karaoa are e tuangnga Mote,+ ao e buakania tibun Amareka. Ao a nako aon taubukin te maunga ae uarereke Mote ma Aaron ao Uura.+

11 N te tai are e tabeki iai baina Mote, ao a taua aona tibun Iteraera, ma n te tai are e karuoi iai baina, ao a taua aona tibun Amareka. 12 Ngke a a kakaii baini Mote, ao a anaa te atibu bwa e na tekateka i aona, ao a nangoi baina Aaron ma Uura, temanna n iterana teuana ao are temanna n iterana are teuana, n te aro are a a teimatoa n tei baina ni karokoa bungin taai. 13 Mangaia are a a taenikai tibun Amareka ma raoia iroun Iotua n te kabaang.+

14 E a taku ngkai Iehova nakoni Mote: “Korea ae kangai i nanon te boki bwa te kanuringa, ao manga taekinna nakon Iotua, ‘N na boni kamauna uringaia tibun Amareka mai aani karawa.’”+ 15 E katea ngkanne te baonikarea Mote ao e aranna bwa Iehovaniti,* 16 ao e kangai: “Ibukina bwa a tabeki baia n riribai ni kaitaraa ana kaintokanuea Iah,+ e na buaka Iehova ma tibun Amareka man te roro teuana nakon teuana.”+

18 Ao Ietero ae ibongani Mirian ae tamani buuni Mote,+ e ongo taekani bwaai ni kabane ake e karaoi te Atua ibukini Mote ma ana aomata aika tibun Iteraera, ae aron Iehova ni kairiia tibun Iteraera ni kaotinakoia mai Aikubita.+ 2 Ao Ietero are tamani buuni Mote, e kamaekaa Tibora are buuni Mote irouna ngke e kaokaki neiei nakoina, 3 n ikotaki ma natin neiei mwaane ake uoman.+ E aranaki natina temanna bwa Keritiom*+ bwa e taku Mote, “I maeka n iruwa n te aba ae ianena,” 4 ao e aranaki are temanna bwa Erietera* bwa e taku, “bon te tia buokai Atuan tamau, are e kamaiuai man ana kabaang Barao.”+

5 Mangaia are e a nako Ietero are tamani buuni Mote ma natini Mote ma buuna ni kawara Mote n te rereua are e kaembwa iai, n ana maunga te Atua ae koaua.+ 6 E kanakotaeka ngkanne nakoni Mote ni kangai: “I a roko ngai ae Ietero+ ae tamani buum ni kawariko, ma buum ao natim aika uoman.” 7 E aki tabwara Mote ma e a otinako naba ni kawara tamani buuna, ao e bobaraaki ao e kaboria* ma ngaia. A ititiraki aroia i marenaia bwa a uara ao imwina a a nako n rinnako n te umwanrianna.

8 E kaongoraea tamani buuna Mote bwaai ni kabane ake e karaoi Iehova nakoni Barao ao Aikubita ibukia tibun Iteraera,+ karawawata ni kabane ake a bwakariia i nanoni kawaia,+ ao aron Iehova ni kamaiuia. 9 E kimwareirei Ietero ni baika raraoi ni kabane ake e karaoi Iehova ibukia tibun Iteraera, ngke e kamaiuia mai Aikubita.* 10 Ao e taku Ietero: “Ke e karaoiroaki Iehova, ae kamaiuingkami mai Aikubita ao mairouni Barao, ao ae kamaiuia aomata mai aani mwaakan Aikubita. 11 I a ataia ngkai bwa e boni kakannato riki Iehova nakoia atua ni kabane,+ ibukin te baere e karaoia nakoia te koraki ake a kainikatonga n ekiianako ana aomata.” 12 Ao e uota te karea ni kabuekaki Ietero are tamani buuni Mote, ma taiani karea nakon te Atua, ao a roko Aaron ma aia unimwaane tibun Iteraera ni kabane n amwarake ma tamani buuni Mote i matan te Atua ae koaua.

13 N te bong are imwina ao e a tekateka Mote n aron ae taneiai iai, bwa te tia motikitaeka ibukia aomata, ao a teimatoa aomata n tei i matani Mote man te moaningabong ni karokoa ae tairiki. 14 Ngke e nori bwaai ni kabane tamani buuni Mote ake e karaoi ibukia aomata ao e taku: “Tera te baene ko karaoia ibukia aomata akanne? E aera ngkai ko tekateka ikai n tii ngkoe ao aomata ni kabane a tei i matam man te moaningabong ni karokoa ae tairiki?” 15 E taku Mote nakon tamani buuna: “Ibukina bwa a teimatoa aomata ni kawarai bwa a na titirakina te Atua. 16 Ngkana iai te bwai ae riki, ao e na roko taekana irou ao ngai ae N na motikitaeka i marenan te aomata temanna ma temanna, ma ni kaotii ana moti ma ana tua te Atua ae koaua.”+

17 E taku tamani buuni Mote nakoina: “E aki raoiroi te baene ko karaoia. 18 Ko na bon rangi ni kua iai, ngkoe ma aomata aika raom aikai, ibukina bwa bon te uota ae rangi n rawawata aei ibukim ao ko aki kona n uotia n tii ngkoe. 19 Ongora ngkai irou. N na anganiko te taeka n reirei ao e na boni memena iroum te Atua.+ Ko riki bwa te tia tei ibukia aomata aikai i matan te Atua ae koaua,+ ao ko riai n uotii taekan aia kangaanga nako matan te Atua ae koaua.+ 20 Ko riai n reireinia kaetieti ma tuua,+ ao kaota te kawai nakoia ae a riai n nakonako iai, ma te mwakuri ae a riai ni karaoia. 21 Ma ko riai n rineiia mai buakoia aomata, mwaane aika konabwai+ aika a mamaaka te Atua, mwaane aika kona n onimakinaki ao aika a ribaa karekean te raka n te babakanikawai,+ ao mwiokoiia bwa mataniwi i aoia kaka teuana tenga, mataniwi i aoia kaka tebubua, mataniwi i aoia kaka nimangaun, ao mataniwi i aoia kaka tengaun.+ 22 A riai ni momotiki taekaia aomata ngkana iai baika riki* ao a na uotii nakoim taekani baika kangaanga ni kabane,+ ma a na motiki taekani baika uarereke ni kabane. Kabebetea riki uotam n arom ni kariaia naakai bwa a na uataboa te uota ma ngkoe.+ 23 Ngkana ko karaoa aei, ao e boraoi aei ma ae e tua te Atua nakoim, ao ko na kona n teimatoa iai n uataboa te uota, ao a na bane aomata n okira mwengaia ma te raunnano.”

24 E waekoa Mote n ongo iroun tamani buuna ao e karaoi bwaai ni kabane ake e taekin. 25 E rineiia mwaane aika konabwai Mote mai buakoia tibun Iteraera ni kabane, ao e mwiokoiia bwa taani kairiri i aoia aomata, bwa mataniwi i aoia kaka teuana tenga, mataniwi i aoia kaka tebubua, mataniwi i aoia kaka nimangaun, ao mataniwi i aoia kaka tengaun. 26 Mangaia are a momotiki taekaia aomata ngkana iai baika riki. A uota taekan te tangitang ae kangaanga nakoni Mote,+ ma a motiki taekani baika uarereke ni kabane. 27 Imwin anne ao e a bakaboraua tamani buuna Mote,+ ao e a nako teuaei nako abana.

19 N te katenua n namwakaina imwin otinakoia tibun Iteraera man te aba are Aikubita, ao a a roko n rereuan Tinai.* 2 A nako mai Rebirim+ ao a a roko n rereuan Tinai ao a kaembwa n te rereua. A kaembwa tibun Iteraera ikekei i moan te maunga.+

3 Ao e ararakea te maunga Mote bwa e na kaotia i matan te Atua ae koaua, ao e weteia Iehova man te maunga+ ao e kangai: “Aio te bwai ae ko na taekinna nakoia ana utu Iakoba aika tibun Iteraera, 4 ‘Boni ngkami ae kam a tia n nora te bwai are I karaoia nakoia I-Aikubita,+ bwa I aonga n uotiingkami nakoiu i aoni baia ni kiba ikare.+ 5 Ngkana kam bon ongo raoi ni bwanaau ma ni kawakina au berita, kam na bon riki bwa au aomata aika okoro* mai buakoia botannaomata ni kabane,+ bwa bon au bwai te aonnaba ni kabutaa.+ 6 Kam na riki bwa ibonga* n au tautaeka n uea ao te natannaomata ae itiaki.’*+ Aikai taeka aika ko na taekin nakoia tibun Iteraera.”

7 Mangaia are e nako Mote ao e weteiia aia unimwaane aomata ao e taekin taeka aikai ni kabane ake e tua Iehova nakoina.+ 8 Imwin anne ao a bane aomata ni kabooi nanoia ni kaeka ni kangai: “Ti kukurei ni karaoi baike e taekin Iehova ni kabane.”+ E uotii naba ngkekei n oki aia kaeka aomata Mote nakon Iehova. 9 Ao e taku Iehova nakoni Mote: “Noria! N na roko iroumi n te nang ae roo, bwa a aonga n ongo aomata ngkana I taetae ma ngkoe, ao a aonga naba n teimatoa n onimakiniko.” Ao Mote e taekin aia taeka aomata nakon Iehova.

10 E taku ngkanne Iehova nakoni Mote: “Naako nakoia aomata ao katabuia* n te bong aei ao ningabong, ao a riai ni kaitiakii kunnikaia. 11 Ao a riai n tauraoi imwain te katenua ni bong, ibukina bwa e na ruo Iehova nakon te Maunga ae Tinai i mataia aomata ni kabane n te katenua ni bong. 12 Ko na katei tiaia aomata ni katobibia te maunga, ao tuangia ni kangai, ‘Tarataraingkami man ararakean te maunga ke ringakin tiana. Ane e ringa te maunga ao e na boni kamateaki. 13 Akea ae e na ringa te aomata anne ma e na karebanaaki n atibu ke e na katebeaki.* E na aki maiu n aki ongeia bwa te man ke te aomata.’+ Ma a na tii kona ni kaania te maunga n tangin te buu ae koron te tiibutetei.”+

14 Ao e ruo Mote man te maunga nakoia aomata, ao e a katabuia aomata ao a kaitiakii kunnikaia.+ 15 E taku nakoia aomata: “Katauraoingkami ibukin te katenua ni bong. Kam na rawa nakon te wene n taanga.”*

16 Ni moaningabongin te katenua ni bong ao e a rebwe te baa ma n itirua, ao iai te nang ae matenten+ i aon te maunga ao e a rangi ni korakora karongoaan tangin te buu are te koro, ao a rurubenebene aomata ni kabane ake n te kaembwa.+ 17 Ao Mote e kairiia aomata ni kaotinakoia man te kaembwa bwa a na kawara te Atua ae koaua, ao a nako ni mena i nanoaan te maunga. 18 Ao e a bubu te Maunga ae Tinai ni kabutaa, ibukina bwa e ruo nako aona Iehova n te ai,+ ao e aetorake bubuna n ai aroni bubun te nne ni kanaiai, ao e a korakora mwaeiein te maunga ni kabutaa.+ 19 Ngke e a tabe n ririkirake karongoaan te buu are te koro, ao e a taetae Mote, ao e a kaekaaki ni bwanaan te Atua ae koaua.

20 Mangaia are e ruo Iehova nako aon te Maunga ae Tinai nako aon taubukina. Ao Iehova e wetea Mote nako taubukin te maunga, ao e a ararake Mote.+ 21 E a taku ngkai Iehova nakoni Mote: “Naako ruuo ao aanga te kauring nakoia aomata bwa a na aki kataia ni kaania Iehova bwa a na noria, bwa a kaawa ni mate aika bati mai buakoia. 22 Ao ke a katabuia ibonga ake a roroko ni kaania Iehova, bwa e aonga n aki oreiia Iehova.”+ 23 E taku ngkanne Mote nakon Iehova: “A aki kona aomata n ararakea te Maunga ae Tinai, ibukina bwa ko a tia n anganira te kauring ni kangai, ‘Katea tian te maunga ni katobibia ao katabua.’”+ 24 Ma e taku Iehova nakoina: “Naako ruuo, ao ko na manga waerake n oki ngkoe ma Aaron, ma tai kariaia ibonga ma aomata bwa a na kaania Iehova, bwa e aonga n aki oreiia.”+ 25 Mangaia are e a ruo Mote nakoia aomata ao e tuangia.

20 E taekini ngkanne taeka aikai ni kabane te Atua+ ni kangai:

2 “Bon Iehova ngai ae Atuam, ae I kairiko ni kaotinakoko man te aba are Aikubita, man te auti n toronaki.+ 3 Ko na tai karekeia riki atuam i rarikiu.*+

4 “Ko na tai karaoa am bouannanti ae kaaraki ke te bwai ae katotongan* te bwai teuana i karawa i eta ke i aon te aba i nano ke n te ran i aon te aba.*+ 5 Ko na tai bobaraaki nakoia ke n anaaki nanom bwa ko na toro irouia,+ bwa bon Iehova ngai ae Atuam ae te Atua ae I tua bwa N na taromauriaki n tii ngai,*+ ae I katuuaaeia naati mwaane ibukin aia kairua tamaia, ao te katenroro naba ma te kaaroro, ibukia taama akana ribaai akanne, 6 ma I kaota te tangira ae koaua* nakoia rooro aika nga ma nga, ibukia taama aika tangirai ma ni kawakin au tua.+

7 “Ko na tai kabongana aran Iehova ae Atuam n te aro ae aki riai,+ bwa Iehova e na boni katuuaaea te aomata ae kabongana Arana n te aro ae aki riai.+

8 “Uringnga ni katabua te bongi n Taabati.+ 9 Ko na bekutata ao karaoi am mwakuri ni kabane i nanon onobong,+ 10 ma te kaitiua ni bong bon te bongi n taabati nakon Iehova ae Atuam. Ko na tai karaoa te mwakuri teuana, ngkoe ke natim te mwaane ke natim te aine ke am toro te mwaane ke am toro te aine ke am man ke te aomata ae maeka n iruwa n am tabo nako ni maeka.*+ 11 Bwa e karaoa karawa ma te aonnaba Iehova ma taari ma bwaai nako ake iai i nanon onobong, ao e a moana motirawana n te kaitiua ni bong.+ Anne bukina ae e karaoiroa iai te bongi n Taabati Iehova ao e katabua.

12 “Karinea tamam ma tinam,+ bwa ko aonga ni maiu i nanon te tai ae maan n te aba ae e anganiko Iehova ae Atuam.+

13 “Ko na tai tiriaomata.+

14 “Ko na tai wene ni kimoa.+

15 “Ko na tai iraa.+

16 “Ko na tai kaotioti ni kewe ngkana ko riki bwa te tia kakoaua ni kaitaraa raom n aomata.+

17 “Ko na tai mataaiakina ana auti raom. Ko na tai mataaiakina buun raom+ ke ana toro te mwaane ke ana toro te aine, ke ana kao mwaane ke ana taongki ke te bwai teuana ae ana bwai raom.”+

18 A bane aomata n ongo rebwen te baa ma tangin te buu ae te koro ao a nora te itirua ma bubun te maunga, ao ngke a nori baikai ma n ongo ao a ruru ao a tei i kiraroa.+ 19 Mangaia are a taku nakoni Mote: “Ko na taetae ngkoe ma ngaira ao ti na ongora, ma ke e tai taetae ma ngaira te Atua bwa ti kaawa ni mate.”+ 20 Mangaia are e taku Mote nakoia aomata: “Tai maaku bwa e roko te Atua ae koaua bwa e na kataingkami,+ bwa e aonga n teimatoa maakakina iroumi bwa kam aonga n aki bure.”+ 21 Mangaia are a teimatoa aomata n tei i kiraroa, ma e kaania te nang are roo Mote are e mena iai te Atua ae koaua.+

22 E taku ngkanne Iehova nakoni Mote: “Aio te bwai ae ko na taekinna nakoia tibun Iteraera, ‘Kam a tia n noria bwa I taetae ma ngkami mai karawa.+ 23 Kam na tai karaoi atua i rarikiu aika karaoaki man te tirewa, ao kam na tai karaoi atuami aika karaoaki man te koora.+ 24 Ko na karaoa ibukiu te baonikarea ae karaoaki man te tano, ao ko na karean i aona am karea ni kabuekaki, am karea n raoi,* am tiibu, ao am kao. N na roko iroum n taabo nako ake I rinei bwa e na ururingaki iai arau,+ ao N na kakabwaiako. 25 Ngkana ko karaoa te baonikarea ibukiu ae karaoaki man taian atibu, ko na aki kateia ni kabonganai atibu aika korokoreaki ni bwaai ni mwakuri.*+ Ngkana ko kabongana am korotiiti i aona, ko a kamwaraea iai ngkanne. 26 Ao ko na tai karaoa te bwai n tamwarake n au baonikarea ae ko na tamwarake iai, bwa e aonga n aki oti i aona bwain rabwatam aika riai ni karabaaki.’

21 “Aikai mooti aika ko na kaotii nakoia:+

2 “Ngkana ko kabooa am toro ae te Ebera,+ e na riki teuanne bwa te toro i nanon onoua te ririki, ma e na kainaomataaki n te kaitiua n ririki n akea booni kainaomataana.+ 3 Ngkana e roko n tii ngaia, e na nako naba n tii ngaia. Ma ngkana iai buuna, e na nako ngaia ma buuna. 4 Ngkana e karekeaki buuna iroun ana toka, ao e bungia neienne natina mwaane ke natina aine, e na riki neienne ma natina bwa ana bwai te toka, ma e na nako teuanne n tii ngaia.+ 5 Ma ngkana e kamatoaa ni kangai te toro, ‘I tangira au toka, ao buu ma natiu, I aki kani kainaomataaki,’+ 6 e na kairia ana toka nako matan te Atua ae koaua. Ao e na kairia ni kararaa ma te mataroa ke bouan te mataroa, ao e na ewara taningan teuaei ana toka n te bwai n ewataninga ao e na riki bwa ana toro n uaa tokini maiuna.

7 “Ngkana iai te aomata ae kaboonakoa natina te aine bwa te toro, e na aki kainaomataaki neienne n aroni kainaomataan te toro te mwaane. 8 Ngkana e aki kukurei ana toka neienne irouna n te aro ae e aki rineia bwa buuna ni kewe* ma e kariaia kabooana iroun temanna,* e na aki riai te toka ni kaboonakoa neienne nakoia ianena, bwa e a tia ni babakanikawaia neienne. 9 Ngkana e rinea neienne bwa buun natina te mwaane, e na karaoa nakoina ae riai ni karaoaki nakon te nati te aine. 10 Ngkana e karekea buuna riki temanna, e na aki riai ni kauarerekea mwaitini kanan neiere moani buuna ma ana kunnikai ao te bae riai* n anganaki.+ 11 Ngkana e aki angan neiei baika tenua aikai, ao e na inaomata n nako neiei n aki kabwakamwane.

12 “E riai ni kamateaki ane e orea te aomata n te aro ae e a mate iai.+ 13 Ma ngkana e karaoa anne n tiaki nanona ao e aki tuka rikin anne te Atua ae koaua, ao N na katauraoa ibukim te tabo ae e kona ni birinako nako iai.+ 14 Ngkana e rangi n un temanna iroun raona n aomata n te aro ae e a tiringnga n oin nanona,+ ao e riai ni mate te aomata anne, e ngae naba ngkana e ukera kamanoana n au baonikarea.+ 15 E riai ni kamateaki ane e orea tamana ao tinana.+

16 “E riai ni kamateaki+ ane e iraea te aomata temanna+ ao ni manga kaboonakoa, ke ngkana e kuneaki+ ae iai te aomata anne irouna.

17 “E riai ni kamateaki ane e kamaraiaa* tamana ke tinana.+

18 “Aio te bwai ae riai n riki ngkana iai aomata aika kauntaeka, ao temanna irouia e a orea naba raona n te atibu ke n ana timoi,* ao e aki mate ma e titiku ni wene ni nnena ni wene: 19 Ngkana e kona n teirake te aomata anne ma n nakonako i tinaniku n okokoia, e na kainaomataaki ngkanne man tuuaana teuare oreia. E na tii kaboomwi n tabeakina teuare ikoaki i nanoni boong ake e aki kona ni mwakuri iai ni karokoa ae e marurung raoi.

20 “Ngkana iai te aomata ae orea ana toro te mwaane ke ana toro te aine n te kai ao e mate i aani baina, e riai n irantangaaki te toro anne.+ 21 Ma e na aki karekeaki kain te aomata anne ngkana e teimatoa ni maiu ana toro i nanon tebongina ke uabong, bwa bon ana bwai te toro anne.

22 “Ngkana iai aomata aika boo n un ao a kaikoaka te aine ae bikoukou n te aro ae e a rimoan ana tai ni bung neienne,*+ ma akea ae e mate iai,* e riai teuare bure ni kaboomwi ibukini kangaanga ake e karekei, ni kaineti ma are e baireia buun te aine anne, ao e na kabwakaa ni kaineti ma aia baire taani moti.+ 23 Ma ngkana iai ae e mate, ko na kabooa ngkanne te maiu ni boona ae te maiu,*+ 24 te mata boona te mata, te wi boona te wi, te bai boona te bai, te wae boona te wae,+ 25 te bue boona te bue, te ikoaki boona te ikoaki, ao te oro boona te oro.

26 “Ngkana iai te aomata ae orea matan ana toro te mwaane ke matan ana toro te aine ao e kakaiaki ikoakini matana, e na kainaomataa te toro anne bwa booni mwini matana.+ 27 Ao ngkana e kabwakaa win ana toro te mwaane ke win ana toro te aine, e na kainaomataa bwa booni mwini wina.

28 “Ngkana iai te kao mwaane ae ewara te mwaane ke te aine ni korona ao e mate te aomata anne, e riai ni karebanaaki n atibu n uaa matena+ te kao mwaane ma e na aki kanaki irikona, ao e na aki katuuaaeaki teuare ana man te kao mwaane. 29 Ma ngkana bon aroaron te kao mwaane anne te ewaewa ni korona ao e a tia teuare ana man n anganaki te kauring ma e aki teimatoa n tararuaia, ao e kamatea te mwaane ke te aine te kao mwaane anne, e na karebanaaki ngkanne ni kamateaki te kao mwaane anne ao e na kamateaki naba te aomata are ana man. 30 Ngkana e motikaki te kaboomwi mairouna, ao e na anga bwaai ni kabane ake a motikaki ibukina bwa booni maiuna.* 31 Ngkana e ewara te teinimwaane ke te teinnaine te kao mwaane anne, e na karaoaki naba te aeka ni moti aei nakon te aomata are ana man te kao mwaane anne. 32 Ngkana e ewara te toro te mwaane ke te toro te aine te kao mwaane anne, e na kabwakaa 30 te tiekera* teuare ana man nakon ana toka te aomata anne bwa boona, ao e na karebanaaki n uaa matena te kao mwaane.

33 “Ngkana e kauka matan te mwarua te aomata temanna, ke ngkana e kena te mwarua ma e aki rabuna matana, ao e bwaka te kao mwaane ke te taongki i nanona, 34 e na kabooa mwina teuare ana mwarua.+ E na anga boona nakon teuare ana man, ao e na bwaina te man are mate. 35 Ngkana iai ana kao mwaane te aomata temanna ae kaikoaka ana kao mwaane te aomata temanna ao e mate, a riai ngkanne ni kaboonakoa te kao are maiu ao n tibwaa boona i marenaia, ao a riai naba ni bwenauaa te man are mate. 36 Ke ngkana e bon ataaki aroaron te kao mwaane anne ae te ewaewa ni korona, ma e aki teimatoa te aomata are ana man n tararuaia, e na anga te kao mwaane temanna te aomata anne bwa booni mwin te kao mwaane, ao e na bwaina are e mate.

22 “Ngkana e iraea te kao mwaane ke te tiibu te aomata temanna ao e tiringnga ke e kaboonakoa, e na kabooa mwin temanna te kao mwaane n niman te kao mwaane, ao temanna te tiibu n aman te tiibu.+

2 (“Ngkana e kuneaki te tia iraa+ n ninia te auti teuana ao e oreaki ao e mate, akea te bure ni katuturaraa ni kaineti ma kamateana. 3 Ma ngkana e riki anne imwini bwakaraken taai, ao e boni bure ni katuturaraa teuanne.)

“E riai ni kabooa mwina te tia iraa. Ngkana akea ana bwai, ao e riai ni kaboonakoaki ibukini baike e iraei. 4 Ngkana e noraki bwa e maiu i nanoni baina te baere e iraea, ae tao te kao mwaane ke te taongki ke te tiibu, e na kabooa mwina ni kauouaa mwaitina.

5 “Ngkana e katikuia ana man te aomata bwa a na amwarake n te tawaana ke n te nne ni kureebe, ao e kariaia bwa a na amwarake n ana tawaana te aomata temanna, e na boni kabooa mwina n uaan arokana aika taiani kabanea n raoiroi ke n uaan ana nne ni kureebe aika taiani kabanea n raoiroi.

6 “Ngkana e ura te ai ao e rakanako nakon aroka aika kateketeke, ao a bue iai bwabwati ni uita ke aroka aika uita* n te tawaana ke ai bon te tawaana ae bwanin, e riai ni kabooa mwin te bwai are bue te aomata are kauraa te ai.

7 “Ngkana e anga te mwane ke bwaai tabeua te aomata temanna bwa e na kawakinaki iroun raona, ao a kimoaaki baikai man ana auti raona, ma ngkana e kuneaki te tia iraa ao e riai ni kabooi mwia ni kauouai mwaitiia.+ 8 Ngkana e aki reke te tia iraa, e na kairaki teuare ana auti te auti nako matan te Atua ae koaua+ bwa e aonga n noraki bwa e boni kuai ana bwai raona ke e aki. 9 Ni kaineti ma kauntaeka nako ibukini bwainakini bwaai aika iraeaki ae te kao mwaane, te taongki, te tiibu, te kunnikai, ke te bwai riki teuana ae bua are e taekinna temanna i buakoia ni kangai, ‘Bon au bwai aei!’ a na uota taekaia koraki aika uakoraki aikai nako matan te Atua ae koaua.+ Te aomata are e taekinna te Atua bwa e bure e na kabooa mwin te baerei ni kauouaa mwaitina nakon raona.+

10 “Ngkana e anga te taongki ke te kao mwaane ke te tiibu ke te aeka ni man riki teuana ae manana te aomata temanna bwa e na kawakinaki iroun raona, ao e mate te man arei ke e rangi n ikoaki ke e kairakinako ao akea taani kakoaua iai, 11 e riai ni karaoaki te taetae n tuea i marenaia, i matan Iehova, bwa e bon aki kuai ana bwai raona ao e na butimwaea anne teuare te tia bwaibwai. E na aki kabooa mwina te aomata are mwiokoaki.+ 12 Ma ngkana e iraeaki te man mairouna, ao e na kabooa mwina nakon teuare te tia bwaibwai. 13 Ngkana e raebitiaki te man iroun te man ni kaakang, e na uota rabwatan te man are mate bwa te bwai ni kakoaua. E na aki kabooa mwin te man ae raebitiaki iroun te man ni kaakang.

14 “Ma ngkana iai ae e bubutii tangoan te man ae ana man raona, ao e rangi n ikoaki te man arei i nanoni baina ke e mate, ao e riai ni kabooa mwina teuare tangoia ngkana e aki mena teuare te tia bwaibwai i rarikin ana man. 15 Ngkana e mena teuare te tia bwaibwai i rarikin ana man ao e na aki kabooa mwina teuare tangoia. Ngkana e kabooaki tangoana ao e na riki te mwane ane kabwakaaki anne bwa te kaboomwi.

16 “Ao ngkana iai te mwaane ae kababaa te aine ae tuai ni boo ma te mwaane ao e tuai ni kabae, ao e wene ma ngaia, e riai ni kabwakaa ibukin neiei boon te buu te aine ae katauaki bwa e aonga n riki bwa buuna.+ 17 Ngkana e bon rawa taman neiei n anga natina te aine aei nakon teuaei, e na boni kabwakaa naba teuaei te mwane ae botau ma boon te buu te aine.

18 “Ko aki riai ni kariaia bwa e na maiu te aine ae te tia tabunea.+

19 “Ane e karaobure ma te man ao e na boni kamateaki.+

20 “Ane e aki angakarea nakon Iehova n tii ngaia ma e angakarea nakoia atua tabeman, ao e na kamateaki.+

21 “Ko na tai karaoa ae buakaka nakon te aomata ae maeka n iruwa ke ni karawawataa,+ bwa kam maeka n iruwa naba ngkoa n te aba are Aikubita.+

22 “Kam na tai karawawataa te aine ae e a tia ni mate buuna ke te teei ae akea tamana.*+ 23 Ngkana ko karawawataa naba teutana n te aro ae e a tang nakoiu, ao N na bon ongo tangina,+ 24 ao e na urarake uniu, ao N na kamateingkami n te kabaang, ao a na riki buumi bwa aine aika a a tia ni mate buuia ao a na riki natimi bwa ataei aika akea tamaia.

25 “Ngkana ko katangomwane nakoia aika a maiu ni kainnano* mai buakoia au aomata, ae te aomata ae mena i rarikim, ao ko na tai riki bwa te tia kataarau* nakoina. Kam na tai bakaonna nakoina.+

26 “Ngkana ko anaa ana kunnikai raom bwa te bwai ni kaboomwi ibukin te bwai ae tangoaki,*+ ao ko na kaoka ana kunnikai nakoina ni bungin taai. 27 Bwa bon tii ngaia karabaana ae kunnikaina ibukin rabunan rabwatana.* E nangi matu n tera ngkana ai akea ana kunnikai?+ Ao ngkana e tang nakoiu, ao N na bon ongo, bwa I atataiaomata.*+

28 “Ko na tai karereantia* te Atua+ ke n taetae ni karekea kain te mataniwi* temanna i buakoia am aomata.+

29 “Ko na tai waeremwe n anga am karea aika uaan abam mai buakon am uaa ae mwaitikurikuri ma am wain ao am oera ae rangi ni bati.+ Ko na anganai te karimoa mai buakoia natim mwaane.+ 30 Aio arom ae ko riai ni karaoia nakon am kao mwaane ao am tiibu:+ E na teimatoa n tiku iroun tinana i nanon itibong ao ko na anganai n te kawanibong.+

31 “Kam na riki bwa au aomata aika itiaki,*+ ao kam na tai kana irikon te man ae raebitiaki n te tawaana iroun te man ni kaakang.+ Kam riai ni karenako nakoia kamea.

23 “Ko na tai kabutaanako* te rongorongo ae kewe.+ Tai uaia ni mwakuri ma te aomata ae buakaka, n arom n riki bwa te tia kakoaua ae iowawa.+ 2 Ko na tai irania aomata aika bati, ni karaoa ae buakaka, ao ko na tai kabwaoua te kaetitaeka ae riai n arom n anga am kakoaua ae boto i aon irakin nanoia aomata aika mwaiti. 3 Ko na tai inanonano n irana ana kauntaeka te aomata ae maiu ni kainnano.+

4 “Ngkana ko boo ma ana kao mwaane te aomata ae kairiribai nakoim ke ana taongki ae tiotionako, ko riai ni kaokia nakoina.+ 5 Ngkana ko nora ana taongki te aomata ae riribaiko bwa e a bwaka ibukin uotana, ko na tai katikua ni kitanna. Ko riai ni buokia ni kanakoa uotan ana man.+

6 “Ko na aki kabwaoua te moti ibukin ana tangitang te aomata ae maiu ni kainnano i buakomi.+

7 “Tai irekereke ma te bukibuki* ni kewe ao tai kamatea te aomata ae akea ana bure ao ae raoiroi, bwa N na aki taekina te aomata ae buakaka bwa e raoiroi.+

8 “Ko na tai butimwaea te bwai ni kamaraato bwa e kona te bwai ni kamaraato ni kamatakia taani motikitaeka aika wanawana, ao e kona naba ni kabwaouai aia taeka aomata aika raoiroi.+

9 “Ko na tai karawawataa te aomata ae maeka n iruwa. Kam ataa raoi aron te maeka n iruwa bwa kam maeka n iruwa ngkoa n te aba are Aikubita.+

10 “Ko na uniki koraa i abam ma n ikotii uaana i nanon onoua te ririki.+ 11 Ma ko riai ni katikua n aki ribanaia n te kaitiua n ririki. A na amwamwarake mai iai te koraki aika maiu ni kainnano, ao nikirana ake a katikui a na kanna manin te tawaana aika moaanti. Anne arom ae ko riai ni karaoia nakoni nnen am kureebe ma nnen am oriwa.

12 “Ko na karaoa am mwakuri i nanon onobong, ma ko na katoka am bekutata n te kaitiua ni bong, bwa e aonga ni motirawa am kao mwaane ma am taongki, ao a na motiki rawaia am toro ao te aomata ae maeka n iruwa iroum.+

13 “Kam riai n tarataraingkami bwa kam na karaoi bwaai ni kabane ake I taekin nakoimi,+ ao kam na tai taboa araia atua riki tabeman, ao a aki riai n otinako mai wimi aara aikai.+

14 “Ko na bukamarui tooa nakoiu aika tenua ni katoa ririki.+ 15 Ko na kawakina te Toa ae te Bwerena ae Aki Karikaki.+ I nanon itibong ao ko na kana te bwerena ae aki karikaki n aron are I tua nakoim, n te tai ae baireaki n te namwakaina ae Abibi,*+ bwa kam otinako n te tai anne mai Aikubita. Akea temanna ae riai ni kaoti i matau n akea uotana.+ 16 Ko na bukamarua naba te Toa ae Taiakini* Moan Uaanikai aika tawaa man am bekutata n ununiki n te tawaana.+ Ko na bukamarua naba te Toa ae Ikotakin Taian Uaa* n tokin te ririki ngkana ko ikotii uaanikai man te tawaana ake mwin am bekutata.+ 17 A na kaoti am rorobuaka ni kabane i matan te Uea ae koaua ae Iehova, tenua te tai n te ririki.+

18 “Ko na tai kareana te raraa ae te karea nakoiu ma te bwai ae karikaki. Ao a aki riai n tiku ni karokoa ae ingabong karea aika taiani mwaete ake a kareanaki n tain au toa.

19 “Ko na uotii moan uaanikai aika tawaa aika taiani kabanea n raoiroi aika uaan am tano nakon ana auti Iehova ae Atuam.+

“Ko na tai kaburoa te kooti ae ataei i nanon rannimamman tinana.+

20 “I a kanakoa te anera rimoam+ bwa e na kawakiniko i aoni kawaim ao ni kairiko nakon te tabo ae I a tia ni katauraoia.+ 21 Kakauongo nakoina ao ongo ni bwanaana. Tai karitei nakoina bwa ane e na aki kabwarai ami bure,+ ibukina bwa e uouota arau. 22 Ma ngkana ko bon ongo raoi ni bwanaana ao ko karaoi bwaai ni kabane aika I taekin, N na kaota ribaakia akana kairiribai nakoim ma ni kaaitaraia te koraki ake a kaaitarako. 23 Bwa e na rimoam au anera ao e na kairiko nakoia taian Amoraite, tibun Eta, taiani Beritaite, tibuni Kanaan, taian Iwaite, ao I-Iebuti, ao N na kamaunaia.+ 24 Ko na tai bobaraaki nakoia atuaia ke n anaaki nanom bwa ko na toro irouia, ao ko na tai kakairi n aia mwakuri.+ Ma ko riai n urui ao ni kamaeinikuni aia boua aika tabu.+ 25 Kam na toro iroun Iehova ae Atuami+ ao e na kakabwaiako n te amwarake ao n te ran.+ N na kanakoa te aoraki mai buakomi.+ 26 A na aki bwaka natiia aine ake i abam ke ni kanoabo+ ao N na kaananaua* maium.

27 “Imwain rokom+ ao a na ongo taekau ma n rurubenebene, ao N na kamangaoia aomata ni kabane ake ko kaitiboo ma ngaiia, ao N na kabirinakoia aiam ni kabane mai mwaim ngkai a konaaki.*+ 28 N na karimoaa namakinan te bwarannano* imwaim+ ao e na kakioianako mai mwaim taian Iwaite, tibuni Kanaan, ao tibun Eta.+ 29 N na aki kakioianako mai mwaim i nanon teuana te ririki, bwa e aonga n aki tiku n aki kaainaki te aba, ao a na aki rikirake iai mwaitiia manin te tawaana aika kaakang ake a na kona ni kaikoakiko.+ 30 N na kakioianako teutana imwin teutana mai mwaim, ni karokoa ae ko a kabatiaia am kariki ao n abana te aba.+

31 “N na katei tian abam man Taari ae Uraura nakon taari are i rarikin abaia I-Biritia, ao man te rereua nakon te Karaanga,*+ bwa N na anga kaain te aba nako nanoni baimi, ao ko na kakioianako mai mwaim.+ 32 Ko na tai karaoa te berita ma ngaiia ke ma atuaia.+ 33 A aki riai ni maeka i abam, bwa a aonga n aki kairiko bwa ko na bure nakoiu. Ngkana ko toro irouia atuaia, ao e na bon riki anne bwa te bwai ni kamwane nakoim.”+

24 E taku ngkanne Iehova nakoni Mote: “Ko na nakon te maunga, ngkoe ma Aaron, Nataba ao Abiu+ ao aia unimwaane tibun Iteraera aika 70, ao bobaraaki mai kiraroa n taromauriai. 2 E riai Mote n tii ngaia ni kaania Iehova, ma a aki riai naake tabemwaang ni kaania, ao a aki riai n iria aomata n ararakea te maunga.”+

3 E oki ngkanne Mote ao e tuangia aomata bwaai ni kabane ake e taekin Iehova ma mooti ni kabane,+ ao a kaeka aomata ni kabane n te bwanaa ae tii teuana ni kangai: “Ti kukurei ni karaoi baike e taekin Iehova ni kabane.”+ 4 Ngaia are e korei ana taeka Iehova ni kabane Mote.+ E utimwaaka ngkanne n te moaningabong ao e katea te baonikarea i nanoaan te maunga, ma atibu ni kauring aika 12 n aroni mwaitin aia baronga tibun Iteraera aika 12. 5 Imwin anne ao e kanakoia rorobuaka n ataei aika tibun Iteraera ao a anga taiani karea ni kabuekaki, ao a anga kaao mwaane bwa karea n raoi+ nakon Iehova. 6 Ao e anaa iteran te raraa Mote ni kaaki n taiani boora ao are iterana e katimtimmwa i aon te baonikarea. 7 Ao e a anaa bokin te berita* ao e warekia ni kabaibati nakoia aomata.+ Ao a taku: “Ti kukurei ni karaoi baike e taekin Iehova ni kabane ao ti na ongeaba.”+ 8 Mangaia are e anaa te raraa Mote ao e katimtimmwa i aoia aomata+ ao e taku: “Aio raraan te berita are e karaoia Iehova ma ngkami ni kaineti ma taeka aikai ni kabane.”+

9 Ao a nakon te maunga Mote ma Aaron, Nataba ma Abiu ao aia unimwaane tibun Iteraera aika 70, 10 ao a nora Atuan Iteraera.+ E mena i aani waena kaanga te kawai ae karaoaki man te tabeiro* ao e itiaki n ai aroni karawa.+ 11 E aki kaikoakiia mwaane ake tibun Iteraera+ ake a karineaki akekei, ao a nora te Atua ae koaua n te miitara ngke a amwarake ma ni moi.

12 E a taku ngkai Iehova nakoni Mote: “Ararake nakoiu nako aon te maunga ao tiiku iai. N na anganiko baaba aika atibu aika mena i aoia tuua aika N na korei ibukin reireinaia.”+ 13 Mangaia are e teirake Mote ma Iotua are ana tia ibuobuoki,+ ao e ararakea Mote ana maunga te Atua ae koaua.+ 14 Ma e taku nakoia unimwaane: “Kam na taningaira ni karokoa okira nakoimi.+ A na raoningkami Aaron ma Uura.+ Ngkana iai te aomata ae iai ana tangitang, ao e na kawariia naakai.”+ 15 Ao e ararakea te maunga Mote ngke e a rabunaki taubukina n te nang.+

16 E tiku mimitongin Iehova+ i aon te Maunga ae Tinai,+ ao e rabunaki n te nang i nanon onobong. N te kaitiua ni bong ao e a wetea Mote mai buakon te nang. 17 Taraani mimitongin Iehova irouia tibun Iteraera ake a mataku, kaanga ai aron te ai ae kamaunai bwaai i aon taubukin te maunga. 18 E rinnako ngkanne Mote nako buakon te nang ao e ararakea te maunga.+ Ao e tiku n te maunga Mote i nanon 40 te ngaina ao 40 te bong.+

25 E taku ngkanne Iehova nakoni Mote: 2 “Tuangia tibun Iteraera bwa a na angabwai nakoiu. Kam na butimwaei angabwai nakoiu mairouia aomata nako ake a ueke nanoia ni kan anga.+ 3 Aio te angabwai ae kam na butimwaeia mairouia: te koora,+ te tirewa,+ te buraati,+ 4 te karai ae buruu, te karai ae beboo ae buraen te tiibu,* te karai ae uraroo,* te rinen ae raoiroi, buraen te kooti, 5 kunin te tiibu mwaane ae kaurauraaki, kunin te tiire, te kai ae te aketia,+ 6 bwaan taian taura,+ te batiam* ibukin te bwaa ae tabu+ ao ibukini baika boiarara,+ 7 ao atibu aika oniki* ma atibu riki tabeua ake a na nim i aon te ebota+ ma te uba.*+ 8 A na karaoa te tabo ae tabu ibukiu ao N na maeka* i buakoia.+ 9 Kam na karaoa te umwanrianna ae tabu* ma bwain nanona nako, ni kakairi raoi n teina* ae I kaotia nakoim.+

10 “A riai ni karaoa te ati man te kai ae te aketia, ae uoua ao te iterana te mwanokunibai* abwakina ao teuana ao te iterana te mwanokunibai raababana ao teuana ao te iterana te mwanokunibai rietana.+ 11 Ao ko na kanimwa te koora ni koaua ni kabutaa.+ Ko na kanimmwa i tinanikuna ao i nanona, ao ko na karaoa mataniwina n te koora ni katabwaninna.+ 12 Ao ko na kaburoi n atoi aua mwamwana aika koora ao kanimwi i etani waena ake aua, uoua te mwamwa n iterana teuana ao uoua te mwamwa n iterana are teuana. 13 Ao ko na karaoi kaai man te kai ae te aketia ao rabuni n te koora.+ 14 Ko na karini kaai akanne i nanoni mwaamwa ake n iteran te Ati ni kauaitera bwa e aonga n uotaki iai te Ati. 15 A na tiku kaai akanne i nanoni mwamwan te Ati. A na aki buutaki mai iai.+ 16 Ko na kaaki i nanon te Ati ni Berita baaba* ake N na anganiko bwa bwaai ni kaotioti.+

17 “Ko na karaoa rabunana* man te koora ni koaua, ae uoua ao te iterana te mwanokunibai abwakina ao teuana ao te iterana te mwanokunibai raababana.+ 18 Ko riai ni karaoi kerubim* aika uoman aika koora. Ko na ororea te koora n te aama ni karaoi rabwataia iai i tabon rabunan te Ati ni Berita ni kauaitera.+ 19 Karaoi kerubim i tabon rabunan te Ati ni Berita ni kauaitera, te kerubim temanna i aon tabona are teuana ao te kerubim are temanna i aon tabona are teuana. 20 A riai kerubim n taakini baia ni kiba aika uaai nako eta, n rabuna aon rabunan te Ati ni Berita ni baia ni kiba,+ ao a na kaaitara. A na baraaki kerubim aikai ni kaitaraa rabunan te Ati ni Berita. 21 Ko na katokaa rabunan+ te Ati ni Berita i aona, ao ko na kaaki i nanon te Ati ni Berita baaba ake N na anganiko bwa bwaai ni kaotioti. 22 N na kaoti nakoim ikekei ao n taetae ma ngkoe mai etan rabunan te Ati ni Berita.*+ N na kaotii nakoim bwaai ni kabane ake N na tua nakoim ibukia tibun Iteraera, mai marenaia kerubim ake uoman ake a mena i aon te Ati ni Berita.*

23 “Ko na karaoa naba te taibora teuana+ man te kai ae te aketia, ae uoua te mwanokunibai abwakina ao teuana te mwanokunibai raababana ao teuana ao te iterana te mwanokunibai rietana.+ 24 Ko na kanimwa iai te koora ni koaua, ao karaoa mataniwina n te koora ni katabwaninna. 25 Ko na karaoa mataniwina ae raababan te rauraunibai* ni katabwaninna ao ko na katamaroaa n te koora ni katabwaninna. 26 Ko na karaoi mwamwana aika aua man te koora ao kaaki mwaamwa aikai ni maninganinga ake aua ake a nim iai rangana ake aua. 27 A riai ni kaan mwaamwa aikai ma mataniwina, bwa bwain tauani kaai ake e na uotaki iai te taibora. 28 Ko na karaoi kaai akanne man te kai ae te aketia ao n rabunna n te koora, ao uota iai te taibora.

29 “Ko na karaoi naba raurauna ma mwangkona ma ana tiaeki ma boorana are e na kabwaroaki mai iai te karea ae te moi. Ko na karaoi man te koora ni koaua.+ 30 Ao ko na katokaa te bwerena ae kaotiotaki i aon te taibora i matau n taai nako.+

31 “Ko na karaoa te kaintaura+ man te koora ni koaua. E riai n ororeaki n te aama ni karaoaki iai. A na karaoaki man te mwakoro ni koora ae tii teuana kaintein te kaintaura ma kaina are a na otinako mai iai mwaangana, mwangkongkona, buutokona, ao ueena.+ 32 Ao a na otinako onoua mwaangan te kaintaura mai rarikina, tenua mwaangana mai rarikina are teuana ao tenua mwaangana mai rarikina are teuana. 33 A na mena tenua mwangkongkona aika aekakin ueen te amon ni katoai mwaangana n te itera teuana, ma buutokona ao ueena aika karemarena, ao tenua mwangkongkona aika aekakin ueen te amon ni katoai mwaangana ake n te itera are teuana, ma buutokona ao ueena aika karemarena. Aio aroni mwaanga aika onoua n otinako mani kain te kaintaura. 34 Iai taiani mwangkongko aika aua i aoni kain te kaintaura aika aekakin tein ueen te amon, ma buutokona ao ueena aika karemarena. 35 E na mena te buutoko i aani moani mwaanga aika uoua aika otinako mani kaina, ao iai naba te buutoko i aani mwaanga ake uoua riki, ao iai naba te buutoko i aani mwaanga ake uoua riki, bwa a otinako mwaanga aika onoua mani kaina. 36 A bane buutokona ma mwaangana ma te kaintaura ae bwanin ni karaoaki man teuana te mwakoro ni koora ni koaua ae ororeaki n te aama.+ 37 Ko na karaoi taurana aika itiua, ao ngkana a kauraaki taura, ao a na kaotaa te tabo are i moana.+ 38 A na karaoaki man te koora ni koaua taati ake a kabonganaaki ibukin tauani wikina ma baan ake nneni wikin taura ake a a tia ni kabonganaaki.+ 39 E riai ni karaoaki ma bwaina aikai, man te koora ni koaua ae teuana te tarena* rawawatana. 40 Taraia bwa ko na karaoi baikai ni katotongi teia* ake a kaotaki nakoim i aon te maunga.+

26 “Ko na karaoa te umwanrianna ae tabu*+ ni kunnikai aika tebwina aika karaoaki man te rinen ae raoiroi ae binokaaki, te karai ae buruu, te karai ae beboo ae buraen te tiibu, ao te karai ae uraroo. Ko na taerii iai taamneia+ kerubim.*+ 2 Abwakini kunnikai aikai kaka 28 te mwanokunibai ao kaka 4 te mwanokunibai* raababaia. E na titeboo abwakin ao raababani kunnikai aikai ni kabane.+ 3 A na tomatomaaki nimaua mani kunnikai aikai ni karaoa iai teuana te rinan ni kunnikai ae ananau, ao a na tomatomaaki kunnikai ake nimaua riki ni karaoa iai teuana riki te rinan ni kunnikai ae ananau. 4 Ko na karaoi timoimoi man te karai ae buruu i taran te kabanea ni kunnikai n te rinan ni kunnikai teuana, ao ko na karaoa naba aekakin anne i taran te kabanea ni kunnikai n te rinan ni kunnikai are teuana, n te tabo are e na toma iai. 5 Ko na karaoi timoimoi aika 50 n te rinan ni kunnikai teuana, ao timoimoi aika 50 i taran te rinan ni kunnikai are teuana bwa a aonga ni kaaitara n te tabo are a toma iai. 6 Ko na karaoi kaai ni kareke aika koora aika 50 ao tomai kunnikai akanne ni kaai ni kareke akanne, ao e na riki bwa teuana te umwanrianna ae tabu.+

7 “Ko na karaoi naba kunnikai mani buraen te kooti+ ibukin rabunan aon te umwanrianna ae tabu. Ko na karaoi kunnikai aika 11.+ 8 Abwakini kunnikai aikai kaka 30 te mwanokunibai ao raababaia kaka 4 te mwanokunibai. E na titeboo abwakin ao raababani kunnikai ni kabane aika 11 aikai. 9 Ko na tomai kunnikai ake nimaua ao tomai kunnikai ake onoua riki, ao ko na rukuma te kaonoua ni kunnikai are i moan te umwanrianna. 10 Ao ko na karaoi timoimoi aika 50 i taran te kunnikai, n te kabanea ni kunnikai n te rinan ni kunnikai are teuana, ao timoimoi aika 50 i taran te kunnikai are teuana n te tabo are a na toma iai. 11 Ko na karaoi kaai ni kareke aika taiani buraati aika 50, ao karini kaai ni kareke i nanon taian timoimoi ao tomaa rabunan te umwanrianna anne ao e na riki bwa teuana. 12 E na tinetine nikiran te kunnikai aei are e riaon abwakin te umwanrianna. E na tinetine i akun te umwanrianna iteran nikiran te kunnikai ae rabunan te umwanrianna. 13 A na tinetine nikirani kunnikain te umwanrianna, kaka teuana te mwanokunibai n iteran nako te umwanrianna bwa e aonga n rabunna.

14 “Ko na karaoa naba rabunan te umwanrianna mani kunin te tiibu mwaane ae kaurauraaki ao e na toka i aona te rabuna ae kunin te tiire.+

15 “Ko na karaoi kain oon+ te umwanrianna ae tabu man te kai ae te aketia aika tei n etirake.+ 16 Kaka tebwina te mwanokunibai abwakini kain te oo, ao teuana ao te iterana te mwanokunibai raababaia. 17 Kaka uoua neweni kain te oo* aika nim iai ae titeboo teia. Anne arom ni karaoi kain oon te umwanrianna ae tabu ni kabane. 18 Ko na karaoi 20 kain oon te umwanrianna ae tabu n iterana are mai maiaki ni kaitaraa maiaki.

19 “Ko na karaoi niibwa aika tirewa aika 40+ i aani kain te oo aika 20: uoua niibwa i aan teaina kain te oo ibukin newena ake uoua, ao uoua niibwa i aani kaka teaina kain te oo ibukin newena ake uoua.+ 20 Karaoi 20 kain te oo ibukin iteran te umwanrianna ae tabu are mai meang, 21 ao nibwaia aika tirewa aika 40, uoua niibwa i aani kain te oo teaina ao uoua niibwa i aani kaka teaina kain te oo. 22 Ko na karaoi kain te oo aika oneai ibukin iteran te umwanrianna ae tabu are mai buki are nako maeao.+ 23 Ko na karaoi kain te oo aika uaai bwa bouani maninganingan te umwanrianna ae tabu n iterana ake uoua ake mai buki. 24 A riai n titeboo teia mai nano nako eta, nakon te moani mwamwa. E riai ni karaoaki aei nakoni baikai ni kauoua ao a na riki bwa bouan te maninganinga aika uaai. 25 Ao e na iai kain te oo aika wannai ao nibwaia aika tirewa aika 16, uoua te nibwa i aani kain te oo teaina ao uoua te nibwa i aani kaka teaina kain te oo.

26 “Ko na karaoi kaai ibukini katomaani kain te oo man te kai ae te aketia, nimaai ibukini kain te oo n iteran te umwanrianna ae tabu are teuana,+ 27 ao nimaai kaai ibukini katomaani kain te oo n iteran te umwanrianna ae tabu are teuana, ao nimaai kaai ibukini kanimwani kain te oo ake n iteran te umwanrianna ae tabu are teuana, mai buki nako maeao. 28 Te kai are i nuka are ibukini katomaani kain te oo are e biri rinukani kain te oo, e riai n tiki mai tabona nako tabona.

29 “Ko na rabuni kain te oo n te koora+ ao ko na karaoi mwamwaia man te koora bwa bwain tauani kaai ibukini katomaani kain te oo, ao ko na rabuni kaai aikai n te koora. 30 Ko riai ni katea te umwanrianna ae tabu n aron taamneina are kaotaki nakoim n te maunga.+

31 “Ko na karaoa te keeten+ man te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki. E na taeraki iai taamneia kerubim. 32 Ko na katinea i aoni boua ake aai ake a karaoaki man te aketia ake a kanimwaki koora n rabunaki aoia iai. A na karaoaki matauia man te koora. A mena boua i aon niibwa aika aua ake tirewa. 33 Ko na katinea te keeten n taiani kai ni kareke ao uota te Ati ni Berita*+ nako ikanne nako akun te keeten. E na kaokoroa te Ruu ae Tabu+ ma ae Moan te Tabu+ te keeten anne ibukimi. 34 Ko riai ni katokaa rabunan te Ati ni Berita i aona n te Ruu ae Moan te Tabu.

35 “Ko na kaaki te taibora i tinanikun te keeten, ma te kaintaura+ ni kaaitara ma te taibora n iteran te umwanrianna ae tabu are mai maiaki, ao ko na kaaki te taibora n iterana are mai meang. 36 Ko na karaoa te keeten* ibukini mataroan te umwanrianna, man te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki ae a ikotaki n rarangaaki.+ 37 Ko na karaoi boua aika nimaai man te aketia ibukin te keeten* anne ao ko na rabuni boua akanne n te koora. A na karaoaki matauia man te koora, ao ko na kaburoi n atoi nimaua niibwa aika taiani buraati ibukini baikanne.

27 “Ko na karaoa te baonikarea man te kai ae te aketia,+ ae nimaua te mwanokunibai* abwakina ao nimaua te mwanokunibai raababana. E riai ni boraoi abwakin te baonikarea ma raababana, ao tenua te mwanokunibai rietana.+ 2 Ko na karaoi kooro+ ni maninganingana ake aua, ao a na riki kooro bwa bwain naba te baonikarea, ao ko na rabuna te baonikarea n te buraati.+ 3 Ko na karaoi bwaketi ibukini kanakoani mannangina,* n ikotaki ma tiaabora, boora, kainiwaiteke, ao baan aika nneni mwaakaron te ai, ao ko na karaoi bwaini mwakuriana nako man te buraati.+ 4 Ko na karaoa warawaran te baonikarea ao ko na kaaki kaka teuana te mwamwa ae te buraati ni maninganingana ake aua. 5 Ko na kaaki i aani mataniwin te baonikarea i nanona mai nano riki, ao e na mena te warawara i nukan te baonikarea. 6 Ko na karaoi kaai ibukin te baonikarea man te kai ae te aketia, ao rabuni n te buraati. 7 A na karinaki kaai akanne i nanoni mwaamwa, n te aro bwa a na mena kaai akanne n iteran te baonikarea ni kauaitera ngkana e uotaki.+ 8 Ko na karaoa te baonikarea man taian rai n aroni karaoan te ati ae akea etana ao aana. E riai ni karaoaki n aron are E kaotia nakoim i aon te maunga.+

9 “Ko na karaoa katawanangin+ te umwanrianna ae tabu.* E na iai n iteran te katawanang are mai maiaki ni kaitaraa maiaki oona aika taiani keeten ae 100 te mwanokunibai abwakina, aika karaoaki man te rinen ae raoiroi ae binokaaki.+ 10 E na iai bouana aika 20 ma niibwa aika 20 aika taiani buraati. A karaoaki man te tirewa mataun taiani boua ma bwain tomaaia.* 11 Ai aron naba oon iterana are mai meang aika taiani keeten ae 100 te mwanokunibai abwakina, n ikotaki ma bouana aika 20 ao nibwaia aika 20 aika taiani buraati, ma matauia aika tirewa ao bwain tomaan* taiani boua. 12 Raababan te katawanang 50 te mwanokunibai ao e na iai taiani keeten n iterana are mai maeao, ao boua aika tengaun ao niibwa aika tebwina. 13 Raababan te katawanang n iterana are mai mainiku ni kaitaraa otin taai bon 50 te mwanokunibai. 14 E na iai taiani keeten aika 15 te mwanokunibai ikotan abwakia n iterana teuana, ao boua aika tennai ao niibwa aika tenua.+ 15 Ao n iterana are teuana e na iai taiani keeten aika 15 te mwanokunibai ikotan abwakia, ao boua aika tennai ao niibwa aika tenua.

16 “E riai n iai te keeten* ni mataroan te katawanang ae 20 te mwanokunibai abwakina ae karaoaki man te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki, ae a ikotaki n rarangaaki,+ ao boua aika aai ao niibwa aika aua.+ 17 E na iai bwaai ni kabaebae ma matau aika tirewa ni boua nako aika katobibia te katawanang, ma a na karaoaki nibwaia man te buraati.+ 18 Abwakin te katawanang bon 100 te mwanokunibai+ ao raababana 50 te mwanokunibai, ao 5 te mwanokunibai rietan taiani keeten aika karaoaki man te rinen ae raoiroi ae binokaaki, ao e riai n iai nibwaia aika taiani buraati. 19 A na karaoaki man te buraati bwaai ni mwakuri nako ao baike a kabonganaaki n te mwakuri n te umwanrianna ae tabu, n ikotaki ma kain rooana, ao kaai ni kabane ake kain rooan te katawanang.+

20 “Ko na tua nakoia tibun Iteraera bwa a na uota nakoim te bwaa man te oriwa ae ikaki ae aki renganaki ibukin te oota, bwa a aonga n teimatoa n ura iai taian taura.+ 21 A na bairei tauran te umwa ni botaki ake i tinanikun te keeten i rarikin te Ati ni Berita*+ Aaron ma natina mwaane, ao a na taraia bwa a na ura i matan Iehova man te tairiki ni karokoa ae ingabong.+ Bon te tua ae teimatoa n aia roro nako, ae e na kakaraoaki irouia tibun Iteraera.+

28 “Ko riai ni wetea tarim are Aaron+ n ikotaki ma natina mwaane mai buakoia tibun Iteraera bwa e aonga ni beku bwa au ibonga*+—Aaron ma natina+ ake Nataba, Abiu,+ Ereata, ao Itama.+ 2 Ko na karaoi kunnikai aika tabu ibukin Aaron are tarim, aika a na anganna karineana ma tamaroana.+ 3 Ko na taetae nakoia akana mwaatai* ni kabane ake te koraki ake I a tia n angania te rabakau,+ ao a na karaoi kunnikain Aaron ibukini katabuana,* bwa e aonga ni beku bwa au ibonga.

4 “Aikai baika a na karaoi: te uba,+ te ebota,*+ te kunnikai ae akea baina,+ te kamwarai ae mataborau, te bwara ae te kunnikai,+ ao te kabaea n nuka,+ a na karaoi baika tabu aikai ibukin Aaron are tarim ma natina mwaane, bwa a aonga ni beku bwa au ibonga. 5 A na kabongana te koora, te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi, taani mwakuri aika mwaatai aikai.

6 “A na karaoa te ebota man te koora, te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki, ao e riai ni katamaroaaki iroun te tia itutu.+ 7 E na iai bwain aon angana aika uoua aika tomaaki mai taboia ake mai eta aika uoua. 8 E riai ni karaoaki te roo*+ ae rarangaaki ae kanimwaki ma te ebota ibukini kakooana bwa e aonga n toka raoi ni nnena, mani bwaai naba akanne: aika te koora, te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki.

9 “Ko na anai atibu aika oniki aika uoua+ ao kaari ni katanei aoia n araia natin Iteraera aika mwaane,+ 10 onoua aara i aon te atibu ane teuana ao nikiran aara akana onoua riki i aon te atibu ane teuana, ni karinania n teini bungiakia. 11 Ao te tia kaari atibu e na katanei araia natin Iteraera aika mwaane i aon atibu akana uoua akanne n aroni kaaran te bwai ni kanikina*+ irouna. Ao ko na kaaki i nanon nibwaia aika koora. 12 Ko na kaaki atibu akana uoua i aoni bwain aon te anga are n te ebota bwa taian atibu ni kauring ibukia natin Iteraera aika mwaane,+ ao e na uouotii araia Aaron i matan Iehova i aoni bwain aon angana akana uoua bwa te bwai ni kauring. 13 Ko na karaoi niibwa man te koora, 14 ao taurekereke aika uoua aika koora ni koaua, aika biraki n aron te roobu,+ ao ko na kabaei ma niibwa taurekereke aika biraki aikai.+

15 “Ko na bairea karaoan te uba ni motikitaeka iroun te tia katamaroa n te taetaeri.+ E riai ni karaoaki n aroni karaoan te ebota, e na karaoaki man te koora, te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki.+ 16 E na boraoi abwakina ma raababana ngkana e kauouaaki, ao te rakana* abwakina ao te rakana raababana. 17 Ko riai ni karaoi iai aua te rinan n atibu. Te moan rinan e na nim iai te rubi,* te tobati, ao te emerote. 18 Te kauoua n rinan te timaraketo, te tabeiro, ao te iatiba. 19 Te katenrinan te retiem,* te akete, ao te ameteti. 20 Te kaaua n rinan te kerutorito, te oniki, ao te iatebi. A riai ni kaakaki i nanon nibwaia aika koora. 21 A na tei atibu aikai ibukin araia natin Iteraera aika mwaane, 12 ni kaineti ma araia. E riai ni kaaraki ni kataneaki kaka teuana te atibu ni kaka teuana arani baronga ake 12, n aroni kaaran te bwai ni kanikina.

22 “Ko na karaoi i aon te uba taian taurekereke aika biraki aika koora ni koaua aika ai aron taian roobu.+ 23 Ko na karaoi mwaamwa aika uoua aika koora ibukin te uba, ao kanim mwaamwa aika uoua aikai i aon tabon te uba ake uoua. 24 Ko na karin roobu akana uoua ake koora i nanoni mwaamwa akana uoua ake i tabon te uba. 25 Ko na karini kaka uoua tabon roobu akana uoua akanne i nanon niibwa aika uoua, ao ko na kanim mai moa i aoni bwain aon te anga are n te ebota. 26 Ko na karaoi mwaamwa aika uoua aika koora, ao kaaki i tabon te uba ake uoua i aon taboia ake a kaitaraa te ebota nako nanona.+ 27 Ko riai ni karaoi mwaamwa aika uoua riki aika koora i moan te ebota, i aani bwain aon te anga ake uoua, n uakaan ma ike e tomaaki iai, i etan te roo* ae rarangaaki ae bwain te ebota.+ 28 E riai n toka raoi te uba ni nnena ngkana e kabaeaki te kabae ae buruu mani mwamwana nakoni mwamwan te ebota. N te aro aei e na toka raoi te uba ni nnena are i aon te ebota, i etan te roo* ae rarangaaki.

29 “E riai Aaron n uouotii araia natin Iteraera aika mwaane i aon te uba ni motikitaeka are mena i aoni bwabwaana ngkana e rin n te Ruu ae Tabu bwa te bwai ni kauring i matan Iehova ae teimatoa. 30 Ko na karina te Urim ao te Tummim*+ i nanon te uba ni motikitaeka, ao a na mena i aoni bwabwaan Aaron ngkana e rinnako i matan Iehova, ao Aaron e na uouota te uba ni motikitaeka ibukia tibun Iteraera i aoni bwabwaana i matan Iehova n taai nako.

31 “Ko na karaoa te kunnikai ae akea baina are kunnikain te ebota man te karai ae buruu ni kabane.+ 32 E na iai te bwangabwanga mai eta i nukana.* E riai n rarangaaki ni kauaataoaki mataniwin te bwangabwanga anne iroun te tia rarangaa te kunnikai. E riai ni katotonga karaoani bwangabwangan te kunnikai ni buaka ae te biti, bwa e na aki raeuaaki. 33 Ko na karaoi i rabin te kooti anne ni katobibia taiani bamkuranete* man te karai ae buruu, ao te karai ae beboo ae buraen te tiibu, ao te karai ae uraroo, n ikotaki ma taiani beero aika koora aika karemarenaaki iai. 34 Ko riai ni karemarenaa teuana te beero ae te koora ma teuana te bamkuranete, teuana te beero ae te koora ma teuana te bamkuranete, ni katobibia rabin te kunnikai are akea baina. 35 E na bwainaki iroun Aaron bwa e aonga ni karaoa ana beku, ao e na ongo te aba tangitangin taiani beero ngkana e rinnako n te tabo ae tabu i matan Iehova ao ngkana e otinako, bwa e na aki mate.+

36 “Ko na karaoa te mwakoro ni biti ae raneanea man te koora ni koaua, ao kaara aona n te koroboki n aroni kaaran te bwai ni kanikina iroun te aomata, ae kangai: ‘Nibwan te itiaki* Iehova.’+ 37 Ko na kabaea i aon te bwara ae te kunnikai+ n te kabae ae buruu. E na mena i moan te bwara anne. 38 E na toka i aon ramwan Aaron ao e na bukinaki Aaron ngkana iai ae e karaoa ae kairua ni kaineti ma baika tabu,+ bwa a katabuaki baikai irouia tibun Iteraera ngkana a anga bwa bwaintangira aika tabu. E na memena i aon ramwana n taai nako bwa a aonga ni karekea akoaia i matan Iehova.

39 “Ko na rarangaa te kamwarai ae mataborau man te rinen ae raoiroi, karaoa te bwara ae te kunnikai man te rinen ae raoiroi, ao karaoa te kabaea n nuka ae rarangaaki.+

40 “Ko na karaoi naba kamwarai, kabaea n nuka, ao taiani bwara aika kunnikai* ibukia natin Aaron aika mwaane+ bwa a aonga n anganaki iai karineaia ma tamaroaia.+ 41 Ko na karini baikanne i aon Aaron are tarim ma natina mwaane, ao ko na kabiriia+ ma ni kateirakeia*+ ao ni katabuia, ao a na beku bwa au ibonga. 42 Karaoi naba aia kawaerake* aika rinen bwa a na karabai iai bwain rabwataia aika riai ni karabaaki.+ A na mwarairai mai bebeeia nakoni boton rangaia. 43 A na bwainaki iroun Aaron ma natina mwaane ngkana a rinnako n te umwa ni botaki ke ngkana a kaania te baonikarea ni beku n te tabo ae tabu, bwa a aonga n aki reke n te bure ao ni mate. Aio te tua ae teimatoa ibukin Aaron ao ibukia kanoana* ake imwina.

29 “Aio te bwai ae ko na karaoia ibukini katabuaia* bwa a na beku bwa au ibonga:* Kaira te kao mwaane temanna ae ataei, ao tiibu mwaane aika uoman aika marurung raoi,+ 2 ao uotii bwerena aika aki karikaki, bwerena aika mronron aika aki karikaki aika karaoaki man te bua ni burawa ae renganaki ma te oera, ao bwerena aika mmani aika aki karikaki aika kabiraki aoia n te oera.+ Ko na karaoi man te burawa ae mte ae karaoaki man te uita, 3 ao nnei n te bwaene teuana ao aanga baikanne n te bwaene,+ n ikotaki ma te kao mwaane ao tiibu mwaane ake uoman.

4 “Ko na katea Aaron ma natina mwaane ni mataroan te umwa ni botaki,+ ao ko na tua bwa a na tebokiia n te ran.+ 5 Ko na anai ngkanne kunnikai+ ao karina i aon Aaron te kamwarai, kunnikain te ebota ae te kunnikai ae akea baina, te ebota, ao te uba, ao ko na kabaea te roo* ae rarangaaki ibukin te ebota ni kakooa i aoni bebeena.+ 6 Ko na kaaki te bwara ae te kunnikai i aon atuna ao kaaki te kanikina ae tabu ibukin te katabu* i aon te bwara anne,+ 7 ao anaa te bwaa ae tabu*+ ao kabwaroa i aon atuna ao kabiria.+

8 “Kairiia ngkanne natina mwaane ni keerake ao karini kamwarai i aoia,+ 9 ao kabaea te kabaea n nuka i aoia Aaron ma natina mwaane, ao katokaa bwaraia ae te kunnikai, ao e na riki te nakoa n ibonga bwa mwiokoaia, bon aei te tua ae teimatoa.+ Aio arom ae ko riai ni kateirakeia iai Aaron ma natina mwaane bwa a na beku bwa ibonga.*+

10 “Ko na kaira ngkanne te kao mwaane nako matan te umwa ni botaki, ao a na katokai baia Aaron ma natina mwaane i aon atun te kao mwaane anne.+ 11 Kamatea te kao mwaane i matan Iehova, ni mataroan te umwa ni botaki.+ 12 Anaa teutana raraan te kao mwaane n tabonibaim ao kabiri iai kooro ake n te baonikarea,+ ao kabwaroa nikiran te raraa ni kabane i oin te baonikarea.+ 13 Anai ngkanne mwaete ni kabane+ ake a rabuna te kanoannano, te mwaete are i aon te ato, ao kirine ake uoua ma mwaete ake i aoia, ao kabueki bwa a aonga ni bubu i aon te baonikarea.+ 14 Ma ko na kabueka irikon te kao mwaane ma kunna ao nakotaarina, n te ai i tinanikun te kaembwa. Bon te karea ni kabwarabure te baei.

15 “Anaa ngkanne te tiibu mwaane temanna, ao a na katokai baia Aaron ma natina mwaane i aon atun te tiibu mwaane anne.+ 16 Kamatea te tiibu mwaane anne ao anaa raraana ao katimtimmwa i aon rarikin te baonikarea ni kabutaa.+ 17 Korokorea te tiibu mwaane, ao teboki kanoannanona+ ma waena ao karinani mwakorokorona nako n ikotaki ma matanriana. 18 Ko na kabueka te tiibu mwaane ni kabane ni kabubua i aon te baonikarea. Bon te karea ni kabuekaki nakon Iehova, ae te boi ae boiarara.*+ Bon te karea ae kareanaki n te ai te baei nakon Iehova.

19 “Imwina ko na manga anaa te tiibu mwaane are temanna, ao a na katokai baia Aaron ma natina mwaane i aon atun te tiibu mwaane anne.+ 20 Kamatea te tiibu mwaane anne ao anaa raraana teutana ao kabira iai aon reben taningan Aaron are te atai ao aon reben taningaia natina mwaane ake ataia, ao aoni waebuani baia ake ataia, ao aoni waebuani waeia ake ataia, ao katimtimwa te raraa i aon rarikin te baonikarea ni kabutaa. 21 Anaa ngkanne teutana te raraa are i aon te baonikarea ao teutana te bwaa ae tabu,+ ao katimtimmwa i aon Aaron ma ana kunnikai ao i aoia natina mwaane ma aia kunnikai, bwa e aonga n tabu ma ana kunnikai ao natina mwaane ma aia kunnikai.+

22 “Anaa ngkanne mwaeten te tiibu mwaane, bukina are te mwaete, te mwaete are rabuna te kanoannano, te mwaete are i aon te ato, kirine ake uoua ma mwaete ake iai,+ ao te ranga are te atai, bwa bon te tiibu mwaane ae kareanaki ibukin te kateirake nakon te nakoa n ibonga.+ 23 Anaa naba te bwerena ae mronron ao te bwerena ae mronron ae aki karikaki ae karaoaki man te bua ni burawa ae renganaki ma te oera, ao te bwerena ae mmani man te bwaene are mena i matan Iehova ae kanoana te bwerena ae aki karikaki. 24 Ko na kaaki baikai ni kabane i bain Aaron ao i baia natina mwaane, ao ko na katiotioi bwa te karea ni katiotioaki i matan Iehova. 25 Ao ko na anai mai baia ao kabueki i aon te baonikarea i aon te karea ni kabuekaki bwa te boi ae boiarara* iroun Iehova. Bon te karea ae kareanaki n te ai te baei nakon Iehova.

26 “Anaa ngkanne bwabwaan te tiibu mwaane are kareanaki+ n taini kateirakean Aaron bwa te ibonga, ao katiotioa bwa te karea ni katiotioaki i matan Iehova, ao e na riki bwa tibwangam. 27 Ko na katabua bwabwaan te man are kareanaki ni katiotioaki, ao te ranga are man te tibwanga are tabu ae katiotioaki ae anaaki man te tiibu mwaane are kareanaki+ n taini kateirakeaia Aaron ma natina mwaane nakon te nakoa n ibonga.” 28 A riai n riki baikanne bwa tibwangaia Aaron ma natina mwaane, bon aei te tua ae teimatoa ae e na karaoaki irouia tibun Iteraera, bwa bon te karea ae tabu, ao e na riki bwa te karea ae tabu ae a na anganga tibun Iteraera.+ Bon aia karea ae tabu ibukin Iehova man aia karea n raoi.+

29 “A na kabonganaaki kunnikai aika tabu+ ake ana kunnikai Aaron irouia natina mwaane+ ake imwina ngkana a kabiraki ao ni kateirakeaki bwa ibonga. 30 E na kunnikaini i nanon itibong te ibonga are onea mwin Aaron mai buakoia natina mwaane ao are e rinnako n te umwa ni botaki bwa e na beku n te tabo ae tabu.+

31 “Ko na anaa te tiibu mwaane ae kareanaki ibukin te kateirake nakon te nakoa n ibonga, ao kaburoa irikona n te tabo ae tabu.+ 32 A na kana irikon te tiibu mwaane Aaron ma natina mwaane+ i rarikini mataroan te umwa ni botaki, ma te bwerena are mena n te bwaene. 33 A na kang baike a a tia ni kareanaki ibukini karekeani kabwaraani buure ao ibukini kateirakeaia bwa ibonga* ao katabuaia. Ma e aki kona ni kang baikai te aomata ae akea kariaiakana,* bwa a tabu baikai.+ 34 Ngkana e tiku ni karokoa ae ingabong nikiran irikon te tiibu mwaane are kareanaki ao nikiran te bwerena, ao ko na kabueka nikirana n te ai.+ E aki riai ni kanaki bwa bon te bwai ae tabu.

35 “Ko na karaoa te aro aei nakon Aaron ma natina mwaane ni kaineti ma bwaai ni kabane ake I tua nakoim. Ko na kabanea itibong ibukini kateirakeaia bwa ibonga.*+ 36 Ko na kareana te kao mwaane are te karea ni kabwarabure ni katoabong ibukini karekeani kabwaraan te bure, ao ko na kaitiaka te baonikarea man te bure ni karaoan anne, ao ko na kabiria ni katabua.+ 37 Ko na kabanea itibong ni kaitiaka te baonikarea man te bure, ao ko na katabua bwa e aonga n riki bwa te baonikarea ae moan te tabu.+ E riai n itiaki* ane e ringa te baonikarea.

38 “Aio te bwai ae ko na kareanna i aon te baonikarea: uoman tiibu mwaane aika ataei aika kaka teuana aia ririki ni katoabong, n taai nako.+ 39 Kareana temanna te tiibu mwaane ae ataei n te ingabong ao are temanna n te airoo.*+ 40 E na airi ma te moan tiibu mwaane ae ataei, teuana katebwinani mwakoron te eba* ni burawa ae mte ae renganaki ma te oera ae te kaamwakoro te in* man oriwa aika ikaki, ao te karea ae te moi ae te kaamwakoro te in te wain. 41 Ko na kareana te tiibu mwaane ae ataei are te kauoman n te airoo,* n ikotaki ma te karea ae te amwarake* ao te karea ae te moi n aekakin are n te ingabong. Ko na anga bwa te boi ae boiarara,* ae te karea ae kareanaki n te ai nakon Iehova. 42 E na kakaraoaki te karea ni kabuekaki aei n ami roro nako i rarikini mataroan te umwa ni botaki i matan Iehova, ike N na kaoti iai nakoimi bwa N na taetae nakoim ikanne.+

43 “N na kaoti nakoia tibun Iteraera ikanne, ao e na katabuaki te tabo anne ni mimitongiu.+ 44 N na katabua te umwa ni botaki ao te baonikarea, ao N na katabua Aaron ma natina mwaane+ bwa a aonga ni beku bwa au ibonga. 45 N na mamaeka* i buakoia tibun Iteraera, ao N na riki bwa Atuaia.+ 46 Ao a na bon ataia bwa bon Iehova ngai ae Atuaia, are I kairiia ni kaotinakoia man te aba ae Aikubita bwa I aonga ni mamaeka i buakoia.+ Bon Iehova ngai ae Atuaia.

30 “Ko na karaoa te baonikarea ibukini kabuekani baika boiarara,+ ao ko na karaoia man te kai ae te aketia.+ 2 E riai ni boraoi abwakina ma raababana, ae teuana te mwanokunibai* abwakina ao teuana te mwanokunibai raababana, ao uoua te mwanokunibai rietana. A na riki korona bwa bwaina naba.+ 3 Ko na kanimwa iai te koora ni koaua, aona ao rarikina ni kabutaa ma kooro ake iai, ao ko na karaoa mataniwina ae te koora ni kabutaa. 4 Ko na karaoi naba mwamwana aika koora aika uoua i aani mataniwina i aon iterana ake uoua ake a kaaitara, ao a na taui kaai ake a kabonganaaki ibukin uotakina. 5 Karaoi kaina man te kai ae te aketia ao ko na rabuni n te koora. 6 Ko na kaaki i matan te keeten are i rarikin te Ati ni Berita,*+ ike N na kaoti iai nakoim. E riai ni mena i matan te Ati ni Berita ma rabunana.+

7 “E na kabueki baika boiarara+ Aaron+ ni kabubui i aon te baonikarea+ ngkana e katauraoi taian taura+ ni katoa ingabong. 8 Ngkana e kaurai naba taura Aaron n te airoo* ao e na kabueki baika boiarara. Bon te karea ae boiarara ae kakaraoaki i matan Iehova i nanon ami roro nako. 9 Kam na tai kabueki i aona baika boiarara aika aki kariaiakaki+ ke te karea ni kabuekaki ke te karea ae te amwarake, ao kam na tai kabwaroa i aona te karea ae te moi. 10 E na kaaki teutana raraan te man are te karea ni kabwarabure+ Aaron i aoni kooro ake n te baonikarea n te taina n te ririki,+ bwa e aonga ni kaitiaka te baonikarea man te bure. E riai ni karaoa anne n te taina n te ririki bwa e aonga ni bubutii ibukin te baonikarea, n ami roro nako. Bon te bwai ae moan te tabu te baei iroun Iehova.”

11 E taku ngkanne Iehova nakoni Mote: 12 “N te tai are ko wareaomata iai ma ni wareki mwaitiia tibun Iteraera,+ e riai temanna ma temanna n anga te kaboomwi nakon Iehova ibukini maiuna* n tain te wareaomata. E riai ni karaoaki aei bwa e aonga n aki roko te rekenikai i aoia ngkana a koreaki araia. 13 Aio te bwai ae a na anga aomata ni kabane ake a koreaki araia: te iterana te tiekera ae te tiekera* ae kakabonganaaki n te tabo ae tabu.*+ Uabwi te kira* ae boraoi ma teuana te tiekera. Te angabwai nakon Iehova bon te iterana te tiekera.+ 14 A na bane n anga te angabwai nakon Iehova aomata nako ake a koreaki araia ake kaka 20 rake aia ririki.+ 15 A aki riai n anga ae bati riki akana kaubwai, ao a aki riai akana maiu ni kainnano n anga ae uarereke riki nakon te itera n tiekera,* bwa te angabwai nakon Iehova ibukini karekeani kabwaraan ami bure ibukini maiumi.* 16 Ko na anaa te mwane ae te tirewa ae bwaini karekeani kabwaraan aia bure tibun Iteraera ao aanga ibukini mwakuri ake a karaoaki n te umwa ni botaki, bwa e na riki bwa te bwai ni kauring i matan Iehova ibukia tibun Iteraera, bwa te kaboomwi ibukini maiumi.”*

17 E reitia ni kangai Iehova nakoni Mote: 18 “Karaoa te taabu ae te buraati ao kainteina ae te buraati ibukin te tebobai ao te tebowae,+ ao kaaki i marenan te umwa ni botaki ao te baonikarea ao kanoaia n te ran.+ 19 A na teboki iai baia ma waeia Aaron ma natina mwaane.+ 20 A na teboki baia ma waeia n te ran ngkana a rinnako n te umwa ni botaki ke ngkana a kaania te baonikarea bwa a na beku ao ni karaoi karea aika kareanaki n te ai ma ni kabubui nakon Iehova, bwa a aonga n aki mate. 21 A na teboki baia ma waeia bwa a aonga n aki mate, ao e na riki aei bwa te tua nakoia ae teimatoa, nakoina ma kanoana n aia roro nako.”+

22 E reitia ni kangai Iehova nakoni Mote: 23 “Imwina, anai baika boiarara aika taiani kabanea n tamaroa aika te mura* ae makano ae 500 te tiekera, ao te tineman* ae boiarara ae iteran te mwaiti anne ae 250 te tiekera, ao te karemati* ae boiarara ae 250 te tiekera, 24 ao te katia* ae 500 te tiekera ae tauaki rawawatana n te tiekera ae kakabonganaaki n te tabo are tabu,*+ n ikotaki ma te oera ae te oriwa ae teuana te in.* 25 Karaoa ngkanne mai iai te bwaa ae tabu. E riai n renganaki ni kabane n te aro n rabakau.*+ Bon te bwaa ae tabu te baenne.

26 “Ko na kabira iai te umwa ni botaki+ ao te Ati ni Berita, 27 n ikotaki ma te taibora ma bwaini mwakuriana nako, te kaintaura ma bwaina nako, baonikareani baika boiarara, 28 baonikarean te karea ni kabuekaki ma bwaini mwakuriana nako, ao te taabu ma kainteina. 29 Ko riai ni katabui bwa a aonga n riki bwa baika moan te tabu.+ E riai n tabu ane e ringi baikai.+ 30 Ao ko na kabira Aaron+ ma natina mwaane,+ ao katabuia* bwa a na beku bwa au ibonga.*+

31 “Ko na taetae nakoia tibun Iteraera ni kangai, ‘E na teimatoa ni kabonganaaki bwa te bwaa ae tabu ibukiu n ami roro nako.+ 32 A na aki kabiraki iai rabwataia aomata, ao kam na tai katotonga aron rengarenganana. Bon te bwai ae tabu te baei. E na teimatoa n riki bwa te bwai ae tabu iroumi. 33 E riai ni kamateaki ane e karaoa katotongan te bwaa ae boiarara aei ao ane e kabira te aomata ae akea kariaiakana* n teutana mai iai.’”+

34 E taku ngkanne Iehova nakoni Mote: “Anai boiarara aikai aika titeboo rawawataia:+ titakite* aika baika ran ao onika* ao boiarara aika karibanam* ao ribano* ni koaua. 35 Karaoia bwa te boiarara,+ ao e riai n renganaki* n te aro n rabakau te rengarenga ae boiarara aei, e taoronaki,+ e itiaki, ao e tabu. 36 Ko na ika teutana mai iai ni kamtea raoi ao kaaki teutana mai iai i matan te Ati ni Berita n te umwa ni botaki, ike N na kaoti iai nakoim. E riai ni moan te tabu iroumi. 37 Ko aki riai ni kabongana i bon ibukim te boiarara ae ko na karaoia ma te rengarenga aei.+ Ko na iangoa te bwai aei bwa te bwai ae tabu nakon Iehova. 38 E riai ni kamateaki ane e karaoa katotongana bwa e na kakukureia ni boina.”

31 E reitia ni kangai Iehova nakoni Mote: 2 “Noria, I a tia n rinea* Betarera+ ae natin Uri are natin Uura man te baronga ae Iuta.+ 3 N na kaonna n taamneiu,* n anganna rabakauna, otana ao ana atatai, bwa e aonga ni mwaatai n aeka ni karaobwai nako, 4 ao ibukini korean taamnei ibukini karaoani bwaai, ibukini mwakurian te koora ma te tirewa ao te buraati, 5 ibukini korokorean atibu+ aika kakawaki ibukini kanimwaia, ao ibukini karaoani bwaai nako man te kai.+ 6 Irarikin anne, I a tia ni mwiokoa Ooriaba+ ae natin Aitamake man te baronga are Tan bwa e na buokia, ao I karina te rabakau i nanoia aomata nako ake a mwaatai,* bwa a aonga ni karaoi bwaai nako ake I tua nakoim n aron aikai:+ 7 te umwa ni botaki,+ te Ati ni Berita*+ ma rabunana+ are i aona, bwain nanon nako te umwanrianna, 8 te taibora+ ma bwaina nako, te kaintaura ae te koora ni koaua ma bwaina nako,+ baonikareani baika boiarara,+ 9 baonikareani karea ni kabuekaki+ ma bwaini mwakuriana nako, te taabu ma kainteina,+ 10 kunnikai aika rarangaaki n te aro ae raoiroi, kunnikai aika tabu ake bwain Aaron are te ibonga,* aia kunnikai natina mwaane ake a beku bwa ibonga,+ 11 te bwaa ae tabu, ao baika boiarara ibukin te tabo ae tabu.+ A na karaoi bwaai ni kabane n aron are I tua nakoim.”

12 E a manga taku Iehova nakoni Mote: 13 “Taetae nakoia tibun Iteraera ao tuangia ni kangai, ‘Kam na boni kawakin au bongi n taabati,+ bwa bon te kanikina i marenau ma ngkami n ami roro nako, bwa kam aonga n ataia bwa bon Iehova ngai ae I katabuingkami.* 14 Kam riai ni kawakina te bongi n Taabati, bwa bon te bong ae tabu nakoimi.+ E riai ni kamateaki ane e urua tuan te bongi n Taabati. Ngkana iai ae e karaoa te mwakuri n te bong anne, ao e na kamateaki te aomata* anne.+ 15 A kona ni karaoaki mwakuri nako i nanon onobong, ma n te kaitiua ni bong bon te bongi n taabati ae te bong ni motirawa.+ Bon te bong ae tabu nakon Iehova. E riai ni kamateaki ane e karaoa te mwakuri n te bongi n Taabati. 16 A riai tibun Iteraera ni kawakina te bongi n Taabati, ao a riai n ira tuan te bongi n Taabati n aia roro nako. Bon te berita ae teimaan. 17 Bon te kanikina ae teimatoa i marenau ma tibun Iteraera,+ bwa e karaoa karawa ma aonnaba Iehova i nanon onobong, ao e motirawa n te kaitiua ni bong ma ni motika rawana iai.’”+

18 Ngke e a tia n taetae ma ngaia i aon te Maunga ae Tinai ao e a angani Mote baaba aika uoua ake Bwaai ni Kaotioti,+ aika baaba aika atibu aika korobokiaki n tabonibain te Atua.+

32 N te tai aei ao a noria aomata bwa e a rangi ni maan Mote ao e tuai man ruo man te maunga.+ Mangaia are a bobotiia i rarikin Aaron ao a taku nakoina: “Karaoa atuara ae e na rimoara,+ bwa ti a aki ataa te bwai ae riki nakoni Mote, are ngaia are e kairira ni kaotinakoira man te aba are Aikubita.” 2 Ao e taku Aaron nakoia: “Buutii taabia aika koora+ mai taningaia buumi, ma natimi mwaane ao natimi aine, ao uotii nakoiu.” 3 Mangaia are a bane aomata ni buutii taabia aika koora ake i taningaia ao a uotii nakon Aaron. 4 E anaa ngkanne te koora mairouia ao e karaoia n te bwai ni kakaari bwa te bouannanti* ae te kao te teei.+ Ao a taku aomata: “Tibun Iteraera, aio Atuam are kairiko ni kaotinakoko man te aba are Aikubita.”+

5 Ngke e nora aei Aaron ao e a katea naba te baonikarea i matan te kao. Ao e takarua ni kangai: “Iai te toa nakon Iehova ningabong.” 6 Mangaia are a utimwaaka n te bong are imwina, ao a anga taiani karea ni kabuekaki ao taiani karea n raoi. Imwin anne ao a tekateka aomata n amwarake ma ni moi. Ao a teirake bwa a na kakukureiia.+

7 E a taku ngkai Iehova nakoni Mote: “Naako ruuo, bwa a kabuakakaia i bon irouia am aomata ake ko kairiia ni kaotinakoia man te aba are Aikubita.+ 8 A waekoa n tibanako man te kawai are I tua nakoia bwa a na toua.+ A karaoa aia bouannanti* ae te kao te teei, ao a teimatoa ni bobaraaki nakoina ao n angakarea nakoina ma n taku: ‘Tibun Iteraera, aio Atuam are kairiko ni kaotinakoko man te aba are Aikubita.’” 9 E reitia ni kangai Iehova nakoni Mote: “I a tia n noria bwa bon aomata aika imanono* te koraki aei.+ 10 Mangaia ae kariaia bwa e na urarake uniu ni kaaitaraia ao N na kamaunaia, ao kariaia bwa N na karaoa te natannaomata ae korakora mairoum n onei mwia.”+

11 E bubutiia* ngkanne Iehova ae Atuana Mote+ ao e taku: “E aera bwa e na urarake unim Iehova ni kaaitaraia am aomata imwini kairakia ao kaotinakoaia man te aba are Aikubita ni mwaakam ae bati ao n te bai ae korakora?+ 12 E aera bwa a na kangai I-Aikubita: ‘E iangoa karaoan ae buakaka nakoia ngke e kairiia ni kaotinakoia. E kan tiringia n taiani maunga ma ni kamaunaia man te aonnaba’?+ Taotaona uraraken unim ao manga iangoa* am moti ni kaineti ma te kabuanibwai ae ko baireia bwa ko na karokoa i aoia am aomata. 13 Uringia am toro ake Aberaam, Itaaka, ao Iteraera, ake ko taetae n tuea nakoia i bon iroum, ao ko kangai, ‘N na boni kamwaitiia kanoami* n aron itoini karawa,+ ao N na bon anga te aba aei ni kabutaa are I rineia nakoia kanoami,* bwa a aonga n teimatoa n abanna.’”+

14 Mangaia are e a manga iangoa* te kabuanibwai Iehova are taekinna bwa e na karokoa i aoia ana aomata.+

15 Ao e ruo rikaaki Mote man te maunga ma+ baaba aika uoua ake Bwaai ni Kaotioti,+ aika baaba aika korobokiaki iteraia ni kauoua. A korobokiaki aoia ao aaia. 16 A karaoaki baaba aikai iroun te Atua, ao koroboki ake i aona bon ana koroboki te Atua are kaari i aoni baaba aikai.+ 17 Ngke e a moanna n ongo aia karongoa aomata Iotua bwa kioina ngke a tatakarua, ao e taku nakoni Mote: “Iai karongoaan te buaka n te kaembwa.” 18 Ma e taku Mote:

19 N te tai are e uakaan iai Mote ma te kaembwa ao ngke e nora te bouannanti ae te kao te teei,+ ma te mwamwaie, ao e urarake unna ao e karenakoi baaba akekei mai baina ao e kamaeinikuni i nanoaan te maunga.+ 20 E anaa te kao te teei are a karaoia ao e kabuekia n te ai ao e kamantintia ni karokoa ae e mte,+ ao e kamraraa i aon te ran ao e kairoroiia tibun Iteraera bwa a na nimma.+ 21 Ao e taku Mote nakon Aaron: “A kangaa ni kairiko aomata aikai bwa ko na karokoa i aoia te bure ae kakaiaki?” 22 E kaeka Aaron ni kangai: “Tai urarake n un au toka. Ko bon atai raoi aroia aomata aikai bwa a boni kani kakaraoa ae buakaka.+ 23 Mangaia are a taku nakoiu, ‘Karaoa atuara ae e na rimoara, bwa ti a aki ataa te bwai ae riki nakoni Mote, are ngaia are e kairira ni kaotinakoira man te aba are Aikubita.’+ 24 Ngaia are I kangai nakoia, ‘Ane iai ana koora ao ke e buutia ma n anganai.’ Ao I kaaki n te ai ao e a otinako naba te kao te teei aei.”

25 E noriia aomata Mote bwa a aki tau baangia, ibukina bwa e a tia Aaron ni kariaia aroia anne, mangaia are a a riki bwa bwaai ni kamaamaeaki i mataia taani kakaaitaraia. 26 Ao e tei Mote n te kawai n rin n te kaembwa ao e taku: “Antai ae tei n ana itera Iehova? Ke e nakoiu!”+ Ao a bane tibun Rewi ni bobotiia i rarikina. 27 Ao e taku nakoia: “E kangai ana taeka Iehova ae Atuan Iteraera, ‘Katekei ami kabaang n tatabemaningkami nako ao rinanon te kaembwa ni kabutaa man te kawai n rin teuana nakon are teuana, ao ke e tiringa tarina temanna ma temanna, kaain rarikina, ao raona ae rangi ni kaan ma ngaia.’”+ 28 A karaoa are e tua Mote tibun Rewi, ao tao 3,000 mwaitiia mwaane ake a mate n te bong anne. 29 E taku ngkanne Mote: “Kaokoroingkami* ibukin Iehova n te bong aei, bwa kam a tia n ekiianako oin natimi mwaane ma oin tarimi n tatabemaningkami nako,+ ao e na boni kakabwaiaingkami n te bong aei.”+

30 E taku ngkanne Mote nakoia aomata n te bong are imwina: “Kam a tia ni karaoa te bure ae rangi ni kakaiaki, ao ngkai N na ararake nakon Iehova bwa tao I kona ni karaoa te bwai teuana bwa e aonga ni kabwarai ami bure.”+ 31 Mangaia are e oki Mote nakon Iehova ao e taku: “Ai kakaiakira te bure ae a karaoia te botannaomata aei! A karaoa atuaia man te koora!+ 32 Ma ngkana ko kani kabwaraa ngkai aia bure+ ao kabwaraa, ma ngkana tao ko aki ao taiaoka kamauna arau man am boki are ko koreia.”+ 33 Ma e taku Iehova nakoni Mote: “N na boni kamauna aran te aomata are bure nakoiu man au boki.” 34 Naako ngkai kairiia aomata aikai nakon te tabo are I a tia n tuangko. Noria! E na rimoam au anera,+ ao N na boni katuuaaeia ibukin aia bure, n te bong are I motiki taekaia iai.” 35 Ao e a karekei kaia aomata aikai Iehova ibukin te kao te teei are a karaoia, are e karaoia Aaron ibukia.

33 E a manga taku Iehova nakoni Mote: “Naako, kitana te tabo aei ngkoe ma aomata ake ko kairiia ni kaotinakoia man te aba are Aikubita. Mwananga nakon te aba are I taetae n tuea ibukina nakon Aberaam, Itaaka, ao Iakoba ni kangai, ‘N na angania kanoam.’*+ 2 N na kanakoa te anera rimoam+ ao e na kakioianako tibuni Kanaan, taian Amoraite, tibun Eta, taiani Beritaite, taian Iwaite, ao I-Iebuti.+ 3 Naako nakon te aba ae raanga iai rannimamman te man ma aia karewe manibeeru.*+ Ma N na aki nako buakomi, bwa bon aomata ngkami aika kam imanono,*+ ao I kaawa ni kamaunaingkami i aoni kawaimi.”+

4 Ngke a ongo taeka aika rangi ni matoatoa aikai aomata, ao a a nanokawaki, ao akea i buakoia ae e karini bwaai ni katamaroa. 5 E taku Iehova nakoni Mote: “Ko na kangai nakoia tibun Iteraera, ‘Bon aomata aika imanono* ngkami.+ I boni kona n nako buakomi ao I a kamaunai naba ngkami n te tai ae waekoa.+ Mangaia ae teimatoa ni buutii ami bwai ni katamaroa, ngkai I tabe n iaiangoa te bwai ae N na karaoia nakoimi.’” 6 Ngaia are a aikoa katekei* aia bwai ni katamaroa tibun Iteraera ni moa man te Maunga ae Oreba.

7 E anaa ana umwanrianna ngkai Mote ao e kateia i tinanikun te kaembwa, n te tabo ae raroa ma te kaembwa, ao e aranna bwa te umwa ni botaki. A bane n otinako aomata ake a na titirakina Iehova+ nakon te umwa ni botaki are i tinanikun te kaembwa. 8 N te tai naba are e otinako iai Mote nakon te umwanrianna ao a bane n teirake aomata ma n tei n tatabemania nako i rarikini mataroan aia umwanrianna, ao a taraa mwini Mote ni karokoa ae e rinnako n te umwanrianna. 9 N te tai naba are e rinnako iai Mote n te umwanrianna ao e ruo te boua ae te nang,+ ao e tei i rarikini mataroan te umwanrianna ngke e taetae te Atua ma Mote.+ 10 Ngke a bane aomata n nora te boua ae te nang bwa e tei i rarikini mataroan te umwanrianna, ao a teirake n tatabemania nako ao a bobaraaki i rarikini mataroan aia umwanrianna. 11 E taetae Iehova nakoni Mote n itaramata ma ngaia,+ n aron te aomata temanna ae taetae ma raona. Ngkana e oki Mote nakon te kaembwa ao e aki kitana te umwanrianna Iotua+ ae natin Nun, ae ana toro ao ana tabonibai.+

12 E a taku ngkai Mote nakon Iehova: “Noria, ko kangai nakoiu, ‘Kairiia aomata aikai,’ ma ko tuai kaotia nakoiu bwa antai ae ko na kanakoa ma ngai. Ko kangai naba, ‘I kinako n aram* ao e reke naba akoam i matau.’ 13 Taiaoka, ngkana e reke akoau i matam ao kaotii nakoiu aroarom nako+ bwa I aonga ni kinako, ao n teimatoa ni karekea akoau i matam. Tai mwaninga naba ae bon am aomata te natannaomata aei.”+ 14 Mangaia are e taku: “Boni ngai ae N* na iriko+ ao N na anganiko te motirawa.”+ 15 Ao e taku Mote nakoina: “Ngkana ko* aki iri ao tai kairiranako man te tabo aei. 16 E na kangaa n ataaki bwa e reke akoau i matam, ngai ma am aomata aikai? Tiaki ngkana ko airi ma ngaira+ bwa ti aonga ni kaokoroaki iai ngai ao am aomata aikai, ma aomata ni kabane aika n te aonnaba?”+

17 E reitia ni kangai Iehova nakoni Mote: “N na karaoa naba te bwai ae ko bubutii aei, ibukina bwa e reke akoam i matau ao I kinako n aram.” 18 Ao e taku Mote: “Taiaoka kaota nakoiu mimitongim.” 19 Ma e taku: “N na kariaia bwa ko na nori raoiroiu ni kabane, ao N na taekina arau ae Iehova i matam,+ ao N na akoa ane I kan akoia ao N na nanoangaa ane I kan nanoangaia.”+ 20 Ma e reitia ni kangai: “Ko aki kona n nora matau bwa akea te aomata ae kona n norai ao e na maiu.”

21 E a manga taku Iehova: “Ao aei te tabo ae i rarikiu. Ko na tei i aon te bwaa. 22 Ngkana e rirarikim mimitongiu ao N na kaakiko n te nangananga, ao N na rabuniko ni baiu bwa kaanga nangoam, ni karokoa ae I tia n rirarikim. 23 Imwin anne ao N na kanakoa baiu ao ko na nora akuu. Ma e aki kona n noraki matau.”+

34 E taku ngkanne Iehova nakoni Mote: “Karaoi baaba aika uoua aika atibu n aron ake mai mwaina,+ ao N na korei i aoni baaba akanne, taeka ake a mena ngkoa i aoni baaba ake mai mwaina+ ake ko kamaeinikuni.+ 2 Katauraoiko imwain te moaningabong, bwa ko na ararakea te Maunga ae Tinai n te moaningabong, ao ko na tei i matau i aon taubukin te maunga.+ 3 Ma akea ae e na ararake ma ngkoe, ao akea riki ae e riai ni mena i aon te maunga. A aki riai naba n amwarake tiibu ke kaao n te tawaana i moan te maunga anne.”+

4 Mangaia are e karaoi baaba aika uoua aika atibu Mote n aron ake mai mwaina, ao e utimwaaka n te moaningabong ao e nako n ararakea te Maunga ae Tinai, n aron are e tua Iehova nakoina, ao e uotii baaba ake uoua ake atibu. 5 E ruo rikaaki ngkanne Iehova+ n te nang ao e tei ma ngaia ikekei, ao e taekina* te ara ae Iehova.+ 6 E rimatana Iehova ao e taekina ae kangai: “Iehova, Iehova, ae te Atua ae nanoanga+ ao e atataiaomata,*+ ae iremwe n un+ ao e bati irouna te tangira ae koaua*+ ao e bwabwaina te koaua.*+ 7 E kaota te tangira ae koaua* nakoia rooro aika nga ma nga,+ e kabwarai kairua ma buure,+ ma tiaki n ae e na aki katuuaaeia akana bure.+ E na katuuaaeia naati aika mwaane ma taian tibu aika mwaane ibukin aia kairua taama, i aon te katenroro ma te kaaroro.”+

8 E aki tabwara Mote ma e a katorobubua naba ni bobaraaki i aontano, 9 ao e taku: “Ngkana e reke akoau i matam Iehova, ao taiaoka Iehova ma kariaia bwa ko na airi ma ngaira ao ni mena i buakora+ e ngae ngke aomata ngaira aika ti imanono,*+ ao kabwarai ara kairua ma ara bure,+ ao tauira bwa am aomata.” 10 E kaeka ni kangai: “I a karaoa ngkai te berita ma ngkami: N na karaoi baika kamimi ma ni kakamaaku i mataia ami aomata ni kabane, aika a tuai mani kakaraoaki* n te aonnaba ni kabutaa ke i buakoia natannaomata ni kabane,+ ao a na bane aomata aika kam maeka i buakoia n nora ana mwakuri Iehova, bwa e kakamaaku te bwai ae N na karaoia ma ngkami.+

11 “Kakauongo nakon te bwai ae I tua nakoim n te bong aei.+ N na kakioianako mai mwaim taian Amoraite, tibuni Kanaan, tibun Eta, taiani Beritaite, taian Iwaite, ao I-Iebuti.+ 12 Taratara raoi bwa kam na aki karaoa te berita ma kaain te aba ane kam nangi nako iai,+ bwa e kaawa n riki te baenne bwa te bwai ni kamwane nakoimi.+ 13 Ma kam na kabwakai aia baonikarea, ao kam na kamaeinikuni aia boua aika tabu ao kam na korei ni kabwakai aia kai aika tabu.*+ 14 Kam na tai bobaraaki nakon te atua riki temanna+ bwa e kinaaki Iehova n arona ae* e tua taromauriana n tii ngaia. Eng, bon te Atua ae tua bwa e na taromauriaki n tii ngaia.*+ 15 Taratara raoi bwa kam na aki karaoa te berita ma kaain te aba, ibukina bwa ngkana a kamwaraeia n taromaurii* atuaia ao n angakarea nakoia atuaia,+ ao ane e na boni kaoko temanna, ao ko na amwarake man ana karea.+ 16 Ao ane ko na bon anaiia natiia aine ibukia natim mwaane,+ ao ane a na kamwaraeia natiia aine n taromaurii* atuaia, ao a na kairiia natim mwaane bwa a na kamwaraeia n taromaurii atuaia.+

17 “Ko na tai karaoi atua aika biiti aika kaburoaki n atoaki.+

18 “Ko na kawakina te Toa ae te Bwerena ae Aki Karikaki.+ Ko na kana te bwerena ae aki karikaki n aron are I tua nakoim. Karaoa aei i nanon itibong n te tai ae baireaki, n te namwakaina ae Abibi,*+ ibukina bwa bon te namwakaina ae Abibi are kam otinako iai mai Aikubita.

19 “Au bwai karimoa nako aika mwaane,*+ n ikotaki ma am man ni kabane aika karimoa aika mwaane, ae tao te kao mwaane ke te tiibu.+ 20 Ko na manga kabooa ana karimoa te taongki n te tiibu. Ma ngkana ko aki manga kabooa, ao ko riai n tiringnga n otea roroana. Ko na manga kabooia natiia natim mwaane aika karimoa ni kabane.+ Akea temanna ae riai ni kaoti i matau n akea uotana.

21 “Onobong am bong ni mwakuri, ma ko na motirawa n te kaitiua ni bong.*+ Ko na motirawa naba e ngae ngke taini kamarauan te tano ao tain te mwakuri n tai.

22 “Ao ko riai ni kabonganai moan uaanikai aika tawaa mai buakon am uita aika taiaki, ni bukamarua iai am Toa ae Taiani Wiki, ao ko na bukamarua am Toa ae Ikotakin Taian Uaa* n tokin te ririki.+

23 “A na kaoti am rorobuaka nako i matan te Uea ae koaua ae Iehova ae Atuan Iteraera, tenua te tai n te ririki.+ 24 Bwa N na kakioianako natannaomata mai mwaim,+ ao N na kabuburaa am aono, ao akea ae e na kan taua abam ngkana ko a nako ni kaoti i matan Iehova ae Atuam tenua te tai n te ririki.

25 “Ko na tai kareana te raraa ae te karea nakoiu n ikotaki ma te bwai ae karikaki.+ E aki riai n tiku ni karokoa ae ingabong te karea ae kareanaki n tain te Toa ae te Riao.+

26 “Ko na uotii moan uaanikai aika tawaa aika taiani kabanea n raoiroi aika uaan am tano nakon ana auti Iehova ae Atuam.+

“Ko na tai kaburoa te kooti ae ataei i nanon rannimamman tinana.”+

27 E reitia ni kangai Iehova nakoni Mote: “Ko na korei taeka aikai,+ ibukina bwa I karaoa te berita ma ngkoe ao tibun Iteraera ni kaineti ma taeka aikai.”+ 28 Ao e tiku ikekei ma Iehova i nanon 40 te ngaina ao 40 te bong. Akea te kariki ae e kanna ao akea te ran ae e nimma.+ Ao E korea taekan te berita i aoni baaba akekei, ake Tuua Ake Tebwina.*+

29 E a ruo ngkanne Mote man te Maunga ae Tinai ao a mena i baina baaba ake uoua ake Bwaai ni Kaotioti.+ Ngke e ruo Mote man te maunga ao e aki ataia ae e a raneanea ubuna bwa mwin taetaena ma te Atua. 30 Ngke a nora Mote Aaron ma tibun Iteraera ni kabane, ao a noria bwa e a raneanea ubuna ao a a maaku ni kaania.+

31 Ma e weteiia Mote, ai ngaia are a a oki nakoina Aaron ma mataniwi ni kabane ake i buakoia te koraki, ao e a taetae Mote nakoia. 32 Imwin anne ao a a bane tibun Iteraera ni kaania Mote, ao e a angania tuua ni kabane ake e anganna Iehova n te Maunga ae Tinai.+ 33 Ngkana e tia Mote n taetae nakoia, ao e a rabuna naba ubuna n te rabuna ni mata.+ 34 Ma ngkana e rinnako Mote i matan Iehova bwa e na taetae ma ngaia, ao e kanakoa te rabuna ni mata ni karokoa otinakona.+ Ao e otinako ao e taekin tuua nakoia tibun Iteraera ake e tuangaki.+ 35 Ao a nora ubuni Mote tibun Iteraera bwa e raneanea, ao e kaoka te rabuna ni mata Mote nako aon ubuna ni karokoa rinna bwa e na taetae ma te Atua.*+

35 Imwina riki ao Mote e botiia te botaki n aomata aika tibun Iteraera ao e taku nakoia: “Aikai baika e tua Iehova bwa a na karaoaki:+ 2 A kona ni karaoaki mwakuri nako i nanon onobong, ma e na tabu iroumi te kaitiua ni bong. Bon te bongi n taabati ae te bong ni motirawa nakon Iehova.+ Ane e karaoa te mwakuri n te bong anne, e na kamateaki.+ 3 Kam na tai kauraa te ai n ami tabo ni maeka n te bongi n Taabati.”

4 Ao e taku Mote nakoia te botaki n aomata aika tibun Iteraera: “E tua ae kangai Iehova, 5 ‘Rikoa te angabwai ibukin Iehova.+ Ao ke a uotii baikai akana kukurei nanoia ni kan anga+ bwa te angabwai ibukin Iehova, ae te koora, te tirewa, te buraati, 6 te karai ae buruu, te karai ae beboo ae buraen te tiibu, te karai ae uraroo, te rinen ae raoiroi, buraen te kooti,+ 7 kunin te tiibu mwaane ae kaurauraaki, kunin te tiire, te kai ae te aketia, 8 bwaan taian taura, te batiam ibukin te bwaa ae tabu ma baika boiarara,+ 9 atibu aika oniki, ao atibu riki tabeua ake a na nim i aon te ebota+ ma te uba.+

10 “‘Ke a bane n nakomai akana mwaatai*+ i buakomi ao a na karaoi bwaai ni kabane ake e tua Iehova, 11 ae te umwanrianna ae tabu* ma bwaina nako ao rabunana, kaini karekena ao kain oona, kaai ibukini kanimwana, bouana ao nibwana, 12 te Ati+ ao kaina,+ rabunana+ ao te keeten+ ae tine mai moana, 13 te taibora+ ma kaai ibukin uotakina ao bwaina nako ao te bwerena ae kaotiotaki,+ 14 te kaintaura+ ibukin te oota ma bwaina nako, ao taurana ao bwaan te taura,+ 15 baonikareani baika boiarara,+ kaai ibukin uotakina, te bwaa ae tabu ao baika boiarara,+ te keeten* ibukini mataroan te umwanrianna ae tabu, 16 baonikarean te karea ni kabuekaki,+ ao warawarana ae te buraati, kaai ibukin uotakina ma bwaini mwakuriana nako, te taabu ma kainteina,+ 17 oon te katawanang aika taiani keeten,+ bouana ao nibwana, ao te keeten* ae mataroan te katawanang, 18 kain rooan te umwanrianna ae tabu ao kain rooan oon te katawanang ma kabaeaia,+ 19 kunnikai aika rarangaaki n te aro ae raoiroi+ ibukin te beku n te tabo ae tabu, kunnikai aika tabu ake bwain Aaron+ are te ibonga,* ao aia kunnikai natina mwaane ake a beku bwa ibonga.’”

20 Mangaia are e a nako te botaki n aomata aika tibun Iteraera mai matani Mote. 21 A roko ngkanne aomata nako ake a kairaki mai nanoia,+ ao ake a ueke nanoia* ao a anga aia angabwai ibukin Iehova bwa e na kabonganaaki ibukin te umwa ni botaki, ao bwaai nako ake a kainnanoaki ibukin te taromauri, ao ibukini kunnikai aika tabu. 22 A teimatoa n roko mwaane ma aine ake a kukurei nanoia ni kan anga, n uotii biin,* taabia, mwaamwa, ao bwaai ni katamaroa riki tabeua, n ikotaki naba ma baika karaoaki man te koora n aekaia nako. A bane n anga aia karea* aika koora nakon Iehova.+ 23 Ao naake iai irouia te karai ae buruu, te karai ae beboo ae buraen te tiibu, te karai ae uraroo, te rinen ae raoiroi, buraen te kooti, kunin te tiibu mwaane ae kaurauraaki, ao kunin te tiire, a bane n uotii baikai. 24 Ao naake a angabwai n te tirewa ma te buraati, a bane n uotii bwa te angabwai ibukin Iehova, ao naake iai irouia te kai ae te aketia, a bane naba n uotii ibukini mwakurian te umwanrianna ae tabu.

25 A bane ni bibinoka ni baia aine aika mwaatai,+ ao a uotii baike a a tia ni binokai: ae te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi. 26 Ao a bane ni binokaa buraen te kooti, aine aika mwaatai ake a kairaki mai nanoia.

27 Ao a uotii atibu aika oniki mataniwi, ma atibu riki tabeua ake a na nim i aon te ebota ma te uba,+ 28 ao te batiam, ao te bwaa ibukin taian taura ao ibukin te bwaa ae tabu+ ma baika boiarara.+ 29 A bane mwaane ma aine ake a kairaki mai nanoia n uotii bwaai ibukini mwakuri nako ake e tua Iehova rinanoni Mote bwa a na karaoaki. A uotia tibun Iteraera bwa te karea ni kan anga nakon Iehova.+

30 E taku ngkanne Mote nakoia tibun Iteraera: “Noria, e a tia Iehova n rinea Betarera, are natin Uri are natin Uura man te baronga ae Iuta.+ 31 E kaonna n taamnein te Atua, bwa e aonga n reke rabakauna ao otana ao ana atatai ao e na mwaatai n aeka ni karaobwai nako, 32 ibukini korean taamnei ibukini karaoani bwaai, ibukini mwakurian te koora, te tirewa, ao te buraati, 33 ao ibukini korokorean atibu ao kanimwaia, ao mwakuriani kaai ibukini karaoani bwaai nako iai n te aro ae tamaroa. 34 Ao te Atua e anganna te konabwai n angareirei, ngaia ma Ooriaba+ are natin Aitamaka man te baronga ae Tan. 35 E kaonia n te rabakau*+ ibukini karaoan ana mwakuri nako te tia karaobwai ae mwaatai, te tia katamaroa n te taetaeri, te tia raranga ae kabongana te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi, ao ana mwakuri te tia rarangaa te kunnikai. A na karaoi aeka ni mwakuri nako mwaane aikai ao ni korei taian taamnei nako ibukini karaoani bwaai.

36 “E na kaai ni mwakuri Betarera ma Ooriaba, ao mwaane nako aika mwaatai* are e angania te rabakau Iehova ma te ota ni baikai, bwa a aonga n atai aroni karaoani mwakuri nako ibukin te tabo ae tabu n aron are e tua Iehova.”+

2 Ao Mote e weteiia Betarera ma Ooriaba, ao mwaane nako aika mwaatai ake e karina te rabakau i nanoia Iehova,+ ake mwaane ake a kairaki mai nanoia bwa a na anga ngaiia bwa a na karaoa te mwakuri.+ 3 A anai ngkanne mairouni Mote angabwai ni kabane+ ake a uotii tibun Iteraera ibukin te mwakuri ae irekereke ma te tabo ae tabu. Ma a bon teimatoa naba naakai n uotii nakoina aia karea ni kan anga n te ingabong teuana ma teuana.

4 A bane n roko taani mwakuri aika mwaatai temanna imwin temanna imwini moanakini karaoan te mwakuri ae tabu irouia, 5 ao a kangai nakoni Mote: “E a riao ae a uotia aomata nakon ae e kainnanoaki ibukin te mwakuri are e tua karaoana Iehova.” 6 Mangaia are e tua Mote bwa e na katanoataaki rinanon te kaembwa ae kangai: “Mwaane ao aine, tai manga uotii riki angabwai ibukin te umwanrianna ae tabu.” Mangaia are a a tukaki aomata man uotakini bwaai. 7 A tau mwaitini bwaai ibukini mwakuri nako ake a na karaoaki, ao e a riaon ae kainnanoaki.

8 Mangaia are a a bane taani mwakuri ake a mwaatai,+ ni karaoa te umwanrianna ae tabu*+ ni kunnikai aika tebwina aika karaoaki man te rinen ae raoiroi ae binokaaki, te karai ae buruu, te karai ae beboo ae buraen te tiibu, ao te karai ae uraroo. E* karaoi ma taamneia kerubim* aika taeraki ni katamaroaaki iai aoia.+ 9 Abwakini kunnikai ibukin te umwanrianna kaka 28 te mwanokunibai* ao kaka 4 te mwanokunibai raababaia. Titeboo abwakin ao raababani kunnikai aikai ni kabane. 10 E tomai ngkanne kunnikai ake nimaua, ao e a manga tomai kunnikai ake nimaua riki. 11 Imwin anne ao e karaoi timoimoi man te karai ae buruu i taran te rinan ni kunnikai teuana, ike a na toma iai kunnikai aikai. E karaoa naba aekakin anne i taran te kabanea ni kunnikai n te rinan ni kunnikai are teuana n te tabo are a na toma iai. 12 E karaoi timoimoi aika 50 n te kunnikai teuana, ao timoimoi aika 50 i taran te kunnikai are teuana n te tabo are a na toma iai rinan ni kunnikai aikai, bwa a aonga ni kaaitara timoimoi aikai. 13 Ni kabaneana, e a karaoi kaai ni kareke aika koora aika 50 ao e tomai kunnikai akanne ni kaai ni kareke akanne, ao e a riki bwa teuana te umwanrianna ae tabu.

14 E karaoi ngkanne kunnikai mani buraen te kooti ibukin rabunan aon te umwanrianna ae tabu. E karaoi kunnikai aika 11.+ 15 Abwakini kunnikai aikai kaka 30 te mwanokunibai, ao kaka 4 te mwanokunibai raababaia. Titeboo abwakin ao raababani kunnikai aika 11 aikai. 16 Ao e tomai kunnikai ake nimaua, ao e a manga tomai kunnikai ake onoua riki. 17 Imwina ao e karaoi timoimoi aika 50 i taran te kabanea ni kunnikai ike a toma iai, ao e karaoi timoimoi aika 50 i taran te kunnikai are teuana are e toma ma ngaia. 18 Ao e karaoi kaai ni kareke aika taiani buraati aika 50 ibukin tomaan rabunan te umwanrianna ae tabu bwa e na riki bwa teuana.

19 E karaoa rabunan te umwanrianna mani kunin te tiibu mwaane ae kaurauraaki ao te rabuna i aon anne ae karaoaki mani kunin te tiire.+

20 Ao e karaoi kain oon te umwanrianna ae tabu aika tei n etirake+ man te kai ae te aketia.+ 21 Kaka tebwina te mwanokunibai rietani kain te oo, ao teuana ao te iterana te mwanokunibai raababaia. 22 Kaka uoua neweni kain te oo* aika nim iai ae titeboo teia. Anne arona ni karaoi kain oon te umwanrianna ae tabu ni kabane. 23 Mangaia are e karaoi kain oon te umwanrianna ae tabu, 20 kain te oo ibukin te itera are mai maiaki, ni kaitaraa maiaki. 24 Ao e karaoi niibwa aika tirewa aika 40 bwa a na mena i aani kain te oo aika 20, uoua niibwa i aan teaina kain te oo ibukin newena ake uoua, ao uoua niibwa i aani kaka teaina kain te oo ibukin newena ake uoua.+ 25 E karaoi naba kain te oo aika 20 ibukin iteran te umwanrianna ae tabu mai meang, 26 ao nibwaia aika tirewa aika 40, uoua niibwa i aani kain te oo teaina ao uoua niibwa i aani kaka teaina kain te oo.

27 E karaoi kain te oo aika oneai ibukin iteran te umwanrianna ae tabu are mai buki are nako maeao.+ 28 E karaoi kain te oo aika uaai bwa bouani maninganingan te umwanrianna ae tabu ni maninganinga ake uoua ake mai buki. 29 Titeboo teini boua aikai mai nano nako eta nakon te moani mwamwa. Anne te bwai ae e karaoia nakoni bouan te maninganinga ake uaai. 30 Mangaia are mwaitini kain te oo boni wannai n ikotaki ma nibwaia aika tirewa aika 16, uoua niibwa i aani kaka teaina kain te oo.

31 E karaoi ngkanne kaai ibukini katomaani kain te oo man te kai ae te aketia, nimaai kaai ni kamatoa ibukini kain te oo n iteran te umwanrianna ae tabu are teuana,+ 32 ao nimaai kaai ni kamatoa ibukini kain te oo n iteran te umwanrianna ae tabu are teuana, ao nimaai ibukini kain oon te umwanrianna ae tabu ibukin te itera are i buki nako maeao. 33 Ao e karaoa te kai ibukini katomaani kain te oo are i nuka bwa e na biri rinukani kain te oo, mai tabona nako tabona. 34 E kanimwa te koora n rabuna kain te oo ni kabutaa ao e karaoi mwamwaia man te koora bwa bwain tauani kaai ibukini katomaani kain te oo, ao e kanimwa te koora ni kaai aikai ni kabutaa.+

35 Ao e karaoa te keeten+ man te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki. E taerii i aona+ taamneia kerubim.+ 36 Ao e karaoi bouana aika aai aika aketia ao e kanimwa te koora n rabuni iai, n ikotaki ma matauia aika koora, ao e kaburoi n atoi nibwaia aika aua aika tirewa. 37 Imwina ao e karaoa te keeten* ibukini mataroan te umwanrianna, man te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki, ae a ikotaki n rarangaaki,+ 38 n ikotaki ma bouana aika nimaai ao matauia. E kanimwa te koora n rabuni aoia ma bwain tomaaia,* ma a karaoaki nibwaia aika nimaua man te buraati.

37 E karaoa ngkanne te Ati+ Betarera+ man te kai ae te aketia. Uoua ao te iterana te mwanokunibai* abwakina, teuana ao te iterana te mwanokunibai raababana, ao teuana ao te iterana te mwanokunibai rietana.+ 2 E kanimwa te koora ni koaua ni kabutaa, i nanona ao i tinanikuna, ao e karaoa mataniwina n te koora ni katabwaninna.+ 3 Imwin anne ao e kaburoi n atoi aua mwamwana aika koora i etani waena ake aua, uoua te mwamwa n iterana teuana ao uoua te mwamwa n iterana are teuana. 4 Imwina ao e karaoi kaai man te kai ae te aketia ao e kanimwa te koora n rabuni iai.+ 5 E karini ngkanne kaai akanne i nanoni mwaamwa ake n iteran te Ati ni kauaitera ibukin uotakin te Ati.+

6 E karaoa rabunana man te koora ni koaua.+ Uoua ao te iterana te mwanokunibai abwakina ao teuana ao te iterana te mwanokunibai raababana.+ 7 E karaoi ngkanne kerubim* aika uoman+ aika koora. E ororea te koora n te aama ni karaoi rabwataia iai i tabon rabunan te Ati ni Berita ni kauaitera.+ 8 Te kerubim temanna i aon tabona teuana ao te kerubim are temanna i aon tabona are teuana. E karaoi kerubim i tabon rabunan te Ati ni Berita ni kauaitera. 9 A taakini baia ni kiba kerubim aika uoman aikai nako eta, n rabuna aon rabunan te Ati ni Berita ni baia ni kiba.+ A kaaitara kerubim aikai ao a baraaki ni kaitaraa rabunan te Ati ni Berita.+

10 Ao e karaoa te taibora man te kai ae te aketia.+ Uoua te mwanokunibai abwakina, teuana te mwanokunibai raababana, ao teuana ao te iterana te mwanokunibai rietana.+ 11 Ao e kanimwa iai te koora ni koaua ao e karaoa mataniwina n te koora ni katabwaninna. 12 Imwina ao e karaoa mataniwina ae raababan te rauraunibai* ni katabwaninna, ao e katamaroaa n te koora ni katabwaninna. 13 Irarikin anne, e kaburoi n atoi mwamwana aika aua man te koora, ao e kaaki mwaamwa aikai ni maninganinga ake aua ake a nim iai rangana ake aua. 14 A kaan mwaamwa aikai ma mataniwina, bwa bwain tauani kaai ake a kabonganaaki ibukin uotakin te taibora. 15 E karaoi ngkanne kaai man te kai ae te aketia ibukin uotakin te taibora, ao e kanimwa te koora n rabuni iai. 16 Imwin anne ao e karaoi man te koora ni koaua bwain aon te taibora, ae raurauna, mwangkona, boorana, ao ana tiaeki are e na kabwaroaki mai iai te karea ae te moi.+

17 Ao e karaoa te kaintaura+ man te koora ni koaua. E karaoa te kaintaura ae ororeaki n te aama ni karaoaki iai. A karaoaki man teuana te mwakoro ni koora kainteina, kaina, mwangkongkona, buutokona, ao ueena.+ 18 A otinako onoua mwaangan te kaintaura mani kaina, tenua mwaangan te kaintaura mai rarikina are teuana ao tenua mwaangana mai rarikina are teuana. 19 Iai tenua mwangkongkona aika aekakin ueen te amon i aoni mwaangana ake tenua, ma buutokona ao ueena aika karemarena, ao tenua mwangkongkona aika aekakin ueen te amon ni mwaangana ake tenua, ao buutokona ma ueena aika karemarena. Anne aroni karaoani mwaanga aika onoua ake a otinako mani kain te kaintaura. 20 Ao iai taiani mwangkongko aika aua i aoni kain te kaintaura aika aekakin tein ueen te amon, ao taiani buutoko ma uee aika karemarena. 21 Iai te buutoko i aani mwaanga aika uoua ake a otinako mani kaina, ao te buutoko i aani mwaanga ake uoua riki, ao te buutoko i aani mwaanga ake uoua riki, bwa a otinako mwaanga aika onoua mani kain te kaintaura. 22 A karaoaki buutoko ma mwaanga ao te kaintaura ni kabane bwa teuana te mwakoro ni koora ni koaua ae ororeaki n te aama. 23 Ao e karaoi man te koora ni koaua taurana aika itiua,+ ao taati ake a kabonganaaki ibukin tauani wikina, ma baan ake nneni wikin taura ake a a tia ni kabonganaaki. 24 E karaoia n ikotaki ma bwaina nako man te koora ni koaua ae teuana te tarena* rawawatana.

25 Ao e a karaoa ngkai baonikareani baika boiarara+ man te kai ae te aketia. E boraoi abwakina ma raababana ae teuana te mwanokunibai abwakina ao teuana te mwanokunibai raababana, ao uoua te mwanokunibai rietana. A riki korona bwa bwaina naba.+ 26 E kanimwa iai te koora ni koaua, i aona ao i rarikina ni kabutaa ma kooro ake iai, ao e karaoa mataniwina ni kabutaa man te koora. 27 E karaoi mwamwana aika koora aika uoua i aani mataniwina i aon iterana ake uoua ake a kaaitara, bwa bwain tauani kaina ake a kabonganaaki ibukin uotakina. 28 Imwin anne ao e karaoi kaai man te kai ae te aketia ao e kanimwa te koora n rabuni iai. 29 E karaoa naba te bwaa ae tabu+ ao baika boiarara aika itiaki,+ ae renganaki n te aro n rabakau.*

38 E karaoa baonikarean te karea ni kabuekaki man te kai ae te aketia. E boraoi abwakina ma raababana, ae nimaua te mwanokunibai* abwakina, nimaua te mwanokunibai raababana, ao tenua te mwanokunibai rietana.+ 2 E karaoi ngkanne korona ni maninganingana ake aua. A riki korona bwa bwaina naba. Ao imwina e kanimwa te buraati n rabunna iai.+ 3 Imwin anne ao e karaoi bwaini mwakurian nako te baonikarea, taiani bwaketi, tiaabora, boora, kainiwaiteke, ao baan aika nneni mwaakaron te ai. E karaoi bwaini mwakuriana nako man te buraati. 4 E karaoa naba warawaran te baonikarea man te buraati, ao e kaaki i aani mataniwina, mai nano riki nako nukana. 5 E kaburoi n atoi aua mwamwana ake ni maninganingana ake aua i rarikini warawarana are te buraati, bwa bwain tauani kaina. 6 Imwin anne ao e karaoi kaina man te kai ae te aketia ao e kanimwa te buraati n rabuni iai. 7 E karini kaai akanne i nanoni mwaamwa ake n iteran te baonikarea ni kauaitera ibukin uotakina. E karaoa te baonikarea bwa tein te ati ae akea etana ao aana.

8 E karaoa ngkanne te taabu man te buraati+ ma kainteina man te buraati, ao e kabonganai aia tirotaam* aine ake a baireaki bwa a na bebeku i rarikini mataroan te umwa ni botaki.

9 Ao e karaoa te katawanang.+ N iteran te katawanang are mai maiaki ni kaitaraa maiaki, ao e karaoa iai te oo aika taiani keeten aika karaoaki man te rinen ae raoiroi ae binokaaki, ae 100 te mwanokunibai abwakina.+ 10 Iai bouana aika 20 ma nibwaia aika 20 aika taiani buraati, ao a karaoaki man te tirewa mataun taiani boua ma bwain tomaaia.* 11 Ai aron naba iterana are mai meang ae 100 te mwanokunibai abwakin oona aika taiani keeten. A karaoaki man te buraati bouaia ake 20 ao nibwaia ake 20. A karaoaki man te tirewa mataun taiani boua ma bwain tomaaia.* 12 Ni kaineti ngkanne ma iterana are mai maeao bon 50 te mwanokunibai raababan oona aika taiani keeten. Tengauni bouaia ao tebwina nibwaia, ao a karaoaki man te tirewa mataun taiani boua ma bwain tomaaia.* 13 Raababan te itera are mai mainiku ni kaitaraa otin taai bon 50 te mwanokunibai. 14 Irarikini mataroan oon te katawanang n te itera teuana, iai taiani keeten aika 15 te mwanokunibai ikotan abwakia ma bouaia aika tennai ao tenua nibwaia. 15 Ao n iterana are teuana i rarikini mataroan te katawanang, iai naba taiani keeten aika 15 te mwanokunibai ikotan abwakia, ma bouaia aika tennai ao tenua nibwaia. 16 A bane ni karaoaki taiani keeten ake a katobibia te katawanang man te rinen ae raoiroi ae binokaaki. 17 A karaoaki man te buraati nibwan taiani boua, ao a karaoaki mataun taiani boua ao bwain tomaaia* man te tirewa ao e kanimwaki te tirewa n rabunaki aon taiani boua iai, ao bon tirewa bwain tomaani bouan nako te katawanang.+

18 E rarangaaki keetenin* mataroan te katawanang n te karai ae buruu, n te karai ae beboo ae buraen te tiibu, n te karai ae uraroo, ao n te rinen ae raoiroi ae binokaaki. Abwakina 20 te mwanokunibai, ao rietana 5 te mwanokunibai n ai aron rietan taiani keeten ake oon te katawanang.+ 19 A karaoaki man te buraati bouaia ake aai ma nibwaia ake aua. A karaoaki man te tirewa mataun taiani boua ma bwain tomaaia,* ao a rabunaki aoia n te tirewa. 20 A bane ni karaoaki man te buraati kain rooan te umwanrianna ae tabu* ma te katawanang ni katobibia.+

21 Aikai baika karinanaki ake a kabonganaaki ni karaoan te umwanrianna ae tabu, ae te umwanrianna are e mena i nanona te Ati ni Berita,+ ake a karinanaki i aan ana baire Mote bwa tabeia tibun Rewi+ i aan ana kairiri Itama+ are natin Aaron are te ibonga.* 22 E karaoi bwaai ni kabane ake e tua Iehova nakoni Mote, Betarera+ are natin Uri are natin Uura man te baronga ae Iuta. 23 Raona bon Ooriaba+ are natin Aitamaka man te baronga ae Tan, bon te tia karaobwai ae mwaatai ao te tia katamaroa n te taetaeri ao te tia raranga n te karai ae buruu, n te karai ae beboo ae buraen te tiibu, n te karai ae uraroo, ao n te rinen ae raoiroi.

24 Botani mwaitin te koora are kabonganaaki ni mwakurian te tabo ae tabu boni mwaitin te koora are kareanaki bwa te karea ni katiotioaki.+ Botani mwaitina bon 29 te tarena* ao 730 te tiekera* ae te tiekera ae kakabonganaaki n te tabo ae tabu.* 25 Ao aia tirewa te koraki ake a koreaki araia mai buakon te botaki n aomata bon 100 te tarena ao 1,775 te tiekera ae te tiekera ae kakabonganaaki n te tabo ae tabu.* 26 Aomata nako ake a koreaki araia ake kaka 20 rake aia ririki ni maiu,+ a uota te itera n tiekera ae te tiekera ae kakabonganaaki n te tabo ae tabu,* ao botaia mwaane aikai bon 603,550.+

27 Ao a kaburoaki n atoaki 100 te tarena n tirewa ibukin nibwan te tabo ae tabu ao niibwa ake i rarikin taiani keeten. E boraoi 100 te nibwa ma 100 te tarena, ae teuana te tarena ibukini kaka teuana te nibwa.+ 28 E karaoi mataun taiani boua man 1,775 te tiekera ao e rabuni naba iai aon taiani boua ao e katomai.

29 Te buraati are te karea* bon 70 te tarena ao 2,400 te tiekera. 30 E karaoi mai iai niibwa ibukini mataroan te umwa ni botaki, te baonikarea ae te buraati ma warawarana ae te buraati, bwaini mwakurian nako te baonikarea, 31 nibwan oon te katawanang ni katobibia, nibwani mataroan oon te katawanang, ao kaai ni kabane ake kain rooan te umwanrianna ae tabu ma kain rooan+ oon te katawanang ni katobibia.

39 A karaoi kunnikai aika rarangaaki n te aro ae raoiroi ibukin te beku n te tabo ae tabu, man te karai ae buruu, te karai ae beboo ae buraen te tiibu, ao te karai ae uraroo.+ A karaoi kunnikai aika tabu ibukin Aaron,+ n aron are e tua Iehova nakoni Mote.

2 E karaoa te ebota+ Betarera man te koora, te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki. 3 A ororei mwakoro ni biti aika koora ni kammanii, ao e korokorei baikai ni karaoi bwa karai, bwa a na rarangaaki i buakon te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi, ao e katamaroaaki n taeraki. 4 A karaoi bwain aon angana aika tomaaki mai eta man taboia aika uoua. 5 Ao te roo* are rarangaaki are nim ma te ebota ibukini kakooana raoi,+ e karaoaki naba mani baikanne, ae te koora, te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki, n aron are e tua Iehova nakoni Mote.

6 A kaaki ngkanne atibu aika oniki i nanon nibwaia aika koora, ao a kaari ni katanei aoia n araia natin Iteraera aika mwaane n aroia ni kaara te bwai ni kanikina.*+ 7 E kaaki baikai i aoni bwain aon te anga are n te ebota bwa taian atibu ni kauring ibukia natin Iteraera aika mwaane,+ n aron are e tua Iehova nakoni Mote. 8 E karaoa ngkanne te uba+ ae ana mwakuri te tia katamaroa n te taetaeri, n aroni karaoan te ebota, ae karaoaki man te koora, te karai ae buruu, te karai ae beboo ae buraen te tiibu, te karai ae uraroo, ao te rinen ae raoiroi ae binokaaki.+ 9 E boraoi abwakina ma raababana ngkana e kauouaaki. A karaoa te uba ae te rakana ni bai* abwakina ao te rakana ni bai raababana ngkana e kauouaaki. 10 A karaoi iai aua te rinan n atibu. Te moan rinan e nim iai te rubi,* te tobati, ao te emerote. 11 Te kauoua n rinan te timaraketo, te tabeiro, ao te iatiba. 12 Te katenrinan te retiem,* te akete, ao te ameteti. 13 Ao te kaaua n rinan te kerutorito, te oniki, ao te iatebi. A kaakaki i nanon nibwaia aika koora. 14 A rinan raoi atibu ni kaineti ma araia natin Iteraera aika mwaane ake 12, ao a kaaraki ni kataneaki aara n aroni kaaran te bwai ni kanikina. E tei te ara teuana ma teuana ibukini baronga ake 12.

15 A karaoi ngkanne i aon te uba taian taurekereke aika biraki aika koora ni koaua aika ai aron taian roobu.+ 16 Ao a karaoi niibwa aika uoua aika koora ao mwaamwa aika uoua aika koora, ao a kanim mwaamwa aika uoua aikai i aon tabon te uba ake uoua. 17 Imwin anne ao a karin roobu ake uoua ake koora i nanoni mwaamwa ake uoua ake i tabon te uba. 18 A karini ngkanne tabon roobu ake uoua i nanon niibwa ake uoua, ao a kanimwi i aoni bwain aon te anga mai moan te ebota. 19 Imwina ao a karaoi mwaamwa aika uoua aika koora, ao a kaaki i tabon te uba ake uoua i aon taboia ake a kaitaraa te ebota nako nanona.+ 20 Ao a karaoi riki mwaamwa aika uoua aika koora ao a kaaki i aon te ebota mai moa, i aani bwain aon te anga aika uoua ni kaan ma te tabo are e tomaaki iai, i etan te roo* are rarangaaki ae bwain te ebota. 21 Imwina ao a a kabaea te uba mani mwamwana ma mwamwan te ebota n te kabae ae buruu, bwa e aonga n aki mwaing mani nnena are i aon te ebota, i etan te roo* are rarangaaki, n aron are e tua Iehova nakoni Mote.

22 E karaoa ngkanne te kunnikai ae akea baina are kunnikain te ebota man te karai ae buruu ni kabane, ae rarangaaki iroun te tia rarangaa te kunnikai.+ 23 E mena bwangabwangan te kunnikai ae akea baina mai nuka n aroni karaoani bwangabwangan te kunnikai ni buaka ae te biti. E rarangaaki ni kauaataoaki mataniwin te bwangabwanga anne ni katobibia, bwa e aonga n aki raeuaaki. 24 Imwina ao a karaoi i rabin te kunnikai are akea baina, taiani bamkuranete* man te karai ae buruu, te karai ae beboo ae buraen te tiibu, ao te karai ae uraroo, aika a binokaaki. 25 Ao a karaoi taiani beero man te koora ni koaua ao a karemarenai beero aikai ma taiani bamkuranete i aon rabin te kunnikai are akea baina ni katobibia, i marenan taiani bamkuranete, 26 a karemarenaa teuana te beero ao teuana te bamkuranete, ao teuana te beero ao teuana te bamkuranete i aon rabin te kunnikai are akea baina ni katobibia, are e kabonganaaki ibukin te beku, n aron are e tua Iehova nakoni Mote.

27 Ao a karaoi kamwarai man te rinen ae raoiroi, ae rarangaaki iroun te tia rarangaa te kunnikai, ibukin Aaron ma natina mwaane,+ 28 ao te bwara ae te kunnikai+ ae te rinen ae raoiroi, te bwara ae te kunnikai ae katamaroaaki ae te rinen ae raoiroi,+ kawaerake*+ aika rinen aika karaoaki man te rinen ae raoiroi ae binokaaki, 29 ao te kabaea n nuka ae karaoaki man te rinen ae raoiroi ae binokaaki, te karai ae buruu, te karai ae beboo ae buraen te tiibu, ao te karai ae uraroo, ae a ikotaki n rarangaaki, n aron are e tua Iehova nakoni Mote.

30 Imwina ao a a karaoa te mwakoro ni biti ae raneanea man te koora ni koaua ae te kanikina ae tabu ibukin te katabu,* ao e koreaki i aona te koroboki ae kaaraki n aroni kaaran te bwai ni kanikina iroun te aomata, ae kangai: “Nibwan te itiaki* Iehova.”+ 31 A kanimwa te kabae ae buruu iai bwa e aonga ni mena i aon te bwara are te kunnikai, n aron are e tua Iehova nakoni Mote.

32 Mangaia are e a bane n tia raoi te mwakuri ibukin te umwanrianna ae tabu* ae te umwa ni botaki, ao a karaoi bwaai ni kabane tibun Iteraera ake e tua Iehova nakoni Mote.+ A boni karaoi n aron tuangaia.

33 A a uota ngkanne te umwanrianna ae tabu+ nakoni Mote ma bwain nanona nako: kaini karekena,+ kain oona,+ kaai ibukini katomaani kain oona,+ ao bouana ma nibwana,+ 34 rabunana ae kunin te tiibu mwaane ae kaurauraaki,+ rabunana ae kunin te tiire, te keeten ae tine mai moana,+ 35 te Ati ni Berita* ma kaina+ ao rabunana,+ 36 te taibora ma bwaina nako+ ao te bwerena ae kaotiotaki, 37 te kaintaura ae te koora ni koaua, taurana+ aika karinanaki ma bwaini mwakuriana nako,+ ao bwaan te taura,+ 38 te baonikarea+ ae te koora, te bwaa ae tabu,+ baika boiarara,+ te keeten*+ ni mataroan te umwanrianna, 39 te baonikarea ae te buraati+ ma warawarana ae te buraati, kaina,+ bwaini mwakuriana nako,+ te taabu ao kainteina,+ 40 keetenin te katawanang, bouana ao nibwana,+ keetenin*+ mataroan oon te katawanang, kabaeana ao kain rooana+ ao bwaai ni mwakuri nako ibukin te beku n te umwanrianna ae tabu, ae te umwa ni botaki, 41 kunnikai aika rarangaaki n te aro ae raoiroi ibukin te beku n te tabo ae tabu, kunnikai aika tabu ibukin Aaron are te ibonga,*+ ao aia kunnikai natina mwaane ake a beku bwa ibonga.

42 Anne aroia tibun Iteraera ni karaoi mwakuri nako ni kaineti ma bwaai ni kabane ake e tua Iehova nakoni Mote.+ 43 Ngke e tuoi aia mwakuri ni kabane Mote, ao e noria bwa a karaoi n aroni karaoaia are e tua Iehova ao e kakabwaiaia Mote.

40 E taku ngkanne Iehova nakoni Mote: 2 “Ni moani bongin te moan namwakaina, ao ko na katea te umwanrianna ae tabu* ae te umwa ni botaki.+ 3 Kaaki te Ati ni Berita* i nanona+ ao ko na tuka te rin nakon te Ati ni Berita n te keeten.+ 4 Ko na karina te taibora+ ao bairei bwain aona, ao uota te kaintaura ni karinna+ ao kaurai taurana.+ 5 Ao kaaki te baonikarea are te koora ibukini baika boiarara+ i matan te Ati ni Berita, ao kaaki te keeten* ni mataroan te umwanrianna ae tabu.+

6 “Ko na kaaki baonikarean te karea ni kabuekaki+ i moani mataroan te umwanrianna ae tabu ae te umwa ni botaki, 7 ao kaaki te taabu i marenan te umwa ni botaki ao te baonikarea, ao kanoaia n te ran.+ 8 Ao katea oon te katawanang+ ni katobibia ao katekea keetenin*+ mataroan te katawanang. 9 Imwina ao ko na anaa te bwaa ae tabu+ ao kabira iai te umwanrianna ae tabu ma bwaai ni kabane ake iai,+ ao katabua ma bwaina nako, bwa e aonga n riki bwa te bwai ae tabu. 10 Ko na kabira baonikarean te karea ni kabuekaki ma bwaini mwakuriana nako, ao katabua te baonikarea bwa e aonga n riki bwa te baonikarea ae moan te tabu.+ 11 Ao kabira te taabu ma kainteina ao katabua.

12 “Ao kaira Aaron ma natina mwaane ni kaania ma mataroan te umwa ni botaki ao tebokiia n te ran.+ 13 Ao ko na karini kunnikai aika tabu i aon Aaron+ ao kabiria+ ma ni katabua, ao e na beku bwa au ibonga.* 14 Imwin anne ao kairiia natina mwaane ni kaania ao karin aia kamwarai i aoia.+ 15 Ko na kabiriia n aron are ko kabira tamaia,+ ao kioina ngkai a kabiraki, a na beku bwa au ibonga n aia roro nako.”+

16 E karaoi bwaai ni kabane Mote n aron are e tua Iehova nakoina.+ E karaoia n aron tuangana.

17 E kateaki te umwanrianna ae tabu n te moan namwakaina n te kauoua n ririki ae teuana iai bongin te namwakaina.+ 18 Ngke e a katea te umwanrianna ae tabu Mote ao e katoroi nibwana,+ e katei kain oona,+ e karini kaai ibukini katomaaia,+ ao e katei bouana. 19 E taakina kunnikain+ te umwanrianna ae tabu i aoni kaina ao e kaaki rabunan+ te umwanrianna i aon anne, n aron are e tua Iehova nakoni Mote.

20 Imwin anne ao e anai baaba ake Bwaai ni Kaotioti+ ao e karini n te Ati,+ ao e kanimwi kain+ te Ati ao e katokaa rabunan+ te Ati i aona.+ 21 E uota te Ati ni karinna n te umwanrianna ae tabu ao e katinea te keeten+ ni nnena bwa e na tuka te rin nakon te Ati ni Berita,+ n aron are e tua Iehova nakoni Mote.

22 Imwina ao e kaaki te taibora+ n te umwa ni botaki n iteran te umwanrianna ae tabu mai meang i tinanikun te keeten, 23 ao e kauaataoi bwerena+ i aona i matan Iehova, n aron are e tua Iehova nakoni Mote.

24 E kaaki te kaintaura+ n te umwa ni botaki i moan te taibora, n iteran te umwanrianna ae tabu mai maiaki. 25 E kaurai taian taura+ i matan Iehova, n aron are e tua Iehova nakoni Mote.

26 Imwina ao e kaaki te baonikarea are te koora+ n te umwa ni botaki i moan te keeten, 27 bwa e aonga ni kabueki ni kabubui i aona+ baika boiarara,+ n aron are e tua Iehova nakoni Mote.

28 Ao e kaaki te keeten*+ ni mataroan te umwanrianna ae tabu.

29 E kaaki baonikarean te karea ni kabuekaki+ i rarikini mataroan te umwanrianna ae tabu are te umwa ni botaki, bwa e aonga n anga te karea ni kabuekaki+ ao te karea ae te amwarake i aona, n aron are e tua Iehova nakoni Mote.

30 E kaaki ngkanne te taabu i marenan te umwa ni botaki ma te baonikarea, ao e kanoaia n te ran ibukin te tebobai ao te tebowae.+ 31 A teboki iai baia ma waeia Mote ao Aaron ma natina mwaane. 32 A teboki baia ma waeia+ ngkana a rin n te umwa ni botaki ao ngkana a kaania te baonikarea, n aron are e tua Iehova nakoni Mote.

33 Ni kabaneana ao e katea oon te katawanang+ ni katobibia te umwanrianna ae tabu ma te baonikarea, ao e katinea te keeten* ni mataroan te katawanang.+

Mangaia are e katiaa te mwakuri Mote. 34 Ao e rabunaki te umwa ni botaki n te nang, ao e on te umwanrianna ae tabu ni mimitongin Iehova.+ 35 E a aki kona Mote n rinnako n te umwa ni botaki, ibukina bwa e tiku te nang i etana ao e onrake te umwanrianna ae tabu ni mimitongin Iehova.+

36 Ao ngkana e mwemwerake te nang mai etan te umwanrianna ae tabu, ao a a manga reita mwanangaia tibun Iteraera i nanoni mwamwanangaia ni kabane.+ 37 Ma ngkana e aki mwemwerake te nang, ao a na bon aki reitaanako mwanangaia ni karokoa te bong are e mwemwerake iai.+ 38 Bwa e mena ana nang Iehova i etan te umwanrianna ae tabu n te ngaina, ao e tiku te ai i etana n te tairiki ao a noria tibun Iteraera ni kabane i nanoni mwamwanangaia ni kabane.+