Te Kataumwane

KARAOA AM BABAIRE AE NAKORAOI

ANA BOTO N REIREI TE BAIBARA: “A na bon nakoraoi ana babaire te aomata ae mwakuri korakora, ma a na boni karako aia bwai aomata ni kabane aika taenoa.”​—Taeka N Rabakau 21:5.

AE NANONAKI IAI: Ngkana ko taningamarau n iririi raoi am babaire, ao a na nakoraoi bwaai ni kabane ibukim. Ngaia are babaire raoi imwain ae ko kabongana am mwane. Uringnga are ko aki kona ni kabooi bwaai ni kabane aika ko tangiri. Ngaia are kabongana raoi am mwane.

TE BWAI AE KO KONA NI KARAOIA:

• Tai bibita am kataumwane. Korei mwin am kabanemwane ni kabane, ao karinani. Ao karaoa am kataumwane i aoni baike ko karinani. Ngkana e riao am kabanemwane n te itera teuana, anaa mwanen teuana nakon anne. N te katoto, ngkana e riao ae ko kabanea ibukini bwaan am kaa, kabongana am kataumwane ibukin te bwai ae aki bati ni kakawaki​—tao n aron te nako n amwarake n te kirabu.

• Tai taarau n aki akaka. Kabanea am konaa bwa ko na aki taarau. Ma kaikoa am mwane ibukini baika ko kainnanoi. Ngkana ko a kainnanoa te tangomwane, kataia waekoa ni kabwaraa am taarau bwa e na aki kekerake rakana. Ngkana ko a taarau, bairea arom ni kabwaraa, ao kakaonimaki n iria.

  Ngkana e tataarau te aomata ane e na bati riki ana kabanemwane. Ngaia are ngkana ko a kainnanoa te tangomwane, iangoia raoi moa.

KARAROAI AROARO AIKA KARUANIKAI

ANA BOTO N REIREI TE BAIBARA: “E aki kamaraua ana tano te aomata ae taningaroti n tain te kamwaitoro, mangaia are e na bubutii n tain te tai bwa ai akea ana bwai.”​—Taeka N Rabakau 20:4.

AE NANONAKI IAI: E kona ni karako am bwai ibukin te taningaroti. Ngaia are mwakuri korakora ao karaoa raoi am kataumwane bwa a aonga naba n reke baika ko kainnanoi n taai aika imwaim.

TE BWAI AE KO KONA NI KARAOIA:

• Mwakuri korakora. Kawakina raoi am mwakuri n arom n taningamarau iai ao ni kona n onimakinaki. A tangira te taningamarau taani kammwakuri.

• Tai babakanikawai. Tai iraa mairoun ane e kammwakuriko. Te babakanikawai e kona ni kabarekaa taekam, ao e kona ni kangaanga iai manga reken am mwakuri imwina.

• Tai nanonrang. Tangiran te mwane n te aro ae riao e kona n urua marurungim ao reitakim ma tabemwaang. Uringnga are e kakawaki riki te maiu nakon te mwane.

ANA BOTO N REIREI RIKI TABEUA TE BAIBARA

TAI KABANEA AM TAI AO AM MWANE N AROARO AIKA BUBUAKA.

“Bwa ane e na karako ana bwai te tia kokoro ni manging ao te tia buabeka, ao te nimatutu e na kunnikaia temanna ni kunnikai aika mangaingai.”​—TAEKA N RABAKAU 23:21.

TAI KABATIAA TE RARAOMA.

“Katoka raraomaeakinani maiumi bwa tera ae kam na kanna, ke tera ae kam na nimma, ke raraomaeakinan rabwatami bwa tera karabaami.”​—MATAIO 6:25.

TAI MATAAI.

“E ingainga ni karekea te kaubwai te aomata ae mamataai, ao e aki ataia ae e na taonakinako ni karakon ana bwai.”​—TAEKA N RABAKAU 28:22.