Te Koroboki i Aon te Oo

Imwina riki, e a riki Beretiata bwa te uea i Baburon. N te tairiki teuana, e a kaoia nga ma nga aomata aika kakannato i Baburon nakon ana baka n amwarake. E tua nakoia ana toro bwa a na anai mwangko aika koora ake e anai ngkoa Nebukaneta man ana tembora Iehova. E moi Beretiata ma ana iruwa ni mwangko aikai ao a neboa atuaia. N te tai naba anne, e a kaoti bain te aomata ao e korei taeka aika kamimi i aon oon te tabo n amwarake.

E maakunrang Beretiata ao e weteiia ana tia kaiwa. E berita nakoia ni kangai: ‘Ngkana iai ae e kona ni kaotii nanon taeka aikai ao N na karikia bwa te kateniman ni mwaaka i Baburon.’ A kataia naakai ma akea ae e kona ni kaotii nanon taeka aikai. Imwina, e a rinnako te ueannaine ao e taku: ‘Iai te mwaane ae arana Taniera ae e kakabwarai nanoni bwaai nakon Nebukaneta. E kona ni kaotii nanon taeka aikai nakoim.’

Ngaia are e a roko Taniera iroun te uea. E taku Beretiata nakoina: ‘Ngkana ko kona ni wareki ao ni kaotii nanon taeka aikai, ao N na anganiko te mwae n roroa ae te koora ao N na karikiko bwa te kateniman ni mwaaka i Baburon.’ E taku Taniera: ‘I aki tangiri am bwaintangira, ma N na kaotii nanon taeka aikai. E kainikatonga tamam ae Nebukaneta, ao e kananorinanoaki iroun Iehova. Ko atai bwaai nako ake a riki nakoina, ma ko aki naba karinea Iehova ngkai ko moi wain ni mwangko ake koora ake bwain ana tembora Iehova. Ngaia are e a korei taeka aikai te Atua: Mene, Mene, Tekeri, ao Baretin. Nanon taeka aikai bwa a na kataenikaia Baburon I-Miria ma I-Botia ao e nang akea ueam.’

N taraana ao bon akea ae kona ni kataenikaia Baburon. E kamanoaki te kaawa aei n te oo ae matenten ao te karaanga ae nano. Ma n te tairiki naba anne ao a a buakanaki irouia I-Miria ma I-Botia. E kaoraa te karaanga Ueani Botia ae Tairati bwa a aonga n rin rake ana tautia nakoni mataroan te kaawa. Ngke a a roko ikanne ao a uki mataroa! A rinnako ana taanga ni buaka, a kataenikaia te kaawa, ao a kamatea te uea. Imwina, e a riki Tairati bwa te tia tautaeka i Baburon.

N ana moan ririki n tautaeka Tairati, e a katanoataa aei: ‘E a tia n tuangai Iehova bwa N na manga katea ana tembora i Ierutarem. A kona n nako ana aomata aika kan ibuobuoki.’ N aron ae e a tia ni beritanna Iehova, a boni bati I-Iutaia aika okiri abaia 70 te ririki imwini kamaunaan Ierutarem. Ao Tairati e kaoki nakon te tembora mwangko ake koora ma tirewa ao bwaai ake e anai ngkoa Nebukaneta. Ko nora aron Iehova ni buokiia ana aomata rinanon Tairati?