Te Katanoata Ae Kaokoro

N TOKIN ana boowi te Watch Tower Bible and Tract Society of Pennsylvania ibukin te ririki ae booaki n Okitobwa 7 2000, ao iai te katanoata ae kaokoro ae karaoaki iroun te tia babaire ae John E.  Barr, ae kaain te Rabwata n Tautaeka. Te kaongora aei e reitaki ma maroro ake a karaoaki mai imwaina n te bong anne, iroun Theodore Jaracz ao Daniel Sydlik.​—Nori iteraniba 22-26 n te maekatin aei.

E taekina te koaua ae kakawaki Brother Barr ngke e kangai: “‘Te toro ae kakaonimaki ma ni wanawana’ ao ana Rabwata n Tautaeka, a a tia ni mwiokoaki ni mwakuri aika kakawaki ao n rababa riki nakon are a mwiokoaki iai botaki ake a kinaaki n tuan te aba. A katauaki bwaai ake a na kona ni karaoi, botaki aikai, ni kaetietin aia botaki. Ara Toka ae Iesu Kristo, e mwiokoa te toro ae kakaonimaki i aon ana ‘bwai’ ni kabane, ke bwaai ake a reitaki ma te Tautaeka n Uea, ake a mena i aon te aonnaba.”​—Mataio 24:45-47.

N reitaki ma te botaki ae te Pennsylvania corporation e taekina ae kangai Brother Barr: “Ma ngke e moani kateaki te Watch Tower Bible and Tract Society of Pennsylvania n 1884, ao maikanne are e a moana naba iai karaoan te mwakuri ae kakawaki ibukira. Ma e ngae n anne, te botaki aei bon tii te botaki ae kinaaki n tuan te aba, ae e kona ni kabonganaki iroun ‘te toro ae kakaonimaki ae wanawana’ ngkana e kainnanoaki.”

N aia maroro, Taari aika Sydlik ao Jaracz a kabwarabwara bwa e ngae ngke “te toro ae kakaonimaki ae wanawana” e mwiokoaki n ana bwai ni kabane te Uea ake i aon te aonnaba, ma tiaki nanona bwa e nang tukiia kaain te koraki ae te toro ae kakaonimaki bwa a na kariaia tabeman mwaane aika tau aika kaain te koraki ae “tiibu tabemang,” bwa a na karaoi mwakuri tabeua ake a reitaki ma tararuan te botaki. (Ioane 10:16) Akea naba bukina man te Baibara ae kaotia bwa kaain baba n tararua ni botaki ake a kinaaki n tuan te aba ake a kabonganaki irouia Ana Tia Kakoaua Iehova, a riai n rineaki mai buakoia Kristian ake a kabiraki.

Brother Barr e kaongoia kaain te botaki bwa tabeman kaain te Rabwata n Tautaeka ibukia Ana Tia Kakoaua Iehova ake a beku bwa kaain baba n tararua ao aobitia ni botaki tabeua aika a kinaaki n tuan te aba, ao a kabonganaki iroun “te toro ae kakaonimaki ae wanawana” n te United States, a a tia n anga nanoia bwa a na kerikaki man taian baba n tararua aikai ni kabane. Taari-mwaane aika tiibu tabemwaang ake a tau nako iai a rineaki bwa onean mwiia.

E boni manena te babaire aei. E reke riki iai aia tai kaain te Rabwata n Tautaeka ni katauraoa te amwarake n taamnei ao ni mwamwannanoa kainnanoia taari ni katobibia te aonnaba n te itera n taamnei.

N tokin ana kabwarabwara, e taekina ae kangai te tia babaire nakoia kaain te botaki: “E ngae ngkai mwakuri tabeua aika reitaki ma waakin te botaki n tuan te aba, ao mwakuri n tararua tabeua a mwiokoaki nakoia mataniwi aika rabakau, . . . ma a bane ni mwakuri i aan aia kairiri n taamnei kaain te Rabwata n Tautaeka. . . . Ti na bane n tataro ma ni kaantaninga Iehova bwa e na kakabwaia ara mwakuri nako ake ti karaoi ni kaineti ma nanona, bwa e aonga ni karineaki ma n neboaki arana ae kakannato.”