Aia Ribooti Taan Ua Rongorongo Ibukin Te Tautaeka N Uea

Butimwaean te Rongorongo ae Raoiroi i aon Latvia

E KATERETEREAKI n te Baibara bwa bon ana kaantaninga te Atua bwa “aomata ni kabaneia . . . a na kamaiuaki, ma ni karekea atakin te koaua.” (1 Timoteo 2:4) Te koraki ngkoa ake a aki anganaki inaaomataia n ongora n te euangkerio a tabe n ongoraa ngkai! I Latvia, n ai aroia naba taabo tabeua n te aonnaba, aomata aika a kakaokoro nako roroia ma aroaroia a tabe ni butimwaea te rongorongo, n aron ae e kaotaki n rongorongo aikai.

• I Rēzekne, ae te kawa teuana i mainikun Latvia, te tina ma natina te aine ae tebwi tabun ana ririki, a titirakina te aine temanna ae nakonako i nanon te kawai, te kaetieti ibukin kawaia n te tabo arei. Imwin anganakiia te kaetieti, te aine arei, are bon ngaia kaain Ana Tia Kakoaua Iehova, e kaoiia nakon aia botaki taan Kakoaua.

Kioina ngke te tina ma natina aio a taua te Aro, a baireia bwa a na kaea te botaki. I aoni kawaiia, a boraraoi bwa ngkana a nora te aki nakoraoi teuana n te botaki, ao a na waekoa naba ni kitanna. Ma, e rangi n anainano te botaki n te aro are ai bon akea iangoan kani kitanan te botaki irouia. A butimwaea te reirei n te Baibara ao a moana rorokoia n te botaki ni katoa tai. Bon tii tenua te namwakaina, ao a kaota nanoia ni kan ira kabutan te rongorongo, ao a ingainga nanoia ni kan babetitoaki.

• N te kaawa ae bubura teuana i maeaon Latvia, te tia Kakoaua temanna e kaitiboo ma Nei Anna ae ai 85 ana ririki ni maiu, are e kaota raoi nanona ni kan ongora ao e butimwaea te reirei n te Baibara. Natin te unaine aei te aine, ma kaain ana utu tabeman, a kakorakoraia n totokoia. Ma e aki kariaia te totoko anne Nei Anna, ao e aki naba kariaia karana ao aki-marurungina bwa a na tuka ana reirei n te Baibara.

N te bong teuana, Nei Anna e tuanga natina are te aine bwa e nang babetitoaki. “Ngkana ko babetitoaki, N na kanakoko nakon te tabo are a tararuaki iai kaara,” e kaeka natin Nei Anna. Ma e aki bara nanon Nei Anna ni kakamaakana aio. Ibukin aki-marurungin rabwatana, e a babetitoaki ni bon mwengana.

Tera aroaron natin Nei Anna ibukin te bwai are e riki? E bitaki nanona, ao e katauraoa te amwarake ae kaokoro man raka arona ibukin tinana imwin babetitoakina. Imwina e titirakina tinana, “Ngkai ko a tia ni babetitoaki, tera aron am namakin?” Tera ana kaeka Nei Anna? “Kanga aron te tei ae e a tibwa bungiaki!”

• N Ritemba 1998, uoman taani Kakoaua a kaitiboo ma te aobitia n te taanga ni buaka n te Soviet Union rimoa, are e a tia n ritaea. Ibukina bwa e kakoaua te tia Karikiriki, e butimwaea te reirei n te Baibara, ao imwina riki e a manga reirei naba buna. A waekoa n rikirake, ao a waekoa n riki bwa taan ua rongorongo aika a tuai ni babetitoaki. N tain te kabuebue are imwina, ao e a babetitoaki teuare te tautia ngkoa. Korakoran tangiran bwaai n taamnei irouia te taanga aio e a riki bwa kaungaan nanoia kaain te ekaretia ni kabaneia. Irarikin naba anne, a kabongana korakoraia ni mwakuri n onikakin te mwenga teuana nakon te Maneaba n Uea ae tamaroa.