Tera ae Ko Onimakinna Ibukin Mweeraoim?

E kateitea baina ni kaboo te roro-n-rikirake ae Josué nakoia ana utu ao raoraona ake a mena n te kaawa ae uarereke, i aon Aberika Maeao.a Imwina e a mwananga nakon te kaawa ae bubura ike e na kakaaea iai te mwane are e taku bwa e kainnanoia ibukin mweeraoina. Ma imwin rokona iai, e a waekoa n nora buren ana kaantaninga ngke e a ataia ae e aki kona ni waekoa n reke te kaubwai n te kaawa arei.

E A BWARA nanon Josué ibukini kangaangan te maiu n te kaawa arei. E rangi ni kaokoro te maiu n te kaawa ae bubura ma are e a tia ni kaantaningaia, ao e korakora nanon Josué ni kan okiriia ana utu ma raoraona ake a tiku imwina. Ma e tei nangin kakanikoana irouia tabeman kaain ana kaawa. E raraoma ni kangai: ‘A na atongai bwa I kabwakaroro ibukina bwa e aki reke arou n te kaawa ae bubura.’

Ma ae e katabetabea riki, bon nanokawakia ana karo are a na taonaki iai ibukina bwa a onimakinna ibukin buokaia te tianti. I nanon ana tai Josué ni keiakina tabeaiangana aio, ao e reke ana mwakuri ae e aki rangi ni karineaki iai, ao e abwabwaki ana aoa ni mwakuri iai, ma ana kareke mwane iai e rangi ni uarereke ni kabotauaki ma are e a tia n iangoia. E a boni kua man ana mwakuri korakora. E a kekerikaki karaoan mwakuri ni Kristian irouna ni katoa wiki, aika bwaai aika rangi ni kakawaki irouna rimoa. E namakina te nanokawaki ao te maroaa ngkai e a raroa nako ma ana utu ao raoraona. E kunea bwa e aki kona ni karekea tei mweeraoi are e ingainga ni kakaantaningaia rimoa, n te kaawa arei.

E ngae ngke a kakaokoro aara ma taabo, ma e okioki rikin ae ai aron ae riki nakon Josué. Tiaki nanona bwa e mataai ni kanibwaibwai Josué, ma e bon tii kakaaea mweeraoina. E boni kakoauaa bwa e na mweeraoi riki n te kaawa ae bubura nakon ana kaawa ae uarereke. E koaua bwa n taai tabetai, tao e kona te aomata ni karikirakea riki kaubwaina, ma tiaki nanona bwa e a reke te mweeraoi ni koaua irouna. E bon aki koro bukin anne nakon Josué, ao e na aki reke naba anne irouia angiia aomata aika kataia ni karaoa are e karaoia teuaei. E kairira ngkanne aio bwa ti na titiraki bwa ‘Tera te Mweeraoi?’

E kakaokoro aron iangoan te mweeraoi irouia aomata aika a kakaokoro nako. E taku te rikitinare teuana bwa te mweeraoi bon “te inaaomata man maakakin te kabuanibwai” ke “te inaaomata man te maaku ke te tabeaianga.” Angiia aomata a ataia bwa e aki kona n reke “te inaaomata man maakakin te kabuanibwai,” ni boong aikai. A rau naba nanoia ngkana a taku bwa a mweeraoi, e ngae ngkana a otabwaniniaki ni kangaanga aika karuanikai.

Tera arom iai? Tera ae ko onimakinna ibukin reken te mweeraoi? E kona ni kuneaki n te kaawa ae bubura ao tiaki n te kaawa ae uarereke, n aron ana iango Josué? Ke e reke n te mwane, n aki ongeia bwa e reke iia ke e kanga aron karekeana? Ke e reke ngkana te aomata e uaiakina kabatiaan karineana irouia kaain ana kaawa? N aki ongeia bwa tera am koaua ibukin karekean te mweeraoi, ma e na maanra mweeraoim anne, ibukim ma am utu?

Ti na iangoi aanga aika tenua ake a uaiakin aomata ibukin reken te mweeraoi, n aron te tabo are a maeka iai, te mwane, ao ai te nakoa ke te karineaki. Imwina, ti na manga neneria bwa e reke iia te mweeraoi ae koaua ma n teimatoa.

[Kabwarabwara ae nano]