E Bon Tabeakinai te Atua?

Kaeka aika taabangaki:

▪ “E rangi ni kakawaki riki te Atua ao e aki tau ni mutiakin au kangaanga.”

▪ “I aki kakoauaa bwa e mutiakinai te Atua.”

Tera ae e taekinna iai Iesu?

▪ “Tiaki a kaboaki niiman te tibaaro n teuana te bene? ao e aki manuokaki temanna n aikai i matan te Atua. Ma a boni bane ni warekaki iran atumi. Kam na tai maku: kam bongana riki nakoia tibaaro aika bati.” (Ruka 12:6, 7) Akea te nanououa bwa e reirei Iesu bwa e bon tabeakinira te Atua.

▪ “Tai iango n raraoma, ni kangai, Tera karara? Ao, Tera nimara? Ao, Tera karabara? Ba a ukoukori baikai ni kabane Tientaire; ba E ataingkami Tamami are i karawa ba a kai nanomi ngkana akea baikai i roumi.” (Mataio 6:31, 32) E boni kakoauaa Iesu bwa e atai baike ti kainnanoi n tatabemanira nako te Atua.

E BON taekinaki n te Baibara bwa e tabeakinira te Atua. (Taian Areru 55:22; 1 Betero 5:7) Ma ngkana ngaia anne ao bukin tera ngkai ti rangi ni karawawataaki ni boong aikai? Ngkana ngaia bwa e tatangira ao moan te mwaaka te Atua ao bukin tera bwa e aki karaoa te bwai teuana ni katoka te karawawataaki?

E irekereke te kaeka nakon te titiraki anne ma te koaua ae e aki rangi n ataaki irouia aomata aika bati, ae Tatan te Riaboro bon te tia tautaeka n te waaki ae buakaka n te aonnaba aei. Ngke e kariria Iesu Tatan, e kataia n anganna tautaeka ni kabane n te aonnaba ngke e kangai: “N na anganiko tauan taekan aikai ni kabane ma tamaroaia: ba I anganaki aei; ao ane I kan anganna, ao I anganna.”​—Ruka 4:5-7.

Antai ae angan Tatan mwaakana n tautaeka n te aonnaba? Ngke a ongeaba iroun Tatan ara moani karo aika Atam ao Ewa ao n tannako mairoun te Atua ma ana kaetieti ao a rinea iai Tatan bwa te tia tautaekania. Ni moa man tain te karitei anne, e a tia n taotaona nanona Iehova ae te Atua ni kariaia te tai ae maan bwa e na kaotia iai ae e kabwaka ana tautaeka Tatan. E aki kairoroia aomata Iehova bwa a na beku irouna ma e a tia ni kauka te kawai ibukira are ti na okiria iai.​—I-Rom 5:10.

Ibukina bwa e tabeakinira te Atua, e a tia ni baireia bwa Iesu e na kainaomataira mai aan ana tautaeka Tatan. N te tai ae uakaan ngkai ao Iesu e na “kataea ana kai teuare iai i rouna maakan te mate, are te riaboro.” (Ebera 2:14, 15a) Ni karaoan anne e na “uru ana makuri nako te riaboro.”​—1 Ioane 3:8.

E na manga riki te aonnaba aei bwa te bwaretaiti. N te tai anne ao “E na kabane rannimataia [aomata] te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki: ba a mauna nako bwaai rimoa.”​—Te Kaotioti 21:4, 5.a

[Kabwarabwara ae nano]

[Taamnei n iteraniba 8]

E na manga riki te aonnaba aei bwa te bwaretaiti