E Boni Butimwaei Aeka n Taromauri

Nako te Atua? Kaeka aika taabangaki:

▪ “A bane ni kairiri Aaro nakon te Atua.”

▪ “E a aki akaka am koaua ngkana e bon nako raoi mai nanom te bwai ae ko kakoauaa.”

Tera ae e taekinna iai Iesu?

▪ “Kam na rin n te mataroa are wariki: ba e warebwe te mataroa, ao e rababa te kawai are nako n te mate, ao a uanao akana rin iai. Ba e wariki te mataroa, ao e irariki te kawai are nako n te maiu, ao a karako akana kunea.” (Mataio 7:13, 14) E aki kakoauaa Iesu bwa a bane Aaro ni kairiri nakon te Atua.

▪ “Ane a na kangai nako Iu aomata aika bati n te bong arei, Te Uea, Te Uea, tiaki ti taetae ni burabeti n aram? ao tiaki ti kanakoia taimonio n aram? ao tiaki ti karaoi kakai aika bati n aram? Ao Ngai N na taku nako ia, I bon aki ataingkami ma ngkoa: naako mai Rou, ngkami aika kam kakaraoa ae buakaka.” (Mataio 7:22, 23) E aki butimwaeia aomata nako Iesu aika a taku bwa taan rimwina.

A MWAITI aomata aika a taua te Aro ake e rangi ni kakawaki irouia oin aia koaua ao aia katei. Ma tera ae na riki ngkana a aki boraoi reirei aikai ma ae taekinaki n te Baibara ae Ana Taeka te Atua? E kaota karuanikain irakin aia katei aomata Iesu ngke e kangai nakoia mataniwi n te Aro n ana bong: “Kam urua ana taeka te Atua iai i bukin ami taeka nikawai.” Ao e reitia nako ni mwaneweani baika e taekin te Atua ni kangai: “A karaoiroai ni matanriaia; ma a raroa nanoia mai Rou. Ma akea manen taromauriau i rouia, ngkai a reirei aia tua aomata ba aia taeka n reirei.”​—Mataio 15:1-9; Itaia 29:13.

E boni kakawaki naba te aroaro ni maiu ao tiaki tii taiani koaua. E taekinaki ae kangai n te Baibara ibukia te koraki aika a taku bwa a taromauria te Atua: “A taku ba a ata te Atua; ma a kaakea n aia makuri nako.” (Tito 1:16) Ni koauana e taekinaki ae kangai n te Baibara ni kaineti ma te koraki aika maiu n ara tai aikai: “N onean mwin tangiran te Atua irouia, a na tangira te kakukurei. E ngae ngke a baka n taua te Aro ma e aki oti koauan te Aro ni maiuia. Tai reitaki ma aomata aikai.”​—2 Timoteo 3:4, 5, Contemporary English Version.

E bon riai bwa e na nako raoi mai nanom am koaua ma e bati riki ae kainnanoaki. Bukin tera? Ibukina bwa e boni kona naba ni kairua ana koaua te aomata e ngae ngke e nako raoi mai nanona. Ngaia are e a rangi ni kakawaki te atatai ae eti ibukin te Atua. (I-Rom 10:2, 3) E na buokira ni kakukureia te Atua karekean te atatai aei iroura ao kaboraoani maiura ma ae taekinaki n te Baibara. (Mataio 7:21) N te koaua ni koaua e irekereke te Aro ae eti ma te nano ae raoiroi, te koaua ae eti, ao te mwakuri naba ae eti. Ao karaoan te mwakuri ae eti e nanonaki iai karaoan nanon te Atua ni katoa bong!​—1 Ioane 2:17.

 Ngkana ko kan atai rongorongo riki tabeua ni kaineti ma tera ae taekinaki n te Baibara ibukin te Atua, reitaki ma Ana Tia Kakoaua Iehova ibukini karekean te reirei n te Baibara ae akea boona.

[Taamnei n iteraniba 9]

E irekereke te Aro ae eti ma te nano ae raoiroi, te koaua ae eti, ao te mwakuri naba ae eti