Tera ae A Maakua Aomata Aika Bati?

“E aki kainnanoaki onimakinan te Aro bwa ko aonga n iangoa ae ti nang reke n te kabuanibwai.”​—STEPHEN O’LEARY, ASSOCIATE PROFESSOR, UNIVERSITY OF SOUTHERN CALIFORNIA.a

KO KAKOAUAI taeka aika taekinaki i eta? A na rinanoaki tabeua bukini maakakini kanoan taai aika a na roko irouia aomata ni kaongora aikai, teuana imwin teuana. Ma e na kaotaki naba bukina ngkai ko kona ni kakoauaa bwa e na akea tokin te maiu n te aonnaba aio. Iai bukini kantaningaani baika raraoi, e ngae ngke iai naba baika koaua aika kabwaranano aika ko nangi wareki.

E teimatoa n rikirake te koaua ae ti kona ni kabuanibwai mani bwaai ni buaka aika mwaakaroiroi. N te ririki 2007, e kangai ana kauring te Bulletin of the Atomic Scientists; “E rangi ni karuanikai riki taian rinerine aika a riai ni karaoi aomata ngkai ma ngke a moani kabwakaaki boom ake a mwaakaroiroi i aon Hiroshima ao Nagasaki.” E aera ngkai e tabeaianga te aba n aei? E ribootinaki n te Bulletin n 2007 bwa iai ngkai 27,000 tabuni boom aika mwaakaroiroi ao 2,000 mai buakoia a a “tauraoi ni kanakoaki n te miniti naba aei.” E ngae ngkana tii teutana te katebubua mwaitini bwaai ni buaka ake a tia ni karebweaki, ma e rangi ni karuanikai mwia!

E a tia ni kerikaaki te koaua ae ti kona ni kabuanibwai mani bwaai ni buaka aika mwaakaroiroi man te tai anne? E taekinaki n te SIPRI Yearbook 2009 bc bwa aaba aika a rangi ni bati aia bwai ni buaka aika Tiaina, Buranti, Rutia, Buritan ao te United States, a a bane ni waaki “ni katauraoi aia bwaai ni buaka aika mwaakaroiroi aika boou, ke a a tia ni katanoatai aia iango ibukini karaoan anne.” Ma e taekinaki naba n te yearbook bwa tiaki tii aaba aikai n iai aia bwaai ni buaka aika mwaakaroiroi. A katautaua taani kakaae bwa kaka 60 nakon 80 aia boom aika mwaakaroiroi aaba aika Inria, Pakistan ao Iteraera. A taekinna naba bwa iai ni katobibia te aonnaba 8,392 bwaai ni buaka aika mwaakaroiroi aika tauraoi ni kanakoaki!

E bae ni karika te kabuanibwai n te aonnaba bibitakini kanoani boong. E taekinna te Bulletin of the Atomic Scientists ae mwaneweaki i eta bwa “kabuanibwai aika riki mani bibitakini kanoani boong, ai aroni karawawata ake a riki mani bwaai ni buaka aika mwaakaroiroi.” A a manga taekin riki kauring aika matoa akanne, taan rabakau ni bwain te aonnaba aika a onimakinaki n aron Stephen Hawking ae te tia rabakau are e mwakuri rimoa n te Kuura ae Rietata i Cambridge, ao Sir Martin Rees ae te Mataniwi n te Trinity College n te University of Cambridge. A namakinna bwa aki kabonganaan raoi kukune aika boou, ao rotakin te otabwanin n aia mwakuri aomata, e kona ni bita tein te maiu n te aonnaba, ke ni katoka naba aia waaki aomata.

A raraoma mirion ma mirion ni katautauan te kabuanibwai ae na riki. Taibina te kibu n taeka ae “end of the world” ao te ririki “2012” n te Internet search engine, ao ko na kunei bubua ma bubua iteraniba ni kaineti ma karioiango ibukin rokon te toki n te ririki anne. E kanga n riki aio? E warebwaiaki bwa e na toki n te ririki 2012 te karenta ngkoa ae te Maya ae ataaki bwa te “Long Count.” A bati aika a maaku bwa tao aio kanikinaean tokin aia waaki aomata n aron ae ti ataia.

A kakoauaa aomata aika bati aika taua te Aro bwa e reiakinaki n te Baibara ae e na kamaunaaki te aonnaba aei. A kakoauaa bwa a na bane aomata aika onimaki n nako karawa, ma a na katukaki nikiran te botannaomata ni kammarakaki n te aonnaba ae mangaongao, ke a na karenakoaki nako moone.

Te koaua, ae e taekinaki n te Baibara bwa e na kabaneaki n uruakaki ao ni kamaunanakoaki te aonnaba? E anga te kauring te abotoro Ioane ae kangai: “Tai waekoa ni kakoauai taeka nako aika taraa n reke rinanon te taamnei, ma tuoi moa taeka aikai n nori bwa a bon nako mairoun te Atua ke a aki.” (1 Ioane 4:1) N oneani mwin ae ko a kakoauai naba aia taeka tabeman, e aera ngkai ko aki kauka te Baibara ni bon noria bwa tera ae taekinaki ibukin tokin te aonnaba? Ko na kubanako ni baika reiakinaki iai.

[Kabwarabwara ae nano]

[Picture Credit Lines n iteraniba 4]

Mushroom cloud: U.S. National Archives photo; hurricane photos: WHO/League of Red Cross and U.S. National Archives photo