A butimwaea te ibuobuoki man te onnaoraki Ana Tia Kakoaua Iehova?

E taekinna Iesu bwa “a aki kainnanoa te taokita aomata aika marurung, ma a kainnanoia akana aoraki.” (Mataio 9:12) E kaotia iai bwa akea tukani karekean te bwainnaoraki mairouia taokita n te Baibara. Ngaia are a kukurei Ana Tia Kakoaua Iehova ni butimwaea te ibuobuoki man te onnaoraki ao bwainnaoraki naba. A kani kateimatoa marurungia ao ni kaananaua naba maiuia. Ni koauana, tabeman mai buakoia Ana Tia Kakoaua Iehova, bon taokita naba n aron te Kristian are Ruka n te moan tienture.​—I-Korote 4:14.

Ma a aki butimwaei aeka ni bwainnaoraki aika kauntaba ma booto n reirei n te Baibara, Ana Tia Kakoaua Iehova. N te katoto, a aki butimwaei aeka ni karinraraa nako ibukina bwa e tabuaki n te Baibara anaakin te raraa ibukini kateimatoaan te maiu. (Karikani Bwaai 9:4; Nakoaia Ibonga 17:1-14; Mwakuri 15:28, 29) E tabuaki naba n Ana Taeka te Atua bwainnaoraki aika irekereke ma ‘mwaakaia taimonio.’​—Itaia 1:13; I-Karatia 5:19-21.

A bati taani kuakua n te onnaoraki aika a anganga bwainnaoraki aika kamarurunga te aba ake a aki kauntaba ma ana kaetieti te Baibara. A oomwaaka riki bwainnaoraki ake a rinei taani Kakoaua aika bati bwa a na butimwaei nakon ake a kauntaba ma ae e tangiria te Atua.

Ni koauana, a bati baika kona n iangoaki ibukin te marurung. E kona ni marurung temanna n te bwainnaoraki teuana ma e aki buokaki are temanna iai. Ngaia are a kona aomata n tatabemania nako n ukeri buokaia ibukin tuoaia aika eti ao ni kawaraia taokita riki tabeman.​—Taeka N Rabakau 14:15.

A na bae n aki boraoi n rinean aia bwainnaoraki taani Kakoaua ni kabane. E anga te inaomata Ana Taeka te Atua ibukini kakaokoroni mataniwin te nano i marenaia Kristian ngkana e aki urua ana kaetieti te Baibara. (I-Rom 14:2-4) Mangaia are a riai aomata nako n tuoi bwainnaoraki aika iangoaki ao ni kakoauaa raoi bwa e na aki kauntaba ma mataniwin nanoia aika kataneiaaki n te Baibara.​—I-Karatia 6:5; I-Ebera 5:14.

E na iangoa arona ni karaoi ana motinnano ni kabane te tia Kakoaua kaanga aron te turaiua are e nang roko n te tuta ni kawai ae a rangi ni bati kaa ni buti iai. Ngkana e a bon tii ririmwia naba taiani kaa akana mai moana ao ni buti rinanon te tuta ni kawai, e na kona ni karika te kabuanibwai ae korakora. E na kakerikaaka butina te turaiua ae wanawana, ao n taratarai raoi butini kaa imwaini butinakona. N aron naba anne, a aki ienikuri ni karaoi aia motinnano taani Kakoaua ao a aki naba kakairi n te iango ae bwabwainaki n akea kabwaninan raoi moa te rongorongo. Ma a iaiangoi raoi ao n neneri booto n reirei man te Baibara imwaini karaoan aia motinnano.

A butimwaea aia mwakuri korakora ao kakaonimakia te koraki ake a katauraoi bwainnaoraki, Ana Tia Kakoaua Iehova. A rangi ni kakaitau ni kabebeteaia man aorakia irouia te koraki ake a mwiokoaki n aei.