A na Kakabwaiaaki Aomata Nako Irouia te Koraki n Ibonga Aika Ueea
“Bon ‘te reeti n aomata ngkami aika kam rineaki, te koraki n ibonga aika ueea, te botannaomata ae itiaki, te koraki ake ana bwai te Atua.’”—1 BETERO 2:9.
KO KONA NI KABWARABWARAA?
N ningai are e moani beritana iai te koraki n ibonga aika ueea Iehova?
A kanga n reke te koraki n ibonga man te berita ae boou?
Baikara kakabwaia ake a na uotii te koraki n ibonga aika ueea nakon te botannaomata?
1. E aera ngkai e ataaki naba “ana katairiki te Uea” bwa te Kauring, ao tera te kantaninga iai?
N TAIRIKIN Nitian 14 n te ririki 33 C.E., ao ai bon ana kabanea n tai Iesu Kristo ma ana abotoro aika 12, ni karaoa aia Toa ae te Riao I-Iutaia. Imwini kaotinakoan Iuta Itekariota are te tia kamwamwane, e a karaoa te toa ae kaokoro Iesu are e ataaki imwina riki bwa “ana katairiki te Uea.” (1 I-Korinto 11:20) Ibukina bwa uoua ana tai Iesu ni kangai: “Kakaraoa aei bwa kanuringau,” e a ataaki iai bwa te Kauring, ae te bong ae kakawaki are ti riai n ururinga iai te baere e karaoia Kristo ni matena ibukira. (1 I-Korinto 11:24, 25) Ibukin ongeabaia n te tua aei, a a kakaraoa te Kauring ni katoa ririki Ana Tia Kakoaua Iehova ni katobibia te aonnaba. E na moanaki mani bungintaai n te Kaabong ae Eberi 5, Nitian 14 n 2012 n ana karenta te Baibara.
2. Tera ae taekinna Iesu ibukini banna ni kauring ake e kamanenai?
2 E botii ni kiibu aika uoua taekani baike e karaoi ao n taekin Iesu n te tai anne, te tia rimwini Kristo ae Ruka ni kangai: “E anaa naba te bwerena ao e katituaraoi, ao e oteia ma n angania, ao e taku: ‘E tei te baei ibukin rabwatau ae N na anga ibukimi. Kakaraoa aei bwa kanuringau.’ Ao e anaa te mwangko n te aro naba anne imwin amwarakeia, ao e taku: ‘E tei te mwangko aei ibukin te berita ae boou ae aanaki n raraau ae e na kawawaeaki ibukimi.’ ” (Ruka 22:19, 20) Tera otaia abotoro n taeka aikai?
3. A na kanga abotoro n ota n te bwai ae nanonaki ni banna ni kauring?
3 Ngkai bon I-Iutaia abotoro, a taneiai ma kareanakia maan nakon te Atua irouia ibonga n te tembora i Ierutarem. A karaoaki angakarea akanne bwa a aonga ni karekea akoaia iroun Iehova ao ibukini kabwaraani buure. (Nakoaia Ibonga 1:4; 22:17-29) Ngaia are a kona n ota abotoro ngke e taekinna Iesu, bwa rabwatana ao raraana are ‘e na anga ao ni kawawaeaki ibukia,’ e nanonna iai bwa e na anga maiuna ae kororaoi bwa te karea. Bon te karea ae kakawaki riki nakoni karea aika taiani man.
4. Tera ae nanonna Iesu ngke e kangai: “E tei te mwangko aei ibukin te berita ae boou ae aanaki n raraau”?
4 Tera nanon ana taeka Iesu ae, “e tei te mwangko aei ibukin te berita ae boou ae aanaki n raraau”? A bon ataa te taetae ni burabeti ibukin te berita ae boou abotoro are e koreaki n Ieremia 31:31-33. (Warekia.) E kaotaki n ana taeka Iesu bwa e karaoa ngkai te berita ae boou are e na onea mwin te berita n Tua are e karaoia Iehova nakoia tibun Iteraera rinanoni Mote. A irekereke berita aika uoua aikai?
5. Baikara kantaninga ake a karekei tibun Iteraera n te berita n Tua?
5 Eng, a bon irekereke kantaninga ni berita aikai. E taekina ae kangai Iehova ngke e karaoa te berita n Tua nakoia tibun Iteraera: “Ngkana tao kam boni kan ongo bwanau, ma ni kawakina au berita, ao kam na riki iai ba bon au aomata mai buakoia botanaomata ni kabaneia: ba bon au bwai aonaba ni bane: ao kam na riki ba au koraki n ibonga, ma te botanaomata ae tabu.” (Te Otinako 19:5, 6, BG) Tera ae nanonaki n taeka aikai nakoia tibun Iteraera?
TE BERITA IBUKIA TE KORAKI N IBONGA AIKA UEEA
6. Tera te berita are e buokaki kakoroan nanona n te berita n Tua?
6 A ota tibun Iteraera n te taeka ae “berita” bwa e a tia Iehova ni karaoa ana berita ae kakawaki ma aia bakatibu aika Noa ao Aberaam. (Karikani Bwaai 6:18; 9:8-17; 15:18; 17:1-9, BG) Kioina ngkai boni kanoan ana berita ma Aberaam, e a tia ni berita Iehova ni kangai: “A na bane botanaomatan aonaba ni kabaia iroun am kariki.” (Karikani Bwaai 22:18, BG) E kakoroaki nanon te berita aei n te berita n Tua. Ibukin anne, a a kona n riki I-Iteraera bwa ana “aomata [Iehova] mai buakoia botanaomata ni kabaneia.” Tera te kantaninga iai? Bwa a aonga n ‘riki bwa ana koraki n ibonga Iehova.’
7. Tera nanon te taeka ae te “koraki n ibonga”?
7 A taneiai I-Iteraera ma nakoa aika ueea ao ibonga ma bon tii te baatua ae Merekitereka ae e kariaia Iehova bwa e na uea ao n ibonga n ana tai. (Karikani Bwaai 14:18) E angania I-Iteraera Iehova te kona n riki bwa te “koraki n ibonga.” N aron ae e kaotaki imwina riki n te koroboki ae kairaki koreana rinanon te taamnei, e a nanonaki n aei te kona n riki bwa te koraki n ibonga aika ueea, ake ueea aika a na kona naba n riki bwa ibonga.—1 Betero 2:9.
8. Baikara aia mwakuri ibonga ake a rineaki iroun te Atua?
8 Bon te uea ae riai n tautaeka. Ma tera taben te ibonga? E kabwarabwaraaki ae kangai n I-Ebera 5:1: “Bwa te ibonga nako ae rietata are e rineaki mai buakoia aomata, e mwiokoaki bwa e na karaoa ana mwakuri te Atua ibukia aomata, bwa e na anga bwaai n tituaraoi ma karea ibukini buure.” Ngaia are e rineaki te ibonga iroun Iehova, bwa e na tei ibukia aomata aika bure i matan te Atua bwa e na angakarea, ao ni bubutii ibukia. N te itera teuana, e tei naba te ibonga ibukin Iehova i mataia aomata n reireinia ana tua te Atua. (Nakoaia Ibonga 10:8-11; Maraki 2:7) Ngaia are ana mwakuri te ibonga are e rineaki bon raoiakinaia aomata ma te Atua n aaro aikai.
9. (a) Tera ae a riai ni karaoia I-Iteraera bwa a aonga n riki bwa te “koraki n ibonga”? (b) Bukin tera ngke e karekea te nakoa n ibonga Iehova i aon Iteraera? (c) Tera are e tukia I-Iteraera mani kaainakin te “koraki n ibonga” i aan te berita n Tua?
9 E reke angaia I-Iteraera n te berita n Tua bwa a na riki bwa te koraki n ibonga aika ueea “mai buakoia botanaomata ni kabaneia.” Ma ibukini karekean te kantaninga ae kamimi aei, iai te bwai ae a riai ni karaoia: “Ngkana tao kam boni kan ongo bwanaau, ao kam na boni kawakina au berita.” A ‘kan ongo ni bwanaan Iehova’ I-Iteraera? Eng ma tii teutana te tai. A kona ni karaoia n te aro ae kororaoi? A bon aki. (I-Rom 3:19, 20) Ibukin anne, e a karekea te nakoa n ibonga i aon Iteraera n taai akanne Iehova ibukini kaokoroaia man te nakoa n uea, bwa a na angakarea aika taian man ibukin aia bure I-Iteraera. (Nakoaia Ibonga 4:1–6:7) A irekereke naba iai aia bure ibonga nako. (I-Ebera 5:1-3; 8:3) E butimwaei angakarea aikai Iehova ma a bon aki kona ni kabwaraaki iai aia bure taan angakarea. A bon aki kona naba n raoiakinaki I-Iteraera ni koaua ma te Atua n te nakoa n ibonga i aan te berita n Tua. E katerea ni kangai te abotoro Bauro: “E aki kona n uotiinako buure raraaia kao mwaane ma kooti.” (I-Ebera 10:1-4) A boni maraia I-Iteraera ibukina bwa a urua te Tua. (I-Karatia 3:10) N aron anne, a aikoa kona n tei ibukia aomata ni kabane bwa te koraki n ibonga aika ueea.
10. Tera te kantaninga ibukin te berita n Tua?
10 E koaua bwa a aikoa kona n riki bwa kaain te “koraki n ibonga” n aron are e beritanna Iehova? Tiaki ngaia anne. Ngkana a kataia n ongeaba ma nanoia ni koaua, e na bon reke irouia ma tiaki i aan te Tua. Bukin tera? (Wareka I-Karatia 3:19-25.) E na boni kamanoaki te taromauri ae itiaki ngkana a kakaonimaki ni kakorakoraia te koraki ake a ongeaba nakon te Tua. A ataia iai I-Iutaia bwa taani bure ngaiia ao a kainnanoa te angakarea ae kakawaki riki nakon are e anga aia ibonga ae rietata ibukia. E kona n riki bwa aia tia reirei are e na kairiia nakon te Kristo ke te Mesia, aika nakoa ake a nanonaki iai “Teuare E Kabiraki.” Ma ngkana e roko te Mesia, e na kakororaoa nanon te berita ae boou are e taetae ni burabetinna Ieremia. A na kaoaki te koraki ake a butimwaea te Kristo bwa a na riki bwa kaain te berita ae boou, ao n riki naba bwa te “koraki n ibonga.” Ti na nora aron rikin anne.
KAREKEAIA TE KORAKI N IBONGA AIKA UEEA N TE BERITA AE BOOU
11. E kanga n riki Iesu bwa aaia te koraki n ibonga?
11 E kaoti n 29 C.E. te Mesia ae Iesu mai Natareta. Tao ngke 30 ana ririki, ao e anga ngaia bwa e na karaoa nanon Iehova, ao e kaotia ni bwabetitoana n te ran. E taekina ae kangai Iehova ibukina: “Bon Natiu ae I tangiria teuaei” ae I kabiria n te taamnei ae raoiroi ma tiaki n te bwaa. (Mataio 3:13-17; Mwakuri 10:38) Imwini kabirakina, e a riki bwa te Ibonga ae Rietata ibukia aomata nako aika onimakinna ao aia Uea naba n taai aika a na roko. E na riki Iesu bwa aaia te koraki n ibonga.
12. Tera ae kona n reke man ana angakarea Iesu?
12 Ngkai te Ibonga ae Rietata Iesu, tera te karea ae e kona n anga ae rabuni ni kabane rikiaia aomata ake a onimakinna ae te bure? Ni karaoani Kauringani matena, e a taekinna iai bwa e na riki maiuna ae kororaoi bwa te karea. (Wareka I-Ebera 9:11, 12.) E nanomwaaka Iesu ae te Ibonga ae Rietata nakoni kataakina ao reireiana, man te tai are e bwabetitoaki iai n 29 C.E. ni karokoa matena. (I-Ebera 4:15; 5:7-10) Imwini kautakina, e a rierake nako karawa ni kaoti i matan Iehova ao n anga te karea ae rangi ni kakawaki. (I-Ebera 9:24) Imwina, e a kona Iesu ni butiia Iehova ibukia te koraki ake a kaotiota onimakinan ana karea, ao ni kaungaia naba bwa a na beku ibukin Iehova ma kantaningaan te maiu ae aki toki. (I-Ebera 7:25) E riki naba ana angakarea bwa kamatoaan te berita ae boou.—I-Ebera 8:6; 9:15.
13. Baikara aia kantaninga te koraki ake a kaoaki bwa kaain te berita ae boou?
13 A riai ni kabiraki naba n te taamnei ae raoiroi te koraki ake a kaoaki bwa kaain te berita ae boou. (2 I-Korinto 1:21) A nanonaki naba iai I-Iutaia ao Tientaire ake a kakaonimaki. (I-Ebeto 3:5, 6) Baikara aia kantaninga kaain te berita ae boou? Te moan, a na boni kabwaraaki aia bure. E taetae ni burabeti Iehova ni kangai: “N na kabarai aia bure n aki manga uring.” (Ieremia 31:34, BK) Ngkai a kabwaraaki aia bure, a a kona n riki bwa “te koraki n ibonga.” E taekina ae kangai Betero nakoia Kristian ake a kabiraki: “Bon ‘te reeti n aomata ngkami aika kam rineaki, te koraki n ibonga aika ueea, te botannaomata ae itiaki, te koraki ake ana bwai te Atua, bwa kam na kabutaanako taekan raoiroin aroaron’ teuare weteingkami man te roo nakon ana oota ae kamimi.” (1 Betero 2:9) E a manga taekin ana taeka Iehova aikai nakoia I-Iteraera Betero ngke e kabwarabwaraa te Tua, ao e kainetiia Kristian ake kaain te berita ae boou.—Te Otinako 19:5, 6.
A NA KAKABWAIAIA BOTANNAOMATA NAKO TE KORAKI N IBONGA AIKA UEEA
14. A na beku ia te koraki n ibonga aika ueea?
14 A na beku ia kaain te berita ae boou? Te moan, a na beku n te aonnaba bwa ibonga ake a na tei ibukin Iehova nakoia aomata bwa a na “kabutaanako taekan raoiroin” aroarona ao ni katauraoi amwarake aika bwain taamnei. (Mataio 24:45; 1 Betero 2:4, 5) Imwini mateia ao kautakia, a na beku i karawa ma Kristo bwa ueea ao ibonga ni karaoi nakoa akanne. (Ruka 22:29; 1 Betero 1:3-5; Te Kaotioti 1:6) E kakoauaa aei te abotoro Ioane ngke e noria anera aika kakaonimaki aika rangi ni mwaiti n te miitara, bwa a mena irarikin ana kaintokanuea Iehova i karawa. A anenea “te kuna ae boou” nakon “te Tiibutetei” ni kangai: “Ko kabooia aomata n raraam bwa ana bwai te Atua mai buakoia baronga nako ma taetae ma taian natannaomata ma botannaomata, ao ko karaoiia bwa te tautaeka n uea ao ibonga ibukin Atuara, ao a na kairiri bwa ueea n tautaekana te aonnaba.” (Te Kaotioti 5:8-10) E taekina ae kangai Ioane ibukia taan tautaeka aikai n te miitara are imwina: “A na riki bwa ana ibonga te Atua ao te Kristo, ao a na tautaeka ma ngaia bwa ueea i nanon ririki ake tenga n ririki.” (Te Kaotioti 20:6) A na kaai n riki bwa kaain te koraki n ibonga aika ueea ma Kristo ao ni kakabwaiaia botannaomata nako.
15, 16. Baikara kakabwaia ake a na uotii te koraki n ibonga aika ueea nakoia botannaomata?
15 Baikara kakabwaia ake a na uotii nakoia kaain te aonnaba? A kabwarabwaraaki te koraki n ibonga aika ueea n Te Kaotioti te mwakoro 21 bwa te kaawa i karawa, ae Ierutarem ae Boou, are e atongaki bwa “buun te Tiibutetei.” (Te Kaotioti 21:9) E taekinaki ae kangai ni kibuna 2 nakon 4: “I nora naba te kaawa ae tabu ae Ierutarem ae Boou bwa e ruo mai karawa mairoun te Atua, ao e katauraoaki bwa kaanga te tia mare te aine ae katamaroaaki imwaini buuna. Ao I ongo te bwanaa ae korakora man te kaintokanuea ae kangai: ‘Noria! E a mena ana umwanrianna te Atua irouia aomata, ao e na maeka ma ngaiia ao a na riki bwa ana aomata. Ao te Atua e na boni memena irouia. Ao e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.’” Ai tamaroara kakabwaia aikai! Ni kamaunaakin te mate ao a na bon akea iai baika karika te tang, te nanokawaki, ao te maraki. Nanon anne bwa a nang kororaoi aomata aika kakaonimaki ao n raoiakinaki ma te Atua.
16 N Te Kaotioti 22:1, 2 ao a kabwarabwaraaki iai kakabwaia riki tabeua ake a na uotii te koraki n ibonga aika ueea, ni kangai: “E kaota nakoiu karaangan te ran ni kamaiu, ae itiaki n ai aron te kirutitaro, ae raanganako man ana kaintokanuea te Atua ao te Tiibutetei, nako nukani kawain [Ierutarem ae boou] ae te kawai ae raababa. Ao iai kaai ni kamaiu n iteran te karaanga ae maikai ao n iterana are teuana, aika a uaa tebwi ma uoua te tai ni katoa ririki. A bane n uaa ni katoa namwakaina. Ao baani kainnamwarake aikai boni bwaai ni kamarurung nakoia te botannaomata.” E kaotaki nakoira n te miitara aei aroni kamaiuaia “te botannaomata,” ke utu nako mai buakoia aomata, man rikiaia ae te aki kororaoi are mairoun Atam. Ni koauana, ‘a nangi mauna bwaai rimoa.’
A KAKORORAOA AIA MWAKURI TE KORAKI N IBONGA AIKA UEEA
17. Tera are a nang kakororaoia te koraki n ibonga aika ueea?
17 A nang kororaoi botannaomata man aia mwakuri aika manena te koraki n ibonga aika ueea n tokin 1,000 te ririki. E nang anga ngkanne botannaomata aika kororaoi nakon Iehova, te Ibonga ae Rietata ao te Uea ae Kristo. (Wareka 1 I-Korinto 15:22-26.) A nang kakororaoa aia mwakuri te koraki n ibonga aika ueea.
18. E na kanga Iehova ni kamanenaia te koraki n ibonga aika ueea ake raoni Kristo imwini kakororaoan aia mwakuri?
18 Mangaia are e na kanga Iehova ni kamanenaia te koraki ake a rangi ni kakabwaiaaki aika raoni Kristo? E taekinaki n Te Kaotioti 22:5 bwa “a na tautaeka bwa ueea n aki totoki.” A na tautaeka i aoia antai? E aki kaotaki n te Baibara. Ma te maiu ae raoiroi are a karekea ao te ibuobuoki are a karaoia nakon te botannaomata aika aki kororaoi, e na kataubobongaia nakon nakoaia n uea ibukini kakororaoan ana kantaninga Iehova n aki toki.
19. Tera are a na kauringaki iai te koraki ake a na ira te Kauring?
19 Ngkana ti botaki ni karaoa te Kauring ibukini maten Iesu n te Kaabong n Eberi 5, 2012, ti na bon uringi iai ana reirei te Baibara aikai. A na katoong banna n aron te kariki ae aki karikaki ao te wain, nikiraia Kristian aika kabiraki aika karako mwaitiia i aon te aba ike a na kaotiia iai bwa kaain te berita ae boou. A na kauringaki mani bannan ana angakarea Kristo aikai, nakoaia ao tabeia aika rangi n tamaroa n ana kantaninga te Atua n aki toki. Ti bia bane n ira te Kauring ma nanora ni kakaitau ae korakora nakon Iehova ae te Atua ibukini katauraoaia te koraki n ibonga aika ueea ake a na kakabwaiaa te botannaomata ni kabane.
[Titiraki ibukin te reirei]
[Taamnei n iteraniba 31]
A na uotii kakabwaia n aki toki nakon te botannaomata te koraki n ibonga aika ueea