Aia Titiraki Taani Wareware . . .

Antai ae kanakoa te “itoi”?

▪ Ko a tia n nori taiani kaotioti ke taamneini bungian Iesu ma ueea ake teniman ke taani kaiwan itoi, ngke a kawara te merimeri are Iesu ae wene ni nneia maan? Ni kaineti ma te rongorongo, e kabongana te Atua te itoi bwa e na kairiia nakon nneia maan i Betereem. N aaba tabeua, a reireiaki ataei bwa a na kamatenanoi araia ueea akana teniman aika Merekiore, Katiba ao Baretiata. Ma e ngae n anne, e boraoi anne ma are e taekinaki n te Baibara? E aki. E kairua te karaki anne n aanga aika bati.

Te moan, antai mwaane akanne? N te taetae n Kuriiti rimoa ao a bon aki aranaki n te Baibara bwa ueea ke mwaane aika wanawana. Bon ibonga ke taani kaiwani bwaini karawa. Bon taani kakaraoi mwakuri ni beekan ake a kaiwani taai aika a na roko ma ni mwaingingin itoi. A aki taekinaki n te Baibara aara akanne ke mwaitiia naake a kawara Iesu.

Te kauoua, a kawara Iesu n ningai mwaane akanne? A aki kawara Iesu ni menana ni nneia maan ngke te merimeri. Ti kanga n ataa anne? E korea ae kangai te tia korea te Euangkerio are Mataio: “Ngke a rin n te auti, a nora te teei ma tinana ae Maria.” (Mataio 2:11) Noria, bwa tiaki te merimeri Iesu ma bon “te teei.” A bon aki tiku Maria ao Ioteba ni kangainaa ni nneia maan, ma a boni mena i nanon te auti.

Te katenua, antai are e kanakoa te “itoi” bwa e na kairiria taani kaiwani bwaini karawa? A aki toki n angareirei taan reirei man Aaro bwa bon te Atua are e kanakoa te “itoi.” E koaua anne? Uringnga bwa te “itoi” arei, e aki kairiia taani kaiwani bwaini karawa akanne nako Betereem. Ma e kairiia nakon te Uea are Erote i Ierutarem. A kaota bungian Iesu taani kaiwa akanne nakon te Uea are e bakantang are iai mwaakana n tiritiri, ao ni korakora ana kairiribai nakon te teei are e nang riki bwa “aia uea I-Iutaia.” (Mataio 2:2) E mwamwanaia taani kaiwa akanne Erote bwa a na manga okiria n ribootina ana tabo te teei, bwa aongkoa e kani karinea naba. E kairia taani kaiwani bwaini karawa te “itoi” anne nakon Ioteba ao Maria. Ngaia are a mwananga naakai ni karaoa are a tuangaki ae e na kona ni karuanikaia te teei, ngke arona bwa a aki tukaki iroun te Atua. E kakukurei bwa e bon tukiia te Atua. E korakora unin Erote ngke a aki oki taani kaiwa akanne n ribootina te bwai are e tangiria, ao e tua bwa a na kamateaki ni kabane ataeinimwaane ake i aan uoua te ririki ake i nanon ao i tinanikun Betereem.—Mataio 2:16.

Imwina riki e taekina ae kangai Iehova ibukin Iesu: “Bon Natiu ae I tangiria teuaei, ae I kakatonga irouna.” (Mataio 3:17) Iangoa aei: E kona te Tama ae tatangira man raoiroi anne, n rineia taani kaiwani bwaini karawa ake beekan, bwa a na uouota ana rongorongo ngkai a karaoi mwakuri n tabunea aika tabuaki n ana Tua? (Te Tua-Kaua 18:10) E kona te Atua ni kabongana te itoi bwa e na kairiia nakon Erote ae rangi ni kakamaaku ao iai mwaakana n tiritiri n te aba anne, bwa a na taekina te rongorongo are e a kakorakoraa riki ana riribai ao bakantangina? E kona te Atua ni kabongana te itoi anne ma taani kaiwani bwaini karawa, bwa a na kaota te tabo are e wene iai natina ae te merimeri?

Ni kaikonakana: E kanakoa ana tautia ae rangi ni mwaatai te tia kairiri n te buaka ae raoiroi, bwa e na karaoa te mwioko ae rangi ni karuanikai ae ninian aia tabo aia kairiribai. E kona ni kaota te tabo are e mena iai te tautia ae mamaara, ao n akea ana konabwai ni kamanoa i bon irouna nakon ana kairiribai? Ni koauana, e aki! Ai tii te arona naba ma Iehova, ngke e kanakoa Natina nakon te aonnaba ae rangi ni karuanikai aei. E kona ni kaota te tabo are e wene iai Natina ae te merimeri nakon te Uea ae buakaka are Erote? E na bon aki!

Antai ngkanne are e kanakoa te “itoi” ke te bwai ae kaanga aron te itoi? Antai ae e korakora nanona ni kan nora kamatean te teei ae Iesu, ma n totokoa rikirakena ao kakororaoani mwiokoana n te aonnaba? Antai are e mwamwanaia aomata ao ni boutokai keewe, mwakuri n iowawa ao n tiritiri? E kaotia Iesu bwa Tatan te Riaboro bon “te tia kewe ngaia, ao taman te kewe” are “te tia tiriaomata ngaia mangke e moani moana ana mwakuri.”—Ioane 8:44.