KARAKI 86
E Kairiia Mwaane Te Itoi
KO NORA te itoi ane otamwaaka anne ae a koteia mwaane aikai? Ngke a a kitana Ierutarem ao e a kaoti naba te itoi. Mwaane aikai boni kaaini Mainiku, ao bon taan rabakau i aon taian itoi. A kakoauaa bwa te itoi ae boou aei, e na kairiia nakon te aomata ae kakannato.
Ngke a a roko i Ierutarem mwaane aikai ao a a titiraki ni kangai: ‘E ngaa te tei are e na riki bwa aia uea I-Iutaia?’ “I-Iutaia” bon araia naba tibun Iteraera teuana. A taku mwaane aikai: ‘Ti moan nora itoin te tei aei ngke ti mena i Mainiku, ao ti roko ngkai bwa ti na taromauria.’
Ngke e a ongo taekana Erote are uean Ierutarem, ao e a rotaki n te un. E aki tangira temanna riki te uea bwa mwina e anaa ueana. Mangaia are e weteia mataniwia ibonga ao e titirakinia ni kangai: ‘E na bungiaki iia te uea are e beritanaki?’ A kaeka ni kangai: ‘E taku te Baibara bwa i Betereem.’
Mangaia are e weteia mwaane ake kaaini Mainiku Erote ao e taku nakoia: ‘Naako kakaaea te tei anne. Ngkana kam kunea ao kaongoai, bwa I kan nako naba ngai n taromauria.’ Ma ni koauana, e kan tiringa te tei Erote!
Imwina e kairiia mwaane aikai te itoi arei nako Betereem, ao e tei raoi i etan te tabo are e mena iai te tei. Ngke a a rinnako mwaane aikai n te auti, ao a a nora Maria ma te tei are Iesu. A kaotinakoi aia bwaintangira ao a angan Iesu. Ma imwina ao e a tuangia Iehova n te mii bwa a na aki okira Erote. Mangaia are a okira abaia n te kawai ae kaokoro.
Ngke e a ataia Erote bwa a a tia mwaane mai Mainiku akekei n toua nako kawaia nako abaia, ao e a rangi n un riki. Mangaia are e a tua bwa a na tiringaki ataei aika mwaane ni kabane i Betereem ake kaka uoua aia ririki rikaaki. Ma e a kaman tuanga Ioteba Iehova n te mii, ao e nako Aikubita Ioteba ma ana utu. Rimwi riki ngke e a ongo Ioteba bwa e a mate Erote, ao e a kaira Maria ma Iesu n okira mwengaia i Natareta. Aio te tabo are e a ikawairake iai Iesu.
Antai ae e karika te itoi are boou arei bwa e na otamwaaka? Uringnga are a nako moa Ierutarem mwaane akekei imwin norakin te itoi. E rangi ni kan tiringa Natin te Atua, Tatan te Riaboro, ao e ataia bwa e na boni kataia n tiringa Iesu Uean Ierutarem ae Erote. Mangaia are bon Tatan are e kaotamwakaa te itoi arei.