Tera Ana Iango Iesu ni Kaineti ma te Waaki n Tautaeka?
A KABWARABWARAAKI irouia taani korei Euangkerio bwaai tabeua ake a a tia n riki nakon Iesu n ana mwakuri ni minita, ike e a aitara iai ma te waaki n tautaeka. N te katoto, e aki maan imwini bwabetitoan Iesu ngke tao 30 ana ririki, ao e mwiokoaki iroun te Riaboro bwa e na riki bwa te tia tautaekana te aonnaba. Imwina riki n ana mwakuri ni minita, a a manga tangiria aomata aika bati bwa e na riki bwa aia uea. A kataia aomata akanne rimwi riki ni kairoroa bwa e na riki bwa te tia kairiri n aia waaki n tautaeka. Tera aron Iesu iai? Ti na rinanoi baika a riki.
Te tia tautaekana te aonnaba. E taekinaki n Euangkerio bwa e anganaki Iesu iroun te Riaboro “tautaekan nako te aonnaba.” Iangoa te ibuobuoki ae bati are e kona n reke, ngke arona bwa e kariaia Iesu bwa e na kamanena mwaakana n tautaekana te aonnaba! Ma e aki butimwaea te iango anne Iesu. E kariaia rikina bwa te tia tautaeka, te aomata ae e kakoauaa bwa e nakoraoi te waaki n tautaeka ao e aki kona ni kakairi iroun Iesu n rawa. (Mataio 4:8-11) Ngkai e kakoauaaki bwa e rangi n tabeakinia botannaomata Iesu, bon iai bukina ae raoiroi ngke e rawa nakon te bwai are e anganna Tatan.
Te Uea. A bati aomata n ana tai Iesu ake a rangi ni kainnanoa te tia tautaeka ae kona ni katoki aia kangaanga, ni kaineti ma te kataumwane ao te waaki n tautaeka. Ibukin anaakin nanoia ni baike e kona ni karaoi Iesu, a a tangiria bwa e na ira te waaki n tautaeka. Ma tera arona iai? E taekina ae kangai te tia korea te Euangkerio ae Ioane: “Ngke e a ataia Iesu bwa a a kan roko n taua ni kaueaa, ao e a manga oki nakon te maunga n tii ngaia.” (Ioane 6:10-15) E mataata bwa e rawa Iesu n irekereke ma te waaki n tautaeka.
Te tia kairiri n te waaki n tautaeka. Nora te baere e riki ni boong ake imwaini maten Iesu. A taetae ma Iesu aia reirei Baritaio ake a kariaia inaomataia man te Embwaea n Rom, n ikotaki naba ma ana aomata Erote ake kaain te waaki n tautaeka aika a irana Rom. A kani kairoroa bwa e na butimwaea mwiokoana n te waaki n tautaeka. Ao a kairoroia naba bwa e na kaota ana iango ibukini kabwakaan aia taekiti I-Iutaia nakon te tautaeka n Rom.
E koreaki ana kaeka Iesu irouni Mareko ni kangai: “ ‘E aera ngkai kam kataai? Kaamai te tenariati bwa N na noria.’ A uota teuana nakoina. Ao e taku nakoia: ‘Antai taamneina ao arana aei?’ A taku: ‘Te Embera n Rom.’ E taku ngkanne Iesu: ‘Angan te Embera n Rom akana ana bwai te Embera n Rom, ao angan te Atua akana ana bwai te Atua.’ ” (Mareko 12:13-17) E taekinaki n te boki ae te Church and State—The Story of Two Kingdoms bwa e aki tangiria Iesu n riki bwa te tia kairiri ae mwaaka n te tautaeka. Ao e katerea naba bwa ti riai n aantaeka nakon tuan te tautaeka, ao n ana tua te Atua.
E ngae ngke e aki irekereke Kristo ma te waaki n tautaeka, ma e tabeakini aia kangaanga aomata n aron te maiu ni kainnano, te babakanikawai ao te ribuaka. Ni koauana, e kaotaki n te Baibara bwa e rangi n nanoangaia aomata ake n ana tai. (Mareko 6:33, 34) Ma e aki katoka te ribuaka Iesu n te aonnaba ngkekei naba, e ngae ngke a kakorakoraia tabeman ni kairoroa bwa e na irekereke ma baike a kauntaekaaki n te tautaeka.
E mataata bwa e kaotaki ni katoto aikai, ae e bon rawa Iesu ni kairekerekea ma te waaki n tautaeka. Ma tera aroia Kristian ni boong aikai? A riai n irekereke ma waaki n tautaeka?