“N tokina, e a bon reke irou te inaomata ni koaua”

AROU RIMOA:

I bungiaki i Moundsville n te kaawa ae uarereke ae mena irarikin te Karaanga ae te Ohio i meangin West Virginia i U.S.A. Ngkai boni ngai te kauoman mai buakoia tariu aika aman ae teniman mai iai mwaane, n angiin te tai e bae ni kaberoro ao ni kaunga mwengara. A mwakuri korakora ao ni kakaonimaki au karo, ao n tabeakinia naba aomata. Ti aki rangi ni kaubwai, ma a bon rereke baika ti kainnanoi n taai nako. Kioina ngkai bon Ana Tia Kakoaua Iehova au karo, a a kabanei korakoraia ni karin i nanora booto n reirei man te Baibara mangke ti uarereke.

Ngke ai te roro n rikirake ngai, I a kaririaki bwa N na aki maiuakini baike I a tia n reiakini. I nanokokoraki bwa e kona n rangi ni manena ke ni kakukurei te maiu ae kairaki ni booto n reirei man te Baibara ke e na aki. I iangoia bwa te inaomata ni karaoi bwaai ni kabane ake I tangiri, bon tii ngaia te kawai nakon te kukurei ni koaua. Imwin te tai ae aki rangi ni maan, I aikoa iririi bobotaki ni Kristian. Bon raou ni karitei tariu temanna ao mwaaneu. A karaoa aia kabanea ni kona ara karo ni kataia ni buokira ma ti katinanikui aia kakorakora.

I aki ataia raoi ae e na kairai te inaomata ae kairua are I tangiria ngkoa nakoni mwakuri aika buakaka aika N na tautoronaki iai. N te bong teuana ngke I rianna n oki man au reirei, ao e a anganai naba te moko raoraou, ao I boni butimwaeia. Man te bong anne ao rimwi nako naba, I a kariaia aroaro aika bubuaka. Imwin tabeua te tai, I a kamanena te drug n te aro ae aki riai, te kamanging ao ni maiuakin aroaro ni maiu aika bubuaka. N ririki aika bati ake imwina riki, e a rangi ni korakora irou tangiran te drug ao I a tautoronaki iai. Ibukina bwa e tabe n rikirake riki tautoronakiu iai, I a moanna ni kaboonakoi ni boutokaa maiu iai.

I kataia ni kakorakoraai ni kakeaa bongani mataniwin nanou, ma e okioki ni kauringai bwa e kairua aroni maiu. Ma I namakinna bwa I a rangi n oimwi ni bita aroaroni maiu are I a tia n rineia. I aki toki n namakina te maroaa ao te rawawata, e ngae ngke I otabwaniniaki irouia aomata n taiani bobotaki ni kakukurei ao n taiani kaotioti. N tabetai, I bae n iaiangoi aroia au karo aika raraoi ma ni kakaonimaki ao I mimi n arou ngkai I a bon tiotionako.

ARONI BITAKINI MAIU MAN TE BAIBARA:

E ngae ngke e bua au kantaninga ni kaineti ma bitakini maiu nakon ae raoiroi riki, ma a bon aki bua aia kantaninga tabeman. N te ririki 2000, ao a kaoai au karo bwa N na kaea aia bwabwaro Ana Tia Kakoaua Iehova. I nako n iria ma bon tiaki nanou. Ma I mimi bwa a roko tariu ao mwaaneu ake a tiotionako naba.

Ni menau n te bwabwaro, ao I uringnga ae I a tia n roko n te tabo aei ni kaean te anene ae kaainaki irouia aomata aika maiubuaka, tao n te ririki ae nako. E bon ringaki nanou bwa e a kaokoro ae I noria ngkai. N tain te kaotioti ngkoa, a a raea taiani maange ao e onrake n te moko te tabo aei. A aki rangi n iraorao angiia taani mataku ao te rongorongo are n te anene, e rangi ni karawawata. Ma n tain te bwabwaro, I a otabwaniniaki irouia aomata aika kukurei ni koaua, ake a butimwaeai ma te akoi, e ngae ngke I tuai man nonoria i nanon ririki aika bati. E a rangi n itiaki te tabo aei ao te rongorongo are e taekinaki iai e rangi ni manena ibukin taai aika imwaira. N norani mwin te koaua man te Baibara ae uaana, e a kairai bwa N na iangoia bwa e aera ngkoa ngke I ribaia!​—Itaia 48:​17, 18.

Imwin te bwabwaro, ao I waekoa n iangoia bwa N na okira te ekaretia ni Kristian. A anaaki nanoia naba tariu ao mwaaneu n te baere a noria n te bwabwaro ao a motinnanoia bwa a na oki naba. Ti butimwaea te reirei n te Baibara ngaira ake teniman.

Te kibu teuana n te Baibara are kaungaai riki bon are n Iakobo 4:8 ae kangai: “Kaania te Atua, ao ane e na kaaningkami.” I a ataia ae ngkana I kani kaania te Atua, I riai moa ni kaitiaka maiu. Tabeua mai buakoni bitaki aika I riai ni karaoi, boni katokani kamanenaan te baakee ao taian drug ma te kamanging.​—2 I-Korinto 7:1.

I buubai mairouia raoraou ngkoa ao ni karekeia aika boou mai buakoia taan taromauria Iehova. E buokai riki te unimwaane n te ekaretia are I reirei ma ngaia n te Baibara. E aki toki n tarebooniai ao n roko naba n norai bwa I uara. Bon raoraou ae I rangi ni kaan ma ngaia ni karokoa te bong aei.

Ni moan iteran te ririki n 2001, I a katabua maiu nakon te Atua rinanoni bwabetitoakiu n te ran, ai uana naba ma tariu ma mwaaneu. Iangoa kimwareireia au karo ao tariu temanna ae uarereke riki are kakaonimaki, ngke ti a katiteuanaaki n ara utu n taromauria Iehova.

AROU NI KAKABWAIAAKI:

I aki toki n iangoia bwa e tauaki inaomatau ni booto n reirei n te Baibara, ma ngkai I a tarai bwa a rangi ni kakawaki ibukini kamanoau. E reke korakorau man te Baibara bwa N na katoka kamanenaan ma kaboonakoan taian drug ao I a riki bwa te aomata ae raoiroi riki.

I a kakabwaiaaki ngkai I a riki bwa kaain te botaki n itaritari ni katobibia te aonnaba aika taromauria Iehova. A kaotiota te tangira ni koaua aomata aikai i marenaia, ao a katiteuanaaki ni beku ibukin te Atua. (Ioane 13:​34, 35) I rangi ni kakabwaiaaki naba n te aro ae okoro bwa mai buakon te botaki n itaritari e a reke iai buu ae Adrianne, are I rangi n tangiria ma n nabeakinna. Ti karekea kukureira ae bati ngkai ti kaai ni beku ibukin ara tia Karikiriki.

N oneani mwin are N na uaiakina oin nanou, I a anga nanou ni kabwanina au tai ngkai n te mwakuri ni minita, ao n reiakinia aomata aroia are a na kakabwaiaaki iai naba man Ana Taeka te Atua. Bon te kabanea ni kakukurei te mwakuri aei irou. I kakoauaa ma nanou ni kabane bwa e bita maiu te Baibara. N tokina, e a bon reke irou te inaomata ni koaua.