E Roko n Taina ae Riai “te Bwai ae Aki Kona ni Mwanuokinaki”

“E AKI kona ni mwanuokinaki!” Anne te bwai ae a taekinna aomata aika bati ibukin te birim ae te “Creation Drama.” E roko raoi n taina te “Creation Drama” ao a aki kona ni mwanuokinna aomata ake a mataku iai. Ni koauana, e korakora ringakin nanoia aomata iai bwa a neboa Iehova teutana te tai imwain rokon te bwainikirinaki ae korakora n ana tautaeka Hitler, i aoia ana aomata te Atua i aon Eurobe. Ma tera te birim ae te “Creation Drama”?

N 1914, e kaotinakoa te “Photo-Drama of Creation” kautun aia botaki ana aomata Iehova i Brooklyn, New York, U.S.A. Bon te taamnei ae kakammwakuri ao ae e aki naba are wanua te aoa maanna, e kirimatamata ao e kona n taetae. E matakuakinaki te “Photo-Drama” irouia mirion ma mirion aomata ni katobibia te aonnaba. E otinako naba mwakorona ae kimototo riki ae te “Eureka Drama” n 1914. Ma n 1920 tabun, e a uruaki te bwai ni kaoti taamnei ibukini birim aika aki kakammwakuri ao te rora. Ma e ngae n anne, a bati aomata aika a kan nora riki te “Photo-Drama.” N te katoto, a titiraki ni kangai kaain Ludwigsburg i Tiaman: “E na manga oti n ningai te ‘Photo-Drama’?” Tera ae kona ni karaoaki?

Ibukini kaitaraani kan noran riki te Drama anne, a a kabooi birim tabeman ake a tei ibukin te utu ni Betaera i Magdeburg i Tiaman mani kambwana aika boou i Paris, Buranti, ma taian taamnei aika aki kakammwakuri mani kambwana i Leipzing ao Dresden n 1920 tabun. A ikotaki naba ma taamnei tabeua nikawai aika aki kakammwakuri man te “Photo-Drama” ake a teimatoa ni kakabonganaaki.

E karioi katangitangin taiani birim ao taamnei ake aki kakammwakuri Brother Erich Frost are iai ana tarena n te katangitang. A kamanenaaki taeka man ara boki ae te Creation n te Drama. Anne bukina are e a oneaki iai te ara ae te “Photo-Drama” nakon te ara ae boou ae te “Creation Drama” imwin rinanoani mwakorona nako.

Titeboo maanin te Drama ae boou ma te “Photo-Drama” bwa wanua aoaia ao a kaotaki mwakorona tatabeua ni katoa tairiki i nanon nimabong. A kaotaki iai rongorongo aika kakannongora ibukini boong ni karikibwai, neneran te Baibara ma rongorongon rimoa ao katerean ae e aki nakoraoi ana reirei te Aro ae kewe nakoia te botannaomata. E kaotaki te birim ae te “Creation Drama” i Austria, Tiaman, Luxemburg, Switzerland ao taabo riki tabeua ake a kamanenaaki iai te taetae n Tiaman.

E taekina ae kangai Erich Frost: “Ni kaotakin te birim ae te Drama, ao I kaungaia raoraou, moarara riki raou ni katangitang bwa a na kamanena te tai ni motirawa ae uarereke ni katoai kaintekateka, n angania aomata ake a roko ara boki aika uarereke ao tabeua riki aika tamaroa. A bati riki ara boki aika ti anga n te tai aei nakon are ti anga n te mwakuri ni minita man te auti teuana ma teuana.” E uringnga Johannes Rauthe are e bairea kaotakin te birim anne i Poland ao i Czech Republic n taai aikai, bwa a bati aomata ake a roko aika a anga aia atureti ibukin okiraia. A bon okiriia aomata akanne ao e rangi ni kakukurei maroroakinan te Baibara ma ngaiia.

N 1930 tabun, ao e a boni kekebo naba ni katoatai te tabo are e kaotaki iai te “Creation Drama”, ao a aki toki n tataekinaki Ana Tia Kakoaua Iehova ni kaawa akanne. N 1933, e kaania teuana te mirion mwaitiia aomata ake a roko n te taamnei are e baireaki karaoana man te aobiti n tararua mai Tiaman. E ururing rikaaki Nei Käthe Krauss ni kangai: “Ti ririanna n te raroa ae 10 te kiromita ni katoaa mwanangara i nanon nimabong ibukini kan noran te birim ae te Drama, ti ribuakonikai ao ti tamwarakei tabuki ao n ruo rikaaki man taiani mwarua.” E taku Nei Else Billharz: “E a riki te ‘Creation Drama’ bwa aan tangiran te koaua irou.”

E taekinna Alfred Almendinger bwa imwini kaean te Drama iroun tinana, ao “e rangi n rotaki nanona ike e a kabooa ana Baibara ao ni kakaaea iai te taeka ae ‘te burikatorio.’” Ibukina bwa e aki kona n reke te taeka anne n te Baibara, e a katoka ana taromauri n ana Aro ao ni bwabetitoaki. E ururing rikaaki Erich Frost ni kangai: “A mwaitikurikuri aomata ake a rin n te koaua man te ‘Creation Drama.’”​—3 Ioane 1-3.

E tabe n rikirake mwaitiia aomata ni matakuakina te “Creation Drama” ma e kakorakoraa naba te botaki ae te Nazi ni boutokaa Eurobe ao ni karikirakea te kangaanga. Ni moan 1933, e a katabuakaki aia mwakuri taani Kakoaua i Tiaman. Man te tai anne ni karokoa tokin te kauoua ni buaka are kabutaa aonnaba n 1945, a a rotakibuaka ana aomata Iehova i Eurobe n te bwainikirinaki ae korakora. E karabuutinaki tao i nanon wanua te ririki Erich Frost. Ma e boni kainaomataaki ao imwina e beku n te Betaera i Wiesbaden, Tiaman. Ai raoiroira bwa e aki kona ni mwanuokinaki te “Creation Drama” bwa e roko raoi n taina, ike a a kakorakoraaki iai ninikoriaia Kristian aika a nang kaaitara ma kataakin aia onimaki n tain te Kauoua ni Buaka Are Kabutaa Aonnaba!​—rongorongora rimoa i Tiaman.