Tera Arom Ngkai Imwin ‘Ataakin Te Atua’?

1. Bukin tera bwa e riai n ira nanon te bwai ni kauring te bwairati imwaini kibana?

E TUOA raoi te wanikiba te bwairati ni katoatai are e na kiba iai. E kamanena te bwai ni kauring ibukini baika a na tuoaki ni kabane n te wanikiba. Ngkana e aki ira raoi nanon anne ni katoatai imwaini kibana, e na karekea te kabuanibwai ae kakaiaki. Ko ataia bwa te bwairati raa ae e rangi ni kaumakaki riki bwa e na karaoa raoi te tutuo n taai nako? Bon te bwairati ae rangi ni mwaatai! E bebete iroun te bwairati ae rangi ni mwaatai bwa e na iangoia ae e aki kainnanoa te kauring ao ni kabwaka ni karaoa ana tutuo ibukini bwaai ni kauring ni kabane imwaini kibana.

2. Tera te bwai ni kauring ae a katauaki iai Kristian?

² N aron te bwai ni kauring are e kamanena te bwairati ibukin tuoan te wanikiba, iai naba te bwai ni kauring teuana are ko kona ni kamanena n tuoa iai am onimaki bwa e teimatoa korakorana e ngae naba ngkana ko aitara ma kangaanga. E ngae ngke ko a tibwa bwabetitoaki ke ko beku iroun Iehova i nanon ririki aika bati, ma e boni kakawaki naba tuoani korakoran am onimaki ao katabuani maium n taai nako ao tangiran Iehova ae te Atua iroum. E kona ni bua ara onimaki ngkana ti kabwaka n tuoa te bwai ni kauring n taai nako. Ti kauringaki n te Baibara ni kangai: “Ane taku bwa e tei, ao ke e tarataraia bwa e na aki bwaka.”​—1 I-Korinto 10:12.

3. Tera ae a riai ni karaoia Kristian ake i Karatia?

³ A riai n tuoa korakoran aia onimaki Kristian ake i Karatia ao ni kakaitau ibukin inaomataia ni kaineti ma reirei aika koaua man te Baibara. E a tia Iesu ni kauka te kawai rinanon ana angakarea nakoia te koraki ake a kaotiota onimakinana bwa a aonga n ataa te Atua n te aro ae rangi n okoro, ike a a kona n riki iai bwa natin te Atua! (I-Karatia 4:9) Ibukin teimatoaia kaaini Karatia ni karekea te kakabwaia ae rangi ni kakawaki n te itoman anne, a a riai n rarawa nakon aia reirei kaain te Aro n I-Iutaia ake a kamatoaa n taekinna bwa a kakairi n te Tua Rinanoni Mote. A bon aki mena naba i aan te Tua anne Tientaire aika aki korotobibiaki n ekaretia! Titeboo aroia I-Iutaia ao Tientaire bwa a kainnanoa karikirakean aia onimaki. E irekereke aei ma ataakin ae a aki kona ni kakororaoa raoiroia rinanon te babaire ibukin te Tua Rinanoni Mote.

MOANI MWANEKA IBUKIN ATAAKIN TE ATUA

4, 5. Tera te reirei ni kairiri are a anganaki kaaini Karatia irouni Bauro, ao n te aro raa ae e kakawaki nakoira?

⁴ Bon iai bukini korean ana reirei ni kairiri te abotoro Bauro nakoia kaaini Karatia bwa a na kauringaki Kristian ni koaua, bwa a na aki kitani koaua aika bati n te Baibara ake a a tia n reiakini ao n okiri baika a tia ni kitani ngkoa. E kairaki te abotoro iroun Iehova bwa e na kaungaia tiaki tii kaain ekaretia i aoni Karatia ma nakoia naba taan taromauria Iehova ni kabane bwa a na kateimatoa kakaonimakia.

⁵ Ti bane ni karaoa ae riai ngkana ti uringa arora ni kainaomataaki man tautoronakira n reirei aika kewe ao n riki bwa temanna Ana Tia Kakoaua Iehova. Ni karaoan aei, iangoi titiraki aika uoua aikai: Ko uringi mwaneka ake ko tou mwia ike ko a tau iai nakon te bwabetito? Ko uringa arom ngke ko moan ataa te Atua ao ko ataaki naba irouna ma namakinan te kabebeteaki ni kaineti ma reirei aika koaua man te Baibara?

6. Tera te bwai ni kauring ae ti na rinanona?

⁶ Ni koauana, ti bane n tou mwini mwaneka aika ruaiwa. Titeboo mwaneka akanne ma taiani bwai ni kauring ibukin ara onimaki ake a kaotaki n te bwaoki ae “Mwaneka Aika A Kairiri Nakon te Bwabetito ao te Teimatoa n Rikirake.” Ti na kakorakoraaki n rarawa n tanrikaaki nakoni bwaikorakin te aonnaba, ngkana ti katoatai ni kauringira mwaneka aika ruaiwa aikai. N aron te bwairati ae mwaatai n rinanon te bwai ni kauring ibukin te wanikiba n taai nako imwaini kibana, ko na buokaki naba ni kateimatoa am beku ma te kakaonimaki ngkana ko rinanon te bwai ni kauring ibukin te onimaki.

A TEIMATOA N RIKIRAKE N TE ONIMAKI TE KORAKI AKE A ATAAKI IROUN TE ATUA

7. Tera te banna ni katoto ae ti riai ni kakairi iai, ao bukin tera?

⁷ E kauringaki te bwairati n te bwai ni kauring ibukin te wanikiba bwa bon anne te bwai ae riai ni kakairi raoi iai imwaini kibana ni kabane. Ti kona naba n tuoira ke n neneri aroarora n taai nako ao te baere ti kakariri iai ni moa mani bwabetitoara. E koroboki Bauro nakon Timoteo ni kangai: “Ko na teimatoa n taui taeka aika koaua ake ko ongo irou bwa te banna ni katoto. Taui ma te onimaki ao te tangira ni kaineti ma Kristo Iesu.” (2 Timoteo 1:13) A reke “taeka aika koaua” akanne n Ana Taeka te Atua. (1 Timoteo 6:3;) N aron ana taamnei te tia korobanna ae mataata raoi ni kona n anganira te iango ibukin taraakin te bwai teuana, ti kona naba ni buokaki ni ‘banna ni katoto ibukin te koaua’ bwa ti na ota ni baika e tangiri mairoura Iehova. Ngaia are ti na nori ngkai mwaneka aika kairira nakoni bwabetitoara bwa ti aonga n nora arora n toua raoi mwin te banna ni katoto ibukin te koaua.

8, 9. (a) Bukin tera bwa ti riai ni kateimatoa rikiraken ara atatai ao ara onimaki? (b) Kabwarabwaraa kakawakin rikiraken te onimaki ao bukin tera bwa bon te mwakuri ae teimatoa.

⁸ Te moanibwai n ara bwai ni kauring ibukin ara onimaki boni kainnanoani karekean te atatai. Ao ngkanne ti a kona ni karikirakea ara onimaki. Ma ti riai n teimatoa n rikirake n itera akana uoua akanne. (2 I-Tetaronike 1:3) E irekereke te rikirake ma te bitaki teuana imwin teuana. E nanonaki n “te rikirake” bwa ko na kabatiaa am atatai ao ko na karakaa am onimaki. Ma e riai n teimatoa n rikirake ni korakora ara itoman ma te Atua, imwin naba bwabetitoara.

⁹ Ti kona ni kabotaua rikiraken ara onimaki ma rikiraken te aroka. E kona n rikirake te aroka nakon ae e rangi ni bubura, ai moarara riki ngkana e rangi n ribunako wakaana ke ni kokorakora. N te katoto, a kona aroka tabeua aika tiira n Rebanon aika tamaroa n roko n abwakin te auti ae 12 borauataona ao n rangi ni matoatoa, ma n ribunako wakaana ao buburani botona 12 te mita. (Ana Anene Toromon 5:15) E rangi n tawe rikiraken te aroka n te moantai. Ngkana a rangi n ribunako ma n aenako wakaana, e rikirake naba n raababa ao n ananaurake botona. Imwina riki, e aki rangi ni bebete noran rikiraken te aroka. Ai tii te arona naba ma rikiraken ana onimaki te Kristian. E kona ni waekoa rikiraken ara onimaki n te tai are ti moan reiakina iai te Baibara ao imwina ti a bwabetitoaki. A rangi ni kukurei kaain te ekaretia n nora rikirakera. Ti kona naba ni katauaki bwa ti na bwaiania ke n anganaki mwioko riki tabeua. Ma imwin ririki aika bati, e kona ni manga aki noraki teimatoara n te onimaki. E ngae n anne, ti riai n teimatoa n rikirake n te onimaki ao te atatai bwa ti aonga “n riki bwa ai aron te aomata ae ikawai raoi ao n rota kororaoin ikawain te Kristo.” (I-Ebeto 4:13) Ti rikirake n arora ngkoa n ai aroni bwebwen te aroka ae rangi n uarereke ni karokoa rikira bwa te Kristian ae ikawai n te onimaki ae kaanga te aroka ae korakora.

10. Bukin tera bwa e kakawaki te rikirake, e ngae naba ngkana a ikawai n te onimaki Kristian?

¹⁰ E aki riai n toki rikirakera ikanne. E riai n raababa nako ara atatai ao ni korakora ara onimaki. Mangaia are a a nene ara onimaki bwa a aanaki man te tano ae Ana Taeka te Atua. (Taeka N Rabakau 12:3) A a bati taari mwaane ao aine n te ekaretia ni Kristian aika a a tia ni karaoa anne. N te katoto, e taekinna te tari te mwaane are e a tia n riki bwa te unimwaane n te ekaretia i nanon 30 tabun te ririki bwa e teimatoa ni karikirakea ana onimaki. E taku: “E rangi ni korakora au kakaitau ibukin te Baibara. I teimatoa ni karekei aanga aika boou ibukini maiuakinani booto n reirei man te Baibara ao tuua n aanga aika kakaokoro. E teimatoa naba n rikirake kukureiu n te mwakuri ni minita.”

KARIKIRAKEA AM ITOMAN MA TE ATUA

11. Ti na kanga ni kona ni kateimatoa rikiraken ara itoman ma Iehova?

¹¹ Ngkana ti kani kateimatoa rikirakera ni Kristian, ti riai n teimatoa ni kaania riki Iehova bwa kaanga bon Raoraora ao Tamara. E tangirira bwa ti na namakinna ae e butimwaeira, ao n ataia ae ti tangiraki ma ni kamanoaki irouna. Ai aron ana namakin te teei ngkana e mwanokaaki iroun ana karo ae tatangira ke ae ti karekea mairoun raoraora ae ti onimakinna ao ni kakaonimaki. N aron ae ko ataia, e aki kona n reke te itoman ae kaan ma Iehova n te tai ae kimototo. E kainnanoaki naba te tai ae maan ibukin ataakin ao tangiran te Atua. Ngaia are ngkana ko kan ataa raoi Iehova, motinnanoia bwa ko na kamwaawa am tai ibukini warekan ana Taeka ni katoabong. Ao ni wareki Taua-n-Tantani ao Awake! ni kabane n ikotaki naba ma booki aika boto man te Baibara.

12. Tera ae ti riai ni karaoia bwa ti aonga n ataaki iroun Iehova?

¹² A rikirake n te onimaki raoraon te Atua rinanon aia tataro ae nako mai nanoia ao aia itoman ae raoiroi. (Wareka Maraki 3:16) A “uki [taningan Iehova] nakon aia kakorakora n tataro ni bubutii.” (1 Betero 3:12) E rangi ni mutiakin ara tataro ni bubutii ibukini buokara Iehova, n aron te karo ae tatangira. Mangaia are ti kainnanoa te “botumwaaka n tataro.” (I-Rom 12:12) Ti aki kona n teimatoa n riki bwa Kristian aika rikirake n akean ana ibuobuoki te Atua. E rangi ni korakora te kariri n te waaki ae buakaka ae ngkai ake ti riai n rarawa nako iai ao n tokanikai i aoia. Ngkana ti a aki botumwaakara n tataro, ti a boni koreira nako iai man te korakora are e aki toki n anganga Iehova ma kukurein nanona. Ko tataro nakon Iehova n aron ae ko maroro ma raoraom ae ko onimakinna? Iai aanga aika ko kona ni karikirakea iai raoiroin am tataro?​—Ieremia 16:19.

13. Bukin tera bwa e kakawaki te iraorao ma raao ni Kristian ibukini karikirakean te onimaki?

¹³ E kukurei Iehova irouia aomata ni kabane ake “a katania irouna” mangaia are ti kani kateimatoa n taai nako ara iraorao ma tabemwaang n te ekaretia ake a ataa te Atua, e ngae naba imwin ataan te Atua iroura. (Naum 1:​7, BK) Ibukina bwa e onrake te aonnaba aei ni baika bubuaka, ti wanawana ngkana ti kabanea ara tai i rarikia tarira ma mwaanera n te onimaki. Baikara kakabwaia iai? Ko na noria kaain te ekaretia n tatabemania nako bwa a na kaungako nakon “te tangira ma mwakuri aika raraoi.” (I-Ebera 10:​24, 25) E korea taekan te uaia n itangitangiri Bauro nakoia I-Ebera n atongnga bwa te botaki n itaritari, te tabo ae titeboo aia iango iai taan taromauri ao te ekaretia. E irekereke kaotiotan te aeka n tangira aei ma te itoman i marenaia Kristian. Ngaia are taraia raoi bwa ko na katoatai n irii bobotaki ao n anganga am kaeka iai.

14. Bukin tera bwa ti riai n tauraoi n taai nako n rairi nanora ao ni karaoi bitaki ni maiura?

¹⁴ Ti bon riai n rairannano ao ni katoki aroarora aika bure ni moan rikira bwa te Kristian. Ma ti kainnanoa te rairannano n taai nako ao karaoani bitaki ni maiura. Kioina ngkai bon aomata ngaira aika ti aki kororaoi, ti a teimatoa n tautaekanaki n te bure ae kaanga te naeta are e tauraoi n tena. (I-Rom 3:​9, 10; 6:​12-14) Ngaia are ti na aki bakaaea te aki atai mamaarara. E kakukurei bwa e taotaona nanona Iehova nakoira ngkai ti kabokorakora ni buakana mamaarara ao ni karaoi bitaki aika kainnanoaki. (I-Biribi 2:12; 2 Betero 3:9) E kona n reke te ibuobuoki ae korakora ngkana ti kabongana raoi ara tai, kaubwaira ao n tannako man ukoukorani baika ti tangiri. E korea ae kangai temanna te tari te aine: “I kaikawaaki n te koaua, ma e kaokoro au iango ma angiia aomata ibukin Iehova ngke I a ikawairake. I iangoia bwa e riai ni bati ni maakaki ao I namakinna bwa I aki kona ni kakukureia.” Imwin tabeua te tai, e noria te tari te aine aei bwa e a “mamaara ana onimaki” ibukin ana kangaanga. E reitia ni kangai: “Tiaki ibukina bwa I aki tangira Iehova, ma I bon aki kinaa raoi. Ma e ngae n anne, imwin au kakorakora n tataro, I a moanna ni karaoi bitaki tabeua.” E a manga taku riki: “I noria bwa e kairirai Iehova kaanga te teei, e buokai n tokanikai i aon au kangaanga teuana imwin teuana, ao e karaui ni kaoti nakoiu baika I riai ni karaoi.”

15. Tera are a noria Iesu ao Tamana?

¹⁵ “Teimatoa ni kabwarabwaraa” taekan te rongorongo ae raoiroi nakoia aomata. E taekin taeka akanne ana anera te Atua nakoni Betero ao tabeman riki abotoro imwini kaotinakoaia man te karabuuti n te aro ni kakai. (Mwakuri 5:​19-21) Eng, kanoan naba ara bwai ni kauring ibukin te onimaki bon uataboan te mwakuri ni minita ni katoa wiki. A nora korakoran ara onimaki ao kukureira n ara mwakuri ni minita Iesu ma Tamana. (Te Kaotioti 2:19) E kabwarabwaraa ni kangai temanna te unimwaane n te ekaretia are e mwaneweaki taekana n te barakirabe are mai mwaina: “Te mwakuri ni minita bon te bwai ae kakawaki nakoira.”

16. Bukin tera bwa e raoiroi iangoani katabuani maiura nakon Iehova?

¹⁶ Iaiangoa am katabu. Te bwai ae te kabanea ni kakawaki ae iai iroura bon ara itoman ma Iehova. E ataiia te koraki ake bon ana bwai. (Wareka Itaia 44:5) Nenera korakoran ao raoiroin am itoman ma Iehova ao tataroa ana ibuobuoki. N reitaki ma anne, iaiangoa kakawakin te tai are ko bwabetitoaki iai. Ko kona naba ni buokaki n anne bwa ko na ururingnga are bwabetitoam boni kaotan am motinnano ae te kabanea ni kakawaki ae ko a tia ni karaoia.

TEIMATOA N NANOMWAAKA NI KAANIA IEHOVA

17. Bukin tera bwa e kainnanoaki te nanomwaaka ibukin teimatoara ni kaania Iehova?

¹⁷ E katereterea kainnanoan te nanomwaaka Bauro n ana koroboki nakoia kaaini Karatia. (I-Karatia 6:9) E rangi ni kakawaki naba anne nakoia Kristian ni boong aikai. Ko na kaaitara ma kataaki ma e na buokiko Iehova. Teimatoa n tataroa te taamnei ae raoiroi. Ko na namakina te kabebeteaki bwa e onea mwin te rawawata nakon te kimwareirei ao te maraki nakon te rau. (Mataio 7:​7-11) Iangoa aei: Ngkana ngaia bwa e tabeakinia mannikiba Iehova, e na mwaitira riki tabeakinam ngkoe are ko tangiria ao n taona nanom ibukina? (Mataio 10:​29-31) N aki ongeia bwa baikara kangaanga ake ko aitara ma ngaai, tai tanrikaaki ao tai kabwaraa nanom. Ai batira kakabwaiaakira ngkai ti a kinaaki iroun Iehova!

18. Tera ae ko kani karaoia ngkai ko “a ataa te Atua”?

¹⁸ Mangaia are ngkai ko a tibwa ataa te Atua ao ni bwabetitoaki, tera ae ko na karaoia imwina? Teimatoa ni karekea ataakin riki Iehova ao n rikirake n ikawai n te onimaki. Ao ngkana ko a tia ni bwabetitoaki i nanon ririki aika bati, tera ae ko na karaoia imwina? Ko riai naba n teimatoa ni kakorakoraa ao ni karababaa am atatai ibukin Iehova. Ti bia aki iaiangoia bwa ti aki kainnanoa te kauring ni kaineti ma ara itoman ma ngaia. N oneani mwin anne, ti riai ni bane n nenera ara bwai ni kauring ibukin ara onimaki ni kakoauaa bwa ti teimatoa ni karikirakea ara itoman ma Tamara ae tatangira, Raoraora ao Atuara ae Iehova n te tai teuana ma teuana.​—Wareka 2 I-Korinto 13:​5, 6.