“Teimatoa ni Bubutii ao Kam na Anganaki”

“Te Uea, reireinira n tataro.” (Ruka 11:1) Anne te bubutii are e tabekia temanna te tia rimwin Iesu. E kaotii uoua kaikonaki Iesu bwa kanoan ana kaeka are e a reireinira iai arora n tataro ao n ongoraeaki iroun te Atua. Ngkana arona bwa ko a tia n iaiangoia bwa e ongoraei am tataro te Atua ke e aki, e na bae n anaaki nanom n ana kaeka Iesu.​—Wareka Ruka 11:​5-13.

E katuruturuaki n te moani kaikonaki te aomata are e tataro. (Ruka 11:​5-8) N te karaki, ao e roko ana iruwa te mwaane temanna n te nukanibong ma akea ana nikira nakoina. E rangi ni kakawaki iroun teuare e kawaraki nikiraan te aomata. N aki ongea bwakanakon te tai, e a nakon ana auti raoraona bwa e na kabaea n ana kariki teutana. N te moantai, e bon rawa raoraona anne n teirake ibukina bwa a a matu ana utu. Ma ibukin aki maamaan te mwaane arei, e aki bwara nanona ma e teimatoa ni bubutii ni karokoa are e a teirake raoraona n anganna te amwarake teutana are e kainnanoia.a

Tera reireiara man te kaikonaki ibukin te tataro? E tuangira Iesu bwa ti riai ni botumwaaka n arora n teimatoa ni bubutii, n ukeuke ao ni karebwerebwe. (Ruka 11:​9, 10) Bukin tera? E koaua bwa e taekinna Iesu bwa e rawa te Atua n ongoraei ara tataro? Bon tiaki ngaia anne. E katerea Iesu bwa e kaokoro te mwaane are e tabwarabwara arei ma te Atua, bwa e bon ingainga ni kani kaekai aia tataro aomata ngkana a kakoauaa raoi bwa e kakauongo irouia. Ti kaotiota te aeka n onimaki anne rinanoni botumwaakara. Ibukin arora n okioki ni bubutii, ti a kaotia iai bwa ti rangi ni kainnanoa te baere ti bubutii ao ti kakoauaa bwa e kona te Atua n ongoraea ara tataro, tii ngkana e boraoi ma nanona.​—Mareko 11:24; 1 Ioane 5:14.

E katuruturuaki n te kauoua ni kaikonaki ‘te tia ongoraei tataro’ ae Iehova. (Taian Areru 65:​2, BG) E titiraki ni kangai Iesu: “Antai te karo i buakomi ae ngkana e bubutii natina te ika, ao tao e na anganna te naeta bwa oneani mwin te ika? Ke ngkana e bubutii te bunnimoa ao e na anganna te tikaobian?” E rangi n teretere kaekaana bwa akea te tama ae tatangira ae kona n angan natina te bwai ae buakaka. Ngkanne e a kabwarabwaraa ae nanonaki n te kaikonaki Iesu ni kangai: Ngkana a “anga bwaintangira aika raraoi” taama aika aki kororaoi nakoia natiia, “ao ai batira riki ngkanne nanon te Tama are i karawa ni kan anga te taamnei ae raoiroi” ae te bwaintangira ae moan te raoiroi i buakoni bwaintangira nakoia natina aika i aon te aonnaba ake a butiia!b​—Ruka 11:​11-13; Mataio 7:11.

Tera reireiara man te kaikonaki aei ibukin Iehova are ‘te tia Ongoraei tataro’? E kaungaira Iesu bwa ti na ataia ae Iehova ai aron te Tama ae tatangira are e ingainga n angania natina te baere a kainnanoia. Ngaia are a kona n namakinna taan taromauria Iehova bwa a inaomata ni kawaria ni bubutiia ma nanoia. Ao ibukin ataakin ae e tangira te bwai ae moan te tamaroa riki ibukia, a a kona n tauraoi ni butimwaea ana kaeka nakon aia bubutii, e ngae ngke tiaki are a kantaningaia.c