KO ATAIA?

E koaua bwa e a manga kateaki te tembora i Ierutarem imwin 70 C.E.?

E TAEKINNA Iesu bwa e na aki tiku te atibu teuana i aon te atibu teuana n aki kabwakaaki n ana tembora Iehova, ae te taetae ni burabeti are e a kakoroaki nanona ni kamaunaan Ierutarem n 70 C.E., n ana taanga ni buaka Rom are e kairiri iai Titus. (Mataio 24:2) Imwina riki, e a manga baireia te Embera are Julian bwa e na manga katea te tembora.

E taekinaki bwa bon te kabanea n embera Julian i Rom ae te beekan. E karekea te reirei are aongkoa mairouia Kristian ai natin Constantine te Kakannato aei. Ma imwini katanoataakina bwa te embera n 361 C.E., e a manga ribaa te reirei anne ao te Aro ni Kristian ae babakanikawai are n ana bong ao n tangiri riki Aaro ni beekan. E taekinaki ni bokin rongorongon rimoa bwa bon “te tia Tannako Man te Koaua.”

E rangi n riribaa te Aro ni Kristian Julian. Bukina teuana ngkai e riki anne, bwa ngke onoua ana ririki ao e noriia taan tei ibukia Kristian n tiringa ana karo ao ana utu aika mwaane. Ni kaineti ma rongorongon rimoa ibukia Aaro ni Kristian, e kaungaia I-Iutaia Julian bwa a na manga katea aia tembora, ma kakoauaan are e na kaotaki iai Iesu bwa te burabeti ni kewe.a

Akea te nanououa bwa e iangoa manga katean te tembora Julian. A kauntaekaia taani korea rongorongon rimoa bwa tao e moana katean te tembora anne Julian ke e aki ao ngkana arona bwa e moana kateana, tera bukin tokin te mwakuri. Ma aio bukina teuana ae mataata. E bon tiringaki Julian n ana tai n tautaeka ae e kee i aan uoua te ririki, ao e a aki koro nanon ana iango ibukin te kateitei.