Kabuanibwai Aika Karina—Boni Bwaai ni Kakoaua Bwa e Ribuaka te Atua?

AIA TAEKA TABEMAN: “E tautaekana te aonnaba te Atua ngaia are boni ngaia ae karikii kabuanibwai aika karina ao ibukin anne e bon ribuaka.”

TE BWAI AE TAEKINAKI N TE BAIBARA: “A bane kaain te aonnaba ni mena i aani mwaakan teuare buakaka.” (1 Ioane 5:19) Antai “teuare buakaka”? E kaotaki n te Baibara bwa bon Tatan. (Mataio 13:19; Mareko 4:15) E kangaanga kakoauaan anne? Iangoa aei: Ngkana iai mwaakan Tatan i aon te aonnaba, ngkanne e boni kariria aomata bwa a na katotongnga ni bangaomata, nanonrang ao n aki karaoi aia babaire aika riai ibukin taai aika a na roko. E aki ngkanne ibuobuoki arona anne ibukini kabwarabwaraan aroia aomata n aki tararuaa raoi aia otabwanin n te aonnaba? A bati taan rabakau aika kauring bwa ngkana ti aki tararuaa raoi ara otabwanin ao a na riki kabuanibwai aika karina, e a kakorakoraa riki te kangaanga mai iai ke e a rangi n ruanikai riki maiun te botannaomata iai.

Ma bukin tera ngkanne bwa e kariaiakaki Tatan iroun te Atua bwa e na kariria aomata n te aro ae korakora? E kaekaaki anne ni moan rongorongoia aomata, ngke a karitei ara moani karo nakon te Atua ae te tia Tautaeka. A boni kakairi angiia aomata n te aro anne mangkekei ni karokoa ngkai. Te motinnano anne ae te rarawa nakon ana tautaeka te Atua, a a katukaki iai taekaia botannaomata i nanoni bain te tia riribaa te Atua ae Tatan. Ngaia are e a atongaki iai Tatan iroun Iesu bwa “te tia tautaekania kaain te aonnaba.” (Ioane 14:30) E na tautaeka Tatan n aki toki? E na bon aki!

E bon aki bangaomata Iehovaa nakon rawawata ake e kariki Tatan. Ni koauana, e rangi n rotaki te Atua n rawawataia aomata. N te katoto, ni kaineti ma taai aika kangaanga ake a bwakaraki iai te natannaomata ae Iteraera, e taekinaki ae kangai n te Baibara ibukin te Atua: “E rawawata n aia tai ni karawawataaki ni kabane.” (Itaia 63:​9, NW) Ibukin ana nanoanga te Atua, e a tia ni baireia bwa e na waekoa ni kamauna te tia tautaeka ae ribuaka ae Tatan! E a tia n rinea Natina ae Iesu Kristo bwa te Uea ae aki inanonano ao n raoiroi n aki toki.

KO KANGA N IREKEREKE IAI: E ngae ngke e kabwaka ana tautaeka Tatan ni kamanoia aomata mani kabuanibwai aika karina, ma e na boni kakororaoa anne ana tautaeka Iesu. E kamanoia taan rimwina Iesu n te taina man te angibuaka ae korakora. E taekinaki rongorongona n te Baibara ni kangai: “E boaa te ang ao e taku nakon te nama: ‘Raoi! Tai karongoa!’ Ao e a toki naba karen te ang, ao e a bung te ariki.” A taku taan rimwini Kristo: “Ai bon antai teuaei, ngkai a ongo naba irouna te ang ao te nama?” (Mareko 4:​37-41) Ti kakoauaa man te bwai ae riki anne bwa e na boni kamanoia aomata ni kabane aika ongeaba Iesu ngkana e a tautaeka bwa te Uea.​—Taniera 7:​13, 14.