I NGKANA e tuangko temanna ni kangai: “E a kaan te tai ae a nang akea iai taiani kabuanibwai.” Tera arom iai? Tao ko bae ni kangai: “Ko aera ko mii? Bon irian te maiu aei taiani kabuanibwai.” Ke tao ko iango i bon iroum ni kangai: ‘Antai ae e kataia ni mwamwanaia?’

E ngae ngke a taraa n riiriki kabuanibwai aika karina n taai nako, ma iai aan te kantaninga ni koaua bwa e na bon iai te bitaki. Ma e na bon aki reke te bitaki man aia kakorakora aomata. A aki ota raoi aomata n aron rikini bwaai ao bukini karikaia, ao akea naba korakoraia n tau aroia ke ni bitii baikai. E korea ae kangai Uean Iteraera rimoa ae Toromon are e rangi ni kinaaki ibukini wanawanana ao matairikina: “E aki kona te aomata n ata raoi aron te makuri ae karaoaki i aan taai: ba ngkana tao e boni kabatia nenerana te aomata, ao e aki kona n ataia; ao ngkana tao e taku te aomata ae rabakau ba e na ataia, ao e aki kona naba n ata arona.”​—Te Minita 8:17, BG.

Ngkana a aki kona aomata ni katoki kabuanibwai aika karina, antai ngkanne ae kona? E kaotaki n te Baibara bwa bon ara tia Karikiriki ae kona ni karaoa te bitaki aei. Boni Ngaia ae e karaoa te aonnaba ma bwain nanon te otabwanin, n aroni kawain te ran are a na raanga nako ni nneia. (Te Minita 1:7) E rangi ni kaokoro te Atua ma aomata bwa iai mwaakana ae akea tiana. E taekina ae kangai te burabeti ae Ieremia ni kakoauaan aei: “Te Uea ae Iehova! noria, Ko karaoa karawa ma aonaba ni mwakam ae korakora ao ni baim ae aroraki; akea te bwai ae aki kokonaki i Roum. “ (Ieremia 32:17, BG) Kioina ngkai bon te Atua ae karika te aonnaba ma bwaina nako, n etina e atai aroni baireani bwaina bwa a aonga ni maeka iai aomata ma te rau ao te kukurei.​—Taian Areru 37:11; 115:16.

Ma e na kanga ngkanne te Atua ni karaoa te bitaki ae kainnanoaki? A bati baika a kakamaaku ake a riiriki n ara bong aikai, aika a riki bwa “te kanikina” ibukin “tain tokin te waaki ae ngkai i aon te aba.” E taku Iesu: “Ngkana kam nori baikai bwa a a riki, kam na ataia iai bwa e a kaan ana tautaeka n uea te Atua.” (Mataio 24:3; Ruka 21:31) E na karaoi bitaki aika korakora i aon te aba Ana Tautaeka n Uea te Atua i karawa are e a tia ni kateia, ao n taui aroni baika karikaki. E ngae ngkai iai mwaakan Iehova ae te Atua ni karaoa aei, ma e a tia n rinea Natina ao ni mwiokoia iai. E taekina Iesu te burabeti are Taniera ni kangai: “E anganaki te tautaeka, ma te neboaki, ma ueana, ba a aonga ni bane natanaomata, ma botanaomata, ma taian taetae, n toro i rouna.”​—Taniera 7:14, BG.

E a tia Natin te Atua ae Iesu Kristo n anganaki te mwaaka ibukini karaoani bitaki aikai ni kabane bwa e aonga ni karika te aonnaba bwa te tabo ae kakukurei. Ni menan Iesu i aon te aba uoua tenga te ririki n nako, ao e kaotii katoto aika uarereke ibukini konabwaina n taui aroni bwain aon te aba. N te taina ngke e kaai n toka i aon te booti ma taan rimwina, “e a roko naba te angibuaka, ao a bwaroa nanon te booti naao, n te aro are e a kan iinako te booti.” A nako nanoia taan rimwina bwa a taku bwa a a kani mate ao a a kauta Iesu. Tera are e karaoia Iesu? E bon tii “boaa te ang ao e taku nakon te nama: ‘Raoi! Tai karongoa!’ Ao e a toki naba karen te ang, ao e a bung te ariki.” A mimi taan rimwina ao a titiraki ni kangai: “Ai bon antai teuaei, ngkai a ongo naba irouna te ang ao te nama?”​—Mareko 4:37-41.

Ni moa man te tai anne, ao e a rierake Iesu nako karawa ike e a anganaki iai te mwaaka ae korakora riki ao te tautaeka. Ngkai ngaia te Uea n Ana Tautaeka n Uea te Atua, iai mwiokoana ao konabwaina ni karaoi bitaki ni kabane aika riai bwa a aonga ni maeka aomata ma te rau ao te kukurei i aon te aba.

Ma e ngae n anne ti a tia n noria bwa a riki kangaanga ao kabuanibwai aika bati mairouia aomata, ke a a rangi ni buakaka riki man aroia ni bangaomata ao n nanonrang n tatabemania nako. Tera ae na karaoia te Tautaeka n Uea nakoia aika a teimatoa ni karaoi waaki akanne ao n rawa ni bitaki? E taekinaki n te Baibara rokon te Uea ae Iesu “mai karawa ma ana anera aika mwaaka n te ai ae uramwaaka, ngkana e a karokoaki te irantanga ni karekekai i aoia te koraki ake a aki ataa te Atua, ma ake a aki ira nanon te rongorongo ae raoiroi ae taekan ara Uea ae Iesu.” Eng, e na “kamaunaia iai te koraki ake a urua te aonnaba.”​—2 I-Tetaronike 1:7, 8; Te Kaotioti 11:18.

Imwin anne, e na taui aroni bwain te aonnaba nako “aia Uea ueea” ae Iesu Kristo. (Te Kaotioti 19:16) E na taraiia raoi aomata ake a mena i aan te Tautaeka n Uea bwa a na aki manga karawawataaki n taiani kabuanibwai. E na kamanena mwaakana n taua aron te aonnaba ma bwaina nako n te aro are a na nakoraoi kanoani boong ma taai ibukini kakabwaiaaia botannaomata. Ibukin anne, e nang kakoauaaki ana berita are rimoa Iehova ae te Atua nakoia ana aomata ae kangai: “N na anga iai ami karau ni bongia, ao e na anga amarakena aon te aba, ao a na kariki uaaia kaain te tawana.” (Nakoaia Ibonga 26:4, BG) A nang kona ni katei aia auti aomata n akea maakan ae a na manga uruaki ni kabuanibwai tabeua. “Ane a na katei auti, ao a na maeka i nanoia; ao a na uniki kurebe, ao a na kang uaaia.”​—Itaia 65:21, BG.

Tera ae Ko Riai ni Karaoia?

Akea te nanououa bwa titeboo arom ma aomata aika bati ake a anaaki nanoia ni kani maeka n te aonnaba ae ai akea iai kabuanibwai aika urubwai. Ma tera ae ko riai ni karaoia bwa ko aonga ni mena naba iai? Kioina ngkai iai “te koraki ake a aki ataa te Atua” ma “ake a aki ira nanon te rongorongo ae raoiroi,” are a aki tau ni maeka n te aonnaba ae ai akea iai taiani kabuanibwai, e a teretere raoi bwa e riai te aomata anne n reiakina taekan te Atua ao ni boutokai ana babaire ibukin ana tautaeka i aon te aba. E tangiriira te Atua bwa ti na kinaa ao n ira nanon te rongorongo ae raoiroi ibukin te Tautaeka n Uea are e a tia ni kateia rinanon Natina.

Te anga ae moan te tamaroa ibukin reiakinan aei, bon rinanon te ukeuke n reirei n te Baibara. Iai kaetieti ni kaineti ma katauara ni maeka n te tabo ae ti mano iai, are e na mena i aan ana kairiri te Tautaeka n Uea. E aera bwa ko aki tuangia Ana Tia Kakoaua Iehova bwa a na buokiko n reiakin ana reirei te Baibara? A tauraoi ni buokiko ibukin te kantaninga anne ngkana ko tuangia. Ti ataia bwa ngkana ti kakorakoraira ni kan ataa taekan te Atua ao n ira nanon te rongorongo ae raoiroi, ti na kakoauaa iai are taekinaki n Taeka N Rabakau 1:33, (BK) ae kangai: “Ma e na tau ane e ongo irou; e na mwengaraoi n aki maka te kabuanibai.”