Arora ni Kaaitarai Kabuanibwai Aika Karina

Kararoako Man te Kabuanibwai.

E taekinaki ae kangai n te Baibara: “E ata rokon te kabuanibai te aomata ae e wanawana ao e katanna mai iai; e aki tabe iai te nanoro ao e mwane iai.” (Taeka N Rabakau 22:3, BK) Aei te reirei ni kairiri ae kona ni kaineti ma kabuanibwai aika karina. Ngkana e katanoataaki bwa e nang urarake te warekeno, e nang roko te ieka, te ukeukennanti ke te angibuaka, a wanawana aomata ake a maeka n taabo akanne ngkana a biri nakon te tabo are a na mano iai. E rangi ni kakawaki riki te maiu nakon tabeakinan te auti ke bwaikoraki.

A kona ni motinnanoia tabeman bwa a na aki maeka n taabo aika a kai riki iai kabuanibwai. E taku temanna te bwakuaku n te tautaeka: “E rangi ni kai reke te kabuanibwai n tein aaba aikai. E uarereke mwakoron te Aba ae reke mai iai angiin te kabuanibwai, ma a na riki n taabo akanne kabuanibwai aika karina aika taabangaki n taai aika imwaira.” N te katoto, e kona n riki aei n taabo aika rinano ake i etan taari ke n taabo aika ataaki bwa e na riki iai te mwaeiei. Ngkana ko kona ni kararoaa mwengam ma taabo aika a kai riki iai kabuanibwai ke ni mwaing nakon te tabo ae ko mano riki iai, e na karako iai karawawataam ni kabuanibwai nako.

Karaoani Kaetieti Ibukini Baika Ko na Karaoi.

E kona naba n riki nakoim te kabuanibwai ae ko aki kantaningaia n aki ongei baika ko karaoi ibukini kamanoam. E na bebete riki arom ni kaaitarai baikai ngkana ko a kamani karaoa am kaetieti. E boraoi aei ma te taeka n reirei ane n Taeka N Rabakau 22:3, (BK) are moan taekinaki. Iai am baeki ae tauraoi ae kai uouotaki ibukini baika ko na kainnanoi n te kabuanibwai n aron aikai, bwainnaoraki, te ran, amwarake aika teimaan ao beeban rongorongom tabeua aika kakawaki? Ko wanawana ngkana ko maroroakin aeka ni kabuanibwai aika kona n riki aikai ma am utu, ao baika kam kona ni karaoi n taini kabuanibwai akanne.

Kateimatoa Reitakim ma te Atua.

E kona n ibuobuoki aei ni baika riiriki nakoim. E taekinaki te Atua n te Baibara bwa “te Tama ae nananoanga ao te Atua ae te tia anga te kabebetenano n aekana nako ae kabebeteira n rawawata nako.” E kabwarabwaraaki taekana n te kibu teuana bwa te Atua ngaia ae “e kabebetei nanoia ake a rawawata.”​—2 I-Korinto 1:3, 4; 7:6.

Eng, bon te Atua ae e rangi n atai baika riki nakoia akana onimakinna. Bon te Atua ae tatangira ao e katauraoi kaungaunga aika kabebetenano n aanga aika kakaokoro. (1 Ioane 4:8) Ti aki tataro ibukin taiani kakai, ma ti bubutii te taamnei ae raoiroi mairoun te Atua bwa e na ni buokira ni baika riki nakoira. E kona te taamnei ae raoiroi ni kauringia akana aitara ma kangaanga kiibu man te Baibara, ake a na kabebeteaki ao ni karauaki iai nanoia. Ni koauana, titeboo aia namakin ana toro te Atua aika kakaonimaki ma uean Iteraera rimoa are Tawita ngke e kangai: “Ngkana tao I nakonako i nanoni maruan nun te mate, Ao I aki maka te bwai teuana ae buakaka; ba Ko memena i rarikiu: Am kai ao okom, a kabebetea nanou.”​—Taian Areru 23:4, BG.

A Kaai n Ibuobuoki Raao ni Kristian.

E kaotia te burabeti ae Akabo n te moan tienture bwa “e nang roko te rongo ae korakora n te aonnaba ni kabutaa. E boni koro bukin anne n ana tai Keraurio.” A bati taan rimwin Iesu i Iutaia ake a korakora rotakia n te rongo anne. Tera are a karaoia taan rimwini Kristo ake n taabo tabeua ngke a ongo rawawataia raoia ni Kristian? E taekinaki ae kangai n te rongorongo: “A baireia taan rimwin Iesu bwa a na kanakoa aia ibuobuoki n aron ae a kona n tatabemania nako, nakoia taari ake a maeka i Iutaia.” (Mwakuri 11:28, 29) A katauraoi bwaai n ibuobuoki ma te nano n tangira.

A karaoa naba anne ana toro te Atua ni boong aikai n rikini kangaanga aika korakora. A a rangi ni kinaaki Ana Tia Kakoaua Iehova ibukin aia ibuobuoki nakoia raoia n onimaki. N te katoto, a waekoa Ana Tia Kakoaua Iehova n ibuobuoki nakoia ake a rotaki n te mwaeiei ae korakora i Chile ni 27 Beberuare 2010. E taku Karla are e urubekeaki ana auti n te tunami anne: “E kabebetenano ao e kaunganano noraia [taani Kakoaua] bwa a roko man taabo tabeua ni buokira n te bong are imwina. Akea te nanououa bwa e kabebeteira Iehova rinanon aia mwakuri n ibuobuoki taan anganano akanne. I namakina iai tangirakiu ao mwannanoakiu.” E nora te mwakuri n ibuobuoki tibun Karla ae te unimwaane ae tiaki te tia Kakoaua ao e taku: “E rangi ni kaokoro aei ma are I nonoria n au Aro i nanon ririki aika bati.” E a tuangia ngkanne Ana Tia Kakoaua Iehova bwa a na reirei ma ngaia n te Baibara man te baere e noria.

E na rangi ni korakora te ibuobuoki n taai ni karawawata, ngkana ti iraorao ma ake a tangira te Atua. Ma bon iai te tai ae a nang akea rekenikai ni kaineti ma kabuanibwai i aon te aba? Ti na nora ae taekinaki n te Baibara ni kaineti ma aei.