TITIRAKI MAIROUIA TAANI WAREWARE

A tiringaki kamwarua ni katineaki i aon te kai irouia tibun Iteraera?

A tiringaki kamwarua tabeman ni katineaki i aon te kai ke te boua irouia botannaomata aika bati n taai ake rimoa. E kabaeaki ke e booneraaki i aon te kai te kamwarua anne irouia kaain Rom, n te aro are e teimatoa ni maiu i nanon tabebong imwain ae e rotaki rabwatana n te maraki, te taka, te baki ao bwaai riki tabeua. A iangoa te mwakuri aei kaain Rom bwa te bwai ni katuuaa ae rangi ni kamaama ibukia kamwarua aika mangori.

Ma tera aron te natannaomata ae Iteraera rimoa? A tiringaki kamwarua ni katineaki i aon te kai irouia tibun Iteraera? E kamatataaki n te Tua Rinanoni Mote ni kangai: “Ngkana tao e bure te aomata temanna n te bure ae e riai matena iai, ao ngkana e kamateaki, ao ngkana ko tauria i aon te kai; ao e na aki tiku rabatana i aon te kai ni kangaina, ma ko na bon taunna n te bongi naba anne.” (Te Tua-Kaua 21:​22, 23, BG) E teretere raoi ngkanne bwa n te tai are e koreaki iai te Baibara n Ebera e na kamateaki moa te aomata are e riai matena ao imwina e a katineaki i aon te kai.

Ao ibukin aei, e taekinaki ae kangai n Nakoaia Ibonga 20:​2, (BG): “Ane mai buakoia tibun Iteraera, ke mai buakoia iruwa aika maeka i buakoia Iteraera, ane angani Moreka ana kariki, ao e na boni kamateaki: a na karebanaia kaain aon te aba n atibu.” E riai naba ni kamateaki “te tia tabunea, ke te ibonga ae e mamata te anti i rouna.” N te aro raa? A ‘na karebanaaki naba n atibu.’​—Nakoaia Ibonga 20:​27, BG.

Ti wareka ae kangai n Te Tua-Kaua 22:​23, 24, (BK): “Ngkana iai te ataeinaine ae e tuai ni iein ae e kainrouaki ma temanna, ao ngkana e kaitibo ma ngaia te mane temanna i nanon te kawa ao e wene ma ngaia, ao kam na kairiia ni kauoman nakoni mataroan te kawa, ao kam na karebanaia ni kamateia. E na mate te ataeinaine kioina ngke e aki wetea buokana i nanon te kawa, ao e na mate te mane kioina ngke e tabarea bun raona.” A kakarebana naba te n te atibu tibun Iteraera ake rimoa bwa te anga teuana ae kakabonganaaki riki ibukin tiringaia naake a kuneaki ni bure n tiritiri.a

E kabwarabwaraaki n Te Tua-Kaua 21:​23, (BG) bwa “ane tauraki ao e reke kaina mairoun te Atua.” A na bon rotaki tibun Iteraera ni kaotiotan rabwatan te aomata ae buakaka are “e reke kaina mairoun te Atua,” i mataia te botannaomata. Ni koauana, bon te kauring nakoia aomata katinean rabwatan te aomata ae e a tia ni mate n te aekaki anne i aon te kai.