“Noria! I a Kabooui Bwaai ni Kabane”

Ko kani marurung ao n ananau maium ma am utu? Ko ingainga ni kani maeka n te aonnaba ae akea iai te maraki, te rawawata ao te mate ake bwaai rimoa? Bon tiaki te karioiango taekan te aonnaba anne. Ni kaitaraan anne, e na waekoa n noraki te aonnaba ni koaua ae mena iai te raoiroi, bwa bon anne ana kantaninga Iehova ae te Atua. Nora aroni kakororaoan ana kantaninga n Te Kaotioti 21:​3-5.​—Warekia.

“E na kaoa te rannimata ni kabane mai mataia [te Atua].” (Te Kaotioti 21:4) Te aeka n rannimata raa ae e na kaoi? Bon tiaki te rannimata ibukin te kimwareirei ao tiaki naba rannimata aika kamanoi matara. E nanonaki n ana berita te Atua rannimata aika riki man te rawawata ao te nanokawaki. E na aki tii kaoi rannimata akanne te Atua, ma e na katoki ni kabane rinanoni kamaunaani baika a reke mai iai rannimata aika aki riai n tiinako ae bon te rawawata ao te nanokawaki.

“E nang akea riki te mate.” (Te Kaotioti 21:4) Tera ae karikii rannimata aika aki riai n tiinako i rarikin te kairiribai ae te mate? E na kainaomataia aomata aika ongeaba Iehova man tautoronakia n te mate. N te aro raa? Ngkana e kamauna te bwai ae karika te mate are te bure ae rikiara mairoun Atam. (I-Rom 5:12) E na kaiririia aomata aika ongeaba Iehova nakon te kororaoi ae boto man ana karea ni kaboomwi Iesu.a Imwin anne, e na boni “kamaunaaki te tia kairiribai are te kabane, are te mate.” (1 I-Korinto 15:26) A na kona aomata aika kakaonimaki ni maiu n aron are kantaningaia te Atua ae te maiu ae kororaoi n aki toki.

“E nang akea riki . . . te maraki.” (Te Kaotioti 21:4) Te aeka ni maraki raa ae nang akea riki? E nang akea riki marakin nako te iango, te namakin ao te rabwata are riki man te bure ao te aki kororaoi, are e kananokawakia aomata aika mirion ma mirion.

E na noraki n te tai ae waekoa te maiu ae akea iai te rannimata, te mate ao te maraki. Tao ko kona n titiraki ni kangai: ‘Ma ia ngkanne?’ Tao e beritana te maiu i karawa te Atua?’ Tiaki ngaia anne. Iangoia bwa e aera ngkai e aki. Te moan, e kaukaki te berita anne ma taeka aika e “mena ana umwanrianna te Atua irouia aomata,” ao a na maeka aomata i aon te aba. (Te Kaotioti 21:3) Te kauoua, e kabwarabwaraaki n te berita anne te aonnaba are e “nang akea riki [iai] te mate” ae nanona te aonnaba are e nonoraki iai ngkoa te mate ma e nang akea. E tuai man riki te mate i karawa, ma e riiriki ikai i aon te aba i nanon te tai ae rangi ni maan. E teretere ngkanne bwa e beritana kakoroani bukin te maiu ae raoiroi riki te Atua ikai, i aon te aba.

E tangirira Iehova bwa ti na kakoauaa ana berita ibukin te waaki ae boou i aon te aba ae mena iai te raoiroi. Imwin raoi kabwarabwaraani kakabwaia aika a na roko, e kakoauaa nakoira n ana berita ni kangai: “Noria! I a kabooui bwaai ni kabane.” Imwina e a manga taku: “A kona n onimakinaki taeka aikai ao a koaua.” (Te Kaotioti 21:5) E aera ko aki reiakina ae bati riki ibukin arom ao aroia aika tangiraki iroum, ni kona ni mena i buakoia taan taromauri aika kukurei ake a na nora kakororaoan ana berita te Atua ae rangi ni kakukurei?