Titiraki Mairouia Taani Wareware

E bon eti irouia Kristian bwa a na kamannangaki rabwataia ngkana a mate?

Akea totokoani kamannangan rabwatan te mate n te Baibara.

Iai rongorongo n te Baibara ake a taekinaki iai kabuekan rabwataia ke riia aomata aika mate. (Iotua 7:25; 2 Rongorongo 34:4, 5) E bae n nanonaki n aei nakoia aomata ake a taraa n aki riai n taunaki raoi. Ma e aki nanonaki n taai nako bwa ngkana a kamannangaki rabwataia maate, a aikoa taraa n aki riai n taunaki raoi.

Ti kona n nora aei n rongorongoni maten te Uea ae Tauro ma natina mwaane aika teniman. A mate naaka aman aikai ngke a buakania I-Biritia. Temanna mai buakoia natina akanne bon Ionatan ae raoraon Tawita ae tatangiria ao te tia boutokaia ae kakaonimaki. Ngke a ataa te bwai ae riki tibun Iteraera ake a ninikoria ake a maeka i Iabetikireata, a uotii rikaaki rabwataia naake aman, a kabueki ao a taun riia. E kamoamoaia Tawita tibun Iteraera akanne imwina riki ibukin aia mwakuri.—1 Tamuera 31:2, 8-13; 2 Tamuera 2:4-6.

Te kantaninga n te Baibara ibukia maate bon te mangauti, ae manga kaokani maiun te aomata iroun te Atua. E ngae ngkana e kamannangaki rabwatan te aomata ae mate ke e aki, ma akea tian ana konabwai Iehova ni manga kaoka maiun te aomata nakon te rabwata ae boou. A aki maaku I-Ebera ake teniman aika kakaonimaki ake a kaaitara ma te kamateaki i nanon te nne ni kanaiai ae uramwaaka are e tua te Uea ae Nebukaneta bwa a na tiringaki iai, e ngae naba ngkana e aki kona te Atua ni kautiia. (Taniera 3:16-18) E a tia naba n riki aei irouia ana toro Iehova aika kakaonimaki ake a kaaitara ma te mate ao ni kamannangaki rabwataia imwina n aia tabo ni kaikain kaain te Nazi i Tiaman. A bati ana toro te Atua aika kakaonimaki ake a mate n taiani boom ke n aanga riki tabeua ake akea iai mwin rabwataia n noraki. Ma akea te nanokokoraki bwa a na boni mangauti.—Te Kaotioti 20:13.

Tiaki nanona bwa Iehova e na manga karaoa rabwatan te aomata n aron teina ngkoa bwa e aonga ni manga kautia. E kaotaki anne iroun te Atua ni kautaia Kristian aika kabiraki nakon te maiu i karawa. N aron Iesu are e a tia ni “manga kamaiuaki n te rabwata n taamnei,” a a kautaki naba Kristian aika kabiraki ni bon aroia anne ma ai te rabwata n taamnei. Akea iteran rabwataia n aomata ngkoa ake a na manga iriia nako karawa.—1 Betero 3:18; 1 I-Korinto 15:42-53; 1 Ioane 3:2.

E boto ara kantaninga n te mangauti tiaki man te baere e na karaoaki ma rabwatan te mate, ma bon onimakinan ana konabwai te Atua ao nanona ni kan kakororaoi ana berita nako. (Mwakuri 24:15) Ni koauana, ti bae n aki oota raoi n aron te Atua ni karaoi kakai ibukin te mangauti n taai aika nako ke n taai aika na roko. Ma ti bon onimakina raoi Iehova. E a tia naba ni kaota “kakoauaana” n arona ni kauta Iesu.—Mwakuri 17:31; Ruka 24:2, 3.

A karaoa ae raoiroi Kristian n iaiangoan aroaro aika bwabwainaki, iango ao baika a eti i aan te tua ni kaineti ma taunakin rabwataia maate. (2 I-Korinto 6:3, 4) Ngaia are e a bon nakon ana motinnano temanna ma temanna ke te utu bwa e na kamannangaki rabwatan te aomata ae mate ke e na aki.