Bon Iai Mwaakan Te Kaantaninga Ibukin Te Manga-uti
“I atongi baikai ni kabane ba te kabuanibwai, . . . ba I aonga n ata Iesu ma mwakani manga-utina.”—I-BIRIBI 3:8-10.
1, 2. (a) Tabeua te ririki n nako, tera aron te mataniwi n Aro temanna, ni kabwarabwara taekan te manga-uti? (b) E na kanga ni waakinaki te manga-uti?
AI TIBWA tabeua te ririki imwin 1890, ao te nuutibeeba teuana e ribootina taekan te kabwarabwara ae kaokoro are e a karaoaki iroun te mataniwi n te Aro teuana, i Brooklyn, New York, U.S.A. E taku teuaei bwa te manga-uti, e nanona manga ikotakiia rii ao iriko ni kabane ake bwain rabwataia aomata ni kabane ake a a tia ni maiu, n aki ongea bwa a kamaunaki ni kabuekaki ke a kabuanibwai, ngkana a kanaki iroun te man, ke e a riki bwa kanan te aroka. Te mataniwi arei e taku bwa n te bong teuana ae maanna 24 te aoa, e na roo karawa ibukina bwa a na kibakiba iai raurau ni bai, anga ni bai, wae, tabonibai, rii, iia, ao kun, aika bwain rabwataia aomata aika birion ma birion mwaitiia ake a maiu ngkoa. Bwain rabwataia aikai, aongkoa a na kataia ni manga toma ma rabwataia ake a mena iai ngkoa. A na manga roko taamnei mai karawa ao moone, bwa a na manga rin inanon rabwata aika a kautaki aikai.
2 Ma te manga-uti are taekan manga katomakin bwain rabwataia aomata ake a maiu rimoa, e aki botau ma te wanawana, ao akea te taamnei ae aki mamate irouia aomata. (Te Minita 9:5, 10; Etekiera 18:4) Iehova ae te Atua ae e kautiia mate, e aki kainnanoa manga katomakin bwain rabwataia aomata. E kona ni karaoi rabwata aika boou ibukia aomata aika a kautaki. Iehova e a tia ni mwiokoa Natina ae Iesu Kristo, n te mwaaka ibukin kautakiia maate, ma te kaantaninga ae a na maiu n aki toki. (Ioane 5:26) Mangaia are e kangai Iesu: “Boni Ngai te manga-uti, ao te maiu: ane onimakinai, ngkana tao e boni mate, ao e na boni manga maiu.” (Ioane 11:25, 26) Ai kaunga ra te berita aei! E kakorakoraira bwa ti aonga n nanomwaaka i aan kataakira, ma ni kaitara naba te mate, n aki kerikaki man nakoara, ae taani Kakoaua ibukin Iehova, aika kakaonimaki.
3. Bukin tera Bauro ngke e riai ni boutokoa taekan te manga-uti?
3 E aki botau taekan te manga-uti ma te iango ae iai te taamnei ae aki mamate irouia aomata—ae te iango ae bwainaki iroun te tia rabakau ni karekeiango ngkoa ae te I-Kuriti, are arana Plato. Mangaia are tera are e a riki ngke te abotoro Bauro e kaotioti nakoia bwakuaku ni Kuriti n te tabo are te Areiobako ni kaawan Atenai, ao e taekina Iesu man taku bwa te Atua e kautiia man te mate? “Ao ngke a ongo manga-utiia maate,” e taku te rongorongo, “a kakaniko temangina.” (Mwakuri 17:29-34) A mwaiti aomata ake a nora Iesu Kristo imwin utina man te mate ake a maiu n te tai arei, ao e ngae ngke a kakanikoaki, ma a kaotiota are e a bon kautaki man te mate. Ma taan reirei aika kewe ake a reitaki ma te ekaretia i Korinto, a kakewea te manga-uti. Mangaia are Bauro e anga te reirei ae korakora ni boutokoa taekan te reirei ni Kristian aei, n 1 I-Korinto mwakorona 15. Te karaurau n nenera raoi ana kabwarabwara aei, e kakoaua n akea te nanououa iai bwa e koaua te manga-uti, ao e mwaaka.
Bwaai Aika A Kakoaua Manga-utin Iesu, Aika A Aki Kona ni Kakeweaki
4. Baikara bwaai ni kakoaua ibukin manga-utin Iesu ake a taekinaki iroun Bauro?
4 Tara ana moan taeka Bauro. (1 I-Korinto 15:1-11) A na teimatoa kaaini Korinto n taua euangkerion te kamaiuaki, ma a na tii kaakea ngkana a riki bwa taan onimaki n akea bukina. E a mate Kristo ibukin ara bure, e taunaki ao e a manga kautaki. Ni koauana, Iesu are e a tia ni kautaki, e a kaoti nakon Keba (Betero), ao rimwi, “nakoia uake tengauni ma uoman.” (Ioane 20:19-23) E noraki irouia aomata aika 500 tabun mwaitiia, tao n te tai are e tuatua ni kangai: ‘Nako ni kakiritiania aomata.’ (Mataio 28:19, 20) E noraki iroun Iakobo, ao irouia abotoro ni kabane ake a kakaonimaki. (Mwakuri 1:6-11) Ni ua kaan ma Tamateko, e kaoti Iesu nakon Tauro, “ngke kaanga nakon te tei ae bungiaki ngke a aki koro matan ana bong”—ae ai aron ae e a tia ni kautaki nakon te maiu n taamnei. (Mwakuri 9:1-9) Kaaini Korinto a riki bwa taan onimaki ibukina bwa Bauro e kaotioti nakoia, ao a butimwaea te euangkerio.
5. Tera aron ana reirei Bauro are e koreaki n 1 I-Korinto 15:12-19?
5 Tara tein ana kabwarabwara Bauro. (1 I-Korinto 15:12-19) Kioina ngke taani kakoaua ake a nora manga-utin Kristo ake a tataekina rongorongona, e a kanga ni kona n atongaki ae akea te manga-uti? Ngke e aki kautaki man te mate Iesu, ao e mate buaka tataekinan te rongorongo iroura ao ara onimaki, ao ti a riki bwa taani kewe aika a kakewea te Atua ngkai ti taekinna bwa boni ngaia are e a kauta Kristo man te mate. Ngkana a aki kautaki maate, ao ‘ti a mena naba n ara bure,’ ao a mauna aomata ake a mate inanon Kristo. Ao ngkana “ti kaantaninga akoara irouni Kristo n ti te maiu aei, ao moa ni kananoanga ngaira i buakoia aomata ni kabaneia.”
6. (a) Tera are e taekinna Bauro ni kakoaua iai aron manga-utin Iesu? (b) Tera “te kairiribai are te kaitira,” ao e na kanga ni kamaunaki?
6 E kakoaua manga-utin Iesu Bauro. (1 I-Korinto 15:20-28) Kioina ngkai Kristo bon “te moa n uaa” mai buakoia akana a matu ni mate, bon iai riki aomata tabemwaang ake a na kautaki. Ibukina bwa te mate e nako man ana aki-ongeaba te aomata are Atam, e a reke naba te manga-uti rinanon te aomata temanna—ae Iesu. Ana koraki a na kautaki inanon ana tai ni mena ma aomata. Kristo e na “kamauna te nakoa n uea ni kabanea, ma te tau-taeka ni kabanea ma te tau-aro” ae kaitara ma ana tautaeka te Atua, ao e na tautaeka bwa te Uea ni karokoa Iehova e a kaki ana kairiribai ni kabane i aani waena. Ao “te kairiribai are te kaitira”—ae te mate are e a riki mairoun Atam—e na kamaunaki naba rinanon kamanenan ana karea Iesu. Ao ngkanne, Kristo e na manga kaoka te Tautaeka n Uea nakon Atuana ao Tamana, ma n aantaeka i aan “Teuare kabane bwaai ni kaki i aana, ba E aonga n riki te Atua ba te Banin ae kororaoi nakoia aomata ni kabaneia.”
Babetitoaki Ibukia Maate?
7. Antai aika a “babetitoaki ibukiia maate,” ao tera are e nanonaki iai ibukiia?
7 A titiraki ni kangai taan rawa nakon manga-utiia maate: “A na aera ake a babetitoaki i bukiia maate?” (1 I-Korinto 15:29) Bauro e aki nanonna bwa aomata aika a maiu a riai ni babetitoaki ibukia aomata ake a a tia ni mate, bwa taan rimwin Iesu n tatabemaniia nako a riai n reirei ibon irouia, n onimaki, ma ni babetitoaki. (Mataio 28:19, 20; Mwakuri 2:41) Kristian ake kabiraki a “babetitoaki i bukiia maate,” n te aro ae a karinaki inanon te waaki teuana ae e na kairiia nakon mateia ao manga-utiia. E moanaki te babetito aei ngke taamnein te Atua e karina inanoia kaantaningan te maiu i karawa, ao e a toki ngkana a kautaki man te mate nakon te maiu ae aki mamate, ae te maiu n taamnei i karawa.—I-Rom 6:3-5; 8:16, 17; 1 I-Korinto 6:14.
8. Tera are a kona ni koaua raoi iai Kristian, e ngae ngkana Tatan ma ana koraki a kamateia?
8 N aron are e oti man ana taeka Bauro, te kaantaninga ibukin te manga-uti e kakorakoraia Kristian bwa a na kona ni kakaoanikaiia, ao ni kaitara te mate ni katoa bong, ibukin kakaraoan te mwakuri n tataekina rongorongon te Tautaeka n Uea. (1 I-Korinto 15:30, 31) A ataia bwa Iehova e kona ni kautiia ngkana e kariaia tiringaia iroun Tatan ke ana koraki. Bon tii te Atua ae e kona ni kamaunai maiuiia i Keenna, are e tei ibukin te kamaunanakoaki n aki toki.—Ruka 12:5.
Riain te Kamarurung
9. Ngkana e na mwaaka ni kateimatoai maiura te kaantaninga ibukin te manga-uti, ao tera ae ti riai ni kararoaira ma iai?
9 E a kateimatoaki Bauro n te kaantaninga ibukin te manga-uti. Ngke e mena i Ebeto, tao aiana a karenakoa nakon te tabo ni kamataku bwa e na kaunrabwata ma maan aika tiritiri. (1 I-Korinto 15:32) Ngkana e a riki anne, ao e a kamaiuaki, n aron naba Taniera are e kamaiuaki mairouia raian. (Taniera 6:16-22; Ebera 11:32, 33) Kioina ngke e kakaantaninga te manga-uti, e okoro aroaron Bauro ma aroaroia kaain Iutaia ake a a tia ni kitana te koaua, ake a maiu n ana bong Itaia. A kangai: “Ti na amarake ma ni moi, ba ti a mate ningabong.” (Itaia 22:13, Septuagint) Ngkana e na mwaaka te kaantaninga ibukin te manga-uti ni kona ni kateimatoaira n aron are e kateimatoa naba maiun Bauro, ao ti riai ni kararoaira mairouia aomata aika a bwaina te aroaro ae aki raoiroi aei. “Kam na tai burebureaki,” e reirei Bauro. “A uru aaro aika riai taian i-raorao aika bubuaka.” (1 I-Korinto 15:33) Te koaua bwa te reirei aei e kaineti raoi nakon bwai aika mwaiti inanoni maiura.
10. Ti na kanga ni kona ni kateimatoa aron kakaantaningan te manga-uti iroura?
10 E kangai Bauro nakoia akana a nanououa n te manga-uti: “Kam na uti raoi n arona te aro ae riai, ao tai bure; ba a aki ata te Atua temangina: I atonga aei ba kamaamaeami.” (1 I-Korinto 15:34) Inanon “tain te toki” aei, ti riai ni karaoa ae boraoi ma te atatai ae eti ibukin te Atua ao Kristo. (Taniera 12:4; Ioane 17:3) E na kateimatoaki iai kaantaningan te manga-uti iroura.
Kautaki n te Rabwata Ra?
11. E a kanga Bauro ni kaota aron manga-utiia Kristian ake kabiraki?
11 Imwin anne, Bauro e rinanoi titiraki tabeua. (1 I-Korinto 15:35-41) Tao ibukin nanona ni kan kananououa taekan te manga-uti, ao e kona n titiraki ni kangai temanna: “A na iranaki ni manga kautaki maate? Ao a roko ma te rabata ra?” N aron are e kaotia Bauro, ai aron ae a mate moa te koraa are e a unikaki ibuakon te tano bwa e aonga ni kona n onikaki ma n riki bwa te bwebwe. N aron anne, te aomata are natinaki n te taamnei e riai ni mate. N aron te bwebwe ae e rikirake man te koraa ao e a riki bwa te rabwata ae boou, ao rabwatan te Kristian are kabiraki are e kautaki man te mate, e a kaokoro naba ma rabwatan te aomata ae te iriko. E ngae ngkai akea okoron aroarona mai imwain matena, ma e a kautaki bwa te karikibwai ae boou, are iai rabwatana n taamnei ae tau ibukin te maeka i karawa. Ma akana a kautaki nakon te aonnaba a na riai n uti ma rabwataia n aomata aika iriko.
12. Tera ae e nanonaki ni “bwaini karawa,” ao “bwain aon te aba”?
12 N aron are e taekinna Bauro, e okoro irikoia aomata ma irikoia maan. E kaokoro naba irikon te man temanna ma te man temanna. (Karikani Bwaai 1:20-25) A kaokoro aron tamaroan “rabata aika bwaini karawa” aika aia bwai aomata aika taamnei ma “rabata aika bwain aon te aba” aika iriko. Bon iai naba te kaokoro n tamaroan taai, namwakaina, ao itoi. Ma a rangi ni mimitong riki taani kabiraki aika a kautaki.
13. N aron are e taekinaki n 1 I-Korinto 15:42-44, tera are e unikaki, ao tera ae rikirake mai iai?
13 Ngke e a tia n taekin kaokoro aikai Bauro, e manga kangai: “Ao ai aron naba manga-utiia maate.” (1 I-Korinto 15:42-44) E kangai naba: “E unikaki ni mka; e a manga kautaki n aki mka.” Tao Bauro e nanona ikai te koraki ae kaainaki irouia taani kabiraki. A unikaki n te mka n te mate, ao a manga kautaki n aki mka, ae a inaaomata man te bure. E ngae ngkai e aki karineaki iroun te aonnaba, ma e kautaki nakon te maiu i karawa ma ni kaotaki n te neboaki ma Kristo. (Mwakuri 5:41; I-Korote 3:4) N te mate, e a unikaki bwa “te rabata ae bon te rabata,” ao e kautaki bwa “te rabata ae te rabata n tamnei.” Kioina ngke e kona n reke aei irouia Kristian ake a natinaki n te taamnei, ti kona ni kakoaua naba bwa iai riki temwangina ake a kona ni kautaki nakon te maiu i aon te aonnaba.
14. Tera aron Bauro ni kabotaua Kristo ma Atam?
14 Ngkanne, Bauro e kabotaua Kristo ma Atam. (1 I-Korinto 15:45-49) Atam are te moan aomata, e a riki bwa “te aomata ae maiu.” (Karikani Bwaai 2:7) “Atam are te kaitira”—are Iesu—e a riki bwa “te tamnei ni kamaiu.” E anga maiuna bwa te karea ni kaboomwi moa, ibukia taan rimwina aika kabiraki. (Mareko 10:45) Kioina ngkai aomata ngaiia, a ‘arona aron teuare e karaoaki man te tano,’ ma ngkana a kautaki, ao a riki n ai aron Atam are te kaitira. Te koaua bwa aomata ni kabane aika ongeaba a na kakabwaiaki man ana karea Iesu, n ikotaki naba ma aomata aika a na kautaki nakon te aonnaba.—1 Ioane 2:1, 2.
15. Bukin tera ngkai Kristian ake kabiraki a aki kautaki n te rabwata ae te iriko, ao a kaanga ni kautaki inanon ana tai Iesu ni mena irarikia aomata?
15 Ngkana a mate Kristian ake kabiraki, a bon aki kautaki n te rabwata n aomata. (1 I-Korinto 15:50-53) Te rabwata ae e kona ni mka are e a karaoaki man te iriko ao te raraa e aki kona n anganaki te aki mka ao te ababa n te Tautaeka n Uea i karawa. Kristian ake kabiraki tabeman a na aki matu nako n te mate n te tai ae ananau. Ngke e toki maiuia ni kakaonimaki i aon te aonnaba inanon ana tai Iesu ni mena ma aomata, a na “onikaki, n ti teuana te tekan, n ti teuana te ruberube ni mata.” A na kautaki n te tekan naba anne nakon te maiu n taamnei ao a na anganaki iai te aki mka ao te neboaki. N tokina, e na koro mwaitin ‘buun’ Kristo i karawa, ae 144,000.—Te Kaotioti 14:1; 19:7-9; 21:9; 1 I-Tetaronike 4:15-17.
Te Tokanikai i aon te Mate!
16. N aron are e taekinna Bauro ma burabeti rimoa, tera ae e na riki nakon te mate are e a riki mairoun Atam?
16 E tabeka bwanana Bauro ni kaotia bwa e na oongaki te mate n aki toki. (1 I-Korinto 15:54-57) A na kakoroaki bukin taeka aikai, ngkana e onikaki are e kona ni mka ma ni mate, nakon are e aki kona ni mka ao e aki mamate: “E oongaki te mate n te tokanikai.” “Te mate, e nga kaweteni bukim? Te [rua ni] mate, e nga am tokanikai?” (Itaia 25:8; Otea 13:14) Kaweteni bukin te mate, bon taekan te bure, ao korakoran te bure te Tua, are a kabuakakaki iai taani bure nakon te mate. Ma ibukin ana karea Iesu ao manga-utina, te mate are e a riki mairoun te tia bure are Atam e na aki manga tokanikai.—I-Rom 5:12; 6:23.
17. A kanga ni kona ni kamanenaki ana taeka 1 I-Korinto 15:58 n taai aikai?
17 “Ma ngaia aei, tariu, aika kam tangiraki,” e taku Bauro, “kam na teimatoa, ao kam na nene, ao kam na tai toki ni kakorakoraingkami n ana makuri te Uea ni kamaiti, ngkai kam ata ami makuri ba e aki matebuaka iroun te Uea.” (1 I-Korinto 15:58) Taeka aikai a kaineti nakoia nikira aika kabiraki aika a maiu ngkai ao nakoia ana “tiibu tabemang” Iesu, e ngae ngkana a mate inanoni boong aika kaitira. (Ioane 10:16) E aki matebuaka aia mwakuri n tia uarongorongo ibukin te Tautaeka n Uea, bwa e mena imwaiia te manga-uti. Kioina ngkai taan toro iroun Iehova ngaira, ao ti bia kakorakoraira n ana mwakuri te Uea, ma n ingainga ni kaantaninga te bong are ti kona ni bane ni kakatonga ni kangai: “Te . . . mate, e nga am tokanikai?”
E Kakoroaki Bukin te Kaantaninga Ibukin te Manga-uti!
18. Tera aron korakoran kaantaningan te manga-uti iroun Bauro?
18 Ana taeka Bauro ake a koreaki n 1 I-Korinto mwakorona 15 a katereterea bwa iai mwaakan te kaantaninga ibukin te manga-uti inanoni maiuna. E boni kakoaua raoi bwa e kautaki Iesu man te mate, ao aomata tabemwaang a na kainaaomataki man aia rua ni mate aomata. E korakora naba am kaantaninga n aron anne? Bauro e iangoa katokan oin nanona ni kakabwaia tabeua bwa ‘taiani maange,’ ao ‘e atongi bwaai aikai bwa te kabuanibwai,’ bwa e aonga n ‘ataa Kristo ao mwaakani manga-utina.’ E kukurei te abotoro anne n rinanon te mate ae ai aron maten Kristo, ibukina bwa e kaantaninga karekean te ‘manga-uti are e na rimoa.’ E aranaki naba anne bwa “te moa ni manga-uti,” ae e na rinanoaki irouia taan rimwin Iesu ake kabiraki, aika 144,000 mwaitiia. Eng, a kautaki nakon te maiu n taamnei i karawa, ma e kakoauaki naba iai ae “maate ake nikira” a na kautaki nakon te aonnaba.—I-Biribi 3:8-11; Te Kaotioti 7:4; 20:5, 6.
19, 20. (a) Antai aomata ake a taekinaki n te Baibara aika a na kautaki nakon te maiu i aon te aonnaba? (b) Ko a kaantaninga manga-utin antai?
19 Te kaantaninga ibukin te manga-uti e a tia n riki bwa te bwai ni koaua ae rangi ni kakukurei ibukia taani kabiraki ake a a tia ni kakaonimaki ni karokoa mateia. (I-Rom 8:18; 1 I-Tetaronike 4:15-18; Te Kaotioti 2:10) Akana a kamaiuaki man te “rawawata are korakora” a na nora naba kakoroan bukin te kaantaninga ibukin te manga-uti i aon te aonnaba, ngkana “marawa e anga maate ake i nanona; ao te mate ma Eriti a anga maate ake i nanoia.” (Te Kaotioti 7:9, 13, 14; 20:13) Iobi naba e na mena ibuakoia aomata ake a kautaki nakon te maiu i aon te aonnaba, are a mate ngkoa natina aika mwaane aika itiman, ao natina aika aine aika teniman. Iangoa aron kukurein nanona ni manga butimwaiia—ao kukurein nanoia naba ngkana a ataia bwa iai riki mwaaneia ao tariia!—Iobi 1:1, 2, 18, 19; 42:12-15.
20 Ai raoiroi ra ngkana Aberaam, Tara, Itaaka, ao nei Rebeka—ao aomata aika a mwaiti riki n ikotaki ma “burabeti ni kabaneia,”—a bane ni kautaki nakon te maiu i aon te aonnaba! (Ruka 13:28) Temanna mai buakoia burabeti aikai bon Taniera, are e tuangaki bwa e na kautaki i aan ana tautaeka te Mesia. E a tia ni motirawa n te rua ni mate ngkai Taniera inanon 2,500 te ririki, ma ibukin mwaakan te manga-uti, e na aki maan ngkai ao e na ‘tei n anaa tibangana’ bwa temanna mai buakoia ‘nati n uea i aonnaba ni kabuta.’ (Taniera 12:13; Taian Areru 45:16) Ai kamaiura butimwaeaia tiaki tii aomata aika kakaonimaki rimoa, ma butimwaeaia naba tamam, tinam, natim, ke aomata riki tabeman ake a tangiraki iroum, ake a tia n anaaki mairoum iroun te kairiribai are te mate!
21. Bukin tera ngkai ti aki riai n iremwe ni karaoa ae raoiroi nakoia aomata ngkai?
21 Raora tabeman ao aomata ake a tangiraki iroura, tao a a tia ni beku iroun te Atua inanon ririki aika mwaiti, ao a kara ngkai. Tao e kangaanga irouia te maiu aei ibukina bwa a kara. Bon kaotan te tangira iroura ngkana ti buokia ngkai n aron are ti kona! Ao ngkanne, ti na aki nanokawaki n taku bwa ti aki karaoa ae riai nakoia, ngkana a taonaki n te mate. (Te Minita 9:11; 12:1-7; 1 Timoteo 5:3, 8) Ti kona ni kakoaua bwa Iehova e na aki manuokin bwaai aika raraoi ake ti karaoi ibukia aomata tabemwaang, n aki ongea bwa iraua aia ririki ni maiu ke aroaroia. “Ma ngaia ae ti na kakaraoa ae raoiroi nakoia aomata ni kabaneia, n ai aron ae ti kona,” e korea ae kangai Bauro, “ao e na kamaitaki riki nakoia kaain te onimaki.”—I-Karatia 6:10; Ebera 6:10.
22. Ni karokoa kakoroan bukin te kaantaninga ibukin te manga-uti, tera ae ti riai ni kamatoai nanora bwa ti na karaoia?
22 Iehova, boni ngaia “te Tama ae nanoangaea te aba, ae te Atua ae te tia karika kabebetean te nano ni kabanea.” (2 I-Korinto 1:3, 4) E kabebetei nanora ana Taeka, ao e buokira bwa ti na kabebetei nanoia aomata tabeman riki n te kaantaninga ae mwaaka, ae taekan te manga-uti. Ni karokoa te tai ae ti nora kakoroan bukin te kaantaninga anne n te tai are a nang kautaki iai maate nakon te maiu i aon te aonnaba, ti bia katotonga aron Bauro, n onimakina te manga-uti. Ti bia katotonga riki aron Iesu, are e a koro bukin onimakinan ae e mwaaka te Atua ni kona ni kautia man te mate. E aki maan ngkai ao akana a mena n ruaia ni mate a na ongo bwanan Kristo ma n otinako. Ti bia kabebeteaki ma ni kakukureiaki iai. Ma ae kakawaki riki, ti bia kakaitau nakon Iehova, are e kauka aron reken te tokanikai i aon te mate, rinanon ara Uea are Iesu Kristo!
Tera Am Kaeka?
• Baikara bwaai ni kakoaua ibukin manga-utin Iesu ake a taekinaki iroun Bauro?
• Tera te “kairiribai are te kaitira,” ao e na kanga ni kamaunaki?
• Ni kaineti ma Kristian ake kabiraki, tera ae e unikaki ao tera ae e kautaki?
• Antai aomata ake a taekinaki n te Baibara aika ko tangiria ni kaitiboo ma ngaiia ngkana a kautaki nakon te maiu i aon te aonnaba?
[Taamnei n iteraniba 28]
Moan te kateke nano ana reirei te abotoro Bauro ni boutokoa te manga-uti
[Taamnei n iteraniba 32]
Manga-utin Iobi, ana utu, ao aomata aika a mwaiti riki, e na karika te kimwareirei ae moan te bati!