Titiraki Aika Kaekaaki Man Te Baibara

E aera ngkai ti riai n tataro?

E tangirira Iehova ae te Atua bwa ti na namakinna ae ti inaomata ni maroro ma ngaia ni katoatai ibukin raraomara. (Ruka 18:1-7) E bon ongora ibukina bwa e mutiakinira. Kioina ngkai e kaoira ma te akoi Tamara are i karawa bwa ti na tataro, e aera ngkanne bwa ti na aki butimwaea ana kakao?—Wareka I-Biribi 4:6.

Te tataro bon tiaki tii te kawai ibukini karekeani buokara. Ma ti buokaki iai ni kaaniaki ma te Atua. (Taian Areru 8:3, 4) Ngkana ti katoatai ni kaotii ara namakin nakon te Atua, ti a karikirakea iai ara iraorao ae kaan riki ma ngaia.—Wareka Iakobo 4:8.

Tera arora ngkana ti tataro?

E aki tangirira te Atua bwa ti na kamanenai taeka ni kamoamoa ke ni kaokioki tataro aika kamatenikunaaki. Akea naba teira ae okoro ae e a tia ni baireaki ibukira. Ma e kaoira Iehova bwa ti na tataro mai nanora. (Mataio 6:7) N te katoto, e tataro Anna ibukin te kangaanga ae rangi ni karawawata n ana utu i aon Iteraera rimoa. Ma imwina riki, ngke e a bitaki rawawatana nakon te kimwareirei, e a karabwaa te Atua n ana tataro mai nanona.—Wareka 1 Tamuera 1:10, 12, 13, 26, 27; 2:1.

Ai kakukureira kakabwaiaara aei! Ti a kona ni kawara te tia Karikiriki ibukin raraomara. Ti a kona naba n taromauria ao ni kaitaua ibukini baike e karaoi. Ti bon aki riai ni kakeaa bongan te kakabwaia ae rangi ni kakawaki anne.—Wareka Taian Areru 145:14-16.