Ko Kona n Nora te Atua ae Aki Nonoraki?

“BON te taamnei te Atua,” ae e aki kona n noraki irouia aomata. (Ioane 4:24) Ma e ngae n anne, e taekinaki n te Baibara bwa a a tia tabeman n nora te Atua n te aro teuana. (Ebera 11:27) E kanga ni kona n riki anne? Ko kona n nora raoi “te Atua ae aki nonoraki”?—I-Korote 1:15.

Kabotaua arora ma te aomata ae bungiaki ni mataki. E koaua bwa ibukini matakiina, e aki kona n ota raoi ni bwain nako te aonnaba aika irarikina? Tiaki ngaia anne. E karerekei rongorongo te aomata ae mataki man aanga aika kakaokoro n te aro are e a kona n namakinia aomata, bwaai ao baika a karaoaki i rarikina. E taku te mwaane temanna ae mataki: “E ngae ngke I aki kona n nori raoi bwaai nako n te aonnaba aika i rarikiu, ma I boni kona n namakini.”

N aron naba anne, e ngae ngke ko aki kona ni kamanenai matam n nora te Atua, ma ko boni kona ni kamanena ‘nanom’ n noria iai. (I-Ebeto 1:18) Iangoi aanga aika tenua aika ko kona ni karaoa iai aei.

“A TERETERE RAOI . . . MANI MOANI KARIKAN TE AONNABA”

N angiin te tai ao a korakora riki ana bwai n namakin te aomata ae mataki n aron te kakauongo ao ringani bwaai, n te aro are e a kamanenai bwa e aonga n atai bwaai ake e aki kona n nori. N aron anne, ko kona ni kamanena am namakin n neneri iai bwaai n te aonnaba aika i rarikim ao n ataa iai te Atua ae aki kona n noraki are e kariki bwaai. “A teretere raoi aroarona aika aki nonoraki mani moani karikan te aonnaba ni karokoa ngkai, bwa a noraki ni baika karikaki.”—I-Rom 1:20.

N te katoto, iangoa mwengara. E karaoaki te aonnaba n te aro ae okoro ibukira tiaki tii ibukini kawakinani maiura n ara mwane ae rangi n uarereke ma ibukin naba kimwareireira. Ti boni kakatonga ngkana ti namakina ukakira n te ang ae kanammwemmwe, ti takaakaro i aan abuen taai, ti katoonga te uaanikai ae ranran, ke ni kakauongo tangiraoin tangitangia mannikiba. E aki ngkanne kaotaraeaki ni bwaai n tituaraoi aikai bwa e tabeakinira ara tia Karikiriki, e akoira ao n nanoangaira?

Tera reireiam ibukin te Atua ni bwaai ni kabane aika ko nori? Te bwai teuana ae kakawaki, e boni kaotaki mwaakan te Atua ni bwaini karawa. E kaotaki naba n te rabakau n aonnaba n taai aika tibwa nako bwa e aki tii rikirake ke n raababa nako bwain nako te iuniweeti ma a karaoaki n te aro ae rangi ni baitii riki! Iangoa aei, ngkana ko taraa karawa n te tairiki: Antai nibwan te korakora aei ae karekea rikirakeni ma waekoani butini bwain nako te iuniweeti? Ti tuangaki n te Baibara bwa e ‘bati mwaakan’ ara tia Karikiriki. (Itaia 40:28, BG) E kaotaki nakoira n ana karikibwai te Atua bwa boni ngaia ae “Moan te Mwaka” ao Teuare ‘moan te bati mwaakana.’—Iobi 37:23, BG.

“E KABWARABWARAAKI TAEKANA IROUN TE NATI”

E taku tinaia ataei aika uoman aika mataki: “Teuana mai buakoni bwaai aika rangi ni kakawaki ibukin reiakinaia bon te taetaenikawai. Tuangia bwaai ni kabane aika kam nori ma n ongo, [ao] ngkana kam mena i tinanikun ami auti katauraoingkami bwa kam na teimatoa ni kabwarabwarai baika kam nori. Kam a bon riki iai bwa mataia.” Ma e ngae n anne, “akea te aomata ae e a tia n nora te Atua n te tai teuana” bwaa tii Natin te Atua ae Iesu are e kabwarabwaraa taekan Tamana are e mena i bwanibwanna. (Ioane 1:18) Ngkai bon ana moani karikibwai te Atua Iesu, Natina ae te rikitemanna ao raoraona ae te kabanea ni kaan ana iraorao ma ngaia, e a riki ngkanne bwa kaanga “matara” n taraa karawa. Boni ngaia te kabanea n tamaroa ibukin nibwan rongorongon te Atua ae aki nonoraki.

Nori bwaai tabeua ake a kabwarabwaraaki ibukin te Atua iroun Iesu are e kabanea te tai ae rangi ni maan ma Tamana:

• E taningamarau ni mwakuri te Atua. “E teimatoa ni mwakuri Tamau ni karokoa ngkai.”—Ioane 5:17.

• E atai baika ti kainnanoi te Atua. “E a kaman atai baika kam kainnanoi te Atua ae Tamami, imwain ae kam butiia.”—Mataio 6:8.

• E katauraoi bwaai ibukira te Atua ma te nanoanga. “Tamami are i karawa, are e kaotaa taai i aoia aomata aika buakaka ma aika raoiroi, ao e kabwakaa te karau i aoia aika eti aroia ma aika aki eti.”—Mataio 5:45.

• Ti bane ni kakawaki iroun te Atua. “Tiaki a kabooaki uoman mannikiba aika tibaaro n te maibibi ni mwane ae uarereke? Ma bon akea temanna i buakoia ae na bwaka i aontano n aki ataaki iroun Tamami. A bane ni warekaki naba irannatumi. Mangaia ae tai maaku, bwa kam kakawaki riki nakoia tibaaro aika mwaiti.”—Mataio 10:29-31.

TE AOMATA AE KAOTIOTA AROARON TE ATUA AE AKI NONORAKI

A aki toki aomata aika mataki ni karekei aia iango n aaro aika kakaokoro ma aomata aika noraaba. E kona n iangoa te nuu te aomata ae mataki bwa tiaki te tabo ae roo ae akea te oota iai, ma bon te tabo ae mwaitoro ae mano mani kabuebuen taai. N aron te aomata ae bon te mataki are e aki kona n nora te nuu ke ootan taai, ti aki kona naba n ota n aroaron Iehova i bon iroura. Ai ngaia are, e a katauraoa te aomata Iehova ae katotongana ae kororaoi ni kaineti ma aroarona ao anuana.

Te aomata anne bon Iesu. (I-Biribi 2:7) E aki tii tataekina taekan Tamana Iesu ma e kaotiota nakoira naba aroaron te Atua. E titiraki nakon Iesu te tia rimwina ae Biribo ni kangai: “Te Uea, kaota te Tama nakoira.” E kaeka Iesu ni kangai: “Ane e a tia n norai ao e a tia naba n nora te Tama.” (Ioane 14:8, 9) Tera ae ko kona n ‘noria’ ibukin te Tama n ana mwakuri Iesu?

E akoi Iesu, e nanorinano ao e kai kawaraki. (Mataio 11:28-30) A katikaki aomata nakoina man aroarona aika kakukurei. E namakina rawawataia aomata Iesu ao e uataboa naba kimwareireia. (Ruka 10:17, 21; Ioane 11:32-35) Ngkana ko wareka ke n ongora karakinan Iesu man te Baibara, iangoia bwa aongkoa ko mena naba iai bwa a aonga ni kakaongora baikana a riki akanne iroum. Ngkana ko kananoa am iango n aron Iesu nakoia aomata, ko na kona ngkanne n ota raoi riki n aroaron te Atua aika tamaroa ao ni katikaki nakoina.

KATOMATOMAAN RONGORONGO TABEUA

Ni kaineti ma aron te aomata ae mataki bwa e na kona n atai baika riki n te aonnaba, e taku temanna te tia kororongorongo: “E karekei teuanne ke neienne rongorongo tabeua ao aika uarereke naba man aaro aika kakaokoro n aron (ringani bwaai, te aroboi, te kakauongo ao a a bati riki), ao e a botii rongorongo akanne n te aro teuana ma teuana ni kabwaninna.” N aron naba anne, e na rikirake n ota raoi aroaron Iehova aika tamaroa n am iango ngkana ko taratarai ana karikibwai te Atua, ko wareka are e taekinna Iesu ibukin Tamana, ao n nenera aron Iesu ni katotonga aroaron te Atua. E na riki bwa bon te aomata ni koaua iroum.

E riki naba anne nakon Iobi are e maiu n taai ake rimoa. E bon taetae n te moantai n “akea naba ana ataibwai.” (Iobi 42:3, BG) Ma imwin iaiangoan raoi ana karikibwai te Atua aika kamimi, e a kairaki Iobi bwa e na kangai: “I ongo taekam ngkoa n ongon te taninga; Ao ngkai, e noriko matau.”—Iobi 42:5, BG.

E kona naba n riki anne nakoim. “Ngkana tao ko ukoukoria, [Iehova] ao E na reke i roum.” (1 Rongorongo 28:9, BG) A na boni kukurei Ana Tia Kakoaua Iehova ni buokiko n ukoukora te Atua ae aki nonoraki ao e na bon reke iroum.