I Bon Tii Tabeakinai

AROU RIMOA:

Ngke tao ai teuana nakon nimaua au ririki, a maeka au utu irarikin Leipzig i Tiaman Maeao ae kuri uakaan ma te tia i Czech ao Polish. Ngke ai onoua au ririki, e kairirira tamau nakon te aba teuana ibukin ana mwakuri, ti nako Brazil moa ao imwina Ecuador.

Ngke 14 au ririki ao I a kanakoaki nakon te kuura ae a mamatu iai ataein te reirei i Tiaman. Ibukina bwa a rangi n raroanako au karo bwa a mena i Amerika Maiaki, I a bon tii tabeakinai. I a riki bwa te aomata ae I kan inaomata. I iango teutana bwa a na kangaa n rotaki tabemwaang n au mwakuri.

A okira Tiaman au karo ngke ai 17 au ririki. N te moantai, I maeka ma ngaiia n aia auti. Ma ibukin nanou ni kan inaomata, e a kangaanga irou ae N na manga bobotaki ma au utu. I a kitana mwengau ngke te 18 au ririki.

I a moanna n rikirake n aki taotaona nanou ao n ukera te maiu ae manena. Imwin norakin aeka ni maiu aika kakaokoro ma botaki, I a kakoauaa riki bwa I kona ni karaoa au kabanea n raoiroi ni maiu mani kabonganaana n neweabaa te buraneti ae tamaroa aei imwain uruakina irouia aomata.

I a kitana ngkanne Tiaman, I kabooa au rebwerebwe ao I a nako Aberika. Ma n te tai ae waekoa, I a riai n okira Eurobe ibukin onobwaian au rebwerebwe. Tabeua te tai imwin anne, I a mena i aoni biken Botukare. I a motinnanoia bwa N na katoka mwamwanangau n te rebwerebwe ao ni moana mwamwanangau n te kaibuke.

I kaaina te kurubu n roro n rikirake ake a katauraoia bwa a na boborau n rinanon te Atlantic Ocean. Ao i buakoia te koraki akanne, I a kaitiboo ma neiere e na riki bwa buu nakon taai aika a na roko ae Laurie. N te moantai, ti boborau nakon aban nako te Caribbean. Imwin tikura i Puerto Rico i nanon te tai ae uarereke, ti a okira Eurobe. Ti kataia ni kakaaea te booti n ieie are ti na bitia bwa nnera ni maeka. Ma imwini kakaaeana i nanon tabeua te tai ae tii tenua te namwakaina, e a karina naba n toki ara babaire anne. I a tauaki ma te matoa bwa N na kaaina te taanga ni buaka i Tiaman.

I a tiku 15 te namwakaina n ana taanga ni buaka Tiaman i taari. Inanon taai akanne, I a mare ma Laurie ao ni baireia bwa ti na reitaanako aroaroni maiura ngkoa are te mwamwananga. Ti boni kabooa rabwatan te booti ni kamaiu tabeua te tai imwain au mwakuri n tautia. N au tai ni mwakuri n tautia, ti a bita rabwatan te booti anne teutana imwin teutana nakon te booti n ieie ae uarereke. Ti baireia bwa ti na maeka i nanona ma n teimatoa ni mwamwananga n neweabaa te buraneti ae tamaroa aei. Bon te tai aei are a a kawarira iai Ana Tia Kakoaua Iehova ao ni moana te reirei n te Baibara ma ngaira, imwin au mwakuri n tautia ao imwaini bobongan te booti.

ARONI BITAKINI MAIU MAN TE BAIBARA:

N te moantai, I aki ataia ae e kainnanoaki te bitaki ae rangi ni bati ni maiu. I boni mare ma te aine are I maeka ma ngaia ngkai, ao I a tia ni katoka te moko. (I-Ebeto 5:5) Ma ibukin ara babaire are ti na mwamwananga ni kabutaa te aonnaba, I a iangoia ngkanne bwa bon aio te bwai ae materaoi iai ara kakorakora, ae kabaneani maiura ni matakuakin ana karikibwai te Atua aika moan raraoi.

Ma ni koauana, I kani karaoi bitaki ai moarara riki n aroarou. Ibukina bwa I rangi ni kamoamoa ao ni kan inaomata, I a kaatuui riki iaiangoan oin au ataibwai ao baike I a tia ni kakororaoi. I bon tii tabeakinai.

N te bong teuana ao I a wareka ana Kabwarabwara i aon te Maunga Iesu ae rangi n ataaki. (Mataio mwakoro 5-7) N te moantai, I aki ota raoi n te kukurei are e taekinna Iesu n ana kabwarabwara. N te katoto, e taekinna bwa e tii kona n reke te kukurei irouia te koraki ake a bwarua kakaraoan ae raoiroi. (Mataio 5:6) I mimi bwa e na kanga n reke te kukurei iroun te aomata ae iai te bwai ae e bwaruia. Inanon waakinakon au reirei n te Baibara, I a ataia ae ti bane ni kainnanoa te Atua, ma ti riai n nanorinano ni kariaia ae ti kainnanoa anne imwain are ti na maiuakinna. N aron ae e taekinna Iesu ni kangai: “A a kukurei akana ataia bwa a kainnanoa te Atua.”—Mataio 5:3.

Imwini moanakin ara reirei n te Baibara i Tiaman, I a mwaing ma Laurie nako Buranti ao imwina Itare. Ti nonoria Ana Tia Kakoaua Iehova n taabo ni kabane ake ti nako iai. E rangi n teke nanou n aia tangira ni koaua ao katiteuanaakia. I ataia bwa taani Kakoaua boni kaain te botaki n itaritari ni katobibia te aonnaba. (Ioane 13:34,35) Imwin tabeua te tai, I a bwabetitoaki ma Laurie ao n riki bwa Ana Tia Kakoaua Iehova.

Imwini bwabetitoakira ao I teimatoa ni bitii aroarou. I iangoia ma Laurie bwa ti na ieie rimataniwin Aberika ao imwina ti rinanon te Atlantic Ocean nakon te United States. Ti a otinako nako nukani marawa, bon tii ngaira uoman i aon ara booti ae rangi n uarereke ao ti otabwaniniaki n taari ae nga ma nga te maire raroana ma te aba, ike I a ataia iai bwa I rangi ni mangori ni kabotauaki ma ara tia Karikiriki ae mimitong. Kioina ngkai e a mwaawa riki ara tai ao ai akea ara mwakuri i nanon marawa, I a kabanea riki au tai ni wawareka te Baibara. E anaaki riki nanou n rongorongoni maiun Iesu i aon te aba. E kororaoi maiuna n aomata n aroarona ae riaon ae I kona n iangoia bwa e aki roko n te iaiangoia i bon irouna. E aki naba iangoa maiuna i bon ibukina, ma bon ibukin Tamana are i karawa.

Ngkai I kananoa au iango i aon ana katoto Iesu, I a ataia ae I riai ni moanibwaia Ana Tautaeka n Uea te Atua ni maiu, n oneani mwin are N na karaoia i buakoni baika a kakaokoro ake I kani karaoi. (Mataio 6:33) N tokina, ti a roko n te United States ao ti a baireia bwa ti nang maeka iai ao ni kaatuui ara iango i aon ara taromauri.

AROU NI KAKABWAIAAKI:

N aroarou are rimoa ngke I bon tii tabeakinai, I aki toki n nanououa n au rinerine. Ma e ngae n anne, I a boni kunea ngkai nibwan te wanawana ae akea burena are I kairiraki iai. (Itaia 48:17, 18) I a tia ni karekea naba maiu ae e manena nakon are mai mwaina, ae taromaurian te Atua ao buokaia aomata bwa a na reiakina taekana.

Ni maiuakinani booto n reirei man te Baibara, e a rangi ni kakorakoraaki riki iai au mare ma Laurie. Ti kakabwaiaaki naba bwa e a reke natira te aine ae botonnaine are e ikawairake n ataakin ao tangiran Iehova.

E aki bebete maiura n ara tai ni boborau n taai akekei. Ma e boni buokira Iehova bwa ti na teimatoa n aki bwarannano ao n aki katoka onimakinana.​—Taeka N Rabakau 3:5, 6.