A na Manga Maiu Maate!

Ko bae n uringa taekan Nei Gail, are e karakinaki n moan iteran te kaongora aei, are e raraoma bwa e na kona n toki nanokawakina ni mateni buuna ae Rob ke e na aki. E ingainga neiei ni kan nora teuaei n te waaki ae boou i aon te aba are e beritanna te Atua. E taku neiei: “I rangi n taatangira te kibu ae Te Kaotioti 21:​3, 4.” E kangai taekana: “Ao te Atua e na boni memena irouia. Ao e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.”

E taku Gail: “E rangi n ibuobuoki te berita aei. I rangi n nanoangaiia aomata ake a mate raoia aika tangiraki irouia, ao a aki ataa te kantaninga aei, ae a na manga kaitiboo ma ngaiia.” E mwakuria ana koaua Gail, ao e riki bwa te tia uarongorongo ae kabwanina ana tai, ni kaotiota nakoia kaain rarikina taekan ana berita te Atua ibukin taai aika imwaira, ike “e nang akea riki te mate.”

Ko bae ni kangai, ‘E aki kona n riki anne!’ Ma iangoa taekan te mwaane are Iobi. E rangi ni kakaiaki aorakina. (Iobi 2:7) E ngae ngke e iangoia Iobi bwa e tau riki ni mate, ma e bon onimakina naba mwaakan te Atua bwa e kona ni kautia nakon te aonnaba. E taku ma te aki nanokokoraki: “Ko bia karabaai i Tiore . . . Ko na weteai iai, ao I a kaekako: Ane Ko na tangira ana makuri baim iai.” (Iobi 14:13, 15, BG) E aki nanokokoraki Iobi bwa e kani manga noria Atuana, ao n tangiria ni kautia.

E na boni karaoa anne te Atua n te tai ae waekoa nakon Iobi ao aomata riki aika mwaitikurikuri, ngkana e a onikaki te aonnaba aei nakon te bwaretaiti. (Ruka 23:42, 43) E kamatoaa ni kangai Mwakuri 24:15: “A na boni mangauti” aomata. E karaui nanora Iesu ni kangai: “Kam na tai mimi n anne, bwa e na roko te tai are a na bane iai n ongo bwanaana aomata ake a mena i nanon taian ruanimate ao a na otinako.” (Ioane 5:28, 29) E nang nora kakoroan nanon te berita anne Iobi. E nang kona ngkanne ni karekea te kantaninga ae e nangi manga ‘okiri ana bong n ataei’ ao irikona e nang tiku n arona ae “raoiroi riki irikona nakon irikon te tei.” (Iobi 33:24, 25, BG) E na riki naba anne nakoia aomata nako ake a kakaitau ni butimwaea te bwai ae katauraoia te Atua ae te mangauti nakon te aonnaba aei.

Ngkana ko karawawataaki ni maten ae tangiraki iroum, tiaki nanona bwa te rongorongo ae ti maroroakinna aei e nangi boni katoka naba nanokawakim. Ma kananoan am iango i aon ana berita nako te Atua aika n te Baibara, e kona n anganiko te kantaninga ao te korakora bwa ko na teimatoa ni kukurei.​—1 I-Tetaronike 4:13.

Ko kan reiakina ae bati riki bwa ko na kangaa ni kekeiaki ribuakon te nanokawaki ae korakora? Ke tao ko titiraki ni kangai, “E aera te Atua ngkai e aki katoka te buakaka ao te karawawata?” Taiaoka ma kawara ara atureti n te intanete ae jw.org, n nori iai ana kaeka te Baibara aika kabebetenano ao ni manena.