Karekea Kakabwaiaam Man Ana Kairiri Iehova ni Boong Aikai

TE MOTINNANO AE KAOTA TE WANAWANA I POLAND

“I BWABETITOAKI ngke 15 au ririki ao onoua te namwakaina imwina, I a moana au aokitirari bwaiania. Imwin teuana te ririki, I a kororeta ni bubutii ibukin te urekura bwaiania. Imwin au angabeeba man te kauarinan, I a bubutii bwa N na beku n te tabo ae korakora riki iai kainnanoaia taan uarongorongoa te Tautaeka n Uea. I boni kani mwakuri n te tabo ae raroa ma au kaawa ao tibuu te unnaine ae tiaki Ana Tia Kakoaua Iehova, are I mamaeka ma ngaia. Ma ai nanokawakira ngai ngke e a tuangai te mataniwi n te aono ae uarereke bwa N na beku n te kaawa raoi are I bungiaki iai! I kataia ni karabaa au namakin nakoina. I baraaki ao n taonnako n iangoi ana taeka. I taku nakon raou ni bwaiania: ‘N au iango ai bon Iona ngai. Ma n tokina, e bon nako Iona nako Ninewe. Ngaia are I riai naba ni beku n te tabo are I mwiokoaki iai.’

“Ai aua ngkai au ririki ni bwaiania n oin au kaawa, ao I noria bwa I wanawana n ongeabau n te kairiri. E riki au iango ae aki riai bwa au kangaanga ngkoa. Ma I a rangi ni kimwareirei ngkai. I nanon teuana te namwakaina, I kairi reirei n te Baibara ma aomata aika 24. I kaitaua Iehova bwa I a tia naba ni moana te reirei n te Baibara ma tibuu are kakaitaraai ngkoa.”

TE BWAI AE KAKUKUREI AE RIKI I BIITII

E riai n rineia temanna te aine ae reirei n te Baibara i Biitii bwa e na ira aia bwabwaro Kristian ke e na ira buuna nakon te rekenibong teuana irouia ana koraki teuaei. E kariaia teuaei bwa e na ira te bwabwaro buuna. E tuanga buuna neiei bwa e na kawaria n ana botaki ni bwaran te bwabwaro. Ma ngke e oki neiei nakon ana auti, e a iangoia bwa e raoiroi riki kararoaana ma te bae e na karuanikaia ana onimaki, ao e a aki nako.

Ngke e taekinna teuaei nakoia ana koraki bwa e butiia buuna bwa e na kawariia ni bwaran ana “botaki ma Taani Kakoaua,” ao a taku: “Ane e na aki roko, bwa a aki bubukamarui rekenibong Ana Tia Kakoaua Iehova!”a

Ibukin anne, e rangi ni kakatonga teuaei ngkai e a tia buuna n tei ibukin ana onimaki ao n ira mataniwin nanona. Mani kakaonimakin neiei aei, e a reke ana tai n uarongorongo nakoni buuna ao tabemwaang naba. Tera mwina? E a kariaia te reirei n te Baibara teuaei ao e a iririi bobotaki ma buuna.