Kaiwanakin Itoi ao Taai Aika A na Roko—Ti na Atai Iai Kanoan Taai Aika Imwaira?

KAIWANAKIN ITOI

E boto kaiwanakin itoi i aon te koaua ae iai irekerekeni maiuia aomata ma itoi, namwakaina, ao buraneti. A taku taani kaiwan itoi bwa nneni bwaini karawa aikai n te tai are e bungiaki iai te aomata, e rota aroarona ao baika a na riki nakoina n taai aika imwaina.

E ngae ngke e nako te kaiwa aei mai Baburon rimoa, ma e bon ataaki naba ngkai. N te kakaae are karaoaki n 2012 n te United States, ao teuana te katenimwakoro i buakoia naake a titirakinaki, aika iangoia bwa te kaiwa aei “e kuri n aekan te rabakau n aonnaba,” ma iai 10% aika taku bwa “bon te rabakau n aonnaba.” E koaua anne? E aki. Aio bukina.

• Akea korakorani buraneti ao itoi n rotii maiuia aomata, n aron ae a taku taani kaiwan itoi.

• N angiin te tai ao baike a taekinaki bwa a na riki, a boni kona n riki nakoia aomata nako.

• A boto aia reke taani kaiwan itoi n taai aikai, i aon te koaua rimoa are a buti ni katobibia te aonnaba taiani buraneti. Ma ni koauana a buti ni katobibia taai taiani buraneti.

• A aki boraoi aia reke taani kaiwan itoi aika kakaokoro, ibukin te aomata ae tii temanna.

• A kaokoroia aomata taani kaiwan itoi ni kurubu aika 12, ni kaineti ma kanikina aika aranaki bwa zodiac, aika irekereke ma aia bong ni bung aomata. Ma kioina ngkai e bibitaki nnen te aonnaba i nanoni waakinakon te tai ae maan, boongi n namwakaina ngkanne ake a irekereke ma kanikina aikai, a aikoa eti raoi ngkana e a buti taai rinanon taiani nna n itoi ake a ingoanaki iai kanikina aikai.

A taekinaki kanikina aika taian zodiac bwa a kaota aroaron te aomata. Ma ni koauana, aomata aika titeboo aia bong ni bung a kakaokoro naba aroaroia. Bon akea irekereken ana bong ni bung te aomata ma aroarona. A aki taraa te aomata taani kaiwan itoi ni kaineti ma aroarona raoi, ma a taekina aroarona ao anuana, ni kaineti ma aia katautau. Tiaki bon te inanonano naba aei?

KAIWANAKIN KANOAN TAAI AIKA A NA ROKO

Mangkoangkoa ao aomata a kakawariia taani kaiwani kanoan taai aika a na roko. Tabeman taani kaiwa a kabonganai kanoan nanoia maan ao aomata ke aron te moa ni katebetebea kanana. Iai ake a kabotoi aia katautau i aon rainin baan te aroka ae te ii ke te kobee ae kamantintaki. N taai aikai a a kabonganai kaati, te booro ae te kiraati, manin te rutoo, ao tabeua riki, ni kaiwan iai baika a na riki nakon te aomata n taai aika imwaina. E kona n onimakinaki? E aki. Ti na maroroakina bukina.

Iangoa aron aki boraoia. E aki toki ni kauntaba reken te bwai ni kaiwa teuana ma are teuana. Ngkana titeboo naba bwaai ni kaiwa aika kabonganaaki, ma a boni kakaokoro naba rekeia. N te katoto, ngkana iai ae e titirakinia taani kaiwa aika uoman te titiraki ae tii teuana ni kaineti ma te bae e na riki nakoina, ni kabonganaan te kabwarabwara n te kaati ae tii teuana, a riai ni boraoi aia reke. Ma n angiin te tai a aki.

A aikoa bati ni kakoauaaki taani kaiwa ma aia anga ni kaiwa ke bukini karaoan aia kaiwa. A taku taani kabuakakaa te itera aei bwa kaati ke booro aika kiraati bon tii bwaai ni katamaroa, ao e reke ana reke te tia kaiwa man taraan te aomata ao tiaki mani baikai. N te katoto, e kabonganai titiraki aika taabangaki te tia kaiwa ae mwaatai, ao e tarai raoi ana taeka te aomata ke kakammwakurin ao tein rabwatana ma ubuna, ake a kona ni kaota aroarona. E kamoamoa te tia kaiwa n ataakini koaua ke baika riki, ake e rina n taekin te aomata anne n aki ataia. A a tia tabeman taani kaiwa ni karekea te mwane ae bati mairouia aomata, ibukina bwa a onimakinaki irouia.

TE BAE E TAEKINAKI N TE BAIBARA

Te waaki ae kaiwanakin itoi ma kanoan taai aika a na roko, e kona n nanona ae a a kamani baireaki baika a na riki nakoira. Ma e koaua anne? E taekinaki n te Baibara bwa ti kona n rinea te bae ti na kakoauaa ke ae ti kani karaoia, ao ara rinerine a rotii arora nakon taai aika imwaira.—Iotua 24:15.

Iai riki bukina ngkai taan taromauria te Atua, a rarawa nakoni kaiwanakin itoi ao kanoan taai aika a na roko, bwa e kabuakakai aeka ni kaiwa nako te Atua. E kangai te Baibara: “E aki riai n noraki i buakomi te aomata ae . . . te tia kaiwa, te tia tabunea, te tia ukoukori kanikinaeani baika tuai n riki, te tia kakaraoi, te tia bubutii buokana iroun te tia rorokoia taimonio, ke te tia kaiwani kanoan taai aika a na roko, ke te tia titirakinia maate. Bwa e riribaaki iroun Iehova ane e kakaraoi baikai.”a—Te Tua-Kaua 18:10-12.