Uarongorongo ma te Aki Maaku n Taabo ni Bitineti
1. Bukin tera bwa ti riai n aki bwarannano ngkana ti namakina te maaku n uarongorongo n taabo ni bitineti?
1 Ko namakina te maaku n uarongorongo n taabo ni bitineti? Ngkana ngaia anne ao tai bwarannano. E riki naba anne nakoni Bauro ae te minita are ninikoria ao n aki maaku n uarongorongo, are e “kaninikoriaaki” ibukin te uarongorongo. (1 Tet. 2:2) Ti na maroroakini ngkai kangaanga aika riiriki, n ikotaki naba ma reirei aika manena bwa ti aonga n tokanikai i aoni kangaanga akanne.
2. Bukin tera bwa ti riai n aki raraomaeakina ae a na un taani mwakuri ngkana a kawaraki n aia tabo ni mwakuri?
2 A na un Taani Mwakuri Ngkana A Kawaraki n Aia Tabo ni Mwakuri? A buokiia aomata ni kabane taani mwakuri n taabo ni bitineti nako, ngaia are a kantaningaia bwa a na boni kawaraki n aia tai ni mwakuri. N angiin te tai, a na butimwaeiko raoi kioina ngkai ko roko n aia tabo ni mwakuri. Ngkana ko kunnikaiko n te aro ae taraaraoi ao ni kaotiota te tangira ao te iraorao, e na kaungaaki iai nanoia bwa a na butimwaeiko raoi.
3. Ti na kanga n aki kaunia aomata aika roko ni boobwai?
3 I Riai n Uarongorongo Ngkana a Bati Aomata Aika Roko ni Boobwai? Ngkana e angaraoi, rinea te tai are e karako iai mwaitiia aomata aika roko ni boobwai, tao ngkana a tibwa uki taabo ni boobwai. Tataningaa te tai are e a mwaawa iai te manatia ke te tia mwakuri imwain ae ko kawaria. Kakimototoa am maroro.
4. Tera ae ti kona n taekinna ngkana ti uarongorongo n taabo ni bitineti?
4 Tera ae I Riai n Taekinna? Maroro ma te aomata ae tararuaa te tabo anne, ngkana a bati iai taani mwakuri. Tao ko kona ni kangai: “E kangaanga rekeia taani mwakuri ni mwengaia, ai ngaia ae ti a kawariko n am tabo ni mwakuri. I ataia ae ko tabetabe, ma N na kakimototoa au maroro.” E tamaroa riki ngkana ti aki taekina te babaire ibukin te bwaintangira bwa ti aonga n aki kaireruaaki ma taani bitineti, ma tii ngkana a titirakinira bwa e kanga ni mwanenaki ara mwakuri. Ibukina bwa a kakaokoro waaki ni bitineti, ko kona ni butiia te manatia ana kariaia bwa ko na maroro n te aro ae kimototo ma taani mwakuri. Kaoka nakoia te maroro are ko a tia ni maroroakinna. Ngkana e taraa n tabetabe te tia mwakuri, kakimototoa am maroro ao anganna te turaeki. Ngkana e aki angaraoi te maroro ma taani mwakuri, tao e na kona n reke kariaiakam ni katuka te maekatin n te tabo are a motirawa iai taani mwakuri ibukin tabeua te miniti.
5. Baikara bukina aika ti kona n uataboa iai te uarongorongo ma te aki maaku n taabo ni bitineti?
5 A uarongorongo nakoia aomata ma te aki maaku Iesu ao Bauro n taabo ni bitineti, ngaia are ko boni kona naba ngkoe ni karaoa anne. (Mat. 4:18-21; 9:9; Mwa. 17:17) Butiia Iehova bwa e na buokiko bwa ko na aki maaku ao ko na ninikoria. (Mwa. 4:29) N taabo ni bitineti ao iai auti tabeua aika a nakonako kaaina, ngaia are e aera ko aki kataa te aeka n uarongorongo ae uaana aei?