Karikirakean Rabakaura n te Mwakuri ni Minita​—Tauani Mwia Ake A Kan Ongora

“Teimatoa n tarataraa raoi arom ao aron am angareirei.” (1Tim. 4:16) E kaotaki n te reirei ni kairiri aei ae kairaki koreana rinanon te taamnei mairoun te abotoro Bauro nakon Timoteo, bwa ti riai ni kakorakoraira ni karikirakea rabakaura e ngae ngke ti boou ke ti a mwaatai. Ibukini buokara ni karaoa anne, e na karinaki te kaongora ae boou n Ara Mwakuri ni Minita ae atunaki ni kangai, “Karikirakean Rabakaura n te Mwakuri ni Minita.” E na maroroakinaki n te kaongora teuana ma teuana te rabakau ae kakawaki, ao e katauraoaki naba iai aanga n ibuobuoki tabeua ibukini karikirakean te rabakau anne. A kaungaaki aomata ni kabane n te namwakaina teuana ma teuana, bwa a na kabongana raoi te rabakau anne. N tokin te namwakaina, ao e na reke ara tai n te Botaki Ibukin te Uarongorongo n taekina aroni buokara mani kabonganaan te rabakau anne. Ti kaungaaki n te namwakaina aei bwa ti na tau mwia ake a kan ongora.

Bukini Kakawakina: Ibukini kakororaoani mwiokoara, ti riai ni karaoa ae bati riki nakon te uarongorongo. Ti riai ni manga okiriia te koraki ake a kaota te kan ongora ao n reireinia, n teboka koraan te koaua are ti a tia n unikia. (Mat. 28:​19, 20; 1Kor. 3:6-9) E irekereke aei ma manga kakaaean te aomata anne, maroroakinani baika e tabeaianga iai, ao ni maroroakina te baere ti a tia ni maroroakinna ma ngaia. Mangaia are ngkana ti a ataia bwa e kan ongora, ti riai n taua mwina.