A Riai n Tetebokaki Koraa Bwa A Aonga ni Bwebwerake
1. Tera ae riai n tetebokaki bwa e aonga ni bwebwerake?
1 A riai n tetebokaki koraa aika unikaki n te onnaroka bwa a aonga ni bwebwerake. Tii te arona anne ma koraan te koaua aika unikaki i nanoia aomata n ara aono. (1 Kor. 3:6) Ti riai n okiri ao n teboki koraa ni kaikonaki aikai ni kabongana Ana Taeka te Atua, ngkana ti tangiriia bwa a na rikirake n te onimaki.
2. Tera ae ti na karaoia bwa e aonga n reke manga okiran te aomata?
2 Tabeka te Titiraki: Ngkana ko katauraoa am maroro, e aera ko aki naba katauraoa te titiraki ae kauekea te kan ongora ao ae ko kona ni kaekaa ni manga okim? Tabeka te titiraki ni banen am maroro, ao karaoa am babaire bwa ko na manga bon oki. A bati aika a karekea kakabwaiaaia n rinean aia maroro man te boki ae Ana Reirei te Baibara, ae a kona ni kaota iai aron te reirei n te Baibara.
3. Baikara rongorongo ake ti riai ni korei ngkana ti tau mwini baike ti maroroakin?
3 Tau Mwini Baike Ko Maroroakin: N te tai are ko kitana te auti are ko moani maroro iai ao korei mwini baike ko maroroakin. Korea aran te aomata anne ao ana tabo. E tamaroa naba korean te bong, te tai, te baere ko maroroakinna ma ngaia ao booki nako ake ko katikui irouna. E taekinna ae iai oin ana Aro? Iai buuna ao natina? E kaotii baika e tatangiri ao ni kani kakaraoi? A na buokiko rongorongo akanne ni kaangaraoa te maroro n rokom are imwina. Korea naba te tai are ko na manga okiria iai ao te titiraki are ko na kaekaa.
4. Bukin tera bwa ti riai ni kakorakoraira ni manga okiriia ake a kan ongora?
4 Kakorakorako ni Karaoia: E aki kona n toki ana kakorakora Tatan ni kan “anaa te taeka” are e unikaki i nanon te aomata. (Mareko 4:14, 15) Mangaia are tai bwarannano ngkana ko kaaitara ma te kangaanga ni manga okiran te aomata are e kan ongora ni mwengana. Ko kona ni kororeta nakoina ke ni korea am taeka teutana ao ni katikua ni mataroan ana auti? E a tibwa moana ana reirei n te Baibara te bwaiania temanna ma te aine ae e kangaanga kaitiboona ma ngaia imwina ni mwengana, ai ngaia are e a korea ana reta nakoina. Ngke e a kaitiboo te tari te aine aei ni mwengan neiei, e a kabwarabwaraa aron rotakina ae bati neiei n tabeakinana iroun te tari anne. Ngkana ti teboka koraan te koaua, ti karekea te kimwareirei n norakin ae e a bwebwerake, e a tabe n ikawairake, ao e a “karikii uaa aika kaka tenibwi ao kaka onobwi ao kaka tebubua.”—Mareko 4:20.